Read Garifuna San Juan 4 Bible Online

San Juan 4 - Garifuna bible

San Juan 4

¹Aba jagáambun fariséogu luágu gíbetima jamá lánigu Jesúsu sügǘ jáu lánigu Juan, áni gíbetima gürígia ñǘbintiña lun, lun jabásterun,

²láu sun máma lan Jesúsu abásteragüdajabaliña, lánigu abásteragüdajabaña.

³Dan le lasúbudirunbalin Jesúsu cátei le, ába láfuridun Judéagiñe lun lagíribudun Galiléoun.

⁴Lídan weíyaasu ligía lásügürübati loúbawagugiñe Samária.

⁵Ítara liñáti lachǘlürün lídoun ában fulásu lídan Samária gíriti Sícar, yaráfa lun múa lé meja lígirubei Jacób lun José le liraǘ, le ában jádaangiñe binádu wagǘbürigu.

⁶Ñíñein wélu le únbei jagúara luwélun Jacób, queíti buchá lan luágu Jesúsu eíbuga, ába lañúurun láru wélu ligía. Queí buri amídirugu óra ligía.

⁷Tiábijati ában wǘri Samariána adábura dúna lídaangiñe wélu le, ába laríñagun Jesúsu tun. —Rúba dúna nun.

⁸Añángüratí buga láni disípulugu agáñija eígini ubúrugu.

⁹Ábati taríñagun wǘri Samariána to lun Jesúsu. —¿Ída liñági bamúriajanbei dúna núma, lárigiñe juríu ban, nugúya Samariána? (Mínsiñeguatiñati juríu joúngua jáma Samariána.)

¹⁰Aba laríñagun Jesúsu tun. —Lun jamúga subúdi báni edéweejani le líchugubei Búngiu, subúdibeí jamúga cátei lan le amúriajabei dúna búma, bamúriajaña jamúga núma, ába jamúga níchugun ában luwúyeri dúna le gayáraati líchugun ibágari bun, bun.

¹¹Ába taríñagun lun. —Úagubeíti cába lan áu badábura dúna áni julíliti wélu le, ¿ída lubáti bíchuguni luwúyeri dúna ligía nun?

¹²Jacób, lé meja binádu wadǘgawagun, ígirubalin wélu le woun, guráti meja dúna lídaangiñe jáu sun lirájüñü jáma lilǘgüniña. ¿Weírigutibu funági sügǘ láu Jacób?

¹³Ába laríñagun Jesúsu tun. —Sun ja átubaña lídaangiñe dúna le, jamágürabudayaba,

¹⁴ánjein le átuti lídaangiñe dúna le níchugubei, mamágürabudundügüyaali, ladǘga dúna le lúnbei níchuguni lun, géseséenbei lídan lun líchugun ibágari magúmuchaditi lun.

¹⁵Ábati taríñagun lun. —Rúbei dúna ligía nun, masándirundügǘyaadina lámuga mágürabu, miábin nugúyame ya wélurugu adábura dúna.

¹⁶Ába laríñagun Jesúsu tun. —Beíba oúgei búmari le úmabei bamárieida, ábame biábin.

¹⁷Ába taríñagun lun. —Mámaritina le maríeitina lúma. Ábati laríñagun Jesúsu tun. —Binárün láu baríñagun luágu mámari ban le maríeiti búma,

¹⁸ladǘga seíngüjáña wügǘriña úmatiña bagánawa, áni mamárieiduntibu lúma wügǘri le úmabei bagánawa guetó. Aríñagaadibu inárüni.

¹⁹Dan tagáambubalin wǘri to cátei le, ába taríñagun lun. —Afíñetina luágu proféta ban.

²⁰Binádu wagǘbürigu ja Samariána, judúguatiña meja lun Búngiu ya luágu wǘbü lígita, ánjein jugúya juríu, aríñagatün luágu Jerusalén lan fulásu le lúnbei ñi lan wájuduragua lun Búngiu.

²¹Ába laríñagun Jesúsu tun. —Afíñebá nun luágu nítebei lan dan lun jájuduragun lun Búngiu mídinga jugúya luágun wǘbü lígita, ni jídin Jerusalén.

²²Jugúya Samariána, ibídiñeti jun ca lan un jájuduragua, ánjein wagía, subúdi wamúti ca lan un wájuduragua ladǘga lídaangiñe warásan wagía juríu liábin asálbaruni.

²³Lachǘlürüba óra, áni niján óra ligía, lun mebéresenwa lan jalía lan jájuduragua gürígia lun Búngiu. Le lúnbei lebéreserunwa láu, ída líña lan ligáburi jájuduragun lun. lúnti jadǘgüni táu sun janígi lídan ában luwúyeri le áuti lagúndaara Búngiu, según lerérun. Niján luwúyeri ájuduraguni le láluajabei Búngiu jámagiñe gürígia.

²⁴Espíritu Búngiu, ja ájuduragubaña lun, lúnti jadǘgüni láu sun janárün, mebéresenga láu cátei le arijúati.

²⁵Ába taríñagun lun. —Subúditi nun luágu liábinba lan Mesías le gíribei Crístu, dánmeti liábin, lafúnraanguagüdübei sun cátei woun.

²⁶Ába laríñagun Jesúsu tun. —Áu Mesías ligía.

²⁷Ligíati jachǘlürün láni disípulugu, ába laweíridun janígi láu jadáriruni Jesúsu adímureja túma ában wǘri, úati ni ában ganígiti lun lálügüdajan ca lan tabúseerubei o ca lan uágu layánuja túma.

²⁸Ábati tígirunun wǘri tugúya tidína, ába tídin ubúrugu oúgaña gürígia, ába taríñagun joun.

²⁹—Jigoúgu jaríja ában eyéri aríñaguti sun cátei le adǘga náalibei nun. ¿Mámadügü funásan ligía Crístubei?

³⁰Ábati joúdingua ubúrugugiñe lun le ñíjin lubeí Jesúsu.

³¹Añájati buga disípulugu ayúmuragua lun Jesúsu lun leígin.

³²Laríñaga joun. —Níjein cátei lun neígini le ibídiñeti jun.

³³Ábati jagúmeserun disípulugu álügüdagua jámagua, ába jaríñagun. —¿Máfuna barǘjaña eígini lun?

³⁴Ába laríñagun Jesúsu joun. —Nadǘgüni lugúndan le oúnajabalina, agúmuchei luwádigimari, ligía neíginbei.

³⁵Jugúya aríñagatün. “Níjeingua gádürü játi lubá alúbajani.” Ánjein áu, naríñajare jun. Aríja jumeí nádü, dánjali lun lalúbajoún.

³⁶Le ñadágimeinbei alúbaja, ibíja lumúti lafáyeiruaja, áni cáteiti le lalúbajabei, gürígia, lun jabíjini ibágari le magúmuchaditi siélu, lun lagúndaarun le ábunagubei úara lúma le alúbajabei.

³⁷Quei le lubeíbei laríñawagún. “Ámu le ábunagubei, ámu le alúbajabei.”

³⁸Oúnaja náadün alúbaja le ñí lubei mábunagun jumá, ámu ábunagubaña, jugúya alúbaja.

³⁹Sarágu jáña lílana fulásu ligía le láni Samária afíñerutiña luágu Jesúsu láu taríñagun wǘri tugúya joun luágu aríñaga láni sun le adǘga táalibei tun.

⁴⁰Dánti le jachǘlürünbei Samariána le ñí lubei Jesúsu, ába jayúmuragun lun lun leréderun jáma. Ába leréderun bián wéyu ñi,

⁴¹ábaya jafíñerun sarágu gürígia dan le jagáambunbalin le laríñagubei.

⁴²Ábati jaríñagun tun wǘri tugúya. —Mámarügaali luágu le baríñagubei woun wafíñera, ladǘga agáamba wamáali gíñe lúmagiñe, áni subúdi wamúti luágu ligía lan Crístubei le lasálbaja ubóu. Lareídaguagüdüni Jesúsu liraǘ ában ñadágimeinti lúma urúei

⁴³Bián wéyu lárigiñe, ába láfuridun Jesúsu Samáriagiñe, ába lasígiruni luweíyasun loúbawagun Galiléa,

⁴⁴mídinti lageíra quei laríñaguni Jesúsu guánarü luágu madügǘniwa lan gásu láu ában proféta lídan guánarü lageíra.

⁴⁵Dan lachǘlürünbei Galiléa, resíbi jamúti lílana fulásu buídu, ladǘga ñǘdün jamá gíñe lídan fédu le lánina páscua Jerusalén áni aríja jamúti sun le ladǘgübei lídan fédu ligía.

⁴⁶Ábayati lagíribudun Jesúsu lídoun fulásu le Caná le lídaanbei Galiléa, le ñí lubei lasáliraguagüda dúna lun diweínme. Ñíñeinti ában wügǘri weíriguti, ñadágimeinti lúma urúei, níjein ában liraǘ sánditi lídan fulásu le gíribei Capernaúm.

⁴⁷Dan lagáambunbei wügǘri ligía luágu ñǘbinjali lan Jesúsu Judéagiñe lun Galiléoun, ába lídin aríjei, ába layúmuragun lun lun lídin lúbiñe lun lareídaguagüdüni liraǘ, ladǘga madíseeli lan lun loúnwen.

⁴⁸Ába laríñagun Jesúsu lun. —Jugúya, ánjaün maríjin miláguru, mafíñetün.

⁴⁹Laríñaga wügǘri ligía lun. —Queímoun furése lubáragiñe loúnwen niraǘ.

⁵⁰Ábati laríñagun Jesúsu lun. —Giríbubá búbiñoun, areídagua biraǘ. Ába lafíñerun wügǘri ligía luágu le laríñagubei Jesúsu lun, ába lídin.

⁵¹Dan layárafadun tun lúban, ába jayábin lumúsuniña lubároun, ába jaríñagun lun. —Magádieeli biraǘ.

⁵²Ába lálügüdüniña ca lan óra lagúmesera liraǘ areídagua, ába jaríñagun lun. —Gúñaarü ladaǘnrün ában rábounwéyu lagídara abíruaü lueí.

⁵³Ába larítaguni luágu ligía lan óra laríñagun Jesúsu lun luágu areídaguaali lan liraǘ, ába lafíñerun luágu Jesúsu jáu sun lufámilian.

⁵⁴Ligía libíaman miláguru le ladǘgübei Jesúsu dan le lagíribudunbei Judéagiñe lun Galiléoun.