Read Garifuna San Lucas 2 Bible Online

San Lucas 2 - Garifuna bible

San Lucas 2

¹Lídoun buga dan ligía, ába laríñagun urúei Augústo lun jabájüdǘn sun gürígia ja Rómabaña.

²Furúmiñe meja jadǘgüni cátei le, dán meja le Cirénio lan agúmadijabei Síria.

³Súnti gürígia mósu joúdin jageíra lun ñi lan jabájüdǘwa.

⁴Ligía láfuridunbei José Nazarétgiñe, loúbawagugiñe Galiléa, ába lídin loúbawagun Judéa lídoun fulásu le gíribei Belén, le ñí lubei lagǘriajoúa Davíd, quei linébaanfan lubeí Davíd José.

⁵Ába lídin Belén lun labájüdǘn úara túma María to gadáradunboun lúma lun jamárieidun, áni dageínañoun.

⁶Dánti le añája lan ñi Belén, ába lachǘlürün dan lun tagǘriajan María.

⁷Ába tagǘriajani furúmiñeti tiraǘ ñi, ába toúburaguni tídan lágei, ába taroúnragüdüni ñi tídan jában anímaalu ladǘga úati ubáraü joun tídan jában chülǘdügütiña. Ánjeligu jáma oúnigirutiña mudún

⁸Lídan áraabu boúgudi lueí Belén, ñíñanu joúniri mudún, bou larúgan jáu oúnigiraña jalǘgüniña mudún.

⁹Sódini, ába lasáliragun ában láni Wabúreme Búngiu ánjeli siélugiñe joun, ába jaríjin ában oúnwenbun larúgounga le lánina Búngiu geyégua jáu, ába janúfudedagun.

¹⁰Ába laríñagun ánjeli ligía joun. —Manúfudeda jumá, ladǘga níjein ugánu buíti nanǘgün jun, lébunabei sarágu ugúndani joun sun gürígia.

¹¹luágu agǘriajoúaali lan ában asálbaragülei jun ugúñe, lageíra Davíd, Crístu le Jabúreme.

¹²Jadárirubei irájü ligía joúburagu tídan lágei, roun tídan jában anímaalu.

¹³Lídan óra ligía, ába jasáliragun sarágu ánjeligu lubádu furúmiñeti ánjeli, ába jíchugun uweíriguni lun Búngiu, jaríñaga.

¹⁴¡Uweíriguni lun Búngiu lídan líñutima siélu,darángilaü múarugu jádan gürígia ja ibíjubalin lufúleisein!

¹⁵Dánti le jagíribudun ánjeligu járigoún siélun, ába jaríñagun joúniri mudún jámagua. —Queímoun Belén aríjei cátei le asúseredubei, le uágubei lasúbudiragüda Wabúreme Búngiu woun.

¹⁶Ába joúdin furésegueina, ába jadárirunun María lúma José, lúma irájü roun tídan jában anímaalu.

¹⁷Dan le jaríjinbalin, ába jabájüdaguni le laríñagubei ánjeli joun libǘgürü le.

¹⁸Súnti ja agáambuliña, weíriti janígi láu le jaríñagubei.

¹⁹Áni María, areídañu tíñein sun cátei le tídan tanígi, arítagua luágu.

²⁰Ábati jagíribudun joúniri mudún, adímurejeina weíri luágu Búngiu, luágu sun le jagáambubei lúma le jaríjibei, ladǘga suséreti ítara quei laríñawagúniwa joun. Larúfudúniwa Jesúsu témpulurugu

²¹Luágu liwídün wéyu, ába lerésibiruni circuncisión, ába jíchuguni líri Jesúsu, íri méme le líridubei ánjeli tun María lubáragiñe tadágeinadun.

²²Dan le lagúnfulirunbei lidáani jarúmadun lagǘbürigu Jesúsu según igáburi lídan lilúrudun Moisés, ába janǘgüni irájü ligía ubúrugun Jerusalén lun jedéregeruni lun Búngiu.

²³Jadǘgünbalin líra ladǘga laríñajare tídan lilúrudun Búngiu. “Sun furúmiñeti wügǘri irájü agǘriajoúti lúnbei Búngiu.”

²⁴Ába lubeíti joúdin adágaragüda le uágubei laríñaga lilúrudun Búngiu. bián wagúgua o bián lan únjun.

²⁵Lídan meja dan ligía, ñíñein meja ában wügǘri Jerusalén gíriti Simeón. Wügǘri ligía ában wügǘri buíti, weíriti ledéregeragun lúngua lun Búngiu, áni agúraba lumúti liábin Crístu, le lúnbei lasálbaruniña Israelítagu. Ñíñein Sífiri Sándu lúma Simeón,

²⁶áni arúfuda láali lun luágu moúnwenbei lan maríjingaleí Crístu le lúnbei loúnajani Wabúreme Búngiu.

²⁷Ába lídin wügǘri ligía témpulurugun, ladúndejan Sífiri Sándu. Dánti le janǘgünbalin lagǘbürigu Jesúsu Jesúsu témpulurugun lun jadǘgüni le laríñagubei lúrudu láu,

²⁸ába loúyuajani Simeón, ába líchugun eteíngiruni lun Búngiu, aríñageina ligía.

²⁹Nabúreme, gayáraajali bígirunina lun noúnwen láu darángilaü, nugúya le esériwidubei bun,ladǘga gúnfuli báali le baríñagubei nun.

³⁰Aríja náali Wasálbaragüle láu nágu,

³¹Asálbaragülei le boúnajabei joun sun gürígia.

³²Ítara lúba queísi ában lámpu lun larúfuduni inárüni joun ja mámabaña juríu,ru ligíame uweíriguni joun Israelítagu, ja bánigu.

³³Ába laweíridun lanígi José táu sun María láu le laríñagubei Simeón luágu irájü le.

³⁴Ábati labíniruniña Simeón, ába laríñagun tun María, to lúguchu Jesúsu. —Irájü le, lébunabei achúgeraguni joun sarágu Israelítagu, lébunabei gíñe asálbaruni joun jíbiri. Ítara lúba queísi ában seíni le lúnbei gíbe jamá májatiña jerésibiruni.

³⁵Ítara lúba lasúbudirúniwa le larítagubei cáda ában tídan lanígi luágu Crístu. Áni ítara lúba sun cátei le bun quei ában efeín to ácharurutu tuágu buwáni.

³⁶Ñíñoun gíñe ában wǘri proféta, gíritu Ána, wǘri tugúya liraǘ Fanuél, jádaangiñe ladǘgawagun Áser. Weíriyaaru wǘri tugúya, ñǘraügiru meja tamárieidunbei, sédüñein irúmu táu lúma túmari, ába loúnwen,

³⁷guetó, gádürü-weín-gádürü irúmu táu. Máfuriduntuti témpulurugugiñe, terédera ñi esériwida lun Búngiu áriebu wéyuagu, ayúnara lúma ayúmuragua lun Búngiu.

³⁸Ába tiábin Ána jawágun María, José, lúma Jesúsu lídan méme óra ligía, ába teteíngiruni Búngiu luágu irájü ligía, adímureja tugúya luágu Jesúsu joun sun ja agúrabajabaalin lasálbarún Jerusalén. Agíribuduni Nazarétün

³⁹Lárigiñeti jagúnfulirun láu sun le laríñagubei lilúrudun Búngiu, ába jagíribudun María, José, lúma Jesúsu Galiléoun lídoun jabúrugute le Nazarét.

⁴⁰Aweírideina ligíati irájü le, éredeina ligía, afáragadagueina lídan lichú áu, biní lumútijati Búngiu sarágu. Jesúsu témpulurugu

⁴¹Ságüja irúmu joúdin lagǘbürigu Jesúsu ubúrugu Jerusalén lubá fédu le páscua,

⁴²áni dan le lagúnfulirunbei Jesúsu dúusu irúmu, ába joúdin súngubei Jerusalén quei le jagáburi lídan fédu ligía.

⁴³Dánti le jagíribudun lárigiñe lagúmuchagun fédu, ába leréderun irájü ligía Jerusalén, ibídiñoun tun lúguchu ni lun José,

⁴⁴jarítagún yebe luágu níten lan jádan gürígia ja jámarigubaña luágu ǘma. Ítara líña jadǘgün ában wéyu eíbuguni, dan le jáluajani jádan jadújeñu lúma jádan jasúbudiraagun,

⁴⁵madári jamúti. Ábati jagíribudun ubúrugun Jerusalén áluajei ñi.

⁴⁶Ǘrüwa wéyu lueígiñe, ligía jadáriruni témpulurugu ñun jádan arúfudajatiña lilúrudun Moisés, agáambajaña, álügüdaguaña.

⁴⁷Súnti ja agáambubalin, weíriti janígi luágu lichú láu lúma luágu buri loúnabagüle.

⁴⁸Dan le jaríjinbalin lagǘbürigu, ába laweíridun janígi, ába taríñagun lúguchu lun. —¿Cáme badǘgei cátei le woun, niraǘ? Nugúya lúma búguchi, wáluajañadibutia láu idíjeri.

⁴⁹Ábati laríñagun Jesúsu joun. —¿Cági uágu jáluajana? ¿Ibídiñeti jun luágu lúnti lan neténirun lun cátei le láni Núguchi?

⁵⁰Úati gunfaráanda jamáni le laríñagubei joun.

⁵¹Ábati lagíribudun jáma, Nazarétün, ába lasígirun láu meme lagáambadi joun. Ábatí buri tareíduni lúguchu sun cátei le tarítagunrugun.

⁵²Niján mémeti Jesúsu aweírideina dándu lúgubu queísi lisáminan, áni buítiti dándu ligíbugiñe Búngiu quei jagíbugiñe gürígia.