Read Ghomala New Testament MATIO 22 Bible Online

MATIO 22 - Ghomala New Testament bible

MATIO 22

¹Yeso lə piŋ ntho' nə́ lɑ ghɔm tə́ tútə̀ gɔmnwə bi pú gɑ:

²Nəfo kɛbəŋ bɑ pa' mu' fo lə da'nwə mu e yə mbɛ a.

³E lə̀ təm mghɛ fa' pyə gɑ wap ghɔ ŋkhe pɔ pyə e lə́ gho wap la'nwə bɔ a. Da' gɑ́ wap ko wap lə kuŋ nə sɔ'.

⁴E lə̀ piŋ nthəm shɑ mghɛ fa' gɑ wap ghɔm bi po pyə e lə́ gho wap a gɑ: Gɑ nyap tsə́ la'nwə, gɑ̌ wà mpɔp m na' ba mcɑ̌ nɔm, guŋ tsə awɛ pəmtə̀, po sɔ' nə la'nwə.

⁵Da' gɑ wap lə̀ nə sɛ sɔmywə; mu' mo lɑ m pě é, yə mu' mo lɑ m sim

⁶pyə shɑ pɔ ghəm mghɛ fa', dɑ wap jɔgo', jwətə wap.

⁷Fo lə̀ yɛluŋ, nthəm msəŋwì pyə wap zhwə̀ pɑ zhwə pɔ bɔ̌, biŋ ntho tisuŋ yap.

⁸Biŋ gɔm bi mghɛ fa' pyə́ gɑ: Tsə ghap ghʉɔ pəmtə, da' gɑ pɔ pyə dɑ ghó wap a lə́ bɑ wap ka ku'nyə.

⁹Po ghɔ mthə́ jyə̀, ŋkhe guŋ pɔ awɛ pyə po yɔ wap a nə̀ nə ghap ghʉɔ.

¹⁰Mghɛ fa' bɔ lə ghɔ mməjyə̀, shu'tə guŋ pɔ awɛ pyə wap yɔ wap a, pɔ cwəpuŋ ba pɔ pɑpuŋ tə̀ dyə ghap ghʉɔ lo pɔmnəŋ.

¹¹Fo lə ko dyə cwəlɔ nə yɔ pɔ pyə wap sɔ' nə la'nwə; jɔ mu' mbɛ bɑ e ka kwadzə la'nwə nə é.

¹²Fo bɔ ghɔm bi e gɑ: So a, o shyə m gɑ kɑ tə́ ŋkho dyə ɔ tə́ dzə la'nwə nə o? Bɛ bɔ lə́ ŋa' shwə é.

¹³Fo ghɔm bi mghɛ fa' pyə gɑ: Po kwɑ bú myə́ pu a mkwə myə́, ma' e pé nthʉm jʉ́m, tsʉ' nə lɔ̀, biŋ mpfɑ msuŋ.

¹⁴Nə pa' a nyənyɔ gɑ́ á bɑ pú ke pɔ jɔmyɔm da' gɑ pɔ pyə pu ci wap a lə yɔm.

¹⁵A lə́ pɑ po'o, pɑ Farisai cu'tə sɛ pa' wap gɔ ghə tə Yeso ghɔmnwə wap nə gəm e nə yo' a.

¹⁶Wap lə́ təm pɑkhʉ pap pu a pɑ Herode gɑ́ wap ghɔ gɔm bi e gɑ: Ta, pyə zhyə́ gɑ o bɑ nyənyɔ, bɑ da'tə məjyə Si dəŋdəŋ tə́ pwɔk sɔmywə, nə pa' dəŋ mo tə́ hɛ́ o pɑ́.

¹⁷O yɔ yǔ gɑ́ kɑ̀? A bɑ pù piŋ kɑ ŋkhəŋnyə nə ma' shwɔp bi Kasa?

¹⁸Yeso lə̀ yɔ fʉ́ yap gɔm gɑ: Pɑ tsɛbǔ, nwə kɑ́ po ləŋtə a?

¹⁹Po la'tə a ŋkhap yə pu nə ma' shwɔp a. Wap lə́ la'tə bɛ ŋkhap.

²⁰E ghɔm bi pu gɑ: Thə mò ba ywə bvəvə yə a nə́ a bɑ́ tsyə wɑ?

²¹Wap pa' gɑ: Tsyə Kasa: Yeso ghɔm bi pu gɑ: A pɑ́ pa' a po pa' ywə yə a yə́ Kasa a bi Kasa, ba' yə a yə Si a bi Si.

²²Wap lə yu' tsɔ ghɔm, a cyə́ wap té', wap piŋ nthak Yeso cwəlɔ, gɔ̌.

²³A lə́ pɑ́ tyɛ'dzʉ bɔ̌, pɑ Sadukai sɔ' bəŋ Yeso; pɑ Sadukai gɔm gɑ́ nə yam nə vʉ̌ tə̀ bɑwə pɑ́. Wap lə sɔ' bəŋ Yeso həŋtə e gɑ:

²⁴Ta, Mosɛ gɔm gɑ: Mo pfʉ tə́ tsə mu, fɑ e sɔk pfɔk e, po' o gɑ e ghə yə gwya fɑ e bɔ.

²⁵A po'o bɑ shɑ mfɑ lə́ pɑ̌ wə pyə pɔ sɔmbʉə. Shyədzə yap lə́ lɔmdyə̌, pfʉ tə́ tsə̀, nthak jwi e bi fɑ e;

²⁶A pɑ́ pɑ́ po'o nə mo batə yɑpʉə ba batə yɑtá, tə́ gɔ ŋkhəm nə batə sɔmbʉə.

²⁷Wap lə pfʉ awɛ, ba mjwǐ piŋ pfʉ yə́.

²⁸A bɑ̀ po'o, a ghɔ sɔ' pɑ cwə yə pu yam nə vʉ̌ a, e pɑ jwi ya mo nə pù? Pa' wap nəŋ dɔm e guŋ yap awɛ a?

²⁹E pa' bi pu gɑ: Po fʉmnyə, nə pa' po ka zhyə́ ŋwa'nyə Si ba gʉ' Si.

³⁰Nə pa' cwə nə yam nə vʉ̌ pu lə ghə mjwǐ kɑ dhə lə. Pu bɑ́ pɑ́ pa' pɑ aŋgəle thə kɛbəŋ a.

³¹Biŋ sɔ' m nə́ nə́ yam nə vʉ̌, bɑ po ka ké ghɔm tsyə Si gɔm bi po a gɑ:

³²Gɑ bɑ Si Abraham, Si Isak, ba Si Yakop a? E tə bɑ Si mpfə́ pɔ́ pɑ̀, e bɑ Si pɔmtʉɔ.

³³Pɔmnəŋ lə́ nə̀ yu' po' o ywə yə Yeso lə bɑwə ji'tə wap a cəŋtə ŋkhonyə wap.

³⁴Pɑ Farisai lə́ nə́ yu' gɑ́ Yeso cɑ shwə pɑ Sadukai, shu'tə.

³⁵Mu' mo nə́ pú, bɑ́ jyə́ mco' ləŋtə Yeso həŋtə e gɑ:

³⁶Ta, dəŋdzə mco' nə mco' bɑ ma mco'?

³⁷Yeso ghɔm bi e gɑ: O gɔ pɑ́ kuŋ Cyəpɔ Si o nə guŋ tʉm tsǔ awɛ, nə guŋ lam tsǔ a awɛ, ba nə guŋ zhwenyə o awɛ.

³⁸Mɔ̌ bɑ mco' gwyə, bɑ dəŋdzə.

³⁹Shɑ́ batə mɑ́bʉ́ə bɑ a kwi' gə dəŋ pɑ́ gɑ: O gɔ pɑ́ kuŋ mo yə e bəŋ o a pá' thə nɑ o.

⁴⁰Guŋ mco' awɛ pu guŋ ywə awɛ yə mghɔm ghɔm Si lə́ ghɔm a miŋ pɑ nə mco' mɔ mɑ́bʉ́ə.

⁴¹Pa' pɑ Farisai lə bɑ wap cu'tə a, Yeso lə həŋtə wap gɑ:

⁴²Pó gɔm gɑ kɑ nə Mesia? E bɑ mu wɑ? Wap pa' bi e gɑ mu David.

⁴³Yeso piŋ gɔm bi pu gɑ: Tə́ nwə kɑ a cyə m nə Zhwenyə, David ké e gɑ́ Cyəpɔ nə cwə yə e gɔm gɑ:

⁴⁴Cyəpɔ ghɔm bi Cyəpɔ a gɑ: cwə́ nə ghəŋ tʉɔ a tə́ nyəŋ mghɛ bo pǔ to mkwə o?

⁴⁵A pɑ gɑ David ŋkhe Yeso gɑ Cyəpɔ e bɑ e biŋ bɑ́ mú é m gɑ́ kɑ̀?

⁴⁶Sɔmmo la tə ku' nə pa' shwə ghɔm bi e, tə́ fɑ tyɛ' o bɔ sɔmmo lə kwi' həŋtə e nwə.