Read Ghomala New Testament MATIO 21 Bible Online

MATIO 21 - Ghomala New Testament bible

MATIO 21

¹Wap lə ghɔ tə bɑ gwɔk nə Yerusalɛm, bɑ wap kəm bəŋ Bɛtfage kúŋ mthə Olivə, Yeso təm pɑkhʉ̌ pɑ́pʉ̌ə

²gɔm bi pú gɑ: Po ghɔ nə la' tsyə a dzə po a; po gɔ wuŋ yɔ jwi jakasi pú mú e bɑ pu cəŋ e; po kyɛ' é dɑ wap nə sɔ' hɑ bəm.

³Bi a mo ghɔmnwə bi po, po pa' gɑ: nwə é nə́ Cyəpɔ, é tak wap nəŋ po wuŋ dɑ e nə́ sɔ'.

⁴A lə təm po'o tə ywə yə gɔm ghɔm Si lə ghɔm a pəmtə gɑ:

⁵Po ghɔm bi go Sion gɑ: Yɔ fǒ o yəŋ bɑwə sɔ' m bu, dɑ byanyə sɔ̌', bɑ e kwɔ' nə jwi jakasi ba m nə́ mu jakasi.

⁶Pɑkhʉ̌ Yeso lə ghɔ pa' e lə́ ghɔm bi pu a.

⁷Dɑ jwi jakasi pu mú jakasi sɔ̌'; biŋ jap mdzə map dəm pú, Yeso cwə dəm o.

⁸Pɔmnəŋ kwa' vəŋ e lə siŋ mdzə map məjyə; pyə shɑ́ pɔ pɑ́ ŋkho' mcɛ̌ thə ma'tə́ məjyə.

⁹Vəŋ pɔ pyə wap lə bɑ dzə e gǐŋ, ba pyə wap lə bɑ jʉ̀m e a lə bɑwə shwe gɑ: Hozana bi Mu David! Byanyə pɑ bi mo yə e wə sɔ' nə tsǒ Cyəpɔ a. Hozana pɑ tə́ thə̀ kɛbə̀ŋ.

¹⁰Yeso lə cwə tə ŋkho Yerusalɛm, guŋ tisuŋ awɛ cʉ'nyə; pu pɑ́ həŋtə gɑ: A bɑ́ wɑ?

¹¹Lɑ vəŋ pɔ pɑ ba' gɑ: A bɑ́ gɔm ghɔm Si Yeso, yə Nazarɛt m Galilea.

¹²Yeso lə ko Dyə Si jə́ŋ guŋ pɔ pyə wáp lə bɑwə fiŋ kɑ jo ywə Dyə Si a lə; npfyə tsə́ tsyə a lə bɑ dəm mkwɔ' pɑ kwyəpnyə ŋkhap a, ba dəm kwɔ' mtɔ pɑ fiŋ mzhwə kúkú a.

¹³Biŋ gɔm bi pu gɑ: A bɑ̀ pu və gɑ: Pu gɔ sɔ' pɑ ke Dyə a gɑ dyə mcwyɛ'nyə; da' gɑ po nə gə dyə msamshwə!

¹⁴Mfʉ́ pu a mkho'tə lə ghɔ bəŋ e Dyə Si e piŋ bɑ jɛ́ wap.

¹⁵Mkamsi gwyəgwyə pu a pɑ zhyə́ mco' lə̀ nə́ yɔ msya myə Yeso lə lu m nə ghə a, ba pǒ mkəcɔk po pyə wap lə bɑwə jwyanyə gɑ: Hozana bi Mú David, nwə pɔk wap,

¹⁶wap ghɔm bi e gɑ: O yu' ywə yə wap wə gɔm a lə? Tə́ Yeso ghɔm bi pú gɑ: əŋ, po la m ŋkhe tsʉ' ŋwa'nyə yə a bɑ pu və gɑ. A cyə m nə́ shwə pomkəcɔk pó pu a po bwǎ o ghə pú ghu'tə o a?

¹⁷Yeso lə tak wap tsʉ'u nthəm tisuŋ gɔ Betanya, di wə.

¹⁸E lə́ pɑ́ bɑnyə m tisuŋ mɑfɔk dzʉ̌, jiku'u yɛ́ é.

¹⁹E yɔ mu' ta'thə nthɔmthə́ bəŋ məjyə̀, gɔ bəŋ o, da' gɑ́ e lə ko jɔ sɔmywə nə́ tə́ ně da' mhwə myə́. Gɔm bi e gɑ: O tə̀ dà' tə biŋ jam nthɔm pɑ. Ta'thə́ bɔ lə wuŋ jəm pɑ cwəocwəo.

²⁰Pɑkhʉ̌ pyə lə nə yɔ po'o nwə cyə wap, wap ghɔm gɑ: A gə m gɑ́ kɑ tə́ thə nthɔmthə wuŋ jəm pɑ cwəocwəo?

²¹Yeso pa' bi pu gɑ: Kwa' nyənyɔ gɑ̌ ghɔm bi po gɑ́, a pɑ gɑ po ghə piŋnthʉm tə la' po zhʉ'nyə, bɑ po tə́ gɔ ghə da' ywə yə gɑ dú m nə ghə nə thə́ nthɔmthə́ a pɑ́, bɑ po ghɔm pɑ bi kuŋgǒ yəŋ gɑ̀ gɑ́, lù tsa' a gɔ bvʉ́ shyə lɑpʉə, bɑ a gɔ pəmtə pɑ́ po'o.

²²Guŋ ywə awɛ yə po ló nthʉm mcwyɛ'nyə pu piŋnthʉm a bɑ pu gɔ hɑ bi po.

²³Yeso lə ko Dyə Si, mkamsi gwyəgwyə pu a mghətso nthʉm gùŋ sɔ' bəŋ é cwə yə e lə bɑwə ji'tə pɔmnəŋ ywə a, gɔ́m bi e gɑ: O dɑ ya tʉɔ gə ywə bǎ? Wɑ hɑ tʉɔ bɔ bu?

²⁴Yeso pa' bi pu gɑ: Ba myə̀ yɑ̌ gɑ̌ gɔ həŋtə wɔ nwə, pɑ́ da' ta' ywə; po la' ba' bəm, bɑ ba myə̀ gɑ̌ gɔ siŋ wɔ yɑ̌ gʉ' yə gɑ̌ nə gə ywə bɔ a.

²⁵Nə nu' mo shyə Yohane lə fɑ m hɑ? A lə fɑ m kɛbəŋ kɑ́ m bi pɔmnəŋ? Wap lə́ sɛ̌ wap wap gɑ: Pɑ ghɔm gɑ kɛbəŋ bɑ e gɔ həŋtə wɔk pɑ gɑ́: Tə nwə ka bɑ po lé tə́ piŋ e.

²⁶Bi a pɑ nəŋ gɔm gɑ bi pɔmnəŋ, bɑ pɔmnəŋ tə́ gɔ nəŋ wɔk pɑ pɑ nə pa' guŋ yap awɛ bɑwə jɔ Yohane pa' gɔm ghɔm Si a.

²⁷Wap lə pa' bi Yeso gɑ́: pyə ka zhyə. Yeso ghɔm bi pú gɑ: Ba myə̀ yɑ̌ ŋ tə́ gɔ siŋ wɔ gʉ' yə gɑ̌ nə gə ywə bɔ a pɑ.

²⁸Po sɛ́ m gɑ́ kɑ? Mu' mbɛ lə́ ghə̀ pó pyə́ pɑ́pʉə. E lə́ ghɔ bəŋ dəŋdzə gɔm bi e gɑ: Ghɔ pé mthə mlu' m̀ tyɛ' ɔ fa' a.

²⁹E lə ghɔm bi e gɑ ŋ tə́ gɔ ghɔ pɑ́, da' gɑ́ a piŋ nə cwə mu ywə e pʉɔ tʉm tsyə́, gɔ̌.

³⁰Bɛ bɔ lə́ ghɔ bəŋ batə mu e yɑpʉə, gɔm bi e pá' e lá' gɔm bi yə mu'mú a. Yə bɔ ghɔm bi e gɑ: Gɑ̀ gɔ ghɔ m Ta, da' gɑ́ la' e ghɔ̌.

³¹Yǎ mo nə pu po'o bɑ́ e ghə pa' tá yap shəŋ a? Wap lə̀ pa' bi Yeso gɑ: Dəŋdzə. Yeso piŋ gɔm bi pu gɑ: Gɑ̌ siŋ wɔ kwa' nyənyɔ gɑ mghɛ kwishwɔp pu a pɑ kathə pɑjwǐ gɔ sɔ' tamdzə po nthʉm Nəfo Si.

³²Nə pa' Yohane le sɔ' bi po nə məjyə dəŋdəŋ po lə̀ lɑ e. Da' pɑ kwishwɔp pu pɑ kathə pɑjwǐ nə lɑ e. Po yɔ ba tə po'o la' po pʉɔtʉm tsɔ biŋ e.

³³Po kwi' ju' mu' ghɔm tə tutə̀. Mu' mo lə ghə pé e. Dzə mthə mlu' nthʉm o. Ŋkwɑ ŋkhɛpé nə́ nə dzam shu'; ntəŋ tsʉ' nə nu' mlù', biŋ ŋkwɑ tsʉ'nə cwə nə dé pě, tə́ jo' pé bɔ bi pɑ tsʉ' mthə́ mlu' cwəlɔ, gɔ tə́m.

³⁴Cwə nthɔm mthə lə kǔ', gɛ pě təm mghɛ fa' pyə gɑ wap ghɔ ŋkwi myə́ nthɔm mthə bi pɑ tsʉ' mthə mlu'.

³⁵Da' gɑ́ mtsʉ' mthə mlu' lə́ ghəm mghɛ fa' bɔ: Shwɔ́ mu'; jwə́ yə mu'; dɑ mwɔ' nthamtə́ yə mu'.

³⁶Gɛ pě lə́ kwi' nthəm shɑ́ mghɛ fa' kwa' vəŋ e nə pyə shɑ́ dzə̀; wap lə ko gə nə pu pɑ pa' pyə dzə̀ a.

³⁷Gɛ pě lə nə́ miŋ nthəm mù e, bɑ sɛ gɑ: Wap gɔ ghə mku' mu a.

³⁸Da' gɑ pɑ́ tsʉ' mthə mlu' lə́ nə́ yɔ mu e gɔm cəcɑ̌ pu gɑ: Yɔ dzʉ̌dyə̌ yə̌. Pɑ zhwə̀ é, mcʉ̌' cʉ' tsɔk pɑ!

³⁹Wap lə ghəm e cwəlɔ, dɑ e nthəm pe jwə é.

⁴⁰Yeso lə həŋtə gɑ: Cwə yə gɛ pě gɔ sɔ' sɔ' a, e gɔ ghə lǎ m pɑ tsʉ' mthə mlu' bɔ?

⁴¹Mkamsi gwyə́gwyə́ pu a mghətso pa' bi e gɑ: E gɔ sɔ' lɑ ghəghʉɔ zhwə mghɛ ghəghʉɔ bɔ, yo' pé bi shɑ pɑ tsʉ' mthə mlù' pyə wap gɔ sɔ' pɑ hɑ myə́ nthɔm mthə cwə nthɔm mthə a.

⁴²Yeso lə kwi' gɔm bi pu gɑ: Po la m ŋkhe pa' a bɑ nthʉm ŋwa'nyə bɑ pu və gɑ: Gwɔ' yə pɑ pə́m pa' lə wa' a, nə lè ji gwɔ' phə́ pa' a; a bɑ fa' Cyəpɔ: Msya nwə nə́ mnyə mɔk pɑ̀.

⁴³A po' tə̀ gɑ siŋ wɔ gɑ́ pu gɔ sɔ' kwi Nəfo Si bi po hɑ́ bi pɔ pyə wap gɔ yam nthɔm a.

⁴⁴Mo yə e gɔ sɔ' vʉ̀ nə gwɔ' bɔ a gɔ sɔ' po'tə; a mo yə gwɔ' bɔ vʉ̀ nə e a, a tsa'tə e.

⁴⁵Mkamsi gwyəgwyə pu a pɑ Farisai lə́ nə̀ yu' mghɔm tə̀ tutə̀ bɔ, jyə gɑ́ Yeso lə gɔm po'o nə pú.

⁴⁶Wap lə̀ pɑ shəŋ nə ghəm e, da' gɑ bɑwə bwɔk pɔmnəŋ nə pa' pɔmnəŋ lə bɑwə dɑ Yeso pa' gɔm ghɔm Si a.