Read Garifuna Hebreos 8 Bible Online

Hebreos 8 - Garifuna bible

Hebreos 8

¹Le buítimaabei lídaangiñe sun le waríñagubei, luágu ítara líña lan wafádirin le íñutimaabei, áni ñurújali lueígiñe loúnwenren Búngiu siélu,

²áni lesériwiduña queísi fádiri lídan fulásu le sándutimáabei le ladǘgübei Wabúreme Búngiu yágüta siélu, máma fulásu le sándutimáabei le jadǘgübei gürígia ya uboúagu.

³Sun fádiri íñutimaati líchugúniwa lun líchugun edéweejani lúma adágaragüdüni lun Búngiu, ligía gásu lubeí gíñe níjein lan som cátei lúnti ladágaragüdüni Jesucrístu lun Búngiu.

⁴Lun jamúga yáñein lan Jesucrístu uboúagu, mámañein jamúga fádiri, lugúndun añájeingua fádirigu adágaragüdütiña le uágubei laríñaga lilúrudun Moisés.

⁵Fádirigu ja, jadǘgüni jawádigimari láu buri cátei le liyáwarügüti lé buri siélubei. Subúdi wamúti luágu iyáwaü lan, lugúndun le lubábei ladǘgünun Moisés lúban Búngiu, ába laríñagun Búngiu lun. “Adǘgabeítia sun cátei queísi iyáwaü to narúfuduboun bun luágu wǘbü.”

⁶Weíriguti lafádirijan Jesucrístu sügǘ láu jafádirijan fádirigu uboúagu, queísigubeirügü buítima lan darádu le uágubei labúyeija lúma Búngiu luágu jáni gürígia fuleísei uboúagu, áni buítimaati cátei le líchugubei iséri darádu ligía.

⁷Lugúndun lun jamúga meja buídu lan furúmiñeti darádu le gumúti, le ladǘgübei Búngiu jáma binádu wagǘbürigu lídaangiñe Moisés, memégeirúnwati jamúga ábanya libíaman darádu.

⁸Magúndaatí buga Búngiu laú furúmiñeti darádu ladǘga mabáfu jamá binádu wagǘbürigu lun jagúnfulirun lúma darádu ligía. Ába laríñagun tídan Lerérun.Laríñajare Jabúreme Búngiu. Lachǘlürüba wéyulun nadǘgün iséri darádu jáma buri linásiñun Judá lúma Israél.

⁹Mítaraanbei quei darádu le nadǘgübei jáma binádu jagǘbürigule wéyu le nárügüdünbalin jájabu lun naságaruniña Ejíptogiñe,magúnfulirun jamúti meja nidáradun ligía,ligíati nígirunbáliña joúngua, líña laríñagun Búngiu.

¹⁰Niján darádu le lúnbei nadǘgüni jáma linásiñun Israél lárigiñeme buri wéyu ligía, líña laríñagun Jabúreme.Níchugubei nugúmadin lídoun jarítagun,ábame nabǘrüjani tídan janígi.Áubati Jabúngiute, jagíame nánigu.

¹¹Memégeirúnwabei lun larúfudajoúniwa nuágu,maríñagunbei wügǘri ni lun lidúje ni lun libíri lun jasúbudiruni Búngiu le Jabúremebei,lugúndun jasúbudirubadina súngubei,lúmagiñe le ñǘraütimaabei darí lúmoun le weíritimaabei jádaangiñe.

¹²Ferúduna nubeí wuríbani le jadǘgübei,nabúlieidubei jafígoun lun sun dan.

¹³Adímurejaali ligía Búngiu luágu ában iséri darádu, rúlaalírügü líña le furúmiñeti quei binádu, áni cátei le binádujalibei, mayúsurunwadügüyaali.