Read Ghomala New Testament MATIO 25 Bible Online

MATIO 25 - Ghomala New Testament bible

MATIO 25

¹Nəfo kɛbəŋ gɔ sɔ' pɑ́ pa' pó gò ghǎm pyə wap lə lɑ mlambù map gɔ́ nə pyap ta jwigʉɔ a.

²Pɔ pɑtɔ nə pu lə bɑ mkəkʉɔ, pyə pɑtɔ pɑ mzhyənwə.

³Mkəkʉɔ mgò lə lɑ̌ mlambu map gɔ tə́ lɑ mwɑ́;

⁴mgò mzhyənwə nə lɑ mlambu map, dɑ ba mwɑ̌ nthʉm mthu'.

⁵Ta jwi gʉɔ lə cwə́ nə sɔ̀', guŋ mgò awɛ ti.

⁶A lə pɑ̀ tiŋ mtsʉ', pú yu' cwé gɑ: Tá jwigʉɔ yə̌ŋ, po sɔ' dɑ e.

⁷Guŋ mgo bɔ awɛ lə yǎm, nyaptə mlambu map.

⁸Mkəkʉɔ gò lə́ ghɔm bi mzhyənwə gò gɑ: Pó hɑ mɔk mwɑ́ nə mwɑ́ mɔ, nə pa' mlambu mɔk wə́ bi pi a.

⁹Mzhyənwə ghɔm gɑ: Gɛ̌, nə pa' bɑ a tə́ gɔ ku' nə́ pɑ̀ pɑ̀! Pó ghɔ m ywə mtɛ̌mtɔ jo mɔ.

¹⁰Wap lə̀ nə ghɔ m nə yo mwɑ̌, ta jwi gʉɔ sɔ'; wap pu a pɔ pyə wap lə bɑ́ si byap a ko dyə la'nwə, jo' jyədyə̌.

¹¹Pyə shɑ mgo lɑ cwə sɔ' yap gɔ́m gɑ: Cyəpɔ, Cyəpɔ, cwɔ' jyədyə̌.

¹²Da' gɑ̀ e ghɔm bi pu gɑ: Kwa' nyənyɔ gɑ̌ siŋ wɔ gɑ́ ŋ kha wɔ zhyə.

¹³Po pɑ́ di tə́ tì nə pa' po ka zhyə tyɛ'dzʉ kɑ cwə̀ lə.

¹⁴Nəfo Si biŋ bɑ́ pa' mu' mo yə e lə pɑ̌ gɔ m tə̌m, ŋkhe mghɛ fa' pyə, hɑ tsə tsyə bi pú a.

¹⁵E lə́ hɑ mtalɑŋto mənthɔ bi mu', hɑ məbʉə bi mu', hɑ da' yɑmu' bi yə mu' mo, bǎ yə wɑlə́ dəŋ yə ǎ ku' nə e a; biŋ guŋ gɔ.

¹⁶Mo yə e lə̀ kwi mtalɑŋto mənthɔ a lə̀ ghɔ nthɛ dzʉ́ shɑ́ mənthɔ.

¹⁷Ba mo yə e lə kwi məbʉ́ə a tsʉ shɑ məbʉ́ə.

¹⁸Da' gɑ mo yə e lə kwi pɑ da' ta' talɑŋto a, ghɔ nthəŋ ghʉ́m, dʉm ŋkhap tap e nə́.

¹⁹Tá mghɛ fa' bɔ lə cwə tə a ku', e pɑnyə pu a pú pɑ sɛ tsə tsyə.

²⁰Mò yə e lə́ kwi mtalɑŋto mənthɔ a, lə sɔ' bəŋ e pu a shɑ́ mənthɔ gɔm gɑ: Ta o lə́ hɑ mtalɑŋto bəm mənthɔ; yɔ shɑ mənthɔ myə ŋ dɑ́ ko dzʉ a mɔ̌.

²¹Tap é ghɔm bi e gɑ: A puŋ m gɛfa' pɑpúŋ biŋ bɑ nyənyɔ. O kě bɑ nyənyɔ nə muywə ywə́, gɑ̌ gɔ sɔ' yap o nə́ ywə gwyə́. Sɔ̌' po tɔ̌ ɔ ŋwɛnyə.

²²Mo yə é lə́ kwi mtalɑŋto məbʉə a lə̀ sɔ' nə yə cʉm gɔm gɑ: Ta, o lə́ hɑ mtalɑŋto məbʉə bəm; yɔ shɑ məbʉə myə ŋ dɑ́ kǒ dzʉ a mɔ̌.

²³Tap e ghɔm bi e gɑ: A puŋ m gɛfa' pɑpùŋ biŋ bɑ nyənyɔ. O ké bɑ nyənyɔ nə muywə ywə, gɑ̌ gɔ sɔ' yap o nə ywə gwyə. Sɔ̌' po Tɔ ɔ ŋwɛnyə.

²⁴Mo yə e lə kwi ta' talɑŋto a lə sɔ̌' nə yə cʉ́m gɔm gɑ: Ta, ŋ də zhyə gɑ́ o bɑ mbɛ bɑ e tʉɔ: O shwa ywə tsʉ' yə o la m dzə ywə nə a, bɑ ŋwa ywə tsʉ' yə o ka tə sɛtə ywə nə a;

²⁵ŋ kě bwɔk, dɑ talɑŋto o nə gɔ dwɔ' nthʉm ca': Yɔ ywə yə a yǔ a yəŋ.

²⁶Da' gɑ́ tap e ghɔm bi e gɑ: Gɛfa' cwəpuŋ, dǔŋ! O lə̀ zhyə̌ gɑ́ gɑ̌ shwa ywə tsʉ' yə da m dzə ywə nə a, biŋ bɑ ŋwa ywə nə tsʉ' yə da m sɛtə sɔmywə nə a.

²⁷O lə́ bɑ gɔ yap ŋkhap a ywə gɛ baŋk; a di biŋ jʉ̀m nthé ŋkhap a pu a mcwɔp myə́.

²⁸Po kwi talɑŋto yə a bi e a, hɑ bi mo yə e gə mtalɑŋto gham a.

²⁹Nə pa' mo yə e ghə ywə a pu gɔ sɔ' hɑ ywə bi e, e ghə a yɔm; da' gɑ mo yə e ka ghə ywə a pu kwi ba yə e ghə a.

³⁰Sɔ' m nə gɛfa' tə kwitə sɔmywə yəŋ gɑ, po ma' e nthʉm jʉ́m dzʉ́: tsʉ' nə lɔ̀ pu a nə pfɑ msuŋ.

³¹Cwə yə Mú mo gɔ sɔ' sɔ' nthʉm ghu'tə e, pu a pɑ aŋgəle jʉm e, cwə nə leŋ ghu'tə e.

³²Guŋ mguŋ awɛ gɔ sɔ' cu'tə dzə e, e tya wap pa' byap dzə nthya jʉ̀jʉ̀ nə dzə́ nthʉɔ a.

³³E gɔ sɔ' yap jʉ̀jʉ̀ nə ghə̌ŋ pú tʉɔ, yap dzə nthʉɔ nə ghə̌ŋ pú kwyap.

³⁴A pɑ po'o Fo ghɔm bi pɑ ghəŋ pú tʉɔ gɑ: Po sɔ̌', wɔ pyə Tá ǎ bɑ e le nyəŋ byanyə nə po a, ŋkwi Nəfo yə pu lə la' nyaptə bi po tə fɑ cwə nə ghə dzʉ̌ a.

³⁵Nə pa' jiku'u lə yɛ́ a, po hɑ ywə pfɑ́; ji shyə lə yɛ́ a, po hɑ nwə́; dɑ́ pɑ́ gʉɔ po nyəŋ a dyə.

³⁶Bɑ kəcyəŋ e po kwa dzə̀ nə m̀, bɑ gǒ, po sɔ' dé a, bɑ dyəcɛ̌ po sɔ' bəŋ m̀.

³⁷A gɔ sɔ' pɑ́ po'o, pɔ nyənyɔ pa' bi e gɑ: Cyəpɔ, pyə lə́ bɑ́ hɑ́ sǒ jɔ o bɑ jìkǔ' yɛ́ o pyə kim o, bɑ ghak o ŋkhə pyə hɑ shyə bu?

³⁸Pyə lə́ bɑ́ hɑ́ sǒ jɔ o o pɑ gʉ̀ɔ pyə nyəŋ o dyə? Kəcyəŋ e, pyə kwa dzə nə o?

³⁹Pyə lə bɑ̀ hɑ sǒ jɔ o o pɑ gó kɑ dyəcɛ̌ lə, pyə sɔ' bəŋ o?

⁴⁰Fo gɔ sɔ' pa' bi pu gɑ: Kwa' nyənyɔ gɑ siŋ wɔ gɑ́ bǎ cwəkəlɑ yə po lə̀ gə bi mukəcɔk mú nə pǒ pɔ̀ pyə wap bɑ mfɑ pɑ̌ a, po lə́ gə pɑ́ bəm.

⁴¹E gɔ sɔ' piŋ ghɔm bi pɑ ghəŋ kwyap gɑ: Mghɛ do, po fɑ bəŋ m̀ gɔ nthʉm mɔk tə pi, yə pu lə nyaptə bi Sata pu a pɑ aŋgəle pyə a.

⁴²Nə pa' jiku'u lə́ yɛ́ a, po lə hɑ ywə npfɑ; ji shyə lə́ yɛ́ a, po lə hɑ nwə́

⁴³Ŋ dɑ́ pɑ́ gʉɔ po lə nyəŋ a dyə; bɑ kəcyəŋ e po lə kwa dzə nə m̀ gǒ biŋ bɑ dyəcɛ̌ po lə lé a.

⁴⁴A pɑ́ po'o wap pa' bi e gɑ: Cyəpɔ, pyə lə́ bɑ́ hɑ́ sǒ jɔ o bɑ jiku'u kɑ ji shyə lə, kɑ gʉɔ lə, kɑ kəcyəŋ e lə, kɑ m nə gho lə kɑ m dyəcɛ̌ lə pyə lə kwitə o?

⁴⁵E pa' bi pu gɑ: Kwa' nyənyɔ gɑ siŋ wɔ gɑ bǎ cwəkəlɑ yə po lě tə ghə bi mu' nə pǒ mkəcɔk po pɔ a, bɑ po lə̀ shyətə ghə pa' pɑ̀ bəm.

⁴⁶Pɔ bɔ gɔ sɔ' ghɔ nthʉm go' tə mì, a pɔ nyənyɔ ghɔ nthʉm vɔk tə mi.