Read Garifuna San Juan 7 Bible Online

San Juan 7 - Garifuna bible

San Juan 7

¹Lárigiñe sun cátei le, ába eíbugañaja lan Jesúsu loúbawagu Galiléa, mabúseerunti leréderun Judéa ladǘga ñi buséntiña juríu jáfaruni jilágubei.

²Queíti yaráfaali lan ában lídaangiñe jafédun juríu le gíribei tufédun dibásein,

³ába jaríñagun lamúlenu lun. —Meréderabá ya, beíba Judéoun aríja jamámugei gíñe bánigu ja ñíbaña cátei lé buri badǘgübei.

⁴Dan le busén lan ában gürígia lasúbudirúniwa, madǘgün lumúti buri cátei arámudaguarügü. Queíti adǘga ban cátei líbeina le, adǘgabeí ligíbugiñe sun uboú.

⁵Ni íbini lamúlenu mafíñetiña luágu.

⁶Ábati laríñagun Jesúsu joun. —Machǘlügili dan lun nídin Jerusalén luágu fédu ligía, ánjein jun, buíti furúmierügü óra.

⁷Siñáti jiyéreegudún joun ja lánina uboú le, anáti áu, iyéreegutina joun, ladǘga geféentina luágu wuríba lán buri cátei le jadǘgübei.

⁸Jeíba lídan fédu, áu mídinbadina guetó, machǘlügili nidáani lun nídin.

⁹Lárigiñe laríñaguni sun le joun, ába leréderun Galiléa. Jesúsu lídan fédu le tánina dibásein

¹⁰Lárigiñe joúdin lamúlenu, ligía lídin Jesúsu lídan fédu ligía, mafúnraangunrügü líña, camá jamuga mabúseerunti larijoúniwa.

¹¹Ítara líña jáluajani juríu lídan fédu ligía, ába jaríñagun. —¿Jageí funásan wügǘri le?

¹²Sarágu jañáti adímurejatiña luágu jádan gürígia. Ñíñanu aríñagutiña luágu ában lan wügǘri buíti ligía, jíbiri aríñaga. “Mabuídunti, yéegua lumútiña gürígia.”

¹³Úati ni ában adímurejati furáangu luágu, ladǘga janúfude jaweí juríu.

¹⁴Lamídounjali fédu lúmagua, ligía lebélurun Jesúsu témpulurugun, ába lagúmeserun arúfudaja.

¹⁵Ába laweíridun janígi juríu, ába jaríñagun. —¿Ída liñásan lasúbudirunbei le sarágu cátei, matúriajaanga ligía?

¹⁶Ába laríñagun Jesúsu joun. —Le narúfudajabei, máma nídaangiñeti, lídaangiñeti le oúnajabalina.

¹⁷Ánjein níjein lubeí ában le aráanseti lun ladǘgüni le labúseerubei Búngiu, lasúbudirubei ánjein lúmagiñeti lubeí Búngiu le narúfudajabei lúmoun luágu lan náni núngua nadímureja.

¹⁸Le adímurejabei luágu láni lúngua, ladǘgüni lun janǘgüni gürígia weíri, le oúchubei lun lanügǘniwa le oúnajabalin weíri, ligía aríñagubalin inárüni, áni máma ligía biángua tigíbu.

¹⁹‘¿Ma inárüni luágu rúlaani Moisés lúrudu jun? Láu sun líra, úati ni ában jídaangiñe úaraduti lúma lúrudu ligía. ¿Ca uágu jabúseera jáfarunina jilágubei?

²⁰Ába jaríñagun lun. —Níjein espíritu wuríbati bídan, ¿ca busénbei láfarunibu jilágubei?

²¹Ába laríñagun Jesúsu joun. —Luágurügü ában cátei le nadǘgübei lídan wéyu le eméraaguagülei laweírida janígi sun jugúya.

²²Arúfudaja lumúti Moisés luáguti jagáburi juríu le circuncisión, (láu sun máma lan ligía agúmeserubalin igáburi ligía, jagúmeserun binádu lagǘbürigu lubáragiñe), ligía lébubei lerésibirun ában irájü circuncisión íbini lídan lan wéyu le eméraaguagülei.

²³Ánjein adǘga jubálin líra íbini lídan lan wéyu le eméraaguagülei lueírügü jadǘraaguni lilúrudun Moisés, ¿cáti uágu jagáñida núma lueígiñe nareídaguagüdüni lúgubu ában wügǘri dayárugubei lídan wéyu le eméraaguagülei?

²⁴Masáminara jumá luágu cátei quéisi larijíniwa, samína jumá luágu quéisi lubeí. Ladímurejan Jesúsu luágu ladǘgawagún

²⁵Ábati jagúmeserun jádaangiñe ja aganoúbaña Jerusalén álügüdaja. —¿Másan niján le jáluajabei lun jáfaruni jilágubei?

²⁶Nijánga adímureja ligíbugiñe guríriguaü, áni úati ni ában aríñaguti ni cáta lun. ¿Léfunasan afíñe jamá gumádimatiña luágu wügǘri lan le Crístubei?

²⁷Subúditi woun jalíagiñe lan liábin le, ánjeinti dánme le liábin Crístu, ibídiñebei ni ca un jalíagiñe lan liábin.

²⁸Dan lagáambubalin Jesúsu cátei le, dan larúfudajaña lubeí témpulurugu, ába laríñagun rein. —¡Subúdi jumútina lubeíti, subúdi jumeí jalíagiñe lan niábin! Máma láu náni núngua niábin, ában le inárünibei luágu níjein lan, ligía oúnajabalina, áni ibídiñeti jun.

²⁹Áu, subúdi numúti ladǘga lúmagiñe lan niábin, áni ligía oúnajabalina.

³⁰Ába yebéti jabúseerun jadáürüni, úati ni ában agúuruti luágu ladǘga machǘlügili lan dan lun loúnwen.

³¹Sarágu jáña afíñerutiña luágu, ába jaríñagun. —Dánme le liábin Crístu, ¿ladǘgüba funági ámu miláguru sügǘ láu wügǘri le? Joúnajan fariséogu polisía adáürei Jesúsu

³²Ába jagáambuni fariséogu le jaríñagubei gürígia luágu Jesúsu, jagía jáma jábutigu fádirigu, ába joúnajan polisía témpulurugugiñe lun jadáürüni.

³³Ábati laríñagun Jesúsu. —Murúsunrügübei dan neréderun júma ya, ábame nagíribudun lúmoun le oúnajabalina.

³⁴Jáluajabadina, madári jubádina, ladǘga siñábei lan jídin le ñíjinbadina lubeí.

³⁵Ábati jagúmeserun juríu álügüdagua jámagua. —¿Jalíñounba funásan lídin le siñábei lubeí nege wadáriruni? ¿Leíbuga funa jámoun juríu ja jagánaguabaña gürígia ja güriégu, lun larúfudajan joun güriégu?

³⁶¿Ca míni lan láu laríñagun woun. “Jáluajabadina, madári jubádina ladǘga siñábei lan jídin le ñíbadina lubeí”? Líseesen dúna wínwanti

³⁷Le lagúmujoún wéyu lídan fédu ligía, ligíatima weírigubei. Lídaanti wéyu ligía, ába laráramun Jesúsu, ába laríñagun láu umálali reínti. —Le mágürabutu luwáni, ñǘbinlá númoun, gurála.

³⁸Le afíñeti nuágu, láwiyujaba dúna wínwanti tídaangiñe lanígi, quei taríñaguni Lerérun Búngiu.

³⁹Laríñaguña Jesúsu láu líra luágu ja lan afíñerutiña luágu, jerésibirubei lan Sífiri Sándu, dan ligía, miábingili Sífiri Sándu ladǘga magíribudungili lan Jesúsu larigoún siélun lídoun luweírigun. Fánreinguaü jádan gürígia

⁴⁰Ñíñanu jádaangiñe gürígia, dan le jagáambunbalin cátei le, ába jaríñagun. —Inárüni luágu niján lan proféta lé meja lúnbei liábin.

⁴¹Jaríñaga jíbiri. —Niján Crístubei. Jaríñaga jíbiri. —¿Ída lubásan Galiléanabei lan Crístu?

⁴²Taríñajare Lerérun Búngiu luágu ladǘgawagunbei lan urúei Davíd Crístu, áni Beléngiñetibei lan, fulásu meme le ñígiñeti lubeí Davíd.

⁴³Ába lubeíti jafánreinragun gürígia lueígiñe Jesúsu.

⁴⁴Ñíñanu yebe abúseerutiña jadáürüni, úati ni ában adǘgüti. Mafíñetiña gumádimatiña luágu Jesúsu

⁴⁵Ába jagíribudun polisía ja tánina témpulu jarigoún jámoun fariséogu jáma jábutigu fádirigu. Ába jaríñagun joun polisía. —¿Ca uágu manǘgün jubálin?

⁴⁶Ába jaríñagun polisía. —¡Úagili ni ában adímurejati quei ladímurejan wügǘri le!

⁴⁷Ábati jaríñagun fariséogu joun. —¿Ígiraguagüdaadün gíñe júngua lun leyéedunün?

⁴⁸¿Níjein funági ában jádaangiñe wábutigu o jádaangiñe lan fariséogu afíñeruti luágu?

⁴⁹Ánjaña gürígia ja, ja afálarubalin wügǘri ligía, ja ibídiñejabubaña lun lúrudu, íñarawagúaaña.

⁵⁰Nicodémo, le ñǘdünbei adímureja lúma Jesúsu gúñoun, ligía ában jádaangiñe fariséogu, ába laríñagun joun.

⁵¹—Según walúrudun, siñáti wasíadiruni ában wügǘri magáambunga wameí furúmiñe lun wasúbudiruni ca lan lidúnrunbei.

⁵²Ábati jaríñagun lun. —¿Galiléana gíñe amǘrü, badímurejaanbei luágu lufúleisein? Atúriajaboún Lerérun Búngiu, basúbudirubei luágu úagili lan ni ában proféta Galiléana.

⁵³Ába joúdin cáda ában jábiñoun.