Read Garifuna Hechos 8 Bible Online

Hechos 8 - Garifuna bible

Hechos 8

¹Sáulo, gúndaatiti láu láfarún Estéban. Wéyu méme ligía, ába lagúmeserun ában oúnwenbun eíbaajoúni jawágun ja afíñebaña luágu Jesucrístu, Jerusalén. Ába janúragun lídoun buri lirájüñü fulásu Judéa lúma Samária le míbetiña gürígia ñi, apóstolugu rügǘñanu manúrajan.

²Ába jayábin wügǘriña ja derégeguatiña joúngua lun Búngiu, ába jábununi Estéban láu sarágu íruni luágu loúnwen.

³Ábati lasígirun Sáulo eíbaajaña afíñetiña, ábaja lebélurun tídoun sun múna lun laságaruniña wügǘriña jáma würíña adúruujeina, ába loúnajaniña furísunrugun. Lapúrichijoún ugánu buíti luáguti asálbaruni Samária

⁴Apúrichija jamúti ja anúrajabaña Jerusaléngiñe ugánu buíti luágu chülǘ lan Jesucrístu lun lasálbaruniña sun gürígia, sun le ñí lumuti joúdin.

⁵Ába lídin ában jádaangiñe, gíriti Felípe, lídoun ában ubúrugu Samária, ába lagúmeserun adímureja joun ja ñíbaña luágu Crístu.

⁶Ábaja joúndaragun gürígia, ru jagía jarígei lun le ladímurejabei Felípe, aríja jameí buri gíñe miláguru le ladáagubei.

⁷Ladǘga sarágu buri gürígia ja gawágutiña espíritugu wuríbatiña, areídaguátiña, ába buri jáfuridun espíritugu wuríbatiña jagía agúarajeina jádaangiñe, areídagua jagía sarágu derégüdaaña jamá, meíbuguntiña.

⁸Súnti gürígia lídan fulásu ligía, gúndaatiña luágu cátei le.

⁹Ñíñein ában wügǘri lídan fulásu ligía, gíriti Simón, gabíñarajati meja, lǘñajaali ayéejaña gürígia Samariána láu laríñagun joun luágu máma lan furúmieguarügü gürígia ligía.

¹⁰Agáambaja jamútitíja sun gürígia buídu, jámagiñe ja gudémegutiña dagá jámoun ja weírigutiña, ába jaríñagun. —Ibíja lumúti gürígia le oúnwenbun lubáfu Búngiu.

¹¹Adǘgatiñatíja gásu láu, ladǘga lǘñajaali ayéejaña láu labíñarajan.

¹²Dan le jafíñerunbei luágu ugánu le líchugubei Felípe joun luágu larúeijan Búngiu lúma luágu Jesucrístu, dándu wügǘriña quei würíña, ába jabásterún.

¹³Simón meme ligía ába gíñe lafíñerun, ába gíñe labásterún, ába lagúmeserun afálarei Felípe, le luweírin lanígi láu buri oúnwenbun buri miláguru lúma seíni le ladáagubei Felípe.

¹⁴Dan le jagáambunbalin apóstolugu ja Jerusalénbaña luágu resíbi jamáali lan Samariána lerérun Búngiu, ába joúnajani Pédro lúma Juan ñi.

¹⁵Dan le jachǘlürünbei, ába jayúmuragun jawágu afíñetiña ja Samariána lun liábiba Sífiri Sándu jádoun,

¹⁶ladǘga miábingili lan Sífiri Sándu lídoun ni ában jádaangiñe, badíseirügügiña lídan líri Wabúreme Jesúsu.

¹⁷Ábati jíchuguni Pédro lúma Juan jájabu jawágu, ába liábin Sífiri Sándu jádoun.

¹⁸Dan le laríjinbei Simón luágu ñǘbin lan Sífiri Sándu jádoun gürígia dan le jíchuguni apóstolugu jájabu jawágu, ába lálugun lagáñijani ubáfu ligía jámagiñe láu seínsu.

¹⁹Ába laríñagun joun. —Rújumei gíñe ubáfu le nun, lun dánme lan níchuguni nújabu luágu furúmieguárügü, lun gíñe lerésibiruni Sífiri Sándu.

²⁰Ábati laríñagun Pédro lun. —Beíba máfiougatin láu sun biseínsun, ladǘga jarítaguatibu luágu gayára lan lagáñijoún cátei le ledéweejan Búngiu.

²¹Maríchatibu, mafánran bugúya lídan wesériwidun lun Búngiu, ladǘga múaraantu banígi ligíbugiñe Búngiu.

²²Ígirabeí buríban le, ayúmuraguabá lun Búngiu, lun ferúduna lánibu luágu luríban barítagun.

²³Ladǘga aríja numúti luágu buin tíña lan banígi láu wuríbani, áni ragǘñu liñálibu Máfia.

²⁴Ábati laríñagun Simón. —Ayúmuragua jumá lun Búngiu nuágu lun masúseredun lan ni cáta nun lídaangiñe le jaríñagubei.

²⁵Lárigiñe jíchugun fe luágu Jesucrístu lúma jadímurejani lerérun Búngiu lídan fulásu ligía, ába japúrichijani apóstolugu ugánu buíti luáguti lasálbaruniña Jesucrístu gürígia lídaangiñe jafígoun lídan sarágu lirájüñü fulásu Samária, luágu jaweíyasun járigoún Jerusaléoun. Felípe lúma wügǘri le Etiopíana

²⁶Lárigiñe cátei le, ába laríñagun láni Wabúreme Búngiu ánjeli lun Felípe. —Aráansebá, beíba luágun sur lídaangiñe ǘma le arárirubei Jerusaléngiñe lun ubúrugun Gáza. Ligía ǘma le ásügürübei lídaangiñe fulásu mageírawati.

²⁷Ába laráanserun Felípe, ába lídin. Luágu leíbuguniwágu, ába ladárirun ában wügǘri Etiopíana lubá lubá. Wügǘri ligía siñáti garaǘ lan, ában wügǘri weíriguti, ligía gíñe gamánijaribei láu sun tiseínsun Candáce to lurúeite Etiopía. Liábiñati wügǘri ligía Jerusaléngiñe lárigi lídin ájuduragua lun Búngiu.

²⁸Lagíribuduñáti lageíroun, ñun tídan ában cárü, alíijeinaloún lilíburun proféta Isaías.

²⁹Ábati laríñagun Sífiri Sándu lun Felípe. —Yaráfabá tuágun cárü túra.

³⁰Ába leíbaagun tuágun cárü, ába lagáambuni lalíijaña lan tídan lilíburun Isaías, ába laríñagun lun. —¿Gunfaráanda bumútisan le balíijabei?

³¹Ába laríñagun wügǘri ligía lun. —¿Ída lubági gunfaráanda náani, úaga cába lan afúnraanguágüdei nun? Ába laríñagun lun Felípe lun ládinun lúmoun lun lañúurun loúbagiñe.

³²Niján buri dimúrei le lalíijabei.Quei mudún, lanügǘwa lun lafarún jilágubei,ítara quei leréderun mudún maníñu jagíbugiñe ja ásarubalín líyu,ítara líña gíñe maríñagun lan ni cáta.

³³Ǘnabuti lanügǘn, áni michugúnwati lirícha lun,siñábei ladímurejoún jawágu ladǘgawagun,ladǘga gumúja lan labágaridun uboúagu.

³⁴Ába laríñagun wügǘri ligía lun Felípe. —Adǘgabeí fuleísei nun, aríñagabeí nun, ¿cáteisan le uágubei laríñagei wügǘri le abǘrüjabei dimúrei le, luoúgua, ódi luágu ámu?

³⁵Ábati lagúmeserun Felípe arúfudajei Lerérun Búngiu lun, lúmagiñe le ñígiñe lubeí lagúmesera alíija, ába líchuguni ugánu luáguti Jesúsu lun.

³⁶Dánti le jásügürünbei lídaangiñe ában fulásu le ñí lubei dúna, ába laríñagun wügǘri ligía. —Nijántia dúna, ¿siñátisan nabásterun?

³⁷Laríñaga Felípe lun. —Ánjein afíñe bubeí luágu Jesucrístu táu sun banígi, gayáraati babásterun. Laríñaga wügǘri ligía lun. —Afíñetina luágu Jesucrístu lan Liraǘbei Búngiu.

³⁸Ábati laráramagüdǘnun cárü, ába jarárirun biángubei jagía dúnarugún, ába labásterágüdüni Felípe.

³⁹Dan jamúdeirun dúnarugugíñe, ába lanǘgüni láni Búngiu Espíritu Felípe ñígiñe, ába maríjin láali lan wügǘri ligía. Ába lasígiruni leíbugun, gúndaañu.

⁴⁰Ába ladáriragun Felípe lúngua Azóto, ába lídin lídaangiñeina fulásu apúrichijeinaleí ugánu luáguti Crístu darí lachǘlürün Cesaréa.