Read Garifuna San Juan 11 Bible Online

San Juan 11 - Garifuna bible

San Juan 11

¹Ñíñein ában wügǘri sánditi, gíriti Lázaro, lílana fulásu le gíribei Betánia, le tageíra María túma Márta to tíbugaña.

²María tugúya, to lítu Lázaro le sándibei, tugúya to éseruboun ibíñei luágun lugúdi Jesúsu, ába tarágajani láu tídiburi.

³Ábati joúnajan bián ítunu ja, aríñaga lun Jesúsu. —Jesúsu, sándiñeintia bumáda.

⁴Dan lagáambunbalin Jesúsu cátei le, ába laríñagun. —Mámabei oúweni lébeja cátei lídaangiñe sándi le, lúntibei larijíniwa luweírigun Búngiu, lúma gíñe lun larijíniwa luweírigun Liraǘ Búngiu lídaangiñe sándi ligía.

⁵Láu sun weíri lan jínsiñe Márta, María, lúma Lázaro lun Jesúsu,

⁶dan le jaríñawagúnbei lun luágu sándiñein lan Lázaro, reídeigili bián wéyu lídan fulásu le ñí lubei.

⁷Lárigiñe, ába laríñagun joun láni disípulugu. —Queímounya Judéa.

⁸Ábati jaríñagun lun. —Maésturu, málügili lueígiñe jálugun juríu jáfarunibu láu dǘbü ñi, ¿busényadibu bídin ñi?

⁹Ába laríñagun Jesúsu joun. —¿Ma dúusuñein óra lídan ában wéyu? Ánjein lubeíti eíbuga ában gürígia wéyuagu, machúgeragúnbei, ladǘga laríjubei lan larúgounga le yábei uboúagu,

¹⁰ánjein eíbuga áriebu, lachúgeraguba ladǘga lubúriga.

¹¹Lárigiñe, ába laríñagun Jesúsu joun. —Arúmuga wamáda Lázaro, neíbuga agágudajei.

¹²Ábati jaríñagun disípulugu lun. —Maésturu, ánjein arúmuga lubeí, lareídaguárügü líña.

¹³Míni lánti Jesúsu luágu jilá lan Lázaro, jarítagunti disípulugu luágu luágu lan furúmieguarügü arúmuguni ladímureja.

¹⁴Ábati laríñagun Jesúsu joun, furáangu. —Jilá Lázaro.

¹⁵Gúndaatina láu úa nan ñi, ladǘga buítimaati ítara jun, afíñe jumámuga. Queímoun waríjei.

¹⁶Ábati laríñagun Tomás, le únbei jaríñaga Mádou, joun jíbiri disípulugu. —Queímoun gíñe, jilá wamámuga úara lúma. Jesúsu ásaaragüdübei lídaangiñe oúweni, ligía íchiga ibágari

¹⁷Dan le lachǘlürünbei Jesúsu, gádürüjali wéyu lueígiñe labunún Lázaro.

¹⁸Lidíse Betánia lueí Jerusalén quei bián quilómetros dimí.

¹⁹Sarágu jáñati jádaangiñe juríu ñǘdüntiña Jerusaléngiñe bisídoun Márta túma María lun jíchugun ñurúguaü joun luágu loúnwen jamúlen.

²⁰Dan tagáambunbei Márta luágu níteeli lan Jesúsu achǘlüreina, ába táfuridun lubároun, ánjoun María, ába teréderun múnada.

²¹Ába taríñagun Márta lun Jesúsu. —Lun jamúga ya ban, moúnwenti jamúga namúlen,

²²áni subúditi nun luágu líchugubei lan Búngiu sun le bamúriajan lúma bun.

²³Laríñaga Jesúsu tun. —Labágaridayaba bamúlen.

²⁴Taríñaga Márta lun. —Ánja, subúditi nun luágu labágaridayaba lan lídaanme jásaarun jiláguaaña lídan lagúmujoún wéyu.

²⁵Ábati laríñagun Jesúsu tun. —Áu le ásaaragüdübaliña jiláaña, rúneí jabágari joun lárigoún. Le afíñeti nuágu, gayáraati loúnwen, labágaridayaba,

²⁶áni sun le wínwangilibei áni afíñeti nuágu, labágariduba gíñe lúma Búngiu súnwandan. ¿Afíñetibu?

²⁷Taríñaga lun. —Ánja, Nabúreme, afíñetiña luágu bugúya lan Crístubei le Liraǘ Búngiu, lé meja lúnbei liábin uboúagun. Layájun Jesúsu lubádu lumúaja Lázaro

²⁸Lárigiñe taríñaguni Márta le, ába tídin oúgoun María, ába taríñagun tun joúnguarügü. —Níjein Maésturu ya lún nege bídin lun.

²⁹Quei tagáambuni María cátei le, ába tásaarun, ába tídin furése aríjei Jesúsu.

³⁰Mebélugiliti Jesúsu ubúrugun, lídaañein fulásu le ñí lubei tadárirei Márta.

³¹Dan le jaríjinbei juríu ja ñíbaña múnada túma María ámalijoun tásaarun ába táfuridun furésegueina, ába joúdin tárigi, jarítagun luágu teíbuga lán yebe luágu umúajaü ayájua.

³²Dánti le tachǘlürünbei María le ñíjin lubeí Jesúsu, ába tájuduragun ligíbugiñe, ába taríñagun. —Nabúreme, lun jamúga ya ban, moúnwenti jamúga namúlen.

³³Dan le laríjin Jesúsu tayájun María jáma juríu ja ñǘbinbaña túma, ába lírudagun tídan lanígi,

³⁴ába laríñagun joun. —¿Jalíasan jábunei? Ába jaríñagun lun. —Jigábu baríjei.

³⁵Ába layájun Jesúsu.

³⁶Ábati jaríñagun juríu. —¡Aríja jumá luweírin meja línsiñe lun!

³⁷Ñíñanu jádaangiñe aríñagutiña. —Niján le aríjagüdübalin wügǘri le maríjinbei, ¿siñáti jamúga funásan ladǘgün lun moúnwen lan Lázaro? Lásaarun Lázaro lídaangiñe oúweni

³⁸Ábaya tírudagun lanígi Jesúsu, ába layárafadun lun umúajaü. Umúajaü ligía ában júyu luágu dǘbü, ñíñein ában dǘbü lidaǘme.

³⁹Ába laríñagun Jesúsu. —Gidájumei dǘbü. Ába taríñagun Márta lun. —Mósutia jíngiaali lan ladǘga gádürü wéyu lueígiñe loúnwen.

⁴⁰Ába laríñagun Jesúsu tun. —¿Másan aríñagatina bun luágu ánjabu lan afíñe nuágu, baríjubei lan luweírigun Búngiu?

⁴¹Ábati jagídaruni dǘbü, ába laríjin Jesúsu siélun, ába laríñagun. —Núguchi, teínqui numútibu luágu bagáambunina.

⁴²Subúdi numúti luágu agáamba bánina súnwandan, naríñaguñein líra jawágu gürígia ja, ja yábaña, lun jafíñerun luágu amǘrü lan oúnajabalina.

⁴³Lárigiñe laríñaguni cátei le, ába lagúaragun. —¡Lázaro, furíba ñígiñe!

⁴⁴Ába láfuridun jiláali láu lújabu lúma lugúdi gürágu táu gamísa, lúma ligíbu táu ában gamísa. Ába laríñagun Jesúsu joun. —Farára jumeí, ígira jumeí lun lídin. Elédeguni lun lárügüdǘniwa Jesúsu

⁴⁵Láu lasúseredun líra, sarágu jádaangiñe juríu ja ñǘdünbaña túma María, aríja jameí le ladǘgübei Jesúsu, ába jafíñerun luágu.

⁴⁶Ñíñanu jádaangiñe, ába joúdin jámoun fariséogu, ába jabájüdaguni le ladǘgübei Jesúsu joun.

⁴⁷Ábati jayábin fariséogu jáma jábutigu fádirigu, ába joúndaragun jáma jíñun-ágei agúmadijatiña, ába jaríñagun. —¿Cábasan wadǘga? Ladáaguñatia wügǘri le sarágu miláguru.

⁴⁸Ánjeinti wígira ítara, jafíñeruba sun gürígia luágu, ábameti jayábin gumádimatiña Rómana, ábame jagúmuchaguagüdünun walígilisin láu sun warásan.

⁴⁹Ñíñein ában jádaangiñe, gíriti Gáifasi, ligía jábutibei fádirigu lídan irúmu ligía, ába laríñagun joun. —Ibídiñeti ni cáta jun,

⁵⁰maríjin jumeí luágu buítima lan woun lun loúnwen ábanrügü wügǘri jawágu jíbiri, máma lun lagǘnrinchawagún sun warásan.

⁵¹Máma láu láni Gáifasi lúngua laríñagei líra, ladǘga quei ligía lan fádiri le íñutimaabei lídan irúmu ligía, ába laríñagagüdüni Búngiu lun, luágu loúweba lan Jesúsu jawágu juríu,

⁵²áni mámarügü jawágu juríu, lun giñe loúndaruniña sun lirájüñü Búngiu ja díseguabaña jawáriuagua.

⁵³Lúmagiñeti wéyu ligía, ába jagúmeserun agúmadijatiña aráanseja lun jáfaruni Jesúsu jilágubei.

⁵⁴Ligía ába lubeí meíbugunjaali lan Jesúsu furáangu jádan juríu, ába láfuridun Judéagiñe, ába lídin lídoun ában fulásu gíriti Efraín, yaráfa lun fulásu mageírawati. Ába leréderun ñi jáma láni disípulugu.

⁵⁵Yaráfaaliti jafédun juríu le gíribei páscua, sarágu jáña gürÍgia ñǘdün Jerusalén lun jadǘgüni igáburi le lánina jarúmadun lubáragiñe fédu ligía.

⁵⁶Jáluajañeinti Jesúsu, dánti le témpulurugúñanu lan, ába jálügüdajan jámagua. —¿Ca jaríñagubei? ¿Liábinba lídan fédu, ódi miábinbei?

⁵⁷Rújañati fariséogu jáma jábutigu fádirigu dimúrei lun le lan asúbudiruti jalíañein lan Jesúsu, lun lan laríñaguni, barǘ jamámugei adáüra.