Read Garifuna San Juan 1 Bible Online

San Juan 1 - Garifuna bible

San Juan 1

¹Dan le lagúmeserunbei sun cátei, níjeinjali meja Dimúrei (le ámu íri lun Búngiu Irájü), lúmañein Búngiu le Dimúreibei, áni Búngiu méme ligía.

²Lídan lubeíti lagúmeserunbei sun cátei, lúmañein Búngiu Úguchili Búngiu Irájü.

³Lídaangiñe ladǘgei Búngiu sun cátei, úati ni cáta adügǘti le máma ladǘga.

⁴Ligía íchugubei ibágari lun sun cátei, áni ligía arúgoungadagüdübei jáu gürígia.

⁵Rúti larúgounga queísi lámpu lídan lubúriga, áni lásiñerubei lubúriga lámpu ligía éñegucha.

⁶Ñíñein meja ában wügǘri loúnajan Búngiu, gíriti Juan, le ñǘbinbei lun líchugun fe luágu Búngiu Irájü le lúnbei liábin uboúagun lun larúgoungadágüdün jáu gürígia.

⁷Juan, lúnti líchugun fe luágu, lun gayáraabei lan jafíñerun sun gürígia luágu cátei le lúnbei laríñaguni dánme le liábin.

⁸Máma Juan le lúnbei larúgoungadágüdün jáu gürígia, ában wügǘri ligía le oúnajoúbei lun ladímurejaba lan luágu.

⁹Búngiu Irájü, le queísigubeirügübei ában lámpu le tímatimaati lun larúgoungadágüdün jáu sun gürígia, lachǘlürüña meja uboúagun lídan dan ligía.

¹⁰Ñǘbinti uboúagun, áni láu sun lídaangiñe lan ladǘgei Búngiu uboú, manǘgün jamúti lirájüñü uboú quei Búngiu Irájü.

¹¹Lageíroun yebe liábin, merésibirun jamúti lílana lageíra.

¹²Láu sun líra, añájein erésibiruti, ába jafíñerun luágu, ába líchugun ubáfu joun lun lirájüñübaña lan Búngiu.

¹³Mítaraantiñatia quei jasáanigu agǘbürigu ja gürígiabaña, ja agǘriajoútiña quei furúmierügü gürígia o láu lan lugúndan ában wügǘri, lirájüñü Búngiu jagía.

¹⁴Ligírati meja le Dimúreibei, le méme Búngiu Irájübei, ñǘbinti lun ítara lúba lan quei furúmierügü gürígia, ába laganoúniwa wádan. Aríja wamúti luweírigun, uweíriguni le ladǘnabei Liraǘ Búngiu le ábanrügüti, le buínbei láu areíni lúma inárüni.

¹⁵Adímurejati Juan luágu, ába laríñagun. —Niján léñaja uágubei nadímureja jun dan le naríñagunbei luágu le lan ubábei naráanseja ǘma, weírigutima lan sügǘ náu, ladǘga níjeinjali lán meja lubáragiñebei nagǘriajoún.

¹⁶Sun wagía ibíjaadiwa sarágu abíniruni lídaangiñe luweírin lirísin.

¹⁷Lúmagiñe Moisés lerésibirúa lilúrudun Búngiu, ánjeinti ínsiñeni lúma inárüni, lídaangiñe Jesucrístu liábin.

¹⁸Úagili ni ában aríjiti Búngiu, Liraǘ le ábanrügübei le yaráfabei tun lanígi, ligía arúfudubalin woun ída líña lan Búngiu. Ladímurejan Juan le abásteragüdajabei luágu lufúleisein Jesucrístu

¹⁹Ába joúnajan juríu ja Jerusalénna fádirigu jáma wügǘriña jádaangiñe ladǘgawagun Leví álügüdei Juan cáteiñein lan.

²⁰Ába laríñagun joun furáangu. —Máma áu Crístu.

²¹Ábayati jálügüdüni. —¿Cátabuti? ¿Proféta Elías amǘrü? Laríñaga joun. —Uá, máma áu. Ábaya jaríñagun lun. —¿Amǘrü proféta ligíra le lúnbei liábin? Ába laríñagun joun. —Máma gíñe áu.

²²Ábati jaríñagun lun. —¿Cátabuti? Mósutia wanǘgüni boúnabagüle joun ja oúnajabaliwa. ¿Cági gayáraabei baríñagun woun buoúgua?

²³Ába loúnabuniña láu méme dimúrei lé meja laríñagubei proféta Isaías. —Áu ában le agúarajabei lídan fulásu le mageírawati. “Aráanse jumoún janígi lubá liábin Wabúreme queísi ladárarúniwa ǘma surúti.”

²⁴Ja ñǘdünbaña adímureja lúma Juan, lánigu jadámurin fariséogu,

²⁵ábati jaríñagun lun. —Ánjeinti máma bubeí Crístu, ni Elías, ni proféta ligía, ¿cáti uágu babásteragüdaja?

²⁶Ába laríñagun joun. —Áu, láu dúna nabásteragüdaja, níjein ában ibídiñeti jun jagánagua,

²⁷liábinba nárigiñe, wügǘri ligía, madǘnatina ni lun jamúga nafáragaduni tagǘrüga ligeídin.

²⁸Sun cátei le, lídan fulásu le gíribei Betábara lasúsereda, luágu oúbaü le ñígiñe lubeí láfuara wéyu libíti dúna Jordán, le ñí lubei labásteragüdaja Juan. Wügǘri le loúnajabei Búngiu lun loúnwen luágu jafígoun gürígia

²⁹Larúgan, ába laríjin Juan liábin Jesúsu ayárafadeina lun, ába laríñagun joun lánigu. —Niján le loúnajabei Búngiu lun loúnwen luágu jafígoun gürígia queísi meja lafarúniwa mudún lídan dan ligíra luágu jafígoun gürígia.

³⁰Luáguñaja nadímureja dan le naríñagunbei. “Liábinba ában wügǘri nárigiñe le weíriguti sügǘ náu, ladǘga níjeinjali lán meja lubáragiñe nagǘriajoún.”

³¹Ni áu, ibídiñetí meja wügǘri ligía nun, abásteragüdajádina láu dúna lun jasúbudiruni Israelítagu.

³²Aríñagati gíñe Juan. —Aríja numúti Sífiri Sándu camá ában únjun, larárirun siélugiñe, ába laráramagun lábulugu.

³³Ibídiñetí yebe nun cátei lan wügǘri ligía, aríñagarügaali meja le oúnajabalina abásteragüdaja láu dúna, nun. “Dánme le baríjin larárirun Sífiri Sándu ábame laráramun lábulugu ítaga wügǘri, ligía wügǘri ligía le abásteragüdajabei láu Sífiri Sándu.”

³⁴Aríja náaliti, geféen áu luágu ligía lan Liraǘbei Búngiu. Furúmiñetiña láni Jesúsu disípulugu

³⁵Larúgan, ñíñeinya Juan jáma biáma jádaangiñe lánigu.

³⁶Dan le laríjinbei Juan lásügürün Jesúsu, ába laríñagun. —Niján wügǘri le lanúadirubei Búngiu lun lagídaruni jafígoun gürígia.

³⁷Ába jagáambuni biáma lánigu Juan laríñagun ítara, ába jafálaruni Jesúsu.

³⁸Ábati ladígiragun Jesúsu lárigoún, quei laríjin jafálaruni, ába laríñagun joun. —¿Ca jabúseerubei núma? Ába jaríñagun lun. —Maésturu, ¿jalía bagánawa?

³⁹Ába laríñagun Jesúsu joun. —Jigoúgu jaríjei. Ába joúdin, ába jaríjini jalía lan lagánawa, ába jásügürüni líbiri wéyu ligía lúma, ladǘga queíburijali lan gádürü rábounwéyu óra ligía.

⁴⁰Andrés, le lamúlen Simón Pédro, ligía ában jádaangiñe biáma ja agáambubalin le laríñagubei Juan ába jafálaruni Jesúsu.

⁴¹Lubáragiñe ámu cátei, ába lídin Andrés álugei Simón Pédro le líbugaña, ába laríñagun lun. —Darí wamaali Mesías, le Crístu, le lanúadirubei Búngiu lun lasálbaruniña gürígia lídaangiñe jafígoun.

⁴²Ába lanǘgüni Andrés Simón le ñíjin lubeí Jesúsu, ába laríaguni Jesúsu Simón ligíbuagun, ába laríñagun lun. —Simón, amǘrü le liraǘ Jonás, guetó Céfasba bíri, míni lan íri le. Pédro, o dǘbü. Lanúadiruniña Jesúsu Felípe lúma Natanaél lun lánime disípulugu

⁴³Larúgan, ába larítagun Jesúsu lídin loúbawagun Galiléa, ába ladúnragun lúma Felípe, ába laríñagun lun. —Falábana.

⁴⁴Felípe ligía, Betsáidana le ñí lubei gíñe lagánawa Andrés láu sun Pédro.

⁴⁵Ábati lídin Felípe áluajei Natanaél, ába laríñagun lun. —Aríja wamáali wügǘri le uágubei labǘrüja Moisés tídan líburu to lánina lilúrudun Búngiu, le gíñe uágubei jabǘrüja profétagu—Jesúsu le liraǘ José le Nazarétna.

⁴⁶Ába laríñagun Natanaél. —¿Níjein funági Nazarétna buíti? Ába laríñagun Felípe lun. —Jigábu baríja.

⁴⁷Dan le laríjin Jesúsu layárafadun Natanaél, ába laríñagun. —Nitén ában ladǘgawagun Israél le tímatimaati, úati yéguaü lídan.

⁴⁸Ába laríñagun Natanaél lun. —¿Ída liñági basúbudirunina? Ába laríñagun Jesúsu lun. —Aríja numútibu lubáragiñe lagúarun Felípe bun, dan le tábugiñeñadibu lan tídibu ígo.

⁴⁹Ábati laríñagun Natanaél lun. —Maésturu, amǘrü Liraǘbei Búngiu, amǘrü jarúeitebei Israelítagu.

⁵⁰Ába laríñagun Jesúsu lun. —¿Bafíñerunbei nun ladǘgarügü naríñagun bun luágu aríja nánibu tábugiñe tídibu ígo? Baríjubati cátei weínamutimáati lueí le.

⁵¹Aríñagati gíñe Jesúsu. —Ninárün jáu, luágu jaríjubei lan siélu junréñu, añájame láni Búngiu ánjeligu aweínja lúma arárija noúgiñe, áu le Wügǘri Garaǘwarügüti.