Read Garifuna San Lucas 18 Bible Online

San Lucas 18 - Garifuna bible

San Lucas 18

¹Ába labájüdagun Jesúsu ában jémpulu joun, lun larúfudajan joun luágu lúnti lan jayúmuragun lun Búngiu súnwandan, láu gurásu.

²Laríñaga joun. —Ñíñein meja ában agúseragüdüti lídan ában fulásu, minébe líña Búngiu lun, mebéresen ligía láu ni ában gürígia.

³Ñíñoun gíñe ában wǘri lídan fulásu ligía, jilá meja túmari, ságü wéyu tídin lúmoun agúseragüdüti le lun líchuguni tirícha tun luágu ában tuwúribun lúma tágani.

⁴Luágu sarágu dan, májati yebe leténirun tun, lárigiñe, ába laríñagun lúnguarügü. “Láu sun minében lan Búngiu nun, mebéresen áu láu ni ában,

⁵quei nuján méme lan wǘri to ásüdagüda nichǘgü, neséfuraaru, jebé lámuga tiábin, gumú líñein nugúraasun.”

⁶Ába laríñagun Jesúsu. —Niján laríñagubei agúseragüdüti le wuríbabei,

⁷gúbumeti leséfuraña Búngiu lánigu ja ayúmuragutiña lun wéyuagu, áriebu. ¿Lǘbei lubá líderaguniña?

⁸Uá, madárasanbei. Láu sun le, dánme le nagíribudun, áu le Wügǘri Garaǘwarügüti, uboúagun, ¿nadáriruba funásan afíñeni jádan gürígia ja yábaña, nuágu? Jémpulu luáguti fariséo lúma agúburajati liseínsuna gumádi

⁹Rúyati Jesúsu ában jémpulu joun ja jarítaguabaña luágu richágua jamá ligíbugiñe Búngiu, janǘgaña ámu gürígia quei ni cáta. Laríñaga.

¹⁰—Ñǘdütiña bián wügǘriña témpulurugu ayúmuragua lun Búngiu, ában fariséo, ában agúburajati liseínsuna gumádi.

¹¹Le fariséo, rára líña layúmuragun, laríñaga. “Búngiu, teínqui numútibu luágu mítaran nan quei jíbiri gürígia—jíwerutiña, wuríbatiña, salúfuritiña, mítaraantina gíñe quei agúburajati liseínsuna gumádi le.

¹²Ayúnaratina bián weíyaasu lídan dimáasu lun nagúnfulirun búma, rúnumuti gíñe díisi gáwanün lídaangiñe ságü fiádürü le ebélurubei nun, bun.”

¹³Ánjeinti agúburajati liseínsuna gumádi, ába leréderun díse, mabúseerunti ni lun liñúruni laríjin siélun, le luweírin lǘnabun lanáangun lúngua. Aboújarügüleí laníguagu láu igárigu, laríñaga. “¡Búngiu, gudémená bun, nugúya le gafígounti!”

¹⁴Naríñajare jun luágu giríbu lan agúburajati ligía lúbiñoun, resíbiñuleí Búngiu, máma fariséo ligía. Ladǘga le anáanguti lúngua weíri, ñǘraübei lanügǘn, ánjein le ñǘraübei lanáangun lúngua, weíribei lanügǘn. Labíniruniña Jesúsu irájüñü

¹⁵Anaajoúatiña gíñe irájüñü lun Jesúsu lun lagúrurun jawágu, dan le jaríjinbalin disípulugu cátei le, ába jadeínjan joun ja anáajabaliña irájüñü.

¹⁶Ába laríñagun Jesúsu joun lun jasígirun anáajaña jarájüñü lun, ába laríñagun joun lánigu. —Ígira jumá lun jayábin irájüñü nun, mewéridija jumá lueí, ladǘga ja ítarabaña quei jagía, jagía lílanabaña larúeijan Búngiu.

¹⁷Ninárün jáu luágu le lan merésibirun lumúti larúeijan Búngiu láu afíñeni jarúmati líbe jafíñen irájüñü, mebélubei lídoun. Layánujan ában wügǘri rísiti lúma Jesúsu

¹⁸Ába lálügüdüni ában jádaangiñe ábutigu Jesúsu, laríñaga lun. —Maésturu buíti, ¿ca lúnbei nadǘgüni lun gayára lan nibíjini ibágari le magúmuchaditi?

¹⁹Laríñaga Jesúsu lun. —¿Ca uágu baríñaga nun “buíti”? Ában rügǘñein buíti, Búngiu.

²⁰Subúdi bumúti gumádi. Maganoúabá túma wǘri gámaritu, máfarajabá, míwerujabá, mayéejabá luágu ni ában, inébe jamá bagǘbürigu bun.

²¹Laríñaga wügǘri ligía lun. —Gúnfulitina láu sun le lúmagiñe ñǘraügidina.

²²Lídan le lagáambunbalin Jesúsu cátei le, ába laríñagun lun. —Mégeigili ában cátei lun badǘgüni. alúgurabeí sun le búmabei, ábame bíchuguni lebégi joun gudémetiña, ábame garísin ban siélu. Ábame bagíribudun, ábame bafálarunina.

²³Dan le lagáambunbalin wügǘri ligía cátei le, ába lírudagun, ladǘga rísiti buídu.

²⁴Dan le laríjini Jesúsu lírudagun, ába laríñagun. —¡Jénreenguti lun jebélurun rísitiña lídoun larúeijan Búngiu!

²⁵Méreenguntimaati lun lásügürün ában caméyu lídaangiñe lujúyun ában agúsa sügǘ láu lebélurun ában rísiti lídoun larúeijan Búngiu.

²⁶Ába jaríñagun ja agáambubalin. —¿Cáteiti gayáraabei lasálbarun?

²⁷Laríñaga Jesúsu joun. —Le jásiñerubei gürígia adǘga, gayára lumúti Búngiu, ladǘga úati ni cáta siñáti lun Búngiu.

²⁸Laríñaga Pédro lun. —Wabúreme, wagía, ígira wamáali sun le wámati lun wafálarunibu.

²⁹Ába laríñagun Jesúsu joun. —Ninárün jáu luágu furúmieguarügü lan le ígiruti lúban, o lagǘbürigu, o líbugañanu, o lamúlenu, o lúmari, o lirájüñü luágu larúeijan Búngiu,

³⁰libíjubatíma sarágu weíyaasu loúgiñe lídan uboú le, ibíjaleíme ibágari magúmuchaditi yágüta siélu. Ladímurejaanya Jesúsu luágu loúnwen

³¹Ába lagúarun Jesúsu joun láni dúusu apóstolugu jábugua, ába laríñagun joun. —Weíbuga Jerusalén guetó, le ñíba lubeí lagúnfulira sun le jabǘrüjabei profétagu nuágu, áu le Wügǘri Garaǘwarügüti.

³²Jedéregerubadina joun ja mámabaña juríu, jéjerajaba náu, anába jamáname, suégua.

³³Jabeíchubadina, lárigiñeme, ábame jáfarunina jilágubei, áni násaaruba lídaangiñe oúweni luágu lǘrüwan wéyu lúnya nabágaridun.

³⁴Úati gunfaráanda jamá ni cáta lídaangiñe cátei le, ibídiñegubeíti joun ca lan uágu ladímureja joun, darúguati laníchigu cátei le laríñagubei, joun. Lareídaguagüdün Jesúsu ában Jericóna maríjinti

³⁵Dan le achǘlüreinaali Jesúsu ubúrugun Jericó, ñíñein ában maríjinti ñun láru ǘma amúriaja.

³⁶Dan le lagáambunbei maríjinti ligía jásüüjan sarágu gürígia, ába lálügüdajan ca lan susérebei.

³⁷Ába jaríñagun lun luágu niján lan Jesúsu Nazarétna ásügüra ñígiñe.

³⁸Ábati lagúaragun, laríñaga. —¡Jesúsu, le ladǘgawagun Davíd, gudémená bun!

³⁹Ja lubá lubáabaña, ába jadeínjan lun lun lámanichun, ligíatima lagúaragun. —¡Ladǘgawagun Davíd, gudémená bun!

⁴⁰Ábati laráramagun Jesúsu, ába loúnajan anǘgei. Dan le yaráfaali lun, ába laríñagun lun.

⁴¹—¿Ca babúseerubei nadǘgün bun? Ába laríñagun lun. —Nabúreme, buséntina naríjin.

⁴²Laríñaga Jesúsu lun. —¡Ibíjabeí baríjin! Areídaguaadibu ladǘga bafíñen.

⁴³Lídan meme óra ligía, ába laríjin maríjinti ligía, ába lafálaruni Jesúsu adímurejeina buíti luágu Búngiu. Sun gürígia ja aríjubalin cátei le, ába gíñe jadímurejan buíti luágu Búngiu.