Read Garifuna Hechos 2 Bible Online

Hechos 2 - Garifuna bible

Hechos 2

¹Dan lachǘlürünbei luwéyuri fédu le Pentecostés, oúndaragu jáña sun lánigu Jesúsu lídan ában fulásu.

²Sódini ába lagaambún ában ireíni ñǘbinti siélugiñe quei dan le láfurun ában garábali jéreti, ába lagaambún tídan sun múna to ñí jabei.

³Ábati lasáliragún buri cátei joun camá ligémeri wátu, afánreinjoúañu lun ñi lan ában murúsun loúgiñe lábulugu cáda ában jádaangiñe.

⁴Ába jabuínchun sun jagía láu Sífiri Sándu, ába jagúmeserun adímureja lídan buri ámu luwúyeri dimúrei lueí jerérun quei ladímuregüdüniña Sífiri Sándu.

⁵Lídoun buri dan ligía, ñíburiñanu juríu Jerusalén ja gúnfulitiña lídan jafíñen, ñǘbintiña lídaangiñe sun fulásu uboúagu.

⁶Dan le jagáambunbalin ireíni ligía, ába joúndaragunga gürígia, ibídiñeja joun cába lan jasáminara ladǘga cáda ában jádaangiñe gürígia jagía, agáamba jamútiña lánigu Jesúsu adímureja lídan jerérun guánarü.

⁷Ába laweíridun janígi, ába jaríñagun jámagua. —¿Ma funági Galiléana ja adímurejabaña?

⁸¿Ída liñáti wagáambubaliña adímureja lídan lerérun cáda ában wádaangiñe?

⁹Añájein gürígia Pártiana ya, Médiana, Elámna, Mesopotámiana, Judéana, Capadóciana, Póntona jáma Ásiana,

¹⁰Fríjiana, Panfíliana, Ejíptona lúma lídaangiñe buri fulásu África le yagǘroun mémebei lueí Ciréne. Añájein giñe Rómana aganoútiña ya, añájein jádaangiñe, juríu ladǘga juríu jamá jagǘbürigu, jíbiri, barǘ jamaali ligáburi jafíñen juríu.

¹¹Añájein gíñe gürígia Crétana jáma Arábiana, sun wagía agáamba wamútiña adímureja luágu luweírigun Búngiu lídan werérun guánarü.

¹²Weíriti janígi súngubei, ibídiñeja joun cába lan jasáminara, ába buri jálügüdagun jámagua. —¿Cásan míni lan sun le?

¹³Jíbiri, ába jéjerajan jáu lánigu Jesúsu, ába jaríñagun. —Bacháruañanúrügü jáña. Le laríñagubei Pédro joun gürígia ja ñíbaña

¹⁴Ábati laráramun Pédro jáma ja jíbiri únsu apóstolugu, ába laríñagun láu umálali jéreti. —Wügǘriña Judéana jáma sun ja aganoúbaña Jerusalén, agáamba jumeí le lúnbei naríñaguni jun buídu, subúdi jumámugei ca lan lílabei cátei le jaríjubei.

¹⁵Mabácharuántiña wügǘriña ja quei jarítagun, néfugubeigili bináafin guetó.

¹⁶Cátei le, le jaríjubei, ligía lé meja uágubei ladímureja Joél, le proféta, dan le laríñagunbei.

¹⁷Lídoun buríme lagúmujoun wéyu, líña laríñagun Búngiu,noúnajabei náni Espíritu jádoun sun gürígia,nadímurejaba jayúmulugugiñe jisáanigu.Nayáwadaguba joun irájüñü,lúma joun weíyaaña mútu.

¹⁸Noúnajabei gíñe náni Espíritu jádoun ja esériwidubaña nun lídoun buri wéyu ligía, wügǘriña jáma würíña,ábame nadímurejan jayúmulugugiñe.

¹⁹Narúfuduba buri cátei garíyawaseti siélu,narúfuduba seíni uboúagu.láubei jítaü seíni buri ligía, láu wátu geméti, lúma láu juánriñu láuti gumúlali.

²⁰Labúrigaduba wéyu,láfuarame játi funáti quei jítaü,lubáragiñe lachǘlürün luwéyuri Wabúreme,le lúnbei ában lan wéyu weíriti, le marijíngilíbei líbe.

²¹Áni sun ja amúriajatiña asálbaruni lúmagiñe Búngiu, jasálbaruba.

²²‘Agáamba jumeí lubeíti le lúnbei naríñaguni, jugúya wügǘriña Israelítagu. Jesúsu le Nazarétna, ában meja wügǘri le larúfudubei Búngiu jigíbugiñe quei wügǘri úaraguati láu buri cátei weínamuti, miláguru, lúma buri seíni le ladǘgübei Búngiu jagánagua lídaangiñe, quei le jisúbudin.

²³Láu sun líra, dan le ledéregerúnbei jun, quei ligáburi aráansejani le larítagubei Búngiu lúmagiñe furúmiñeti dan, ába jáfaruni jilágubei láu jedéregeruni joun wügǘriña wuríbatiña lun jádaraguni luágu gurúwa.

²⁴Ába leséfuruni Búngiu lídaangiñe lubáfu oúweni, sarágüda lumúti lúnya labágaridun, ladǘga siñá lan gabáfu lan oúweni luágu.

²⁵Laríñajare urúei Davíd, dan le ladímurejan luágu Jesúsu.Subúdi numúti luágu númabei lan Nabúreme Búngiu súnwandan,noúbagiñeñein lun úa lan ni cáta lun lebélaagüdün anúfudei nídoun.

²⁶Ligía lébubei téjerajan nanígi,ába nadímurejan luágu ugúndani le nídaanbei.Láu sun wügǘri nan garaǘwarügüti,jeménigitina buágu luágu nabágaridayaba lan,

²⁷ladǘga mígirun bubóun nuwáni lídan jabára jiláaña,mígirun amǘrüme lun lañáladun núgubu, áu le bánigu le jínsiñebei bun.

²⁸Arúfuda bumúti ǘma le anǘgübei gürígia lídoun ibágari magúmuchaditi nun,áni babuínchagüdǘbadina láu ugúndani láu abúnja lan nubádu.

²⁹‘Nidújeñu, cátei furáanguti le, luágu jilá lan meja wadúje Davíd, bunáwa ligía, gayáraagili waríjini lumúaja chülǘ lúmoun wéyu le.

³⁰Davíd, ában meja proféta ligía, áni subúdi lumúti meja luágu aríñaga láali lan Búngiu lun luágu jádaangiñeba lan linébaanfan liábin Crístu, le lúnbei lañúurun luágu lála.

³¹Adímurejati lubeíti Davíd luágu lásaarun Crístu lídaangiñe oúweni, luágu gíñe merédeboun lan luwáni lídan jabára jiláaña, mañáladun ligíame lúgubu. Ítara líña ladímurejan Davíd luágu Crístu camá jamuga aríagu líña lun, áni ítara líña lasúseredun.

³²Sarágüda lumúti Búngiu Jesúsu méme le lídaangiñe oúweni, sun wagía geféentiwa luágu líra.

³³Ñurúgüda lumúti Búngiu lueígiñe loúnwenren láu sarágu uweíriguni, ába lerésibiruni Sífiri Sándu lúmagiñe Búngiu queísi laríñaguni Búngiu lun, lun gayáraabei lan loúnajani méme Sífiri Sándu ligía joun sun lánigu uboúagu. Ligía cátei le aríja jumáalibei lúma le agáamba jumáalibei guetó.

³⁴Máma Davíd amúdeirubei siélun, aríñagati Davíd guánarügü.Laríñajare Búngiu lun Nabúreme.“Ñürǘba lueígiñe noúnwenren,

³⁵daríme níchuguniña báganiñu lábugiñoun bubáfu.”

³⁶‘Lúnti jasúbudiruni sun jugúya linásiñun Israél luágu Jesúsu méme lan le, le jádaragubei luágu gurúwa, adǘga láali lan Búngiu lun ligíaba lan Wasálbaragüle, ligíame gíñe Wabúreme.

³⁷Dan jagáambunbalin cátei le, ába lebélurun igárigu tídoun janígi, ába jaríñagun lun Pédro lúma joun jíbiri apóstolugu. —Wadújeñu, ¿cábasan wadǘga?

³⁸Ába laríñagun Pédro joun. —Sáansi jumeí jigáburi ligíbugiñe Búngiu, badísei jugúyame cáda ában lídan líri Jesucrístu, ferúdunawa lámuga jifígoun, ru lámugei Búngiu Sífiri Sándu jun.

³⁹Ladǘga aríñagaali Búngiu luágu líchugubei lan giñe Sífiri Sándu jun, lúma joun jadǘgawagun, lúma joun ja aganoúbaña díse, lúma joun sun ja lagúarubaña Búngiu lun lánigu jamá.

⁴⁰Láu buri dimúrei le lúma buri ámu, ladímureja Pédro joun, ába laríñagun joun. —Séfu jumá lueí asúfuriruni le lúnbei liábin jawágun gürígia wuríbatiña ja.

⁴¹Ítara liñáti ába jabásterun, ja adǘgübaña gásu láu lerérun, ába jayábin queí buri ǘrüwa mílu gürígia lun jafíñerun luágu Jesucrístu wéyu ligía.

⁴²Ába jedéregeragun joúngua lun jafúnrendeiruni le jarúfudajabei apóstolugu joun, aganoúa jagía lídan úarani jámagua, ayúmuragua jagía buri lun Búngiu, oúndaragua jagía lun jeíginun fein to arítaguagülei luágu loúnwen Jesúsu, queísi meja laríñaguni joun apóstolugu lun jadǘgüni. Jabágari furúmiñetiña lánigu Crístu

⁴³Súngubei láuñanu luweírin anígi luágu buri seíni lúma buri miláguru le ladǘgübei Búngiu jádaangiñe apóstolugu.

⁴⁴Sun ja afíñerubaña, lídaañanu ában, ába buríti jafánreinjani le jámati jádaangua.

⁴⁵Jalúgurajeí buri jafúlasun lúma le jámati, ába jafánreinjani lebégi según lemégeirun cáda ában.

⁴⁶Ságü wéyu joúndaragun témpulurugu lun jájuduragun lun Búngiu. Lárigiñe, ába joúndaragun lúbiñe ában jádaangiñe lun jeíginun fein to arítaguagülei luágu loúnwen Jesúsu, lúma lun jeígin le lánina ságü wéyu, lídan ában láu ugúndani lúma gudémegu.

⁴⁷Ábaja jadímurejan weírigu luágu Búngiu, ábati jínsiñe jamá joun gürígia, ábatija anáajeina lániña Búngiu ja asálbareinabaña jánwoun.