Read Ghomala New Testament MATIO 11 Bible Online

MATIO 11 - Ghomala New Testament bible

MATIO 11

¹Yeso lə́ miŋ nə siŋ pɑkhʉ̌ pyə shwɔppʉə́ mghǎm pa' wap gɔ nə fa' a, du gɔ ji'tə pɔ nthʉm mtisuŋ map, bɑ́ siŋ wap Cuŋ pɑpuŋ.

²A lə pɑ́ po'o Yohane tiŋnyə dyəcɛ̌ ju' mfa' Kristo, nthəm pɑkhʉ̌ pyə gɑ wap ghɔ́ həŋtə́ e gɑ:

³O bɑ́ mo yə e bɑ́wə gɔ sɔ' a, kɑ pyə gɔ piŋ pyap mu' mo?

⁴Yeso pa' bi pu gɑ: Po ghɔ siŋ Yohane ywə yə po ju' a, ba yə po jɔ a:

⁵Mfʉ̀ wə jɔ tsʉ', mkho'tə pɑwə gǐŋ dəŋdəŋ, mghɛ ka'pap pɑ́wə dɔ, mbu'mtəŋ piŋ bɑwə ju', mpfə́ pɔ pɑ́wə jam nə vʉ̌, pu piŋ bɑwə siŋ Cuŋ pɑpuŋ bi mpə̌ŋ.

⁶Buŋtsě bɑ mo yə ŋ tə gɔ pɑ ywə fa'tə yə e gɔ cyə m nə vʉsi a pə.

⁷Cwə yə pɑkhʉ̌ Yohane lə ghɔ a, Yeso ghɔmnwə bi pɔmnəŋ nə é gɔm gɑ: Pó lə gɔ m ghakgo le kɑ? Shʉɔ ka' yə fəfa wə ŋʉ'nyə a lə?

⁸Po lə gɔ m nə yɔ kɑ? Mo bɑ́ e kwa dzə mkwìŋ lə? Pɑ kwa dzə mkwìŋ shwə́ m dyə̌ mfo

⁹Tə po lə̀ gɔ m nə yɔ kɑ? Gɔm ghɔm Si lə? Əŋ gɑ siŋ wɔ gɑ e cyə gɔm ghɔm Si.

¹⁰A bɑ́ mo yə a bɑ pú və nə e gɑ: Po yɔ, gɑ̌ təm shwiŋkhʉɔ a dzə o; e gɔ nyaptə məjyə o dzə̌ o.

¹¹Gɑ siŋ wɔ kwa' nyənyɔ gɑ̌, cəcɑ̌ pɔ pyə mjwǐ dzə a, sɔmmo ka təm nə tɑ shyə́ Yohane nu' pɔ shyə; da' gɑ́ mukəcɔk mò nthʉm Nəfo kɛbəŋ bɑ e cyə e.

¹²Tɑ́ fɑ nə cwə Yohane nu' pɔ shyə gɔ ŋkhəm tyɛ' ɔ, Nəfo kɛbəŋ bɑ a cʉ' nwə gʉ', mghɛ gʉ' nə́ pɑwə dɑ́.

¹³Nə pa' guŋ mghɔm ghɔm Si ba mco' lə ghɔ̌m tə ŋkhəm nə Yohane.

¹⁴Po pɑ gɔ yu' kwa' pɑpúŋ, po zhyə́ gɑ Yohane nə bɑ̀ Elia yə e gɔ piŋ sɔ' a.

¹⁵Mo yə e ghə mtəŋ a, e yu'!

¹⁶Gɑ gɔ fo' pɔ nə́ yəŋ wɔ̌ dzʉ́ nə kɑ? Bi a pɑ́ pú fo' pɔ nə́ yəŋ wɔ̌ dzʉ́ nə pɑkhʉ̌ bɑ wap cwə tətɔ bɑwə gɔm cəcɑ̌ pu gɑ:

¹⁷Pyə tuŋ duŋ bi po, po lə nəŋ! Ŋkwa vʉ́, po lə tsɔp kəkɔp yɔ!

¹⁸Nə pa' Yohane kě sɔ̌', e lə pɑ dzʉ́ ywə, e lə nəŋ nwə́ ywə, pu ghɔm gɑ zhwenyə cwəpuŋ nə e.

¹⁹Mú mo sɔ', bɑ́ dzʉ́ ywə, biŋ bɑ́ nwə ywə pu ghɔm gɑ: E bɑ dzʉ́ ywə, bɑ nwə mlù', so pɑ kwishwɔp pu a mghɛ mhɔ̀. Da' gɑ́ mfa' myə́ le gə pú zhyə zhyənwə yə a fɑ bi Si a.

²⁰A lə pɑ po' Yeso to' nə́ ghɔmtə mtisuŋ myə e lə́ té msya nə a, nə pa' wap lě tə pʉɔ tʉm tsap a gɑ:

²¹Ghəghʉɔ o Korazin! Ghəghʉɔ o Betsaida! Nə pa' msya myə pu lə ghə cəcɑ̌ po a, lə pe' bɑ́ m Tiro pu Sidon, bɑ wap lě da' shi' və́ ŋkwá mpʉə, bʉɔ tʉm tsap.

²²Əŋ gɑ siŋ wɔ kwa' nyənyɔ gɑ́ tyɛ'dzʉ nə fyɛ', go' Tiro pu Sidon lə pɑ ywə nə yɔ.

²³Sɔ' m nə o m Kapɛrnaum, o kwɔ' tə ŋkho pɑ kɛbəŋ, bɑ o gɔ sɔ' fi' tə ko guŋ a vʉ̌. Nə pa' msya myə pu lə ghə ywə o a lə pé'e bɑ́ m Sodɔm, bɑ Sodɔm jɑ pɑwə tyɛ' ɔ.

²⁴A po' tə bɑwə siŋ o gɑ tyɛ' fyɛ', go' Sodɔm lə pɑ́ ywə nə go' o.

²⁵A lə pɑ cwə o bɔ, Yeso lɑ ghɔm gɔm gɑ: Gɑ sé o m Ta, Cyəpɔ kɛbəŋ pu cǎ', nə pa'ǒ tʉm ywə bɔ bi mzhyə́ fʉ́ pu a mzhyənwə, da' gɑ biŋ da'tə bi pǒ mkəcɔk pó.

²⁶Əŋ m Ta, o gə po'o pa' o yɔ a.

²⁷Tá bɑ e hɑ guŋ ywə awɛ bəm. Sɔmmo ka zhyə́ Mú tə ně da' Tá, sɔmmo lə piŋ nə́ŋ jyə́ Tá tə́ ně da' Mú, biŋ gə mo yə Mú ghə gɑ́ e zhyə́ e a.

²⁸Po sɔ' bəm guŋ yɔ awɛ pyə ŋkhəm bɑ́wə dzá wɔ a, hɑ hwitə bi po.

²⁹Po kwa kəlo' á nə po, sɔ ji'tə nwə a, nə pa' gɑ bɑ gɑ ghə tʉm byányə́ ba nə fi'nɑ hɑ Si, po gɔ ghə hwitə nə tʉm tsɔ.

³⁰Əŋ, kəlo' a bɑ a yɛ̀ nə kwa, ŋkhəm a piŋ jɛ́ gɑ fǎ.