Read Ghomala New Testament MATIO 18 Bible Online

MATIO 18 - Ghomala New Testament bible

MATIO 18

¹A lə́ pɑ́ cwə o bɔ, pɑkhʉ̌ pyə́ sɔ' bəŋ é həŋtə e gɑ: wɑ̌ bɑ mo gwyə nthʉm Nəfo kɛbə̀ŋ?

²Yeso lə ké muywə mú, jap e cəcɑ́ pú

³biŋ gɔm gɑ: Gɑ̌ siŋ wɔ kwa' nyənyɔ gɑ́ po pɑ́ tə́ kwyəpnyə biŋ shʉ' pa' pǒmkəcɔk po a, bɑ gɛ̌, po tə́ gɔ sɔ' kó nə́ Nəfo kɛ́bə̀ŋ pɑ.

⁴Mo yə e gɔ sɔ' zhi mo ŋkho' pa' mú yəŋ gɑ a, bɑ̀ mo gwyə nthʉm Nəfo kɛbəŋ.

⁵Mo yə e lɑ muywə mú pa' yəŋ gɑ nə tso tsɑ̌ a, bɑ e dɑ pa' pɑ́ kwa' myə̀.

⁶Da' gɑ́ mo yə́ e fa'tə bǎ tá' mo nə pǒmkəcɔk po pɔ gɑ pyə wap biŋ a, bɑ dzə̀ bi mo bɔ gɑ pu cə̀ŋ mɑ gwɔ' nthuŋ e ma' e nthʉ́m tsʉ̀m shyə́ lɑpʉə.

⁷Ghəghʉɔ bi dzʉ̌ yə a fa'tə pɔmnəŋ po'o a, əŋ, a buŋ gɑ fa'tə pɑ wə́, da' gɑ́ ghəghʉɔ bɑ bi mo yə fa'tə shyə m nə́ e a.

⁸A pɑ gɑ pú u kə́ kwə ó lə́ gɔ fa'tə o, o ya' gwa' tə́ gʉə sʉəsʉə; nə pa' dzə gɑ o ko nə́ vɔk m kam kwə kə́ m kam pu lə́, shyə́ pa' bi a pɑ́ pu ma' o nthʉm mɔk mamà pu a bú mǔ məbʉə kə́ pu a mkwə mǔ məbʉə lə́.

⁹Biŋ bɑ́ bi a bɛtsə o pɑ̀ gɔ fa'tə o nə vʉ nə mhɔ, o té e gwa' e tə́ gʉə sʉəsʉə; dzə gɑ o kó nə vɔk kəpitsə shyə pa' bi a pɑ́ pu ma' o nthʉ̀m mɔk mama pu a mnyə mǔ məbʉə a.

¹⁰Pó pɔm nə wak sɔm mú nə pǒmkəcɔk po pɔ̌ gɑ, nə pa' gɑ siŋ wɔ gɑ a bɑ́ kɛbəŋ m aŋgəle pap pɑ nthiŋnyə tə́ pwa dzə̌ Tá ǎ.

¹¹Nə pa' Mu mò lə́ sɔ' nə vɔk ywə yə a lə́ pi a.

¹²Pǒ jɔ̌ yɔ́ gɑ́ kɑ̀? A po'o bi a pɑ mo ghə jʉ̀jʉ̀ tsyə́ ŋkhə́, mu' ta' piŋ nthəm nə pú bi, bɑ́ e tə́ gɔ tak pyə shwɔpvʉ̌' mgham vʉ̌' dəm kuŋ, ghɔ cəŋ yə é bi a pa a?

¹³Gɑ̌ siŋ wɔ kwa' nyənyɔ gɑ́ e cwə tə jɔ́ e bɑ e gɔ ŋwɛnyə nə e tə́ cyə nə pyə shwɔpvʉ̌' mgham vʉ̌'.

¹⁴A dəŋdəŋ po'o tə́ Tá yɔ kɛbəŋ shəŋ gɑ́ sɔmmo nə pǒ pɔ gɑ kɑ́ pi.

¹⁵A pɑ́ gɑ́ fɑ o hɔ́nwə̀, o ghɔ jɔ e, po e pɑ́ pɑ́ pɑ́pʉə, o cɔktə e. E yu' bɑ o tsʉ́ fɑ o.

¹⁶E pɑ́ tə yu' bù, o piŋ dɑ ta' mo kɑ pɔ pʉə lə́ po'o gɑ mghɔm pɔ pʉə kɑ pɔ tá lə nyap nwə bɔ.

¹⁷Bi a e kəŋnyə, nə yu' bi pu a, o siŋ cu'tə pɔ Kristo, bi a e piŋ ŋkhəŋnyə nə yu' bi cu'tə, o yɔ e cwəlɔ m pa' tə́ pɑ yə Yudea kə́ pa' ŋkwi shwɔp a lə.

¹⁸Nə pa' gɑ siŋ wɔ kwa' nyənyɔ gɑ́: Guŋ ywə awɛ yə pǒ kwɑ dəmcǎ' a pu gɔ sɔ' kwɑ kɛbəŋ, a guŋ ywə awɛ yə po ŋkhyɛ' dəmcǎ' a pu sɔ' kyɛ' kɛbəŋ.

¹⁹Gɑ piŋ siŋ wɔ kwa' nyənyɔ gɑ pɔ pɑpʉə cəcɑ́ po dəm cá' pɑ ŋkwishwə dó pɑ́ kə́lə́, bɑ Tá a yə e kɛbəŋ a gɔ hɑ́ bi pù.

²⁰Nə pa' tsʉ' yə́ pɔ pʉə kɑ pɔ tá lə cu'tə́ nə́ nə́ tsǒ tsɑ á bɑ́ gɑ bɑ́ cəcɑ́ pú.

²¹Pɛtrɔ lə fʉ'tə nɑ e gɔ bəŋ Yeso gɔm bi e gɑ: Cyəpɔ, cwə yə́ fɑ a hɔnwə bəm a, bɑ gɑ̌ gɔ nə cwyɛ' e mcʉm sʉ'ʉ? Mcʉm sɔmbʉə lə́?

²²Yeso ghɔm bi e gɑ: Ŋ tə gɔ ghɔm bu gɑ́ tə́ ŋkhəm da' mcʉm sɔmbʉə pɑ́ o gɔ nə cwyɛ'e mcʉm mgham sɔmbʉə jyə sɔmbʉə.

²³Nə pa' Nəfo kɛbəŋ shwə pa' nwə mu' fo yə e lə pɑ́ ŋkhʉə ju bi mco' pyə́ a.

²⁴Pú lə́ to' dɑ mu' co' e sɔ' bɑ pu e ghə tsə talɑŋto sha' ghǎm.

²⁵Pa' a lə́ bɑ e ka ghə́ ywə nə nthuŋ a, fo lə́ ghɔm gɑ́ pu fiŋ e, ba jwi e pu a po pyə́, ba guŋ tsə tsyə awɛ nə nthuŋ jú e.

²⁶Gɛfa' bɔ lə̀ nǔŋ mkwə fo gɔm gɑ: Na' byap a, gɑ gɔ tuŋ.

²⁷Mtso myə́ lə kú tap e, e lɑ jú e nə shwyɛ' e, nthak e nəŋ e ghɔ.

²⁸Gɛfa' bɔ lə nə təm dzʉ́, pu mu' só e yu'tə, e pɑwə ŋkhʉə e tsə bɛ ŋkhə. E tɔm e nə nthuŋ e, nwɔ' nthuŋ e pɑ nə zhwə e, bɑ́ gɔm gɑ: Tuŋ ywə yə pǔ ya a.

²⁹Só e lə́ núŋ mkwə e, biŋ shwyɛ'nyə e gɔm gɑ: Na' byap a gɑ̌ gɔ tuŋ.

³⁰Da' gɑ́ e kə́ŋnyə̀, biŋ gə pú nyəŋ e cɛ́ tə nə byap gɑ́ e tuŋ jú e.

³¹Mso pyə́ lə nə yɔ ywə yə a shyə́ a, nwə pɔk wap té' o; wap ghɔ siŋ tà yap nwə yə a nthəm a.

³²Tá yap lə ké gɛfa' e bɔ gɔm bi e gɑ: Gɛfa' cwəpùŋ, o lə́ cwyɛ'nyə a, ŋ də jú o nə shwyɛ' o awɛ.

³³O la tə bɑ́ pɑ́ o cɔmmtso sò o pa' ŋ də cɔ́mmtso mu a pɑ a?

³⁴Tap e lə yɛluŋ nə e, hɑ e bi fəfə, tə nə byap gɑ́ e túŋ guŋ ywə awɛ yə pu lə bɑwə ŋkwi bi a.

³⁵A dəŋdəŋ po' tə́ Tá a kɛbəŋ gɔ sɔ' ghə nə po, bi a pɑ́ gɑ́ bǎ ya mo lə nə po ka lɑ mhɔ fɑ e nə shwyɛ' e tə nthʉ́m tʉ́m e a.