Read Ghomala New Testament MATIO 13 Bible Online

MATIO 13 - Ghomala New Testament bible

MATIO 13

¹A lə pɑ́ tyɛ'dzʉ bɔ̌, Yeso təm dyə, shwə kə́ŋ shyə lɑpʉə.

²Mɑ vəŋ pɔ lə cu'tə bəŋ e tɑ́ e kwɔ' shwə nthʉm kənu'; guŋ pɔmnəŋ awɛ cwə kə́ŋ shyə.

³E lə lɑ̌ ghɔm tə́ tutə̀ gɔm mnwə bi pú tɑ́ a yɔm gɑ: Mu' dzəywə́ lə tə̌m bɑ́ dzə́ ywə́.

⁴Pa' e lə pɑ́ dzə́ ywə́ a, mu' gwya ywə lə vʉ giŋnyə mə́jyə̀; pǒmsəŋ kɛbəŋ sɔ', pfɑ́.

⁵Mu' vʉ nə tsʉ' mwɔ', la' cǎ' pɑ́ tsʉ'u sàk, a lə wuŋ sá', pa' cǎ' la tə bɑ́ bɑ ǎ cu a pɑ́,

⁶nam cwə tə sa', ntho, a yak mŋɛ́ jə́m.

⁷Mu' vʉ nthʉm júŋ; jǔŋ kwɑ, a fám.

⁸Mu' vʉ nə ca' pɑpuŋ jam nthɔm, mu' yam nthɔm ŋkhə, mu' yam mghamnthɔk, mu' yám mghamnthá.

⁹Mo yə e ghə mtəŋ a e yu'.

¹⁰Pɑkhʉ Yeso lə sɔ' bəŋ e həŋtə́ é gɑ: Nwə́ kɑ́ o pɑ dɑ ghɔm tə tútə̀ gɔm nwə bi pú?

¹¹Yeso pa' bi pú gɑ́: Nə pa' a sɔ' m bi po bɑ pú ghə gɑ po zhyə nwə cyə zhyə́nwə nə Nəfò kɛbəŋ, tə sɔ' m nə pú, a lə pɑ po'o.

¹²Nə pa' pu gɔ sɔ' hɑ́ ywə bi mo yə e ghə ywə a, é cəŋtə ji, tɑ́ sɔ' m nə́ mo yə e ka ghə ywə a, pù kwi ba yə à bi a.

¹³Ywə yə a gə bɑ́ gɔm pɑ́ ghɔm tə tutə bi pú a bɑ gɑ wap dé tə yɔ̀, bɑ ju' tə yu'.

¹⁴Ghɔm gɔm ghɔm Si Esaya piŋ bɑ bəmtə nə pù ghɔm tsyə a gɔm gɑ: Pǒ gɔ sɔ' yu' pɑ gɑ kɑ́lə́, po lə yu', lé pɑ́ gɑ kɑlə́ po lə yɔ.

¹⁵Nə pa' mtʉ̌m pɔ pɔŋ gɑ bɑ a tsɑ̀, bɑ mtəŋ map sɔk. A bɑ wap cɑ́ mnyə map, po'o gɑ wap kɑ́ lɑ mnyə map jɔ tsʉ' wap lə lɑ mtəŋ map jú', wap lə nəŋ dɑ mtʉm map ju', po'o gɑ wap kɑ pʉɔtʉm tsap, biŋ jɛ wap.

¹⁶Tɑ́ sɔ' m nə po, mnyə mɔ ghə puŋtse, nə pa' a jɔ, ba mtəŋ mo ghə puŋtsé nə pá' a ju'.

¹⁷Kwa' nyənyɔ gɑ̌ siŋ wɔ gɑ́ mghɔm ghɔm Si jɔmyɔ̌m, ba bo'gwyə́ pɔ dəŋdəŋ lə cə́ŋ nə yɔ ywə yə po wə jɔ a, wap lə́ yɔ, biŋ ju' ywə yə po wə ju' a, wap lə yu'.

¹⁸Pó yu' pa' ghɔm tə tútə̀ dzə̀ywə́ nthutə a:

¹⁹Mo yə e ju ghɔm Nəfo la' e kyəp a, a bɑ cwəpuŋ sɔ' kwi ywə yə a bɑ pú tsə nə tʉm tsyə́ a, a bɑ mo yə pu dzə ywə nə e m kəŋ məjyə a.

²⁰Mo yə pú dzə ywə nə e m pa' tsʉ' mwɔ' a, a bɑ mo yə e ju' ghɔm, gúŋ dɑ ŋwɛnyə ŋkwi.

²¹Da' gɑ la' gɛ́ pɑ́ nə é, e pɑ́ yə pɑ́ mo cwə bɔ̌, ghəghʉɔ kɑ nə cwɔ' mkwə cwəpuŋ nə ghɔm cwə́ tə sɔ̌' e wuŋ bvʉ.

²²Mo yə pu dzə ywə nə e m nthʉm juŋ á, a pɑ́ mo yə e ju' ghɔm, da' gɑ́ nə zhwiŋ dzʉ́, ba ghi'nyə fʉ' fam ghɔm bɔ, e lə yam tɔm e.

²³Mo yə pu dzə ywə nə e m nə ca' pɑpuŋ a, a pɑ mo yə e ju' Ghɔm, ŋkhyəp; gə nthɔm, jám ŋkhə́ nə ta', mu' yam mgham nthɔ̌k, mu' yam mgham ntha.

²⁴Yeso lə kwi' gɔm mu' ghɔ̀m tə tútə̀ gɑ́: Nəfo kɛbəŋ bɑ́ pa' mu' mo yə e tsə̀ gwyà ywə pɑ́puŋ pé e a.

²⁵Cwə yə pɔmnəŋ lə pɑ́wə di a, gɛ bo e ya' sɔ' dzə ghé cwəpuŋ tuŋ msɛ́tʉ̀ɔ cwəlɔ, gɔ̌.

²⁶Cwə yə msɛtʉ̀ɔ lə sa' tə du' cwɔ' e ghé cwəpuŋ təm yə́.

²⁷Mghɛ fa' tá gɛ lǎ' sɔ' gɔm bi e gɑ: Cyəpɔ o ka tə tsə̀ pɑ gwya ywə pɑpuŋ pé o lə̀? Tɑ́ ghé cwəpuŋ fɑ m hɑ nthʉm o?

²⁸E ghɔm bi pú gɑ́: Gɛ́ bo nə gə́ pa' a. Mghɛ fa' ghɔm bi e gɑ: O kuŋ gɑ pyə ghɔ shwɔ' a?

²⁹E ghɔm bi pú gɑ: Gɛ̌, bwɔk gɑ́ bi a pɑ́ po nə cwɔ' ghɛ́ cwəpuŋ, shwɔ' ba msɛtʉɔ.

³⁰Po tak guŋ e awɛ nəŋ a pəmtə ŋkwyə. Tə ŋkhəm tyɛ' nə lɑ tsə́ pé; a piŋ bɑ cwə nə lɑ tsə́ gɔm bi pɑ lɑ tsə́ pé gɑ: Po lə̀ŋdzə̀ shwɔ' mghɛ́ cwəpuŋ, ŋkwɑ́ bo'bò' nthó mɔk; tɑ́ sɔ' m nə́ msɛtʉɔ, po cwa nyəŋ ŋkhiŋ.

³¹E lə kwi' gɔm mu' ghɔm tə tútə̀ bi pú gɑ: Nəfo kɛbəŋ bɑ pa' sɔm thə́ tsəsɔk yə mu' mo dzə́ pé é a.

³²A bɑ a kɔk shyə guŋ gwya ywə awɛ. Da' gɑ́ a shwə tə sa', ji shyə guŋ mthə́ jap awɛ ji tà' thə́ pǒ msəŋ sɔ' bɑ́ ba' mkɔ máp nə bú myə́.

³³E lə kwi' gɔm mu' ghɔm tə tútə̀ bi pu gɑ: Nəfo kɛbəŋ bɑ́ pá' ywə nə gə msɛ̌ kwɔ' yə mjwǐ nyəŋ muywə nə msɛ́ bǔ ntha nə gə a cəŋtə kwɔ' a.

³⁴Guŋ mnwə bɔ awɛ, Yeso lə́ dɑ pɑ ghɔm tə̀ tutə̀ gɔm bi pɔmnəŋ, e lə ghɔm sɔm nwə bi pú tə lɑ pɑ́ ghɔm tə́ tutə̀ gɔm pɑ́.

³⁵Po'o gɑ ywə yə gɔm ghɔm Si lə́ ghɔm a a pəmtə gɑ: Gɑ gɔ sɔ' ŋa' shwə a ghɔm pɑ ghɔm tə́ tutə̀, siŋ tsə tsyə a lə tʉmnyə tə fɑ cwə nə́ tʉ dzʉ a.

³⁶Yeso lə tak pɔmnəŋ cwəlɔ bɑnyə dyə́, pɑkhʉ̌ pyə́ sɔ' bəŋ é gɔm bi e gɑ: Tutə́ ghɔm tə́ tutə̀ ghé cwəpuŋ pé bi pyə.

³⁷E ghɔm bi pu gɑ: Mo yə e dzə gwya ywə pɑpuŋ a bɑ Mú mo.

³⁸Pě pɑ́ dzʉ̌, gwya ywə pɑpuŋ pɑ́ pɔ Nəfo, ghé cwəpùŋ pɑ́ pɔ mo cwəpuŋ.

³⁹Gɛ̀ bò yə e dzə́ a, e pɑ́ Sata; cwə nə lɑ tsə̀ a pɑ́ jʉɔjʉ̀m tyɛ'dzʉ́; pɑ lɑ tsə́ a pɑ́ pɑ aŋgəle.

⁴⁰Dəŋdəŋ pa' pu shwɔ' mghe cwəpuŋ nthó mɔk a, a gɔ sɔ' pɑ́ pɑ́ po'o nə jʉɔjʉ̀m tyɛ'dzʉ́.

⁴¹Mú mo gɔ sɔ' təm pɑ aŋgəle pyə́ wap cwɔ' guŋ tsə fa'tə awɛ pu a guŋ pɑ ghə mnwə cwəpuŋ, thé wap nə Nəfo

⁴²biŋ ma' wap nthʉm mɔk gwyə́, tsʉ' u bɔ gɔ sɔ' pɑ tsʉ' lɔ̀ ba nə mpfɑ msuŋ.

⁴³Pɔ dəŋdəŋ gɔ sɔ' pɑ ləŋnyə pa' nàm a nthʉm Nəfo Tá yap. Mo yə e ghə mtəŋ a é yu'.

⁴⁴Nəfo kɛ́bəŋ bɑ pa' mu' fʉ' yə a lə bɑ a tʉmnyə nthʉ́m mu' pé, mu' mo yɔ a: E lə piŋ shəŋtə́ dʉ́m fʉ' bɔ. Dɑ ŋwɛnyə gɔ fiŋ guŋ tsə́ tsyə́ awɛ, nə sɔ' jó pé bɔ.

⁴⁵Nəfo kɛbəŋ ŋkwi' bɑ́ pa' mu' nthɛ mtɔ̌ yə e lə shəŋ tsə́dzə nthʉɔ.

⁴⁶E lə́ cwə́ tɑ́ jɔ tsə́dzə́ nthʉɔtʉɔ gɔ fiŋ tsə tsyə awɛ nə jó.

⁴⁷Nəfo kɛbəŋ ŋkwi' bɑ́ pa' nthənthɔm yə pu ma' shyə lɑpʉə nə nthé nthi nthi bapgu a.

⁴⁸A shwə́ tə do, pu fəŋ jap kəŋ shyə, shwə́ bəŋ o cwəlɔ dɑ sap dak yə pɑpuŋ, biŋ gwa' yə a tə sɔmywə a pɑ́.

⁴⁹A gɔ sɔ' pɑ́ pɑ́ po'o nə jʉɔjʉm tyɛ'dzʉ: Pɑ aŋgəle gɔ sɔ' təm, té pyə pɔ cwəpuŋ nə pyə dəŋdəŋ,

⁵⁰ma' wap nthʉm mɔk gwyə́; tsʉ'u bɔ gɔ sɔ' pɑ tsʉ' lɔ̀ ba nə npfɑ msuŋ.

⁵¹Yeso lə hə́ŋtə wáp gɑ: Tə́ pǒ yu' guŋ mnwə bɔ awɛ lə? Wap pa' bi e gɑ: Əŋ.

⁵²E piŋ gɔm bi pu gɑ: Bǎ ya gɛ zhyə́ mco' lə yə ě zhyə́ nwə nə́ Nəfo kɛbəŋ a, bɑ́ pa' mu' gɛ lǎ' yə e nthé ywə sə́ ba yə bvò nthɛ é a.

⁵³Yeso lə́ mǐŋ nə́ ghɔm mghɔm tə́ tutə̀, tsʉ'u bɔ, du gɔ.

⁵⁴E lə́ kó la' pú, bɑ ji'tə ywə bi pɑ wə́ pú dyə sinagogə, bɑ shə́ŋtə ji'tə wap tə nwə cyə wap; wap pɑ gɔm gɑ: Yəŋ nthi zhyənwə pu a msya nwə̀ fɑ m hɑ́ bi e?

⁵⁵E tə́ bɑ mú ŋkham mthə́ pa' a lə́? Pu tə́ ŋkhe map e gɑ Maria a lə́? Mfɑ pyə́ lə pɑ́ pɑ Yakop pu a Yosɛp ba Simon ba Yuda lə̀?

⁵⁶Ba mfɑ pyə́ pyə pɑ jwǐ lə pɑ́ pɑ́ cəcɑ̌ pɑ́ lə̀? Tə mɔ gə nthi mnwə fɑ hɑ bi é?

⁵⁷Yeso lə bɑ bi pú bɑ́ pa' ywə fa'tə a. E lə ghɔm bi pú gɑ: Pu gwak gɔm ghɔm Si pɑ nthʉm gùŋ pú ba m dyə̌ é.

⁵⁸A lə́ pɑ́ po'o Yeso lə ghyɛ' gə msya wə́ pɑ́ nə pa' wap la tə bɑ wap ghə piŋnthʉm a pɑ́.