Read Garifuna San Lucas 4 Bible Online

San Lucas 4 - Garifuna bible

San Lucas 4

¹Ába lígiruni Jesúsu fulásu loúbawagu dúna Jordán, buin láu lubáfu Sífiri Sándu, ába lanǘgüni Sífiri Sándu lídoun fulásu mageírawati.

²Reídeiti Jesúsu bián-wein wéyu ñi láu Máfia oúchaguei ánjein áburuja lídoun wuríbani. Meíginti ni cáta lídan sun bián-wein wéyu ligía, ába lasándirun ában oúnwenbun ilámaü.

³Ábati laríñagun Máfia lun. —Ánjein Liraǘ bubei Búngiu, salíguagüdabeí dǘbü le feínme.

⁴Laríñaga Jesúsu lun. —Taríñajare Lerérun Búngiu. “Mámarügüba táu fein jabágarida gürígia, jabágariduba gíñe láu jagúnfulirun láu sun dimúrei le laríñagubei Búngiu.”

⁵Lárigiñe, ába lanǘgüni Máfia Jesúsu luágun ában wǘbü íñuti, ába larúfuduni sun fulásu le uboúagubei lun lídan ában.

⁶Ába laríñagun Máfia lun. —Níchugubei sun ubáfu lúma sun uweíriguni le bun

⁷ánjabu ájuduragua nun lun banǘgünina quei bubúngiute, bánibei súngubei, ladǘga ibíja náali sun le, áni gayáraati níchuguni lun le únti nabúseera.

⁸Ába laríñagun Jesúsu lun. —Dísebá nueí, Máfia, ladǘga taríñajare Lerérun Búngiu. “Judúguabá lun Búngiu le Babúreme, lúnrügülá besériwida.”

⁹Lárigiñe, ába lanǘgüni Máfia ubúrugun Jerusalén, ába laweínragüdüni tábulugu témpulu, ába laríñagun lun. —Ánjein Liraǘ bubei Búngiu, chǘguabá búngua yágiñe lun ǘnabun,

¹⁰ladǘga taríñajare Lerérun Búngiu.Loúnajabaña Búngiu láni ánjeligu lun joúnigiruníbu,

¹¹janǘgübadibu jájaburugu lueí labúleiseirun bugúdi luágu dǘbü.

¹²Ába laríñagun Jesúsu lun. —Taríñajare gíñe Lerérun Búngiu. “Moúchaguabeí Búngiu le Babúreme.”

¹³Dánti le madárijali Máfia cába lan luwúyeri oúchawagúni ladǘga lun Jesúsu, ába lígiruni lúngua luágu átiri dan. Lagúmeseruni Jesúsu luwádigimari Galiléa

¹⁴Ába lagíribudun Jesúsu Galiléoun buin láu lubáfu Sífiri Sándu, ába buríti ladímurejoún luágu lídan sun fulásu geyégua.

¹⁵Arúfudajatija tídan jalígilisin juríu lídan sun fulásu, buíti jadímurejan sun gürígia luágu. Jesúsu lídan ubúrugu Nazarét

¹⁶Ábati lídin Jesúsu Nazarétün, le fulásu le ñí lubei lagǘriajoúa, ába lebélurun tídoun jalígilisin juríu lídan wéyu le eméraaguagülei quei ligáburi yebu, ába laráramun lun lalíijan tídan Lerérun Búngiu.

¹⁷Ába jíchugunun lilíburun proféta Isaías lun, dan le ladárarunun, ába ladáriruni le ñí lubei laríñaga ítara.

¹⁸Níjein láni Búngiu Sífiri Sándu nuágu,ladǘga anúadaja láadina lun níchuguni ugánu buíti joun gudémetiña,oúnaja láadina lun námalijaniña ja nidíjeribaña tídan janígi,lun náfuridagüdüniña adaürǘtiña,lun níchugun aríjini joun maríjintiña,lun neséfuruniña ja ouserúabaña wuríba,

¹⁹lun nadímurejan luágu dan le fuleíseijabu lan Búngiu joun gürígia.

²⁰Ába ladáurunun Jesúsu líburu, ába líchugunun lun ídejati tánina ligílisi, ába lañúurun. Queíti jasígirun sun ja ñíbaña aríaguei,

²¹ába lagúmeserun adímureja, laríñaga. —Ugúñe guánarü gúnfulijali cátei le jigíbugiñe.

²²Adímurejatiña sun jagía buíti luágu Jesúsu, weírititi janígi luágu lubuídun buri dimúrei le laríñagubei. Jálügüdagua buríti jámagua. —¿Mámasan le liraǘ José le?

²³Ába laríñagun Jesúsu joun. —Subúsiti nun luágu jaríñagubei lan cátei le nun. “Surúsia, agáraniguabá búngua”, jaríñaguba giñe nun. “Agáambaadiwa luágu buri cátei le adǘga báalibei Capernaúm, adǘgabeí gíñe ya bageíra.”

²⁴Ába lasígirun adímureja, laríñaga. —Ninárün jáu luágu úa lan ni ában proféta erésibirúati buídu lageíra.

²⁵Choúru numúti luágu añájein lán meja sarágu würíña ja jiláguañábaña jámarigu jádan Israelítagu lídan meja lidáani proféta Elías, dan le májuyun lubeí júya luágu ǘrüwa irúmu dimí, ába ñi lan sarágu ilámaü fulásurugu,

²⁶áni moúnajan lumúti Búngiu Elías túmoun ni ában jádaangiñe würíña jiláguaaña jámarigu jagía ja aganoúbaña Israél, loúnajei túmoun ában to aganoúboun Sarépta, yaráfa lun ubúrugu Sidón.

²⁷Ñíñanu meja gíñe sarágu gawágutiña gumeín luágu jára ñi Israél lídan lidáani proféta Eliséo, úati ni ában jádaangiñe areídawaguagüdüti lueídügüya Naamán le Síriana.

²⁸Dan le jagáambunbalin sun ja ñíbaña ligílisirugu cátei le, ába jagáñidun sarágu.

²⁹Ába jásaarun, ába jaságaruni Jesúsu bougudín lueí fulásu, ába janǘgüni lábulugun wǘbü le gagíbuagubalin fulásu lun jájuchuruni ñígiñe.

³⁰Ába lásügürün Jesúsu jamídaanguágiñe jámagua, ába lídin. Ában wügǘri gawáguti espíritu wuríbati

³¹Ábati lídin Jesúsu Capernaúm, ában fulásu le lídaanbei Galiléa, ába larúfudajan joun gürígia ñi lídan wéyu le eméraaguagülei.

³²Weírititi janígi láu ligáburi larúfudajan, ladǘga láu ubáfu ladímureja.

³³Ñíñeinti ában wügǘri ligílisirugu, gawáguti espíritu wuríbati, ába lagúaragun ítara.

³⁴—Ígira báwa, ¿ca uágu bemétera wámoun, Jesúsu le Nazarétna? ¿Biábiña agǘnrinchaguawa? Subúdi numútibu, áni subúdi numúti luágu amǘrü lan Liraǘ Búngiu le sándubei.

³⁵Ába ladeínjan Jesúsu lun espíritu wuríbati ligía, ába laríñagun lun. —¡Maníba, furíba lídaangiñe gürígia le! Ábati lájuchuruni espíritu wuríbati wügǘri ligía múarugun jagíbugiñe súngubei, ába láfuridun lídaangiñe, mabúleiseirunga.

³⁶Ába laweíridun janígi súngubei, ába jaríñagun jámagua. —¿Cáteisán buri dimúrei le? ¡Adímurejati wügǘri le láu gumádi lúma ubáfu joun espíritugu wuríbatiña, ába jáfuridun!

³⁷Adímurejoúatiti buri luágu Jesúsu lídan sun fulásu geyégua. Lareídaguágüdünun Jesúsu límenidi Pédro

³⁸Ábati láfuridun Jesúsu tídaangiñe jalígilisin juríu, ába lídan lúbiñoun Simón. Sándiñounti límenidi Simón, tabíruajaña, ába jayúmuragun lun Jesúsu lun lareídaguagüdünun.

³⁹Ába lélemuchun Jesúsu tuágun, ába ladeínjan lun abíruaü, ába lagídarun abíruaü tueí. Lídan méme óra ligía ába tásaarun, ába tagúmeserun eténira joun. Lareídaguagüdün Jesúsu sarágu sánditiña

⁴⁰Sun ja añájeinbaña sánditiña jábiñe, dan le láfuachun wéyu ába janǘgüniña lun Jesúsu, ába líchuguni lújabu jawágu cáda ában jádaangiñe, ába lareídagun furúmieguarügü sándi le jawáguti.

⁴¹Sarágu jaña gíñe ja gawágutiña espíritugu wuríbatiña, ába jagídarúniwa jaweí, ába buri jagúaragun ítara. —Amǘrü le Liraǘbei Búngiu. Ába ladeínjan Jesúsu joun espíritugu wuríbatiña, mígirun lumútiña lun jadímurejan, ladǘga subúdi jamúti luágu ligía lan Crístubei. Lapúrichijan Jesúsu Galiléa

⁴²Dan le larúgadunbei, ába láfuridun Jesúsu bougudín lueí ubúrugu lídoun ában fulásu mageírawati. Ába jáluajani gürígia, ába jachǘlürün le ñíjin lubeí, buséntiña yebe jeréderuni lueí lídin,

⁴³ába laríñagun joun. —Gásu gíñe níchuguni ugánu le luáguti larúeijan Búngiu joun lílana líbiri fulásu, ladǘga lun líra noúnajoúa.

⁴⁴Ítara líña lídin apúrichijeina tídan buri jalígilisin juríu, Galiléa.