Read Garifuna San Lucas 1 Bible Online

San Lucas 1 - Garifuna bible

San Lucas 1

¹Lun Teófilo le weírigubei. Gíbeeña gürígia oúchutiña jabǘrüjani cátei lé buri luáguti wasálbarun lé meja asúseredubei wagánagua lídan lúaragun,

²áfaaguatiña jabǘrüjani ítara quei jarúfudajani ja aríjubalin buri cátei ligía lúmagiñe lagúmeserun, apúrichija jagía luágu, woun.

³Áu gíñe, álügüdajaadina gíñe buídu buídu libǘgürü sun cátei le asúseredubei lúmagiñe lagúmeserun, áni afíñetina luágu maríban lan lun nabǘrüjanun gárada to bun quei lubúdubu,

⁴subúdi bámugei linárün cátei le arúfudúaalibei bun buídu buídu. Niján le asúseredubei. Lasúbudiragüdüni ában ánjeli luáguti lagǘriajoún Juan le abásteragüdajabei

⁵Dán meja le Heródes lan urúeibei Judéa, ñíñein meja ában fádiri lánina jafíñen juríu, gíriti Zacarías, jádaangiñeti fádirigu ja lánigu Abías. Elisabét tíribei lúmari, jádaangiñetu giñe ladǘgawagun Aarón.

⁶Biángubei jagía, richáguatiña ligíbugiñe Búngiu, gúnfulitiña lúma, adǘga jameí sun le lubeíbei darí lun siñá lan laríñawagún ni cáta wuríbati jawágu.

⁷Masáanigutiña ladǘga siñá lan tagáragüdün Elisabét, áni derébugugaaña gíñe jagía biángubei.

⁸Luágu ában wéyu, lídan lidáani jesériwidun lánigu Zacarías quei fádirigu ligíbugiñe Búngiu,

⁹ába jabúdujan según jagáburi fádirigu juríu, lun jasúbudiruni cába lan ebélura lídoun fulásu le sándutimaabei témpulurugu águdaja cupáli ligíbugiñe Búngiu, ába láburujan luágun Zacarías.

¹⁰Sun niján lan cupáli águdajoúa, añája gürígia boúgudi ayúmuragua lun Búngiu.

¹¹Ábati lasáliragun ában láni Wabúreme ánjeli lun Zacarías, rára lueígiñe loúnwenren latárü le ñí lubei cupáli.

¹²Dan le laríjini Zacarías ánjeli ligía, ába laweíridun lanígi, ába lebélurun anúfudei lídoun.

¹³Ába laríñagun ánjeli ligía lun. —Manúfudebá, Zacarías, ladǘga agáamba láali Búngiu bayúmuragun, tagáraüduba búmari ában irájü, ábame bíchuguni líri Juan.

¹⁴Tabuínchuba banígi láu ugúndani luágu, áni sarágujaba gíñe agúndaarutiña láu lagǘriajoún,

¹⁵ladǘga weírigubei biraǘ ligíbugiñe Búngiu. Mátunbei diweín ni bínu, áni ñíbei Sífiri Sándu lúma lúmagiñe lubáragiñe lagǘriajoún lun ladúndejani lídan sun cátei.

¹⁶Ladǘgüba lun jagíribudun sarágu jádaangiñe Israelítagu lun jagáambuni Jabúngiute,

¹⁷lesériwiduba lun Búngiu láu sarágu ubáfu queí meja ladǘgüni Elías. Laráansejaba lubá Jesúsu láu laráandaragüdüniña agǘbürigu jáma isáanigu, láu gíñe larúfudajan joun ja magáambadibaña lun Búngiu lun júaradun lúma queísi gürígia richáguatiña. Ítara lúba laráanseruniña lubá jerésibiruni Jabúreme Jesúsu.

¹⁸Ába laríñagun Zacarías lun ánjeli ligía. —¿Ída lubági nachoúruni cátei le? Áu táu sun númari, derébugugaadiwa.

¹⁹Ába laríñagun ánjeli ligía lun. —Gabriél áu, áni nesériwiduña lun Búngiu, ligía oúnajabalina adímureja bun lun níchuguni ugánu buíti le bun.

²⁰Guetó, quei mafíñerun bubeí luágu le naríñagubei bun, berédera merérunga, siñábei badímurejan daríme lagǘriajoún biraǘ. Lagúnfuliruba cátei le lídan lidáani.

²¹Sun dan le, añájati buga gürígia boúgudi agúrabajei Zacarías, weírititi janígi luágu lílü témpulurugu.

²²Dan le láfuridunbei, siñá ladímurejan joun, ábati jasúbudiruni luágu salígua lan som cátei lun, témpulurugu. Ladímurejati joun láu seíni, meréngadijaali.

²³Dan le lagúmuchun dan le lúnbei lesériwidun Zacarías témpulurugu, ába lídin lúbiñoun.

²⁴Lárigiñe cátei le, ába tadágeinadun Elisabét, to lúmari, ába máfuridun tan jábiñegiñe luágu seíngü játi, teréngati túnguarügü.

²⁵“Ladǘgüñein Búngiu lubuídun cátei le nun guelé lun lagídaruni nibúsigari jagíbugiñe gürígia.” Lasúbudiragǘdüni ában ánjeli luáguti lagǘriajoún Jesúsu

²⁶Sísi játi lárigiñe, ába loúnajani Búngiu ánjeli Gabriél lídoun ában ubúrugu láni Galiléa, gíriti Nazarét,

²⁷lun lídin bisídoun ában wǘri irájügiru, gíritu María. Wǘri tugúya, gadáraduñoun lúma ában wügǘri gíriti José lun tamárieidun lúma, wügǘri ligía, linébaanfan urúei Davíd.

²⁸Ába lebélurun ánjeli ligía le ñíjin tubeí, ába laríñagun tun. —¡Báfaguagüle, María! Níjein Búngiu búma, binílaadibu sügǘ jáu sun würíña.

²⁹Dan le tagáambuni ánjeli ligía, ába tájüchürün láu le laríñagubei, ába tálügüdagun túngua ca lan uágu labúsura tun ítara.

³⁰Ábati laríñagun ánjeli ligía tun. —Manúfudebá María, fuleísei láadibu Búngiu,

³¹badágeinada, ábame bagǘriajan ában irájü, ábame bíchuguni líri Jesúsu.

³²Weírigubei, Liraǘ Búngiu le íñubei lúba lagúarúniwa, áni larúeigüdübei Wabúreme Búngiu quei larúeigüdüni Davíd, le binádu lidúje.

³³Lagúmadirubei linásiñun Israél lun sun dan, áni magúmuchadibei lagúmadijan.

³⁴Ábati taríñagun María lun ánjeli ligía. —¿Ída lubági lasúseredun cátei le, mámarigidinagu?

³⁵Ába laríñagun ánjeli tun. —Liábinba Sífiri Sándu buágun, ábame loúburagunibu lubáfu Búngiu. Ligía sándubei lubeí irájü le lúnbei bagǘriajani, Liraǘ Búngiu lúba lagúarún.

³⁶Tiábin bidúje to Elisabét, dageínaaru gíñe lau sun weíyaaru lan, tagáraüdüba ában wügǘri irájü, ítara líña lubeíti, tó meja uáguboun jaríñaga luágu siñá lan tagáraüdun, níjein sísi játi dageínaü tuágu.

³⁷Úati ni cáta siñáti lun Búngiu.

³⁸Ábati taríñagun María. —Lidámun Nabúreme Búngiu nugúya, adǘgaleí le baríñagubei náu. Lárigiñe, ába lídin ánjeli. Tídin María bisídoun Elisabét

³⁹Lídoun dan ligía, ába tídin María furése lídoun ában ubúrugu le labádinaguabei buri wǘbü Judéa,

⁴⁰ába tebélurun lúbiñoun Zacarías, ába tabúsurun tun Elisabét.

⁴¹Dan le tagáambuni Elisabét tabúsurun, ába lánjingichagun tiraǘ turágeirugu, ába liábin Sífiri Sándu tuágun.

⁴²Ábati taríñagun láu umálali le jéreti. —Binílaadibu Búngiu sügǘ jáu sun jiñáriñu, binílaali gíñe biraǘ.

⁴³¿Cátanañadina lun tiábin lúguchu Nabúreme bisídana?

⁴⁴Láu nagáambuni babúsurun, ába lánjingichagun niraǘ nurágeirugu láu ugúndani.

⁴⁵Gúndaatibu bugúya le afíñerubei, luágu lagúnfuliruba lan cátei le laríñagubei Wabúreme bun.

⁴⁶Ábati taríñagun María.Rútu nuwáni uweíriguni lun Nabúreme,

⁴⁷gúndaagua tugúya nanígi luágu Búngiu le Nasálbaragüle,

⁴⁸lugúndun gudémejabujaali nun, nugúya le lidámun.Lúmagiñe guelé, jaríñaguba sun gürígia luágu fuleíseiwaadina lan,

⁴⁹ladǘga adǘgaali Búngiu, le Súnti Gabáfu, cátei weínamuti nun, sánduti líri.

⁵⁰Súnwandan gudémebaña lan ja inébejabúbaña lun, lun.

⁵¹Adúgaali oúnwenbun buri cátei,adǘgaali lun ni cáta jamá ja barǘguabaña joúngua.

⁵²Gidálaaña ja gabáfubaña lídaangiñe jaweírigun,ja ǘnabubaña, ába ladǘgüniña lun weírigu jamá.

⁵³Já buga lamábaña, quimúlegüda lumútiña,ánjeinti ja rísibaña, míchugunti ni cáta joun.

⁵⁴Íderagua lumútiña linásiñun Israél, ja esériwidubaña lun,mabúlieidun lumúti lun gudémejabu lan,

⁵⁵queí meja lidáradun jáma binádu wagǘbürigu—Abrahám jáma ladǘgawagun—lun gudémejabu lan joun lun sun dan.

⁵⁶Ába teréderun María ǘrüwa játi ñi, lárigiñe, ába tagíribudun jábiñoun. Lagǘriajoún Juan le abásteragüdajabei

⁵⁷Ába lagúnfulirun dan lun tagǘriajan Elisabét, ába tagǘriajan ában wügǘri irájü.

⁵⁸Dan le jagáambun tubésinanigu jáma tidújeñu luágu lubuídun cátei le ladǘgübei Búngiu tun, ába jagúndaarun úara túma.

⁵⁹Luágu liwídün wéyu, ába lerésibiruni circuncisión, le liseíni luágu láni lan Búngiu irájü ligía. Buséntiña yebéti jíchuguni líri lúguchi luágu, le Zacarías,

⁶⁰ába taríñagun lúguchu. —Uá, Juánba líri.

⁶¹Ába jaríñagun tun. —¿Cági uágu? Úati ni ában jádaangiñe binébaanfaangu gíriti Juan.

⁶²Ába jálügüdüni lúguchi irájü láu seíni ca lan íri labúseerubei líchugun luágu.

⁶³Ába lamúriajan ában murúsun fuláansu, ába labǘrüdün luágun. “Juan líribei.” Ába laweíridun janígi súngubei láu cátei le.

⁶⁴Lídan méme óra ligía, ába gayáraajaali lan ladímurejan Zacarías, ába líchugun uweíriguni lun Búngiu.

⁶⁵Ába laweíridun janígi besínagu láu cátei le, ába labájüdawagún cátei le lídan sun fulásu geyégua jáu.

⁶⁶Sun ja agáambubalin, ába jeréderun asáminara, ába jálügüdagun jámagua, jaríñaga. —¿Cáteibeí funasan irájü le? Ladǘga biní lumútija Búngiu le tímatimaati. Lerémujan Zacarías

⁶⁷Ába liábin Sífiri Sándu luágun Zacarías, le lúguchi irájü ligía, ába ladímurejani Zacarías dimúrei le laríñagubei Búngiu lun, ába laríñagun.

⁶⁸Buídulá ladímurejoún luágu Wabúreme le Jabúngiutebei gürígia ja Israelítagu,ladǘga ñǘbinjali woun, wagía le lánigu, áni sálba láadiwa.

⁶⁹Rújali ában Asálbaragülei le gabáfuti woun jádaangiñe linébaanfaangu Davíd, lé meja esériwidubei lun.

⁷⁰Ítara líña meja laríñaguni Búngiu jádaangiñe láni profétagu ja edéregeragubaña joúngua lun, lúmagiñe meja binádu dan,

⁷¹luágu lasálbarubádiwa lan jaweí wáganiñu lúma jaweí sun ja iyéreejabúbaña woun.

⁷²Ítara líña gudémejabu lan Búngiu joun binádu wagǘbürigu,arúfudaleí luágu mabúlieidagun lan lueí lidáradun le sándubei jáma.

⁷³Niján lé meja laríñagubei lun wáguchi Abrahám.

⁷⁴luágu leséfurubadíwa lan jaweí wáganiñu,lun gayáraabei lan wesériwidun lun manúfudeiga,

⁷⁵láu úarani, derégeguñu wagía woúngua lun, sun dan le wabágaridubei.

⁷⁶Áni bugúya nisáaniraü, láni Búngiu le íñubei proféta lúba bagúarúniwa,ladǘga baráansejaba lubá Wabúreme,

⁷⁷subúdi lámuga ǘma lánina asálbaruni joun lánigu,le áubei ferúdunawa lan jafígoun.

⁷⁸Wabúngiute, láu lísiñejabu lúma lugúdemejabu,loúnajabei Crístu wámoun siélugiñe

⁷⁹lun larúgoungadágüdün jáu ja lídaanbaña lubúriga lúma jáu ja luágubaña ǘma le oúwenibei lébeja,lúma lun ladúndejani wapásun lídoun ǘma le anǘgübaliwa lídoun darángilaü.

⁸⁰Aweírideina ligíati irájü ligía, afáragadagueina gíñe lídan láni espíritu. Ába laganoún lídan fulásu mageírawati darí lúmoun wéyu le lagúmeserun luwádigimari lun Búngiu jagánagua lumútuniña Búngiu ja Israelítagu.