Read Garifuna San Lucas 17 Bible Online

San Lucas 17 - Garifuna bible

San Lucas 17

¹Ába laríñagun Jesúsu joun láni disípulugu. —Súnwandan níjeinbei lán buri cátei afígougüdüti gürígia, ¡áni fugiábu gürígia le afígougüdüti ámu!

²Buítimaati jamúga lun lun lagurún baránajoun láu ában dǘbü le lamúlija awási güráñu luágu ligíina sügǘ láu lafígoungüdün ában jádaangiñe ja ñǘbürigiñabaña lídan jafíñen nuágu.

³Ítara líña lubeíti toúnigi jumá. ‘Ánjein adǘga bamúlen o bíbugaña wuríbani bun, wéridibeí, ánjein asáansiragua ligáburi, ferúdunabeí,

⁴ánjein adǘga wuríbani bun sédü weíyaasu lídan ában wéyu, sédü weíyaasu liábin aríñaga bun luágu madǘgündügüya láali lan, lúnti ferúduna báni. Lubáfu afíñeni

⁵Ába jaríñagun apóstolugu lun Jesúsu. —Wabúreme, rúba lánwoun wafíñen.

⁶Ábati laríñagun Wabúreme Jesúsu joun. —Lun jamúga níjein lan murúsuraü afíñeni jídan—gayáraati jamúga ñǘraüraü lan queísi ában tíla mostása—gayáraati jamúga jaríñagun tun tídibu wéwe to. “Gidába yágiñe láu sun bílagüle, beíba ájücha baránaja”, áni lasúsereduña jamúga. Wesériwidun lun Búngiu máma ában cátei lun lateíngiruníwa luágu

⁷‘Ánjein níjein lubeí lumúsun ában jídaangiñe, dan le lagíribudun áraabugiñe lárigiñe lawoújan o loúnigirun lan anímaalu, ¿laríñaguba funági lun músu ligía. “Belúba, ñurúba eíga”?

⁸Uá, aríñagarügübei lun. “Aráansebeí neígin, aráanseñu amǘrüme lun beténirun nun sun anája lan eíga lúma áta, lárigiñeme, gayáraajalíme beígin lúma bátun.”

⁹¿Teínqui lumúti funági iyúbudiri músu luágu ladǘgüni le lubeíbei lun? Uá.

¹⁰Jugúya giñéti, dánme lásurun jadǘgüni le uágubei laríñaga Búngiu jun lun jadǘgüni, lúnti jaríñagun. “Músu moúntiña wagía, ladǘga lé rügǘñein lúnbei wadǘgüni wadǘga.” Lareídaguagüdün Jesúsu díisi gawágutiña gumeín

¹¹Lídan lasígiruni Jesúsu luweíyasun Jerusaléoun, ába lásügürün labádinaguagiñe Samária lúma Galiléa.

¹²Dan le lachǘlürünbei lídan ában liraǘraü fulásu, ába jayábin díisi wügǘriña gawágutiña gumeín, lubároun. Ába jeréderun díse lueí,

¹³ába jagúaragun lun ítara. —¡Jesúsu, Maésturu, gudéme wamá bun!

¹⁴Dan le laríjinbaliña Jesúsu, ába laríñagun joun. —Jeíba arúfudagua júngua joun fádirigu. Dánti le ídirina jamá, ába jareídagun.

¹⁵Ñíñeinti ában jádaangiñe, dan le laríjinbei luágu areídaguaali lan, ába lagíribudun le ñíjin lubeí Jesúsu, adímurejeina buíti luágu Búngiu láu umálali jéreti.

¹⁶Ába lájuduragun dagá ligíbu múarugu lun líchuguni eteíngiruni lun. Áni Samariána wügǘri ligía.

¹⁷Ábati laríñagun Jesúsu. —¿Ma díisiñanu areídagutiña? ¿Jagáñagi ja jíbiri néfu?

¹⁸¿Niján gubeírügü teréncha le agíribuda eteíngirei Búngiu?

¹⁹Ábati laríñagun lun wügǘri ligía. —Sarába, beíba, areídaguaadibu ladǘga bafíñen. Ída lúba lan ligáburi liábin larúeijan Búngiu

²⁰Ába jálügüdüni fariséogu Jesúsu ídaba lan lagúmesera larúeijan Búngiu, ába laríñagun joun. —Dánme le lagúmeserun larúeijan Búngiu, marijínbei,

²¹maríñawagúnbei. “Niján”, o “Níngitan”, ladǘga lídan linárün cátei, níjeinjali larúeijan Búngiu jagánagua.

²²Ábati laríñagun joun láni disípulugu. —Lachǘlürüba dan lun meménija lánme janígi lun júmabadina lan, íbini luágurügü ában wéyu, masúseredunbei lídan dan ligía.

²³Laríñawagúba jun. “Niján Crístu ya”, o “Níngitan yágüta.” Iyéenibei, mídin jumá járigi, mafálarun jumáñame.

²⁴Ladǘga ítara quei larijín ában labírijaníga lueígiñe ában loúba siélu lun luágun le ában, ítara lúba dánme le nagíribudun uboúagun, áu le Wügǘri Garaǘwarügüti.

²⁵Lúnti nasúfurirun sarágu furúmiñe, mebéresen jagíame gürígia ja lánina dan le náu.

²⁶Queí meja lasúseredun lídan lidáani Noé, ítara lúba gíñe lasúseredun lídan búrime wéyu le niábingüle, áu le Wügǘri Garaǘwarügüti.

²⁷Dán meja ligía, jerédera meja gürígia eíga, áta, agámarida, íchaajaña jarájüñü lun jamárieidun darí wéyu le lebélurun Noé tídoun ugúnein to árca. Ába liábin gúnran, ába jañáradagun súngubei.

²⁸Ítara lúba gíñe quei lasúseredun lídan lidáani Lot. jerédera gürígia eíga, áta, agáñija, alúguraja, ábunagua, adáagua múna.

²⁹Dan le láfuridunbei Lot ubúrugugiñe Sodóma, ába láburujan wátu geméti lúma súfuru siélugiñe, ába láfaraguniña súngubei.

³⁰Ítara lúba dánme le niábin, áu le Wügǘri Garaǘwarügüti.

³¹‘Lídaanme wéyu ligía, le gürígia le boúgudibei tueí lúban, ánjein níjein lubeí lumégegun múnada, mebéluralá aságarei. Le gürígia le áraabubei lídan óra ligía, magíribudalá lúbiñoun.

³²Jarítagua jumá luágu le asúseredubei tun lúmari Lot.

³³Le áluguti leséfuruni libágari ya uboúagu, leféridirubei ibágari magúmuchaditi, le ánjabei leféridiruni libágari ya uboúagu, nueígiñe, libíjuba ibágari magúmuchaditi.

³⁴‘Naríñajare jun luágu áriebu lánme ligía, ñíbaña biáma gürígia arúmuga tídan ában meme gabána, lanügǘba ában jádaangiñe, ígirúame le ában según jafíñen nuágu.

³⁵Ñíbaña biáma würíña amúlija lídan ában, tanügǘba ában jádaangiñe, ígirúame to ában.

³⁶Ñíbaña biáma wügǘriña áraabu, lanügǘba ában jádaangiñe, igirúame le ában.

³⁷Dan le jagáambunbalin cátei le, ába jálügüdüni, jaríñaga lun. —¿Jalíabasan lasúsereda buri cátei le, Wabúreme? Laríñaga joun. —Le ñí lumuti lúgubu jiláali, ñíba joúndaragua wadúbi.