Read Ghomala New Testament MATIO 23 Bible Online

MATIO 23 - Ghomala New Testament bible

MATIO 23

¹A lə pɑ̌ po'o Yeso ghɔmnwə bi lǎ' ba m bi pɑkhʉ̌ pyə gɑ:

²Pɑ zhyə́ mco' pu a pɑ Farisai bɑ wap cwə nə kwɔ' Mosɛ:

³Po ghə̌ biŋ jyə̌ ywə yə wap gɔm bi po a, da' gɑ ka po fo' mghənyə mnwə map, nə pa' wap gɔm tə́ la' wap ghə́ a.

⁴Wap ŋkwɑ bò' ywə dzɑtsɑ jap bò' pɔ, da' gɑ bɑ ŋkhəŋnyə kwa' wáp nə lɑ nthə pu yap ŋaknyə bò' ywə bɔ.

⁵Guŋ mfa' map awɛ bɑ́ wap pɑ gə pɑ́ gɑ́ pu yɔ wap. Wap gwim pak ŋwa'nyə nthʉm twɔ' bɑ pu və mkam ghɔm Si nə nə́ pu ba mɑ sʉəsʉə mcwǐŋ dzə.

⁶Wap ŋkhuŋ nə cwə dzə̀ tsʉ' la'nwə, ba nə mdəŋdzə mkwɔ' dyə sinagogə.

⁷Ŋkhuŋ gɑ́ pu ca'tə wap dəm sim, ba m gɑ pu ke wap gɑ Rabi.

⁸Sɔ' m nə po, ka po cə́ŋ gɑ́ pu ké wɔ gɑ́ Rabi; nə pa' a bɑ po ghə da' tá' tá gɛ la'tə, po piŋ bɑ́ pɑ́ mfɑ̌ mfɑ́.

⁹Ka po ke sɔmmo dəmcǎ' gɑ tá yɔ; nə pa' a bɑ po ghə da' ta' tá, Tá kɛbəŋ.

¹⁰Ka po cəŋ gɑ́ pu ke wɔ gɑ́ mtadyə nə pa' a ba po ghə da' ta' tadyə, Kristo.

¹¹Mɑ mo gwyə cəcɑ̌ po pɑ gɛfa' yɔ.

¹²Mo yə e ŋa' nɑ e a pu gɔ sɔ' fi' e, mo yə e fi' nɑ e hɑ si a pu sɔ' ŋa' e hɑ thə́.

¹³Ghəghʉɔ yɔ, pɑ zhyə mco' pu a pɑ Farisai mtsɛ bǔ, wɔ pyə po shɑ məjyə̀ nə ŋkho nə̀ Nəfo kɛbəŋ bi pɔmnəŋ a! Kwa' wɔ tə̀ bɑwə ŋkho nə̀ pɑ́, po lə nəŋ nthak pɔ pyə wap bɑwə shəŋ nə ko nə̀ a nə́ŋ.

¹⁴Ghəghʉɔ yɔ, pɑ zhyə́ mco' pu a pɑ Farisai mtsɛ bǔ, wɔ pyə̀ po dɑ tsə mpfɔk pɑ jwǐ, biŋ gə msʉəsʉə mcwyɛ'nyə nə fʉtə pɔmnəŋ. Pu gɔ sɔ' nyəŋ kwa' mɑ shɛ thə po.

¹⁵Ghəghʉɔ yɔ, pɑ zhyə́ mco' pu a pɑ Farisai mtsɛ bú, wɔ pyə pǒ ŋkha nə guŋ mshyə lɑpʉə pu a guŋ dzʉ̌ awɛ tə́ gə ta' mo jʉ̀m po a, mo nəŋ shwə tə́ jap jʉ̀m po, po lɑ e gə pɑ́ mo mɔk tə pi, e pɔk shyə wɔ mcʉm bʉ̌ə!

¹⁶Ghəghʉɔ yɔ, mfʉ̀ la'tə jyə. Po gɔm gɑ: Mo lɑ tsʉ' dɔlɔ̌ Dyə Si ŋkhɔ mkɔ bɑ a tə nwə pɑ, da' gɑ́ dɑ gɔl tsʉ' dɔlɔ̌ Dyə Si ŋkhɔ mkɔ e tɔ́m.

¹⁷Po bɑ́ mfʉmnyə pɔ biŋ bɑ́ mfʉ! A ghɔ nə gɔl pu tsʉ' dɔlɔ̌ Dyə Si bɑ yá cyə̀ yá? Tsʉ' dɔlɔ̌ yə a dɔ́nyə̀ gɔl a kɑ gɔl?

¹⁸Pǒ ŋkwi' gɔm gɑ́ mo lɑ tsʉ' nuŋpwɔ' ŋkhɔ́ mkɔ bɑ a tə nwə a, tə́ dɑ tsə pwɔ' tsyə a dəm tsʉ' nuŋpwɔ' a ŋkhɔ́ mkɔ e tɔ́m.

¹⁹Mfʉ̀! A gɔ nə tsə pwɔ' pu tsʉ' nuŋpwɔ' yə a dɔnyə tsə pwɔ' a bɑ yá cyə̀ yá?

²⁰Nə pa' mo yə e dɑ tsʉ' nuŋpwɔ' ŋkhɔ́ mkɔ a dɑ ba ywə yə a dəm o a nə ŋkhɔ́ mkɔ.

²¹Mo yə e dɑ tsʉ' dɔlɔ̌ Dyə Si ŋkhɔ́ mkɔ dɑ ba mo yə e shwə nə̀ a ŋkhɔ́ mkɔ.

²²Mo yə e dɑ kɛbəŋ ŋkhɔ́ mkɔ a dɑ pa' a leŋfo Si ba mo yə e dəm lɛŋfo bɔ a ŋkhɔ́ mkɔ.

²³Ghəghʉɔ yɔ pɑ́ zhyə mco' pu a pɑ́ Farisai mtsɛbú. Po gap ba mcɛ́ jap nə gə jyə̀ gham hɑ tá' jyə̀ Dyə Si da' gɑ bɑ gwak kwa' ywə gwyə yə a bɑ́ nə mco' a nwə dəŋdəŋ, cɔ̌mmtso, nyənyɔ yəŋ bɑ́ ywə yə po kɑ bɑ gɔ ghə tə̀ ghə yə bɔ a.

²⁴Mfʉ̀ pɑ cya, po nthya mshwəlu', da' gɑ bɑ mi mkamelo.

²⁵Ghəghʉɔ yɔ pɑ́ zhyə́ mco' pu a pɑ Farisai mtsɛbú. Po sɔk jʉm mthǔ' pu a pak kɛ dzʉ̀ a lɔ́ da' gɑ nthʉm e pɑ bɑ a lo tsə cwuŋ pu a nwə tə́ dhə.

²⁶Mfʉ pɑ Farisai! Po ləŋdzə sɔk nthʉm nthu' tə́ jʉm dzʉ̌ lɔ́.

²⁷Ghəghʉɔ yɔ pɑ zhyə́ mco' pu a pɑ Farisai mtsɛbú, po hwə́ mthəsì ba pu lɑ bʉ̀m fəfə shi': A bɑ́ m jʉm dzʉ̌ hwə ywə pɑpuŋ da' gɑ bɑ m nthʉm o bɑ mkwe mpfə pɔ pu a bɔkbɔk tsə́ lo nə́.

²⁸A po'o pɔmnəŋ pɑ jɔ wɔ də̀m po hwə pɔ dəŋdəŋ, da' gɑ bɑ m nthʉm o bɑ po lo mnwə tsɛbǔ pu a mnwə cwəpùŋ.

²⁹Ghəghʉɔ yɔ pɑ zhyə́ mco' pu a pɑ Farisai mtsɛbú, wɔ pyə po bəm mghʉ̌m mghɔm ghɔ̀m Si, bɑ ŋkwiŋ mthəsì pɔ dəŋdəŋ,

³⁰biŋ bɑ gɔm gɑ: Pyə lə́ pe' bvɔk m nə cwə mta pɔk, bɑ pyə le tə́ tamtə nə pu, pyə a pu pfyə mcyə mghɔm ghɔ̀m Si.

³¹A bɑ po'o po pɑ nə nyəŋ shɛ pɑ thə po gɑ́: Pó bɑ po pɔ pyə wap lə́ zhwə mghɔm ghɔ̀m Si a.

³²Po donyə pɑ ywə yə mta pɔ lə fo' a.

³³Mnɔk, mnɔk mtiŋ, po gɔ sɔ' vɔk go' mɔk tə pi m gɑ kɑ̀?

³⁴A po' tə́ gɑ̌ wə nthəm mghɔm ghɔ̀m Si bi pó, ba mzhyə fʉ́, pu a pɑ zhyə mco'. Po gɔ zhwətə wap, kam wap thə bɛnyəpɛnyə, cwɔ wap mdyə sinagogə po, piŋ cʉm jʉ̀m pú nə mtisuŋ,

³⁵po'o gɑ mcyə̀ guŋ pɔ dəŋdəŋ myə pu lə pfyətə dəmcǎ' a ko nə po, tə fɑ nə mcyə Abɛ mo dəŋdəŋ gɔ ŋkhəm nə mcyə Sakaria mù Barakia yə po kɑ zhwə e cə́cɑ̌ tsʉ́' dɔlɔ̌ Dyə Si pu tsʉ' nuŋpwɔ' a.

³⁶Gɑ siŋ wɔ kwa'nyənyɔ gɑ́ guŋ e awɛ gɔ ko nə pɔ nə̀ yəŋ wɔ̌ dzʉ̌.

³⁷Yerusalɛm, Yerusalɛm, wə yə o jwə mghɔm ghɔm Si, biŋ dɑ mwɔ' mthamtə́ pɔ pyə pu nthəm wap bu a, gɑ̌ cəŋ nə cu'tə pó pǔ pa' mɑgɔp shu'tə pó pyə bap e a mcʉm sʉ'ʉ, o lə piŋ?

³⁸Pa' ǎ pɑ́ po'o a, pu gɔ sɔ' tak la' tsǔ bu pa' ghakgo a,

³⁹nə pa' gɑ siŋ wɔ gɑ́ tə́ fɑ cwəlɔ po tə́ gɔ piŋ yɔ a pɑ́ tə̀ kəm cwə yə po ghɔm gɑ: Bianyə bi mo yə e wə sɔ' a shyə́ m nə́ tso Cyəpɔ.