Read Garifuna San Juan 18 Bible Online

San Juan 18 - Garifuna bible

San Juan 18

¹Lárigiñe laríñaguni Jesúsu cátei le, ába láfuridun jáu láni disípulugu lun joúdin loubáfurugun dúna le cedrón. Ñíñein ában fulásu lé buri ñí lumuti tídibu olívos, ñíjin lubeí lebélura Jesúsu jáu láni disípulugu.

²Subúdi lumúti gíñe Júdas le alúgurubalin Jesúsu, fulásu ligía, ladǘga oúndaraguañajaali Jesúsu ñi jáma láni disípulugu.

³Ába lubeíti lachǘlürün Júdas ñíjin jáu sarágu súdaara jáma polisía ja tánina témpulu, joúnajan jábutigu fádirigu jáma fariséogu. Gárumatetiña, barǘtiña gíñe lámpu lúma tóchi.

⁴Quei subúdi láali lan Jesúsu le lúnbei lasúseredun lun, ába láfuridun, ába laríñagun joun. —¿Ca jáluajabei?

⁵Ába jaríñagun lun. —Wáluajañein Jesúsu le Nazarétna. Laríñaga Jesúsu joun. —Áu Jesúsu ligía le jáluajabei. Ñíñeinti Júdas le edéregerubalin jáma.

⁶Dan laríñagunbei Jesúsu joun luágu ligía lan le jáluajabei, ába jeíguadunga múarugún janagoún.

⁷Ábaya laríñagun Jesúsu joun. —¿Ca jáluajabei? Ába jaríñagun lun. —Wáluajañein Jesúsu le Nazarétna.

⁸Ábati laríñagun Jesúsu joun. —Aríñagaadinatia jun luágu áu lan. Ánjein áu lubeí jáluajabei, ígira jumáña ja lun joúdin.

⁹Lasúseredunbei líra lun lagúnfulirun le laríñagubei Jesúsu guánarügü. “Meféridirúnti ni ában jádaangiñe ja líchugubaña Núguchi nun.”

¹⁰Ábati laságarunun Simón Pédro lefeínte, ába líbuguni larígei ában lumúsun fádiri le íñutimaabei gíriti Málco.

¹¹Ába laríñagun Jesúsu lun Pédro. —Dáboun befeínte tárigoún. ¿Jarítaguatibu funági luágu moun lan nasúfuriruni oúchawagúni le líchugubei Núguchi lun nasúfuriruni? Jesúsu ligíbugiñe fádiri le íñutimaabei

¹²Ábati janǘgüni súdaara, lúma gumándan, jáma japolisían juríu, Jesúsu adáüra, ába jagǘraguni.

¹³Lárigiñe, ába janǘgüni lúbiñoun Anás. Anás ligía limédamurubei Gáifasi, fádiri le íñutimaabei lídan irúmu ligía.

¹⁴Gáifasi ligía, le méme meja aríñagubei joun juríu luágu buítima lan joun lun loúnwen ában wügǘri jawágu sun mútu. Leyéedagun Pédro luágu subúdi láni Jesúsu

¹⁵Ába woúdin, áu Juan lúma Simón Pédro, lárigi lárigi Jesúsu. Áu, subúditina lun fádiri le íñutimaabei, ábati nebélurun lúma Jesúsu lídoun tübǘrürü lúban fádiri,

¹⁶ánjeinti Pédro, ába leréderun boúgudi luágu béna. Ligía náfuridunbei, ába nadímurejan túma to oúnigirubalin béna, ába nebélaagüdüni Pédro.

¹⁷Ábati tálǘgüdüni oúnigirutu béna Pédro. —¿Ma bugúya ában jádaangiñe láni gürígia le disípulugu? Laríñaga Pédro. —Uá, máma áu.

¹⁸Queíti dilíga lubeí, fúguatiñati músu jáma polisía wátu, rára jañáti ñi abácharagua. Ñíñein gíñe Pédro jáma, abácharagua larǘgürügü wátu. Lálügüdaguni fádiri le íñutimaabei Jesúsu

¹⁹Ába lagúmeserun fádiri le íñutimaabei álügüdaguei Jesúsu cátaña lan lánibaña disípulugu, cátei lan gíñe larúfudajabei.

²⁰Laríñaga Jesúsu lun. —Boúgudi nadímureja ligíbugiñe sun uboú, súnwandan narúfudajan tídan ligílisi lúma témpulurugu le ñí lubei joúndaragua sun juríu, madǘgüngidina lubeíti ni cáta arámudaguati.

²¹¿Ca uágu bálügüdana? Álügüda báña ja agáambubalina, jagíalá aríñagei le uágubei nadímureja joun. Subúdi jamúti le naríñagubei joun.

²²Dan laríñaguni Jesúsu cátei le, ába liábin ában jádaangiñe polisía ja tánina témpulu, ába lagáyuajan ligíbuagun, ába laríñagun lun. —¿Ítara lúba boúnabuni fádiri le íñutimaabei?

²³Laríñaga Jesúsu lun. —Ánjein aríñaga nubeí wuríbati, aríñagabeí jalíañein lan luríban, ánjeinti buídu lubeí le naríñagubei, ¿ca uágu bagáyuaja nuágu?

²⁴Ábati loúnajani Anás gürágu lun Gáifasi, fádiri le íñutimaabei lídan irúmu ligía. Leyéedagunya Pédro luágu Jesúsu

²⁵Sun dan le, nijágua Pédro abácharagua larǘgürügü wátu, ába jaríñagun lun. —¿Másan amǘrü ában jádaangiñe láni gürígia le disípulugu? Ába leyéedagun Pédro, ába laríñagun. —Uá, máma áu.

²⁶Ábati lálügüdüni ában jádaangiñe lumúsuniña fádiri le íñutimaabei, ában lidúje le líbugubei Pédro arígei. —¿Máfunagi aríja numútibu lúma lídan fulásu lé buri ñí lumuti tídibu olívos?

²⁷Ábaya leyéedagun Pédro, lídan óra ligía, ába layúgurujan gáyu. Jesúsu ligíbugiñe Piláto

²⁸Ábati janǘgüni Jesúsu lúbiñegiñe Gáifasi lun lúbiñoun gumándan. Arúgadeina liñáti, mebélutiñati juríu palásiurugún lueí marúma jamá, siñáme gádan lániña adíneruni le lánina páscua.

²⁹Ligía láfuridunbei Piláto lun ladímurejan jáma, ába laríñagun joun. —¿Cásan lidúnrunbei gürígia le jurúma?

³⁰Ába jaríñagun lun. —Lun jamúga madǘgün lan wuríbani, medéregerun wamúti jamúga bun.

³¹Ábati laríñagun Piláto joun. —Barǘjumei, agúseragüda jumeí quei laríñaguni jilúrudun guánarü. Jaríñaga juríu lun. —Wagía juríu, maríchatiwa lun wáfarun ni ában jilágubei.

³²Ítara líña lagúnfulirún le laríñagubei Jesúsu luágu ligáburi ída lúba lan loúnwen.

³³Ábaya lebélurun Piláto palásiurugun, ába lagúarun lun Jesúsu, ába laríñagun lun. —¿Amǘrü Jarúeitebei Juríu?

³⁴Ába laríñagun Jesúsu lun. —¿Luágu báni búngua bálügüdaja luágu líra, ódi ladǘga jaríñaguni ámu bun nuágu?

³⁵Laríñaga Piláto lun. —¿Juríu funági áu? Binásiñun jáma jábutigu fádirigu, jagía edéregerubalibu nun. ¿Cági bidúnrunbei?

³⁶Ábati laríñagun Jesúsu lun. —Narúeijan máma lánina uboú le, lun jamúga ítara líña lan, jageíndaguña jamúga nánigu lun medéregerúniwa nan joun juríu. Máma yána narúeijan.

³⁷Ábati laríñagun Piláto lun. —¿Urúei lubeíti amǘrü? Laríñaga Jesúsu lun. —Urúei áu quei baríñaguni. Agǘriajoúatina, ñǘbin áu lídoun uboú le lun naríñaguni le inárünibei. Sun ja gagáambadibaña lun inárüni, agáamba jamúti le naríñagubei.

³⁸Laríñaga Piláto lun. —¿Cáteiti inárünibei? Lasíadirúniwa Jesúsu lun oúweni

³⁹Quei jéchu jumá lun nígiragüdün ában adaürǘti jun lídan fédu le láni páscua, ¿buséntün lun náfuridagüdüni Jesúsu le jarúeitebei juríu?

⁴⁰Ábaya jagúaragun sun jagía. —¡Mígiragüdabeí le! ¡Barabáslá bígiragüda! Barabási ligía, ában jíwer uti.