Read Garifuna San Marcos 8 Bible Online

San Marcos 8 - Garifuna bible

San Marcos 8

¹Lídan dan ligía, ábaya joúndaragun sarágu gürígia áni úati ni cáta jáma lun jeígin. Ába lagúarun Jesúsu joun láni disípulugu, ába laríñagun joun.

²—Gudémetiña gürígia ja nun ladǘga ǘrüwa wéyu jáu núma ya áni úaali ni cáta jáma lun jeígin.

³Ánjaña noúnaja águyu meíginga, ladágaruba falálaü jawágu ǘmada, ladǘga añájein jádaangiñe, díseti ñígiñe lumúti jayábin.

⁴Ába joúnabuni láni disípulugu. —¿Ída lubáti jeígagüdüniwa ya lídan fulásu le mageírawaguti?

⁵Ába lálügüdüniña Jesúsu. —¿Átiriñoun fein júma? Ába jaríñagun lun. —Sédü.

⁶Ába lañúuragüdüniña gürígia múarugu, ába lanǘgünun sédü fein tugúya lújaburugu, ába líchugun eteíngiruni lun Búngiu. Ába lagúbachagunun, ába lamúrusujanun, ába líchugunun joun láni disípulugu, ába jafánreinjanun jádan gürígia jagía.

⁷Ñíñanu gíñe átiri jarájüñü úduraü jáma, ába líchugun eteíngiruni jawágu, ába lafánreinragüdüniña.

⁸Joútiña sun jagía químule, buíngüdagíña sédü faníñe táu tífe to ígiraguboun.

⁹Yaráfañanu joun gádürü mílu wügǘriña. Ába loúnajaniña Jesúsu águyu,

¹⁰ába ládinun tídoun ugúnein jáma láni disípulugu, ába joúdin Dalmanutoún. Jamúriajan fariséogu miláguru lúma Jesúsu

¹¹Ába jayábin fariséogu, ába jagúmeserun asígeneja lúma Jesúsu. Lúnti jaríjin lábun, ába jamúriajan lun larúfudun ában miláguru joun, siélugiñe.

¹²Ába lawáragun Jesúsu weíri, ába laríñagun. —¿Cásan uágu jamúriaja gürígia ja lánina dan le ában miláguru? Ninárün jáu luágu marúfudúnbei lan miláguru jun.

¹³Ába lígiruniña Jesúsu, ábaya ládinun tídoun ugúnein, ába lídin loubáfurugun dúna. Jarúfudajan fariséogu quei ísi

¹⁴Bulíei jamútiti disípulugu janǘgün eígini, ában rügǘñoun fein jáma tídan ugúnein.

¹⁵Ába lewéridiruniña Jesúsu, laríñaga joun. —Toúnigi jumátia lueí jísite fariséogu lúma lísite Heródes.

¹⁶Ába jaríñagun disípulugu jádaangua. —Ladǘgatia meígan wamá fein laríñagubei ítara.

¹⁷Ába lasúbudiruni Jesúsu jarítagun, ába laríñagun joun. —¿Ca uágu jaríñaga luágu meígan jumá fein? ¿Úagili gunfaráanda jumá, meféen jugúya? ¿Ítara lidére jichǘgü?

¹⁸¿Maríjintün láu jágu, magáambun jugúya láu jarígeirugu? ¿Marítagun jumáali?

¹⁹Dan le nafánreinjanbarun seíngü fein jádan seíngü mílu wügǘriña, ¿átiriñoun faníñe táu tífe jabúdun? Ába jaríñagun. —Dúusu.

²⁰—Ángi dan le nafánreinjanun sédü fein jádan gádürü mílu, ¿átiriñeingi faníñe buin jabúdun? Ába jaríñagun. —Sédü.

²¹Ába laríñagun joun. —¿Úagili gunfaráanda jumá luágu máma lan tuágu fein nadímureja? Lareídaguagüdün Jesúsu ában maríjinti Betsáida

²²Lárigiñe, ába jachǘlürün Betsáidoun, ába lanügǘniwa ában marijínti lun Jesúsu, ába jayúmuragun lun lun lagúurun luágu.

²³Ítara líña lárügüdüni Jesúsu maríjinti ligía, ába lanǘgüni bougudín lueí fulásu ligía. Ába lájurudagun arǘrei luágu lágu, ába líchuguni lújabu luágu, ába lálügüdüni ánjein gayáraaraü lubeí laríjin.

²⁴Ába laríjin, ába laríñagun. —Aríja numútiña wügǘriña, naríjiniña quei tídibu wéwe, eíbugeina.

²⁵Ábaya líchuguni Jesúsu lújabu luágu lágu, ába laríjin gürígia ligía láu goúnigi, ába lareídagun, ába laríjini sun cátei furáangu.

²⁶Ába loúnajani Jesúsu águyu, aríñageina lun. —Mebélurabátia ubúrugun, maríñagunbeíme lun ni ában ñi. Laríñaguni Pédro luágu Jesúsu lan Crístubei

²⁷Lárigiñe, ába lídin Jesúsu jáu láni disípulugu lídoun buri lirájüñü fulásu le geyéguabei láu ubúrugu Cesaréa le Filípo. Ǘmada, ába lálügüdüniña láni disípulugu, laríñaga joun. —¿Cátanasan jaríñagun gürígia?

²⁸Ába joúnabun. —Añájein aríñagutiña luágu Juan lan le abásteragüdajabei lan amǘrü, jíbiri aríñaga proféta Elías ban, añájeingua aríñagutiña luágu ámu lan proféta amǘrü.

²⁹Ába laríñagun. —Ánti jugúya, ¿cátanati lídan jarítagun? Ába laríñagun Pédro lun. —Amǘrü Crístubei, le loúnajabei Búngiu lun lasálbaruniña gürígia lídaangiñe jafígoun.

³⁰Ába laríñagun Jesúsu joun lun maríñagun jamáni lun ni ában. Ladímurejan Jesúsu luágu loúnwen

³¹Ába lagúmeserun Jesúsu, le Wügǘri Garaǘwarügüti, arúfudaja joun luágu lúnti lan lasúfurirun sarágu, luágu weíribei lan jíchugun wügǘriña weírigutiña lídan jafíñen juríu mebéreseni láu, ítara lúba gíñe joúseruni jábutigu fádirigu jáma arúfudajatiña lilúrudun Moisés. Aríñagati joun luágu láfarúaba lan jilágubei, áni lásaaruba lan lídaangiñe oúweni lúnya labágaridun luágu lǘrüwan wéyu.

³²Furáanguti laríñaguni le joun. Ábati lanǘgüni Pédro Jesúsu ñígiñe, ába lagúmeserun adeínja lun.

³³Ába lagáraragun Jesúsu, ába laríjin jawágun láni disípulugu, ába lébechuni Pédro, ába laríñagun lun. —¡Díseba nueí, Máfia! Bugúya, masáminaruntibu quei Búngiu, basáminarun quei wügǘriña.

³⁴Ábati lagúarun Jesúsu joun láni disípulugu jáma jíbiri gürígia lun jayárafadun lun, ába laríñagun joun. —Le busénti lafálarunina, bulíeileí cáteiñein lan, awándaleí sun luwúyeri asúfuriruni le lúnbei liábin lun nueígiñe queísi lanǘgüni ában wügǘri lugúruwan, falálana.

³⁵Ladǘga le abúseeruti leséfuragun lúngua ya uboúagu leféridirubei ibágari le magúmuchaditi, ánjeinti le ánjabei leféridiruni libágari ya uboúagu nueígiñe, libíjubei ibágari le magúmuchaditi siélu.

³⁶¿Cági ju lan lun gürígia lagáñeiruni sun le lánina uboú, leféridireime lubára siélu?

³⁷Úati ni cáta lánina uboú le áuti gayára lan lagáñijan gürígia lubára siélu.

³⁸Le anǘgüti busíganu nuágu lúma luágu nerérun jagíbugiñe gürígia múaraantiña áni gafígountiña ja, nanǘgüba gíñe busíganu láu, áu le Wügǘri Garaǘwarügüti, dánme le niábin siélugiñe láu luweírigun Núguchi, geyégu jáu ánjeligu ja sándubaña.