Read Ghomala New Testament MATIO 20 Bible Online

MATIO 20 - Ghomala New Testament bible

MATIO 20

¹Nəfo kɛbəŋ shwə pa' mu' mo gɛ lǎ' yə e lə́ təm mɑfɔkdzʉ̌ bɑ dɑ mghɛ fa' pé mthə mlu' e a.

²Pú a mghɛ fa' lə́ yap gɑ e gɔ hɑ bɛ ŋkhap bi pú nə tyɛ'dzʉ́ cwəlɔ̌, e cya wap pé mthə mlu' e.

³A lə piŋ nə cyə mnam tá e təm jɔ shɑ pɔ bɑ wap tiŋnyə tsʉ'u tɑ pɑwə gə ywə,

⁴e ghɔm bi pu gɑ: Ba wɔ yɔ ghɔ pe mthə mlu' m̀, gə hɑ ywə yə a ku'nyə a bi pò.

⁵Wap lə ghɔ̌. E lə piŋ nthəm nə batə́ mnam nthɔk, ba mnam vʉ̌', kwi' gə pɑ po'o.

⁶A lə pɑ nə gwɛ a jyə mnam shwamu' mgham e kwi' nthəm, biŋ jɔ́ shɑ pɔ̀ bɑ wap tiŋnyə tsʉ'u, gɔm bi pu gɑ: Nwə kɑ bɑ po ywɔk tsɔ'ɔ tə ghə sɔmywə?

⁷Wap pa' bi e gɑ, sɔmmo bɑ e ka lɑ wɔk fa'. E ghɔm bi pu gɑ: Ba wɔ yɔ ghɔ pé m̀.

⁸A lə kəm bwadzʉ̌, gɛ pě ghɔm bi ŋkho nthɛ é gɑ: Ké mghɛ fa', hɑ ŋkhap fa' bǎ ya mo lə bi é, ntho' nə pɔ pyə wap sɔ' jʉm a, miŋ nə pyə wap la' dəŋdzə sɔ' a.

⁹Pɔ pyə wap lə sɔ' nə batə mnam shwamu' mgham a, lə sɔ̌', bǎ ya mo lə nə́ pu kwi ta' bɛ ŋkhap.

¹⁰Pɔ pyə wap lə́ tsə́ pé a lə́ nə sɔ' bɑwə ŋkwɛ gɑ́ pu gɔ kwi' yáp dəŋ ŋkhap; da' gɑ bǎ ya mo lə́ nə pu lə kwi pɑ ta' bɛ ŋkhap.

¹¹Wap lə́ nə kwǐ bɑ ŋkhuku nthuŋ pú nə gɛ la' a

¹²bɑ gɔm gɑ: Pɔ pyə wap sɔ' m jʉm a bɑ wap fa' da' nə ta' nam, o piŋ gə nə pu pɑ́ pá' wɔk pyə́ pyə ywɔk fa', mɑ nam tyə́ wɔk a.

¹³Da' gɑ gɛ la' a ghɔm bi mu' mo nə́ pu gɑ: So a, ŋ kha hɔ sɔmywə bu, pu ké tə́ ka'nyə nə bɛ ŋkhap a?

¹⁴Pé ywə yə a yu a gɔ. Gɑ̌ gɔ hɑ pɑ dəŋ yə gɑ hɑ bu a bi yə́ŋ mò.

¹⁵Pù ka piŋ gɑ́ gə nə ywə yə a yɑ̌ a pa' gɑ kuŋ a? Kɑ bɛtsə o bɔk pa' gɑ mo pɑpuŋ a?

¹⁶A po'o tə́ pɑ jʉ̀m gɔ sɔ' cʉ' pɑ dzə, a pɑ dzə piŋ shʉ' pɑ jʉ̀m.

¹⁷Yeso lə́ nə́ pʉɔ ghɔ Yerusalɛm ŋkhe pɑkhʉ̌ pyə nə gɔ tsʉ' tsiŋ, biŋ giŋ mə́jyə̀ gɔm bi pú gɑ:

¹⁸Pó yɔ, pɑ si po' bʉɔ m Yerusalɛm, pu hɑ Mú mo bi mkamsi gwyəgwyə pu a pɑ zhyə́ mcò'; wap ya'shɛ e gɑ pu gɔ zhwə e,

¹⁹piŋ hɑ e bi pɑ tə pɑ pɑ Yudea gɑ́ wap yəmtə é, biŋ dɑ mshɔ̀m shwɔ́ é, ŋkham é thə́ bɛnyəpɛnyə; a piŋ bɑ nə batə́ tyɛ'dzʉ́ yɑtá e yam nə vʉ̌.

²⁰A lə pɑ́ po'o, ma pǒ Zebede sɔ' bəŋ Yeso pu a pó pyə, ŋkham mkwi'tə myə́ dzə é nə lo mu' ywə bi e.

²¹Yeso həŋtə é gɑ: O shəŋ gɑ́ kɑ̀? E ghɔm bi e gɑ́, yap gɑ́ nthʉm Nəfo tsǔ po pɑ pɔ gɑ pɑpʉ́ə mu' cwə nə́ ghə̌ŋ pú u yə tʉɔ, yə mu' cwə nə ghə̌ŋ pú u yə kwyap.

²²Yeso pa' gɑ: Po ka zhyə ywə yə pó wə dó a. Bi a pɑ́ po nwə́ nthú' yə gɑ gɔ nwə́ a? Wap ghɔm gɑ bi a pɑ́ pyə nwə́.

²³E ghɔm bi pú gɑ: Po gɔ la' nwə nthu' a, da' gɑ́ sɔ' m nə nə́ cwə nə ghə́ŋ pu a yə tʉɔ ba yə kwyap, tə́ myə̀ nə hɑ bi mo pɑ̀: Pù gɔ la' hɑ bi pɔ pyə Tá a lə nyaptə bi pú a.

²⁴Pyə pɔ gham lə nə yu' po'o jɛ́luŋ nə mfɑ̌ pɔ pɑ́pʉ́ə.

²⁵Da' gɑ́ Yeso ké wap gɔm bi pu gɑ: Pó zhyə gɑ́ pɑ sa' mguŋ dɑ tʉɔ̀ yap nə nthɔm mguŋ, pɔ gwyəgwyə pɑ́ hya guŋ.

²⁶A tə́ bɑ pɑ́ po'o cəcɑ̌ po pɑ́, mo pɑ́ gɔ pɑ mo gwyə cəcɑ̌ po e pɑ́ gɛfa' yɔ.

²⁷Biŋ bɑ bi a mo pɑ shəŋ nə pɑ́ dzə̀ cəcɑ́ po e pɑ ŋkwɔ yɔ.

²⁸A po'o tə́ Mu mo la tə́ sɔ' gɑ pu fa' bi e pɑ, e lə́ sɔ' m nə fa', piŋ hɑ vɔk é nə kwyəpnyə pɔ jɔmyɔ̌m.

²⁹Yeso lə́ nə́ təm Yeriko vəŋ pɔ yap jʉ̀m e.

³⁰Shɑ́ mghɛ fʉ̀ pɑ́pʉ́ə pyə a lə́ bɑ wap cwə kəŋ məjyə̀ a lə́ nə yu' gɑ́ Yeso nə wə shyə̀, shwe gɑ: Cyəpɔ Mu David cɔmmtsò mɔk!

³¹Pɔmnəŋ lə́ pɑ shɑnyə wap gɑ wap lɛtə, wap piŋ shwe tɑ thə gɑ: Cyəpɔ Mu David cɔmmtso mɔk

³²Yeso lə́ tiŋnyə̀, ŋkhe wap gɔm bi pu gɑ: Po shəŋ gɑ gə gɑ kɑ́ bi pǒ?

³³Wap ghɔm bi e gɑ: Cyəpɔ, gɑ mnyə mɔk ghyɛ'.

³⁴Mtso map lə kǔ Yeso, e co' pǔ nə mnyə map. Wap wuŋ jɔ tsʉ' biŋ jap jʉ̀m e.