Read Ghomala New Testament MATIO 16 Bible Online

MATIO 16 - Ghomala New Testament bible

MATIO 16

¹Pɑ Farisai pu a pɑ Sadukai lə sɔ' bəŋ Yeso, dəŋtə e gɔm bi e gɑ é la'tə wap mtiŋ myə a fɑ m kɛbəŋ a.

²E pa' bi pu gɑ: A bɑ bwadzʉ̌ po ghɔm gɑ: Dzʉ̌ gɔ puŋ nə pa' po yɔ dzʉ̌ pɑwə bɛ pa' mɔk a,

³a piŋ bɑ fɔkdzʉ̌ pɔ ghɔm gɑ dzʉ́ gɔ pɔk tyɛ' ɔ nə pa' kɛbəŋ wə bɛ sónyə̀ sǒnyə́ a. A bɑ po zhyə nə yu' mtiŋ kɛbəŋ, da' gɑ bɑ po ka ku' nə zhyə mtiŋ cwədzʉ̌.

⁴Pɔ nə wɔdzʉ́ cwəpùŋ, pɑ ghə ghap həŋtə mtiŋ. Sɔ' m nə mtiŋ, pu tə́ gɔ piŋ la'tə wap sɔm mtiŋ a tə́ né da' mtiŋ Yona pɑ̀. E lə̀ ghɔm po'o nthak wáp tsʉ'u gɔ̌.

⁵Pɑkhʉ̌ Yeso lə́ nə́ sa' ghɔ nə yə mu' jʉɔ, dʉɔnyə nə lɑ̀ msɛ.

⁶Yeso ghɔm bi pu gɑ: Po pɔm! Po pɔm ywə pɑ Farisai pu a pɑ Sadukai.

⁷E lə ghɔm po'o pɑkhʉ̌ pyə pɑwə sɛ gɑ́: A dù pa' pɑ ka lɑ msɛ́ a.

⁸Da' gɑ̀ Yeso zhyə, gɔm bi pu gɑ: Wɔ mghɛ piŋnthʉm ŋkho', nwə kɑ po sɛ gɑ pa' po ka lɑ msɛ a?

⁹Po jɑ tə́ yu' a? Po ka kamtə́ nwə msɛ mta' tɔ nə pɔ sha'tɔ biŋ gə dəŋ msap myə́ po lə lak bo' myə́ nə́ a?

¹⁰Kɑ msɛ mta' sɔmbʉə nə pɔ sha' pfʉə ba dəŋ mkhəkhʉə bo' myə́ a?

¹¹Nwə kɑ́ po lə yu' gɑ ŋ kha tə́ gɔmnwə m nə sɛ́ pɑ́ nə cwə yə ŋ khɑ gɔm bi po gɑ́ po pɔm kwɔ'msɛ̌ pɑ Farisai pu a pɑ Sadukai!

¹²A lə pɑ́ po'o wap yu' gɑ e katə̀ gɔm m gɑ́ wap pɔm ŋkwɔ'msɛ pɑ́; gɑ e gɔm gɑ wap pɔm ywə yə pɑ Farisai pu a pɑ Sadukai ji'tə pɔmnəŋ a.

¹³Yeso lə́ ŋwak nthʉm guŋ Kaesarea Filipo, həŋtə pɑkhʉ pyə gɑ: Pɔmnəŋ gɔm gɑ Mú mo bɑ wɑ?

¹⁴Wap ghɔm bi é gɑ: Shɑ́ pɔ gɔm gɑ́ o bɑ́ Yohane nu' pɔ shyə̀; pyə shɑ̀ ghɔm gɑ́ o bɑ́ Elia; shɑ̀ ghɔm gɑ́ o bɑ́ Yeremia kɑ mu' gɔm ghɔm Si lɑ́.

¹⁵Yeso piŋ gɔm bi pu gɑ: Kwa' wɔ, pǒ gɔm gɑ́ gɑ̌ bɑ́ wɑ?

¹⁶Simon Pɛtrɔ lɑ́ ghɔm gɔm gɑ: O bɑ́ Kristo Mú Si nthʉɔtʉɔ.

¹⁷Yeso piŋ dɑ́ ghɔm gɔm bi e gɑ: Simon mu Yona o bɑ́ bùŋtsě, nə pa' tə́ bapnɑ kɑ́ mcyə lə́ nə gə o zhyə po'o pɑ̀, Tá a yə e kɛbəŋ a nə́ gə́.

¹⁸Biŋ sɔ' m nə m̀, gɑ ghɔm gɑ o bɑ́ Pɛtrɔ yəŋ la'tə gɑ́ ghǔ gwɔ', biŋ gɔ́ sɔ' kwɑ cu'tə a dəm ghǔ gwɔ' bɔ, mtʉ̀ɔ vʉ lə nəŋ gɔ sɔ' ghə sɔm gʉ' nə̀.

¹⁹Gɑ̌ gɔ sɔ' hɑ ki Nəfo kɛbəŋ bu; guŋ ywə awɛ yə ǒ kwɑ́ dəmcǎ' a, pú gɔ sɔ' kwɑ́ kɛbəŋ, a guŋ ywə awɛ yə ǒ kyɛ' dəmcǎ' a, pu sɔ' ŋkhyɛ' kɛbəŋ.

²⁰A lə pɑ̌ po'o Yeso ghɔm bi pɑkhʉ̌ pyə gɑ wap pɔm nə siŋ sɔmmo gɑ e bɑ́ Kristo.

²¹Tɑ́ fɑ cwə o bɔ Yeso Kristo to' nə siŋ pɑkhʉ pyə gɑ e lə́ gɔ ghɔ Yerusalɛm, yɔgó' té' o bi mghətso, bɑ m bi mkamsi gwyəgwyə pu a pɑ zhyə́ mco', wap ghə pu zhwə e, tə́ e piŋ jam nə vʉ̌ nə batə tyɛ'dzʉ́ yɑtá.

²²Pɛtrɔ fəŋ e nə gɔ jʉ̀m, shɔk e gɔm bi e gɑ: Si pfɔptə o m Cyəpɔ! Gɛ̌, bi a lə pɑ́ nə o pa' a.

²³Da' gɑ́ Yeso fɛ́ nɑ e gɔm bi Pɛtrɔ gɑ: Lu jʉ̌m m̀ m Sata! O wə bɑ bəŋ m̀ bɑ pɑ ywə fa'tə, nə pa' mkwɛnyə mǔ tə́ wə bɑ́ myə́ Si pɑ́, a pɑ́ myə́ pɔmnəŋ.

²⁴Yeso lə piŋ gɔm bi pɑkhʉ̌ pyə̀ gɑ: Mo pɑ́ gɔ yap jʉ̌m m̀, e kəŋnyə thə́ nɑ e, biŋ ŋkwa yə bɛnyəpɛnyə, nə jap jʉ̀m m̀.

²⁵Nə pa' mo pɑ́ shəŋ nə vɔk vɔ́k e bɑ e gɔ pi vɔk e bɔ; da' gɑ́ mo yə e pi vɔk é nə m̀ a gɔ sɔ' ghə vɔk.

²⁶A po' bi a pɑ a piŋ ŋkwitə mo nə kʉ̌ gɑ guŋ dzʉ awɛ pɑ bi e, tə́ bɑ ě lɑ vɔk e nə jo? Kɑ bi a pɑ́ mo hɑ kɑ a pɑ́ dəŋ vɔk é?

²⁷Nə pa' Mú mo gɔ sɔ' sɔ' pu a pɑ aŋgəle pyə nthʉm ghu'tə Si a, hɑ bǎ myə́ mcwɔ'fa' wɑlə́ pa' e nə giŋ yə a.

²⁸Kwa' nyənyɔ gɑ̌ siŋ wɔ gɑ, cəcɑ́ pɔ pyə wap tsɔ' a, shɑ pɔ tə́ gɔ sɔ' pfʉ tə yɔ̌ pa' Mu mo sɔ' pa' fo a pɑ́.