Read Ghomala New Testament MATIO 12 Bible Online

MATIO 12 - Ghomala New Testament bible

MATIO 12

¹A lə pɑ cwə o bɔ, Yeso pɑ shyə́ nə mu' pé msɛtʉ̀ɔ tyɛ' Sabat. Jikǔ' yɛ pɑkhʉ̌ pyə́. Wap to' nə pɑ bo' mcɛ́ msɛ́tʉ̀ɔ bɑ pfɑ.

²Pɑ Farisai lə nə yɔ po'o, gɔm bi Yeso gɑ: Yɔ, pɑkhʉ̌ wə́ gə ywə yə a bɑ̀ pu ka piŋ gɑ́ pu ghə tyɛ' Sabat a.

³E pa' bi pu gɑ: Po la m ŋkhe ywə yə David lə́ ghə cwə yə jiku'u lə yɛ́ e pu a mso ghiŋ pyə a?

⁴Pa' e lə kǒ Dyə Si, pu a mso pyə, pfɑ msɛ̌ nə nuŋpwɔ' myə a lə́ bɑ pu ka piŋ gɑ sɔmmo nə pú pfɑ, kɑ yʉ́, kɑ mso pyə lə, tə ne da' mkamsi a?

⁵Kɑ pó la m ŋkhe nə mcò' gɑ́ a bɑ́ tyɛ' Sabat Dyə Si, mkamsi pɔptə mcò' la' a pɑ bɑ wap hɔ nwə̀ a?

⁶Tə gɑ siŋ wɔ gɑ ywə tsɔ'ɔ bɑ ǎ ghu' shyə Dyə Si.

⁷Po la' pe' ju' ywə yə ghɔm tsyə a gɔm gɑ: Gɑ̌ shəŋ cɔmmtsò, ŋ tə́ shəŋ tsə pwɔ' a gɔm a, bɑ po ka nyəŋ shɛ thə pɔ pɔ̀ gɑ pyə wap ka hɔnwə a.

⁸Nə pa' Mú mò bɑ́ ta Sabat.

⁹Yeso lə lǔ tsʉ'u gɔ ŋkho sinagogə pú.

¹⁰Mu' mo lə bɑ dyə bɔ bɑ pu é cwyəm Pɑ Farisai həŋtə Yeso nə dəŋtə e gɑ: A bɑ pú piŋ gɑ pú yɛ́ gho tyɛ' Sabat a?

¹¹Da' gɑ́ Yeso ghɔm bi pú gɑ: Wɑ nə po bi a pɑ́ e ghə mú jʉ̀jʉ̀ e yɑmu', e vʉ̀ ghʉm tyɛ' Sabat, bɑ é tə́ gɔ kwa é, té é ghʉm a?

¹²Tə mcʉ̌m sʉ' nə mo yə a bɑ e cyə jʉ̀jʉ̀ a! A bɑ́ pú piŋ gɑ́ pú ghə nwə pɑpuŋ tyɛ' Sabat.

¹³E lə piŋ gɔm bi bɛ bɔ gɑ: Siŋ pu ǒ. Bɛ bɔ lə siŋ pù e, a cwə pɑpuŋ pa' yə mu' ghəŋ a.

¹⁴Pɑ Farisai lə təm cwəlɔ, shu'tə shɔm pa' wap gɔ ghə tə́ zhwə Yeso a.

¹⁵Yeso lə nə yu' po'o, dú tsʉ'u, vəŋ du pɔ yap jʉ̀m e, e pɑ́ jɛ̀ wap awɛ.

¹⁶Bɑ gɔm bi pu gɑ́ ka wap ghə pu zhyə e,

¹⁷po'o gɑ ywə yə gɔm ghɔm Si Esaya lə ghɔm a pəmtə́ gɑ:

¹⁸Yəŋ bɑ gɛfa' a yə gɑ shi e a, mo yə gɑ ŋkhùŋ e té' a, yə a buŋ gɑ shwɔ' e a. Gɑ gɔ sɔ' nyəŋ Zhwenyə a nə é, e piŋ bɑ da'tə nwə dəŋdəŋ bi nthəm nthə̌m.

¹⁹E tə gɔ sɔ' pɑ́ cəŋ nwə pɑ; e lə pɑ́ shɔk pu lə pɑ́ ju' gi e nə sɔmtsʉ'.

²⁰E tə gɔ sɔ' po' ka' tsyə a pɔ a pɑ́, e lə pí səsa' mɔk, tə nwə dəŋdəŋ cyə́ shù.

²¹Nthəm nthə̌m gɔ sɔ' pɑ́ yap mkwɛnyə map pɑ́ nə tsó tsyə̀.

²²Pú lə lɑ̌ mu' mo sɔ' bi Yeso, zhwenyə cwəpùŋ pɑ́ nə e, e pɑ́ fʉ̀ biŋ bɑ́ tə ghɔm; Yeso yɛ̀ é tə e ghɔmnwə, biŋ jɔ tsʉ'.

²³Nwə lə cyə̌ pɔmnəŋ, wap pɑ́ gɔm gɑ: Mo yəŋ gɑ tə́ bɑ́ Mu David a lə?

²⁴Da' gɑ pɑ Farisai lə́ nə yu' yap gɔm gɑ: Mo yɑ̌ dɑ pɑ́ Beɛlzəbul tá mzhwenyə cwəpuŋ tə́ nə́ jəŋ mzhwenyə cwəpuŋ.

²⁵Yeso lə zhyə́ mkwɛnyə map gɔm bi pu gɑ: Guŋ nəfo tsyə a ghaptə a bɑ guŋ bipǐ. Bi a pɑ́ sɔm tisuŋ, kɑ sɔm tuŋdyə lə yə ŋkhyɛ'nyə ko nə a lə vɔk.

²⁶A pɑ gɑ́ Sata zhəŋ Sata, bɑ e ghaptə nɑ e, bɑ nəfo tsyə́ gɔ piŋ pɑwə m gɑ kɑ?

²⁷A pɑ gɑ́ gɑ dɑ Beɛlzəbul tə́ nə́ jəŋ mzhwenyə cwəpuŋ bɑ pɑkhʉ pɔ dɑ kɑ́ jəŋ wap ɑ? Wap nə gɔ cwɔ'tə wɔ pɑ́ wap wap.

²⁸Da' gɑ́ a pɑ gɑ́ gɑ̌ dɑ Zhwenyə Si tə́ nə jəŋ mzhwenyə cwəpuŋ bɑ nəfo Si sɔ' tə́ ŋkhəm nə po.

²⁹A nəŋ bɑ́ bi a pɑ mo ko dyə gɛ gʉ̌' jʉ tsə́ tsyə m gɑ́ kɑ? Tə ləŋdzə kwɑ e? E kwɑ e bɑ e gɔ sim dyə e.

³⁰Mo yə pyə e tə bɑ a pɑ́ bɑ́ gɛ bo a, mo yə pyə e tə nəŋ bəmtə shu'tə́ a pɑ sa'tə.

³¹A po'o tə gɑ̌ siŋ wɔ gɑ́ pu gɔ sɔ' lɑ guŋ mhɔ bɑ guŋ mcap nə cwyɛ' pɔmnəŋ, da' gɑ pu tə gɔ sɔ' cwyɛ' mo nə nə cap Zhwenyə pɑ.

³²Mo yə e ghɔmnwə nə Mú mo a pu gɔ sɔ' nə cwyɛ' e, da' gɑ bi a pɑ́ e ghɔmnwə nə Zhwenyə Dɔlɔ̌ bɑ pu tə gɔ sɔ' nə cwyɛ' e nthʉm yəŋ dzʉ̌ kɑ yə dzʉ̌ yə a gɔ tə sɔ' a lə.

³³Mo ghə ta'thə pɑpúŋ, bɑ e gɔ ghə tɔmthə́ pɑpuŋ, biŋ gə ta'thə cwəpùŋ bɑ o gɔ ghə tɔmthé cwəpuŋ. Pù jyə ta'thə pɑ nə tɔm é.

³⁴Wɔ gwya mnɔk mtìŋ, bi a pɑ́ po ghɔmnwə pɑpuŋ m gɑ́ kɑ̀, bɑ po pɔk tiŋ pá' a? Nə pá' ywə yə mo gɔm a bɑ ywə yə a nthəm nthʉm tʉm e a.

³⁵Mo pɑpúŋ nthé tsə pɑpuŋ nthʉm nthɛ́ pɑpuŋ e; mo cwəpuŋ pɑ́ nthé tsə cwəpuŋ nthʉm nthɛ cwəpuŋ e.

³⁶Tɑ́ gɑ siŋ wɔ gɑ́ pɔmnəŋ gɔ sɔ' pa' nwə nə mghɔm cwəpuŋ myə a lə təm shwə́ pu a.

³⁷Nə pa' a gɔ sɔ' cyə pɑ́ m nə mghɔm mǔ tɑ́ o təm nə shɛ́, piŋ cyə pɑ́ m nə mghɔm mǔ tɑ́ o kó nə shɛ́.

³⁸A lə pɑ́ po'o shɑ́ pɑ zhyə́ mco' pu a pɑ Farisai lɑ ghɔm gɔ́m gɑ: Ta pyə wə shəŋ gɑ́ o ghə pyə yɔ ta' mtiŋ.

³⁹Yeso pa' bi pu gɑ: Pɔ nə wɔdzʉ cwəpuŋ pɑ́ ghə ghap həŋtə́ mtiŋ! Pu tə gɔ piŋ la'tə sɔm mtiŋ bi pu pɑ́ tə ně da' myə́ gɔm ghɔm Si Yona.

⁴⁰Nə pa' dəŋdəŋ pá' Yona lə ghə mtyɛ'dzʉ́ məthá ba mtsʉ̌' məthá vam mɑ bapgu a, a dəŋdəŋ po'o tɑ́ Mú mo gɔ sɔ' ghə mtyɛ'dzʉ́ məthá ba mtsʉ̌' məthá nthʉm ca'.

⁴¹A gɔ sɔ' pɑ́ tyɛ'dzʉ́ nə fyɛ', pɑ́ Ninivə lusi pu a pɔ nə yəŋ wɔdzʉ́ pɑ́ Ninivə pɑ nyəŋ shɛ thə̀ pú nə pa' a bɑ wap lě ju' ghɔm Yona bʉɔtʉ́m tsap a. Tə́ po zhyə gɑ́ mo yə e tsɔ' a cyə Yona.

⁴²A gɔ sɔ' pɑ́ nə tyɛ̌' dzʉ nə fyɛ́' shɛ, Mɑfo guŋ Mto dzʉ́ lusi pu a pɔ nə yəŋ wɔdzʉ, e nyəŋ shɛ thə pú, nə pa' e lə fɑ tə dhə́ dzʉ́ sɔ' jú' zhyənwə Salomoŋ. Tə po zhyə gɑ mo yə e tsɔ' a bɑ e cyə Salomoŋ.

⁴³A bɑ́ cwə yə zhwenyə cwəpuŋ təm nə mo a, e pɑ ŋkha nə mghak tsʉ́', bɑ shəŋ tsʉ' hwitə̀, da' gɑ́ e lə yɔ pɑ́.

⁴⁴A pɑ́ po'o e ghɔm gɑ: Gɑ̌ gɔ pɑnyə nə tsʉ' shwə a yə dɑ təm nə a. E bɑnyə cwəlɔ, jɔ tsʉ' la' ywə pɑ nə, bɑ pu khʉ́m, jap ŋkhɛ nə.

⁴⁵E ghɔ cwəlɔ dɑ shɑ mzhwenyə sɔmbʉə bɑ wap pɔk shyə e, pu a pú sɔ' ŋkho nə mo bɔ; mo bɔ piŋ bɔk shyə́ pa' e lə ji bɑ́ a. A gɔ sɔ' pɑ́ pɑ dəŋdəŋ po'o nə yəŋ wɔ̌ dzʉ̀ cwəpuŋ.

⁴⁶Cwə yə́ Yeso lə pɑ́ gɔm nwə bi pɔmnəŋ a, map e pu a mfɑ pyə tiŋnyə dzʉ̀ bɑwə shəŋ nə ghɔmnwə bi e.

⁴⁷Mu' mo ghɔm bi e gɑ: Mɔ̌ pu a mfɑ pǔ tíŋnyə̀ dzʉ́, bɑwə shəŋ nə ghɔmnwə bu.

⁴⁸Yeso pa' bi mo yə́ e lə ghɔm bi e po'o a gɑ: Wɑ̌ bɑ́ ma a? Pɑ wɑ̌ pɑ mfɑ pɑ̌?

⁴⁹Biŋ nya pu e nə pɑkhʉ̌ pyə gɔm gɑ: Yɔ ma a bɑ mfɑ pɑ̌ pɔ gɑ;

⁵⁰Bǎ wɑlə́ yə e ghə ywə yə Tá a thə kɛbəŋ shəŋ a bɑ e bɑ́ fɑ a yə mbɛ ba yə mjwǐ, biŋ bɑ́ ma á.