Read Garifuna San Juan 13 Bible Online

San Juan 13 - Garifuna bible

San Juan 13

¹Ábanrügaali wéyu lubá fédu le páscua. Subúdi láali Jesúsu luágu chülǘja lan óra lun lígiruni uboú le lun lídin lúmoun Lúguchi. Súnwandan meja jínsiñe jamá lánigu ja uboúagubaña lun, guetó larúfuduñeinti línsiñejabu lídan luweírin-ágei.

²Dálaalíti Máfia larítagun tídoun lanígi Júdas Iscarióte lun ledéregeruni Jesúsu joun láganiñu. Jesúsu, láu sun subúdi láni luágu lúmagiñe lan Búngiu liábin, luágu lúmounba lan gíñe Búngiu lagíribuda, luágu gíñe rúlaali lan Úguchili sun cátei lújaburugun, ába larúfuduni luweírin-ágei ǘnabuni le luágubei. Dan lubeíti jadíneruña lan, ába lásaarun lueígiñe dábula, ába larágachunun gamísa to tigíbuaguboun ladáüragun, ába lagǘrün ában tuáya liránaagua.

⁵Ába líchugun dúna lídoun ában dabárasi, ába lachíbuni jagúdi disípulugu, ába larágachuni táu tuáya to liránaaguaboun.

⁶Dán yebe le lachíbaali lan lugúdi Simón Pédro, ába laríñagun lun. —Nabúreme, ¿bachíbaalisan nugúdi?

⁷Ába laríñagun Jesúsu lun. —Guetó, úati gunfaráanda báni le nadǘgübei, gunfaráanda bubeí lárigiñe.

⁸Ába laríñagun Pédro lun. —¡Machíbun bubeí nugúdi! Laríñaga Jesúsu lun. —Ánjein machíbun nan bugúdi, siñábei gafánran ban núma.

⁹Ába laríñagun Simón Pédro lun. —Mámarügülá nugúdi bachíba, chibábei gíñe nújabu lúma nigíbu.

¹⁰Laríñaga Jesúsu lun. —Le sun liñábei lágoun, lugúdi rügǘñein abúseera lachibúniwa, ladǘga jarúmati líbiri lúgubu. Jugúya, jarúmatün, mámarügü líña sun jugúya.

¹¹Le laríñagunbei luágu máma lan sun jagía jarúmatiña, ladǘga subúdi láni cába lan edéregerei.

¹²Lásun lachíbuni Jesúsu jagúdi, ábaya ladáürunun gamísa to larágachuboun, ábaya lañúurun luágu dábula, ába laríñagun joun. —¿Gunfaráanda jumútisan le nadǘgübei jun?

¹³Jugúya agúajatün nun Maésturu, lúma Nabúreme, áni richátün ladǘga áu ligía,

¹⁴ánjeinti chibá nubálin jugúdi láu sun Jumáesturun nan áni Jabúreme, lúnti gíñe jachíbuni jugúdi júmagua.

¹⁵Rújadina ában jémpulu jun lun jadǘgüni líbe méme le nadǘgübei.

¹⁶Ninárün jáu luágu míñugun lan ni ában músu lueí liyúbudiri, ni ában le oúnajoúti lueí le oúnajabalin.

¹⁷Ánjein gunfaráanda jumá buri cátei le áni adǘga jumeíme, gúndaabadün.

¹⁸‘Mámatia nadímurejaña juágu sun jugúya, subúdi numútiña cátaña lan nanúadirubaña lun nánigume le tímatimaati. Áni lúnti lagúnfulirún le tídaanbei Lerérun Búngiu. “Garábagua le eígubei núma, nuágun.”

¹⁹Naríñaguñein le jun lubáragiñe lasúseredun, lun dánme lan le lasúseredun, afíñe jumámuga luágu áu lan Crístubei.

²⁰Ninárün jáu luágu le lan erésibiruti le noúnajan, resíbi lumútina gíñe, áni le erésibirutina, resíbi lumúti gíñe le oúnajabalina. Ladímurejani Jesúsu luágu ledéregerubei lan Júdas

²¹Lásun laríñaguni Jesúsu sun cátei le, ába lasándirun sarágu íruni tídan lanígi, ába laríñagun furáangu. —Ninárün jáu luágu ledéregerubadina lan ában jídaangiñe.

²²Ábati jagúmeserun disípulugu aríagua jawoúguoún, ibídiñounga joun ca lan jádaangiñe uágubei ladímureja Jesúsu.

²³Áu Juan, le abǘrüjabarun gárada to, ában jádaangiñe disípulugu, le weíribei ínsiñe lun Jesúsu, loúbagiñeñádina lídan adíneruni,

²⁴ába ladǘgün Simón Pédro seíni nun lun nálügüdüni Jesúsu ca lan jádaangiñe uágubei ladímureja.

²⁵Ábati nayárafaduntima lun Jesúsu, ába naríñagun lun. —Nabúreme, ¿cáteisan lúnbei ledéregerunibu?

²⁶Ába laríñagun Jesúsu nun. —Nadǘdüragüda murúsun fein, le únti níchigoun, ligíaba edéregerana. Ábati ladǘdüragüdün murúsun fein, ába líchugunun lun Júdas Iscarióte, le liraǘ Simón.

²⁷Quei lárügüdünun Júdas fein tugúya, ítara lebélurun Máfia tídoun lanígi. Ábati laríñagun Jesúsu lun. —Le lúnbei badǘgüni, adǘgabeí furése.

²⁸Úati gunfaráanda láni ni ában jádaangiñe ja eígibaña luágu dábula ca lan uágu laríñagei Jesúsu líra lun.

²⁹Quei Júdas lubeí táubei lágei seínsu, sun jaríñagun yebéti laríñaguña Jesúsu lun lun lagáñijani le jabúseerubei lubá fédu, o lun lan líchugun seínsu joun gudémetiña.

³⁰Lárigiñe leíginun Júdas fein, ába láfuridun. Gúñeeli óra ligía. Iséri gumádi

³¹Lárigiñe láfuridun Júdas, ába laríñagun Jesúsu. —Larijúa nuweírigun, áu le Wügǘri Garaǘwarügüti, guetó, arijúame luweírigun Úguchili nuágu.

³²Ánjeinti arúfuda nubálin luweírigun Búngiu, larúfudubei gíñe Búngiu nuweírigun, áni ladǘgübei madíse.

³³Nirájüñü, úaadináme júma sarágu dan. Jáluajabadina, le méme naríñagubei joun juríu naríñagayaali jun guetó. Siñábei jídin le ñíjinba lubeí nídin.

³⁴Níchigaali iséri gumádi le jun. lun jínsiñegua jumá júngua. Ítara quei jínsiñe nun, lúnti gíñe jínsiñegua jumá júngua.

³⁵Ánjaün jínsiñegua júngua, jasúbudirubei sun gürígia luágu náni jumá disípulugu. Ladímurejani Jesúsu luágu leyéedaguba lan Pédro luágu

³⁶Ába laríñagun Simón Pédro lun Jesúsu. —¿Jalíñounbadibusan, Nabúreme? Ába laríñagun Jesúsu lun. —Siñáti bafálarunina le ñíjinbadina lubeí guetó, lachǘlürüba wéyu lun bafálarubadina lan.

³⁷Laríñaga Pédro lun. —¿Ca uágu siñá lubei nafálarunibu guetó? Aráanseedina lun níchuguni nibágari buágu.

³⁸Laríñaga Jesúsu lun. —¿Binárün luágu aráanse ban lun bíchuguni bibágari nuágu? Ninárün báu luágu beyéedaguba lan náu ǘrüwa weíyaasu lubáragiñe layúgurujan gáyu.