Read Ghomala New Testament MATIO 10 Bible Online

MATIO 10 - Ghomala New Testament bible

MATIO 10

¹Yeso lə́ ke pɑkhʉ́ pyə shwɔppʉ́ə mghǎm hɑ tʉ̀ɔ bi pú nə́ nə jə́ŋ mzhwenyə cwəpuŋ, biŋ jɛ guŋ mgho awɛ ba mŋkho'tə.

²Mtsǒ mghɛ nthəm bɔ shwɔppʉə mgham bɑ́ gɑ: Dəŋdzə: Simon yə pú ŋkhe e gɑ Pɛtrɔ a, ba Andreya fɑ e. Yakop mú Zebede ba Yohane fɑ e;

³Filipo ba Bartelemi; Tomasi ba Matio gɛ kwishwɔp. Yakop mu Alfeo ba Tadeo.

⁴Simon mú e guŋ ba Yuda Iskariɔt yə e hɑ Yeso bi mghɛ bo pyə a.

⁵Yeso lə nə təm pɔ shwɔppʉə mghǎm gɔm bi pu gɑ: Po kɑ́ ghɔ nə mguŋ myə pɑ tə pɑ́ pɑ Yudea nə a, po kɑ́ nəŋ ŋkho nə tisuŋ pɑ Samaria.

⁶Po ghɔ m bəŋ jʉ̀jʉ̀ pyə wap lə la' bi nə tuŋdyə Israɛl a.

⁷Po ghiŋ məjyə bɑ shyanyə gɑ́ Nəfo kɛbəŋ ghɔptə.

⁸Po yɛ́ mghɛ ghɔ́, jám mpfə pɔ, dɔnyə mghɛ ka'pap, jəŋ mzhwenyə cwəpuŋ. Po kɑ kwǐ pɑ něné, po hɑ pɑ́ něné.

⁹Po kɑ́ lɑ gɔl, kɑ ŋkhap, kɑ bʉ̌m nthʉm pètə yɔ lə.

¹⁰Kɑ pʉə ghiŋ lə́, kɑ dzə ŋkwakwa tsɑ pʉə́ lə́, kɑ mthap, kɑ pəŋ lə́, nə pá' bǎ yá gɛfa' lə́ byap mcwɔ'fa' myə́ a.

¹¹Po kò bǎ nə ya tisuŋ lə́, kɑ bǎ nə tsa la' lə, po cəŋ tə jɔ mo yə bi a pɑ́ e nyəŋ wɔ dyə a, shwə pɑ́ ywə e tə ŋkhəm cwə nə ghɔ.

¹²Po nə́ kǒ nə dyə̌ sha'tə é.

¹³Bi a pɑ gɑ́ dyə bɔ ŋkhu'nyə, bɑ hwitə yɔ gɔ wuŋ nə e bi a e ka nə́ŋ ŋkhu'nyə a, bɑ hwitə yɔ gɔ pɑnyə nə́ po.

¹⁴Pú ko bɑ tə lɑ wɔ, biŋ bɑ́ tə yu' ghɔm tsɔ, po nə təm dyə̌, kɑ nə tisuŋ bɔ lə, dzɔp vɔp nə mkwə mɔ.

¹⁵Gɑ siŋ wɔ kwa' nyənyɔ gɑ́ a gɔ la' pɑ́ nə tyɛ' fyɛ', go' Sodɔm pu Gomora lə pɑ ywə nə yə tisuŋ bɔ.

¹⁶Po yɔ́, gɑ́ nthəm wɔ pa' mjʉ́jʉ́ a cəcɑ́ mbvʉ̌ gǒ. Po ghə fʉ́ pa' mnɔk a, biŋ dɛtə́ pa' msəŋgɔpfo a.

¹⁷Po pɔ́mtə́ pɔmnəŋ! Wap gɔ pɑ́ hɑ wɔ dyə fyɛ̀', pɑ́ lɑ mshɔm cwɔ wɔ dyə sinagogə

¹⁸pu gɔ sɔ' pɑ lɑ wɔ́ ghɔ dzə mgɔpna' pu a mfomfò nə tsǒ tsɑ̌. A gɔ sɔ' pɑ bi pu ba m bi pɑ tə pɑ́ pɑ Yudea pɑ́ mtiŋ nə ŋkwinthɛ̌.

¹⁹Pú sɔ' bɑ dɑ wɔ gɔ po'o, lam tsɔ kɑ sɔ nə ywə yə po gɔ ko ghɔm a ba pa' po gɔ nə ghɔm a. Po gɔ sɔ' kwi ywə yə pɔ gɔ ghɔm a pɑ́ cwə o bɔ.

²⁰Nə pa' tə́ wɔ nə gɔ sɔ' pɑ ghɔm ǎ pɑ́, Zhwenyə Tá yɔ nə gɔ sɔ' pɑ ghɔm nə po.

²¹Fɑ́ gɔ sɔ' hɑ fɑ́ nə vʉ̌. A tá hɑ mú nə vʉ̌; pǒ gɔ sɔ' fɛ́jʉ́m pɑ tsə́ wap ghə pú zhwə wap.

²²Guŋ pɔ awɛ gɔ sɔ' pɔ wɔ nə tso tsɑ̌; tə mo yə e tɔm tə́ nə miŋ a gɔ sɔ' vɔk.

²³Cwə yə pu gɔ sɔ' zhəŋ wɔ nə mu' tisuŋ a, po ŋkhʉ́ gɔ nə yə mu'. Gɑ̌ siŋ wɔ kwa' nyənyɔ gɑ pǒ gɔ sɔ' nə kǎ nə mtisuŋ Israɛl tə miŋ bɑ Mú mo sɔ'.

²⁴Mukhʉ̌ tə bɑ m dzə tap e pɑ́; ba gɛfa' lə pɑ m dzə ta fa'.

²⁵Tə bi a múkhʉ̌ pɑ̌ pa' tap e, gɛfa' pɑ́ pa' ta fa' e. Pu ké gɛ dyə gɑ́ Beɛlzəbul bɑ mtsǒ pó gɔ piŋ pɔk tə cyə.

²⁶Ká po pwɔk! Sɔmywə yə pu hwyətə́ tə la' pu ghɔ sɔ' ghyɛ' a tə wə pɑ, sɔmywə yə pu tʉm tə́ la' pu ghɔ sɔ' zhyə a lə pɑ́wə.

²⁷Ywə yə gɑ̌ siŋ wɔ cwə jʉ́m a, po ghɔm yá dɔdzʉ̌. Ywə yə po ju' bhə tə̌ŋ po a, po ghɔm ya do dyə̌.

²⁸Ka po pwɔk pɔ pyə bi a pɑ́ wap zhwə nɑ mo, tə bi a pɑ wap lə zhwə lam tsu a; po pwɔk pɑ́ mo yə bi a pɑ e zhwə lam tsɔ mo ba nɑ e nthʉm mɔk tə mi a.

²⁹Pu tə́ fiŋ mcici pɑpʉə nə bɛ́ ywə á lə? A nəŋ bɑ po'o, bi a pɑ́ bǎ yɑ́mu' lə vʉ́ si nə pu tə a ba gɑ Ta yɔ piŋ.

³⁰Sɔ' m nə po, a bɑ pú sɛ mnəŋ thə mɔ awɛ.

³¹Ka po pwɔk, a bɑ po cyə guŋ mcici awɛ.

³²Mo yə e piŋ a dzə pɔmnəŋ á bɑ gɑ̌ gɔ sɔ' piŋ e dzə Ta a thə kɛbəŋ.

³³Da' gɑ́ mo yə e kəŋnyə a dzə pɔmnəŋ a, bɑ gɑ̌ gɔ sɔ' kəŋnyə e dzə Tá a thə kɛbəŋ.

³⁴Ka po kwɛ gɑ́ gɑ sɔ' nə hɑ hwitə dəmcǎ', ŋ tə́ sɔ' m nə hɑ hwitə pɑ, gɑ̌ sɔ' m nə hɑ nyə.

³⁵Əŋ, gɑ̌ sɔ' hapnyə mo pu tap e, hap mú mjwǐ pu map e, hap jwi mu nə má dhə́.

³⁶Mghɛ bò gɔ sɔ' pɑ́ pɑ̀ pǒ dyə.

³⁷Mo yə́ e ŋkhuŋ tap e kɑ map e tə shyə a bɑ e ka ku'nyə nə m̀. Mo yə́ e ŋkhuŋ mú e yə mbɛ kɑ yə mjwǐ lə tə shyə a, bɑ e ka ku'nyə nə m̀.

³⁸Mo yə e ka kwa yə bɛnyəpɛnyə nə jap jʉ̌m m̀ a ba e ka ku'nyə nə m̀.

³⁹Mo yə e lwɔ' vɔk e a gɔ sɔ' pi, tɑ́ mo yə e pi vɔk e nə m̀ a gɔ sɔ' vɔk.

⁴⁰Mo yə e lɑ wɔ dyə a dɑ pa' pɑ myə̀. Mo yə e nəŋ dɑ a, bɑ e dɑ pa' mo yə e nthəm a.

⁴¹Mo yə e lɑ gɔm ghɔm Si pa' gɔm ghɔm Si a gɔ sɔ' ŋkwi mcwɔ'fa' bi gɔm ghɔm Si. Mo yə e nəŋ dɑ mo dəŋdəŋ pa' mo dəŋdəŋ a sɔ' ŋkwi mcwɔ'fa' mo dəŋdəŋ.

⁴²Mo yə e hɑ bǎ nthu' shyə nə nwə bi mu' mú nə pǒ pɔ́ gɑ m nə pa' e mukhʉ ǎ, bɑ gɑ siŋ wɔ kwa' nyənyɔ gɑ́ e tə gɔ sɔ' pi myə́ mcwɔ'fa' pɑ̀.