Read Ghomala New Testament MATIO 14 Bible Online

MATIO 14 - Ghomala New Testament bible

MATIO 14

¹A lə́ pɑ́ cwə o bɔ, fo Herode yu' dəŋ pa' pu lə bɑwə gu'tə́ tsó Yeso a,

²biŋ gɔm bi pɔ pyə gɑ: Bɛ bǎ bɑ́ Yohane nu' pɔ shyə́! A bɑ́ e yam nə vʉ̌; a ywə yə a gə tɑ e pɑwə nthé msya a.

³Nə pa' a lə́ bɑ Herode lě gə̀ pu ghəm Yohane dɑ́ gwɑ́ mtʉɔ shəŋ é, nyəŋ e dyəcɛ̌, po'o dú nə nwə Herodia jwi fɑ Herode yə tso tsyə bɑ Filipo a.

⁴Nə pa' Yohane lə bɑ́ gɔm bi Herode gɑ́, pú ká piŋ gɑ́ o lɑ jwi fɑ o.

⁵A lə bɑ́ po'o Herode pɑ shəŋ nə zhwə Yohane, da' gɑ́ bɑwə bwɔk pɔmnəŋ, nə pa' wap lə́ bɑwə dɑ Yohane gə gɔm ghɔm Si a.

⁶Da' gɑ́ a ti bɑ nə ŋwɛ́nyə tyɛ' tsə Herode, mú gò Herodia nə̀ŋ ywə dzə̌ msǒ Herode, a puŋ e te'te'.

⁷A lə pɑ̌ po'o, Herode kɔ́ mkɔ nə gɔm bi mú mjwǐ bɔ gɑ́ e həŋtə́ pɑ kɑ bi lə́ bɑ e gɔ hɑ bi e.

⁸Map e lə thənyə e, e ghɔm bi Herode gɑ́: Hɑ́ thə́ Yohane nu' pɔ shyə bəm tsɔ'ɔ nthʉm pak kɛ́.

⁹Nwə lə pɔk fo Herode. Da' gɑ a cyə́ m nə mkɔ myə e lə kɔ a, ba m nə mso pyə́, e ghɔm gɑ pu hɑ́ bi e.

¹⁰Tə́ nthəm pu ghɔ dyə́ cɛ̌ ja' thə Yohane.

¹¹Pú lə lɑ̌ thə́ e nə sɔ' nthʉm pak kɛ hɑ bi mǔ mjwǐ, e lɑ nɑ gɔ hɑ bi map e.

¹²Pɑkhʉ̌ Yohane lə sɔ' ŋkwa pfə e nə gɔ nthəŋ; biŋ gɔ siŋ Yeso.

¹³Yeso lə nə yu' mcuŋ bɔ, dɑ kənu' nə gɔ nə mu' ghakgo, tsʉ' tsiŋ, pɔmnəŋ lə nə yu', nthəm nə mtisuŋ jyəjyə̀ jap jʉ̀m e, giŋ mkwə̀.

¹⁴E lə̀ nə təm kənu', jɔ mɑ du pɔ mtsò map kú e, e piŋ bɑ jɛ́ mŋkho'tə.

¹⁵A lə kú' bwadzʉ̌, pɑkhʉ̌ Yeso ghɔ bəŋ e, gɔm bi e gɑ: Tsɔ'ɔ yəŋ yə pɑ nɑ a wə bɑ ghakghak tsʉ', ya'dzʉ̌ piŋ bɑ́ bà ǎ cyə̀; zhəŋ pɔmnəŋ wap ghɔ nthʉm la' jó ywətsʉ.

¹⁶Da' gɑ Yeso ghɔm bi pu gɑ: A ka kwitə̀ gɑ̀ wap ghɔ tsʉ'u. Kwa' wɔ hɑ ywətsʉ bi pú.

¹⁷Wap ghɔm bi Yeso gɑ: Pyə ghə da' msɛ́ mta' tɔ biŋ gə bapgu duŋ pʉə tsɔ'ɔ.

¹⁸Yeso ghɔm gɑ: Po hɑ bəm.

¹⁹E lə ghɔm gɑ́ pɔmnəŋ cwə́tə́ dəm mghě, biŋ kwi msɛ́ mta' tɔ ba bapgu duŋ pʉə, bʉ' mnyə myə́ de thə́ nyəŋ byanyə nə́. Bo' msɛ cwəlɔ, hɑ bi pɑkhʉ̌ pyə, wap hɑ bi pɔmnəŋ.

²⁰Guŋ yap awɛ lə pfɑ, jwyə. Pu piŋ daktə bo' myə́ a lo nə msap shwɔppʉə mghǎm.

²¹Pɔ̀ pyə́ wap lə pfɑ a, lə́ bɑ́ gwɛ a pɔ̀ sha'tɔ, tə̀ sɛ pɑ jwǐ pu a pǒ mkəcɔk pó.

²²Yeso lə́ wuŋ nthənyə pɑkhʉ̌ pyə gɑ́ wap ko nthʉm kənu', bɑ́ sa' gɔ nə́ yə mu' jʉɔ, e cʉ' bɑ da'nyə pɔmnəŋ.

²³E lə́ miŋ nə́ la'nyə pɔmnəŋ, bʉɔ gɔ dəm kúŋ, tsʉ' tsiŋ shwyɛ'nyə Si. A lə pɑ̌ bwadzʉ̌, e pɑ tsʉ'u do é.

²⁴Kənu' tsə́ pɑ̀ tə gʉə sʉəsʉə dəm shyə. Fa shyə́ pɑ́wə mɛnyə, fəfa pɑwə ŋkwa é nə biŋ m jʉ̀m.

²⁵A lə nə pɑ́ gwɛ a ŋkwɔ'dzʉ̌, Yeso ghiŋ dəm shyə pɑpʉə bɑ sɔ' m bəŋ pú.

²⁶Pɑkhʉ̌ pyə lə́ nə yɔ pa' e wə giŋ dəm shyə, səŋ te', wap ghɔm gɑ: A ghɛnyə́ mo, bwɔk, shwé tə thə́.

²⁷Da' gɑ́ Yeso wuŋ gɔm bi pu gɑ: Po kyəp tʉm tsɔ, a bɑ́ myə̀, ka po pwɔk.

²⁸Pɛtrɔ ghɔm bi e gɑ: Cyəpɔ a pɑ́ gɑ́ a bɑ kwa' wə, o ghɔm gɑ́ giŋ dəm shyə sɔ̌' bəŋ o.

²⁹Yeso ghɔm bi e gɑ: Sɔ̌'. Pɛtrɔ tə̀m kənu' giŋ dəm shyə́ bɑ gɔ m bəŋ Yeso,

³⁰da' gɑ gʉ' fəfa ghə̀ e pwɔk, ntho' nə nuŋtə m shyə, shwé gɑ: Cyəpɔ, vɔk a!

³¹Yeso wuŋ nya pu e, ŋkhyəp e, gɔm gɑ Mo mu ywə piŋnthʉm, nwə kɑ́ bɑ o zhʉ'nyə́?

³²Wap pu e lə̀ ko nthʉm kənu' cwəlɔ, fəfa mǐ.

³³Pɔ pyə́ wap lə bɑ́ nthʉm kənu' a kam mkwi'tə dzə é gɔm bi e gɑ: Kwa' nyənyɔ, o bɑ́ Mǔ Si.

³⁴Wap lə sa' shyə, ŋkhəm nə cǎ' guŋ Genezarɛt.

³⁵Pɑ́ tsʉ'u bɔ zhyə́ Yeso, siŋ guŋ pɑ́ ghəŋ tsʉ'u awɛ, pu pɑ dɑ guŋ mghɛ gho awɛ sɔ' bi e.

³⁶Bɑ shwyɛ'nyə e da' gɑ́ e piŋ nə tak gɑ wap kwak mcwǐŋ dzə e, a piŋ bɑ po'o guŋ pɔ pyə wap lə́ bɑwə́ ŋkwak a pɑ́ jɛ́.