Read Garifuna San Lucas 7 Bible Online

San Lucas 7 - Garifuna bible

San Lucas 7

¹Dan le lásurunbei ladímurejan Jesúsu joun gürígia, ába lídin Capernaúm.

²Ñíñein ában gumándan Rómana ñi, láu ában lumúsun jínsiñeti lun sarágu, sándiñein músu ligía, yaráfa lun loúnwen.

³Dan le lagáambunbei gumándan ligía luágu Jesúsu, ába loúnajan fiú jádaangiñe wügǘriña weírigutiña lídan jafíñen juríu lun jayúmuragun lun Jesúsu lun lídin areídaguagüdei lumúsun.

⁴Ába joúdin lúmoun Jesúsu, ába jagúmeserun ayúmuragua lun táu sun janígi, jaríñaga lun. —Buíti lun bíderaguni gumándan le,

⁵ladǘga jínsiñetiwa wagía juríu lun, ligía guánarügü ábunaguagüdübarun walígilisin.

⁶Ábati lídin Jesúsu jáma, dan le yaráfaaña tun lúban gumándan ligía, ába loúnajan gumándan jádaangiñe lumádagu aríñaga lun Jesúsu. —Nabúreme, ítara líña gumándan lun manǘgün ban bubéresegun ñǘdün lúbiñe, luágu nege madǘna lan lun bebélurun lúbiñoun,

⁷ligía nege mídin lubeí lúngua álugabu. Rúrügübeí dimúrei, ábame lareídagun lumúsun.

⁸Ladǘga ligía nege gíñe lábugiñeñein gumádi íñutimaati, áni añájein gíñe súdaara lábugiñe lagúmadijan. Dan lé nege laríñagun lun ában jádaangiñe lun lídin, ñǘdünti, dan le laríñagun lun le ában lun liábin, ñǘbinti, áni dan le loúnajani lumúsun adǘga som cátei, adǘga lumúti. Ítara lúba nege, luágu berérun mósu lídin sándi lueí lumúsun.

⁹Dan le lagáambunbalin Jesúsu cátei le, weíriti lanígi láu wügǘri ligía, ába laríjin jawágun gürígia ja afálarubalin, aba laríñagun joun. —Ninárün jáu, ni íbini jádan Israelítagu madárigidina afíñeni weíriti quei lafíñen wügǘri le.

¹⁰Dánti le jachǘlürünbei wügǘriña ja ñǘdünbaña álugei Jesúsu járigoún lúbiñoun gumándan, areídaguaali lumúsun. Láguyuguágüdüni Jesúsu tiraǘ ában jiláali túmari

¹¹Lárigiñe cátei le, lídiña Jesúsu lídoun ában ubúrugu gíriti Naín, úareina jáña láni disípulugu lúma, jáma sarágu gürígia.

¹²Dan le lachǘlürünbei yaráfa lun lubéneri ubúrugu ligía, ába laríjin joúdin ábunaja ában jiláali le ligíarügüti tiraǘ lúguchu to jiláali túmari. Sarágu jáña lílana fulásu ñǘdün ábunaja túma.

¹³Dan le laríjinbarun Wabúreme Jesúsu, ába tagúdemedagun lun, ába laríñagun tun. —Mayájuabá.

¹⁴Ába layárafadun, ába lagúrurunun gánjoun, ába jaráramagun ja anǘgübaña. Ába laríñagun lun jiláali. —Irájü, ¡naríñaguña bun lun básaarun!

¹⁵Ábati lásaarun lé buga jiláalibei, ába lagúmeserun adímureja. Ába ledéregeruni Jesúsu tun lúguchu.

¹⁶Dan le jaríjinbalin gürígia cátei le, ába laweíridun janígi, ába jagúmeserun adímureja buíti luágu Búngiu, jaríñaga. —Chülǘgua ában proféta weíriguti wádoun. Aríñagatiña gíñe. —Ñǘbinja Búngiu íderaguawa, wagía le lumútuniña.

¹⁷Ába lagaambúniwa cátei le ladǘgübei Jesúsu lídan sun Judéa lúma geyégua láu. Loúnagülegu Juan le abásteragüdajabei

¹⁸Agáambati Juan luágu sun cátei le, abájüdagua jamúti lánigu lun. Ábati lagúarun joun biáma jádaangiñe,

¹⁹ába loúnajaniña álügüdei Wabúreme Jesúsu ánjein ligía lubeí Crístubei le lúnbei liábin, o ánjein jagúrabajaba lubeí ámu.

²⁰Dan le jachǘlürünbei le ñí lubei Jesúsu, ába jayárafadun, ába jaríñagun lun. —Loúnajañadiwa Juan le abásteragüdajabei álügüdabu ánjein amǘrü lubeí Crístubei le lúnbei liábin, o ánjein lun lubeí wagúrabun ámu.

²¹Lídan méme óra ligía, areídaguagüdati Jesúsu sarágu gürígia lídaangiñe jasándi lúma jasúfurirun, lúma jádaangiñe espíritugu wuríbatiña, aríjagüda ligía gíñe sarágu maríjintiña.

²²Ába lubeíti laríñagun joun. —Jeíba, jaríñageime le jaríjubei lúma le jagáambubei lun Juan. Jabájüdaguáme lun luágu jaríjin maríjintiña, jeíbugun meíbuguntiña, jareídagun láutiña gumeín luágu jára, jagáambun magáambaditiña, jáguyugun jiláaña, lúma luágu líchugún ugánu luáguti asálbaruni joun gudémetiña.

²³Gúndaati gíñe gürígia le meféridirun lumúti lafíñen nuágu.

²⁴Lárigiñe joúdin já buga loúnajabaña Juan, ába lagúmeserun Jesúsu adímureja luágu Juan joun gürígia, laríñaga. —¿Cásan jídinbei aríja lídan fulásu mageírawati? ¿Ában mabúru le lánjinjan garábali?

²⁵Ánjein máma lubeí ítara líña, ¿cáti jídinbei aríja? ¿Ában wügǘri táu anáanguni wéndegutu? Máma ligía, subúdi jumúti luágu ja lan wéndegubaña adáüragun, agánawa jagía buídu, tídaañanu jában urúeigu.

²⁶Lídan linárün cátei, ¿ca jídinbei aríja? ¿Ába proféta? Ánja, inárüni, áni ában weíriguti sügǘ láu proféta.

²⁷Juan, ligía oúnagülei le uágubei taríñaga Lerérun Búngiu.Noúnajañein noúnagüle bubáragiñelun laráansejani ǘma bubá.

²⁸Quei naríñaguni jun, jádan sun gürígia, úagili proféta weíriguti lueí Juan, áni láu sun líra, weíriguti le ǘnabutimaabei lídan larúeijan Búngiu sügǘ láu le anǘgarügübalin ugánu luágu arúeijani ligía.

²⁹Dan le jagáambunbalin sun gürígia, ásta ja agúburajabaña liseínsuna gumádi, cátei le, ába jaríñagun luágu richá lan Búngiu láu laríñagun liyúmulugugiñe Juan luágu lúnti lan jasáansiraguni jagáburi. Gürígia jagía, resíbi jamáali meja labásteragüdajan Juan,

³⁰ánjañati jíbe-ágei fariséogu jáma arúfudajatiña lilúrudun Moisés, májatiña meja lun jadǘgüni le lubeíbei Juan, merésibirun jamúti lé yebe labúseerubei Búngiu ladǘgün luágu jafúleisein.

³¹Ába laríñagun Jesúsu. —¿Ída liñásan jagáburi gürígia lánina dan le? ¿Cásan lenégebei?

³²Ítara jáña quei irájüñü ja añúurubaña mágidirugu ájurera, ába jagúaragun joun jíbegu. “Íñaajatiwa fídu jun, mabínajantün, erémujatiwa urému jíruti jun, mayájuntün.”

³³Ladǘga ñǘbinti Juan le abásteragüdajabei, lé meja meíginbei fein, mátun ligía diweín, aríñagatün luágu gawágu lan espíritu wuríbati.

³⁴Lárigiñe, ába niábin, áu le Wügǘri Garaǘwarügüti, joútina áni gurá áu. Jaríñaga luágu geígadina, gátadi, jamáda áu nege gafígountiña jáma agúburajatiña liseínsuna gumádi.

³⁵Wel, ja chúbaña áu, subúdi jamúti luágu buídu lan le ladǘgübei Búngiu láu lichú láu. Jesúsu lúbiñe Simón le fariséo

³⁶Ába lamísurajani ában jádaangiñe fariséogu Jesúsu lun lídin eíga lúbiñe, ába lídin Jesúsu lúbiñe fariséo ligía, ába lañúurun eíga luágu lidábulan.

³⁷Ñíñounti ában wǘri wuríbati témeri lídan ubúrugu ligía, dan le tagáambunbei luágu lídin Jesúsu eíga lúbiñe fariséo ligía, ába tídin láu ában lágei ibíñei jémeti.

³⁸Ába taráramun lanágangiñe Jesúsu, lubádu lugúdi, ába tadǘdüragüdüni lugúdi láu táguira. Nuján ayájuaja, nuján arágajei láu tídiburi, nuján achújei lugúdi, ába téseruni ibíñei luágun.

³⁹Dan le laríjinbalin fariséo le amísurajabalin Jesúsu cátei le, laríñaga lúnguarügü. “Lun jamúga inárüni lan luágu proféta lan wügǘri le, lasúbudiruñein jamúga ca lan to agúruruboun luágu lúma ca lan tuwúyeri gürígia tugúya, luágu wuríba lan témeri.”

⁴⁰Ábati laríñagun Jesúsu lun fariséo ligía. —Simón, níjein ában cátei lun naríñaguni bun. Laríñaga fariséo. —Aríñagabeí nun, maésturu.

⁴¹Laríñaga Jesúsu lun. —Níñanu bián wügǘriña dúweitiña seínsu lun ában afúredeijati. Ában jádaangiñe, dúweiti seíngü-san denáriu, le ában, dimí-san.

⁴²Queíti siñá lubei jafáyeiruni, ába ferúduna láani afúredeijati ligía jadúweijan biángubei. Aríñagabeíti nun. ¿cábagi jádaangiñe jínsiñejabutima lun afúredeijati ligía?

⁴³Laríñaga Simón lun. —Lídan narítagun, le gíbetimaabei adúweijan. Laríñaga Jesúsu lun. —Richátibu.

⁴⁴Ába laríjin Jesúsu tuágun wǘri tugúya, ába laríñagun lun Simón. —¿Aríagu bíña tun wǘri to? Belútina búbiñoun, míchutibu dúna nun lun nachíbuni nugúdi, ánjounti wǘri to, ágawagüda tumúti nugúdi láu táguira, ába tamábeidagüdüni láu tídiburi.

⁴⁵Machú bumútina, ánjoun tugúya, lúmagiñe nebélurun, merédegili tachújani nugúdi.

⁴⁶Míchutibu aíli nábulugu, ánjoun tugúya, túguatu ibíñei jémeti luágu nugúdi.

⁴⁷Ligía naríñagunbei bun luágu arúfuda láani luweírin tínsiñejabu luágu ferúdunawa lan líbe tifígoun, ánjeinti gürígia le míbeti ferúdunawa lan, míbeti ínsiñeni larúfudun.

⁴⁸Ábati laríñagun Jesúsu tun wǘri tugúya. —Ferúdunawaali bifígoun.

⁴⁹Ábati jagúmeserun amísurajoútiña ja ñúnbaña lúma ñi aríñaga jámagua. —¿Cáteisan wügǘri le, ferúduna lubeí gíñe figoú?

⁵⁰Ába laríñagun Jesúsu tun wǘri tugúya. —Sálbawádibu lídaangiñe bifígoun ladǘga bafíñerun nuágu, beíba darángilañu.