Read Ghomala New Testament MATIO 26 Bible Online

MATIO 26 - Ghomala New Testament bible

MATIO 26

¹Yeso lə́ nə́ miŋ nə ghɔm guŋ mghɔm nthɔk bɔ awɛ, gɔm bi pɑkhʉ̌ pyə gɑ:

²Pǒ zhyə gɑ Paska gɔ pɑ nə batə tyɛ' pʉə: Pù hɑ Mú mǒ pu kam é thə̀ bɛnyəpɛnyə.

³A lə̀ pɑ́ po'o, mkamsi gwyəgwyə, ba mghətso cəcɑ̌ pɔmnəŋ, cu'tə tətɔ ŋkhamsi gwyə yə pu lə́ ŋkhe é gɑ́ Kaifa a.

⁴Wap lə tɛ́ bɑ ŋkwi shwə̀ nə lɑ fʉ̌ gəm Yeso jwə́ e.

⁵Da' gɑ wap lə́ bɑwə gɔm gɑ: Ka pɑ ghəm e nthʉm la'nwə, po'o gɑ a kɑ paknyə pɔmnəŋ.

⁶Cwə yə́ Yeso lə̀ pɑ́ Betanya dyə Simon gɛ ka'pap,

⁷mu' mjwǐ sɔ' bəŋ e, bɑ e wim duŋ mwɑ damnyəlamnyə, myə tʉɔdəŋ, pfyə thə Yeso, cwə yə wap lə́ bɑ tɑpe a.

⁸Pɑkhʉ̌ Yeso lə́ nə yɔ po'o, sə́ yap fi', wap ghɔm gɑ, yəŋ pí gɔ kwitə kʉ?

⁹Pu kɑ́ bɑ gɔ fiŋ mwɑ́ bɔ mtʉɔdə̀ŋ, hɑ ŋkhap bi mpə̌ŋ.

¹⁰Yeso lə́ zhyə̌, gɔm bi pu gɑ: nwə kɑ́ po paknyə yəŋ mjwǐ? A kwa' fa' pɑpuŋ tə e fa' nə m̀.

¹¹A ghɔ nə mpə̌ŋ, po a pú nə gɔ pɑ́ pɑ́ guŋ mcwə awɛ, tə́ sɔ' m nə m̀, tə́ pɑ nə gɔ pɑ́ pɑ́ guŋ mcwə awɛ pɑ́.

¹²E nə nyəŋ mwɑ damnyəlamnyə mɔ gɑ nə m̀, nə́ nyaptə nə təŋ a.

¹³Kwa' nyənyɔ gɑ̌ siŋ wɔ gɑ guŋ mtsʉ' awɛ myə pu gɔ la' siŋ Cuŋ pɑpuŋ yəŋ gɑ́ nə́ nthʉm guŋ dzʉ awɛ a, pu pɑ gɔm ba ywə yə e lə ghə a nə ŋkhamtə e.

¹⁴A lə pɑ̀ po'o, mu' mo nə pɔ shwɔppʉə mgham yə tso tsyə bɑ Yuda Iskariɔt a ghɔ ywə mkamsi gwyə,

¹⁵gɔm bi pu gɑ: Po gɔ hɑ́ kɑ́ bəm a, biŋ hɑ e bi pǒ? Wap lə pǐŋ ŋkhap bɛ mgham ntha bi e.

¹⁶Tə̀ fɑ po'o Yuda pɑ shəŋ sɔ̀ pɑpuŋ nə hɑ Yeso bi pú.

¹⁷A lə̀ pɑ́ nə dəŋdzə tyɛ'dzʉ msɛ tə kwɔ' msɛ̌, pɑkhʉ̌ Yeso sɔ' gɔm bi e gɑ: O wə́ shəŋ gɑ́ pyə nyaptə ywətsʉ Paska bu m hɑ̀?

¹⁸E ghɔm bi pu gɑ: Po ghɔ tisuŋ, gɔm bi mu' mo gɑ́: Ta ghɔm gɑ: Cwə wə bɑ a ghɔptə, pyə a pɑkhʉ̌ pɑ̌ gɔ ghə Paska ywə o

¹⁹Pɑkhʉ̌ Yeso lə ghə pa' e lə́ ghɔm bi pu a, nyaptə Paska.

²⁰A lə pɑ bwadzʉ̌, Yeso pu a pɔ shwɔppʉə mgham pɑ tɑpe

²¹pu a pu lə pɑ̀ dzʉ̀ywə, e ghɔm gɑ: Kwa' nyənyɔ gɑ̌ siŋ wɔ gɑ mu' mo nə po gɔ hɑ a bi pu.

²²Nwə lə pɔk wap té'o, bǎ ya mo lə́ nə pu pɑ gɔm bi e gɑ: A bɑ a à Cyəpɔ?

²³E pa' bi pu gɑ pu yɔk pyə mo yə e gɔ hɑ a bɑ a pəmtə́ ŋkho kɛ́.

²⁴Mú mo gɔ ghɔ pa' pu lə́ və nə́ e a; da' gɑ ghəghʉɔ bi mo yə pu shyə m nə́ e tə́ hɑ Mú mo a! Dzə lə́ bɑ bi mo bɔ gɑ pu kɑ tsə́ e.

²⁵Yuda yə e lə́ bɑwə hɑ e a lə ghɔm gɔm gɑ: Bi a pɑ a pɑ ǎ Rabi? Yeso pa' bi e gɑ: Ǒ ghɔm!

²⁶Wap lə pɑ dzʉ̀ ywə, Yeso pe msɛ̌, nyəŋ byanyə nə, bo', biŋ hɑ bi pɑkhʉ̌ pyə gɔm gɑ: Po kɑ̀ pfɑ́, yəŋ gɑ bɑ́ bapnɑ a.

²⁷Biŋ ŋkwa nthú' mlu' go'tə Si nə hɑ bi pu gɔm gɑ: Po nwə́ guŋ yɔ awɛ.

²⁸Nə pa' moŋ gɑ bɑ mcyə́ mə̌, mcyə kɔ̀ myə pu pfyə nə thə́ pɔ jɔmyɔ̌m, nə nə́ lɑ mhɔ pɔ shwyɛ' wap a.

²⁹Gɑ siŋ wɔ gɑ: Ŋ tə gɔ piŋ kwi' nwə́ mlu' nthɔm thə̀ mɔ gɑ́ pɑ̀, tə́ kəm tyɛ'dzʉ́ yə pɑ̀ gɔ la' kwi' nwə́ myə sə́, nthʉm Nəfò Tà ǎ a.

³⁰Wap lə zhwɔp shyə, nthəm gɔ kuŋ mthə́ bɛ.

³¹A pɑ po'o, Yeso ghɔm bi pu gɑ: Kwa' mtsʉ' ɔ gɑ, po gɔ cyə m nə m̀ vʉtəsi awɛ, nə pa' a bɑ pu lé bvə gɑ: Gɑ̌ gɔ sɔ' cwɔ byap dzə́, mjʉ̀jʉ̀ sɛtə́ kà.

³²Da' gɑ̀ gɑ̌ gɔ cwə tə yam nə vʉ̌, po kwyatə a Galilea.

³³Pɛtrɔ lɑ ghɔm gɔm gɑ: Guŋ pɔ awɛ cyə m nə o bvʉtə́ bɑ ŋ tə gɔ vʉ̀ pɑ́.

³⁴Yeso ghɔm bi e gɑ: Kwa nyənyɔ gɑ̌ siŋ o gɑ́ ko' gɔ nə tuŋ m tsʉ' ɔ bɑ ǒ kəŋnyə a mcʉm ntha.

³⁵Pɛtrɔ ghɔm bi e gɑ: A pɑ pɑ́ gɑ́ pǔ gɔ pəmtə pfʉ́ bɑ ŋ tə gɔ kəŋnyə o pɑ̀. Ba guŋ pɑkhʉ̌ awɛ lə ghɔm pɑ́ po'o.

³⁶Yeso pu a pɑkhʉ̌ pyə lə ghɔ tə́ ŋkhəm nə́ mu' tsʉ' yə pú ŋkhe gɑ́ Gətsemane a, e ghɔm bi pú gɑ: Po cwə tsɔ'ɔ tə́ a gɔ tsi' i shwyɛ'nyə Si.

³⁷E lə́ lɑ̌ Pɛtrɔ pu a pǒ Zebede pɑpʉə. Biŋ ntho' nə zhwiŋ, lam tsyə́ pɑ sɔ́.

³⁸A lə pɑ po'o e ghɔm bi pu gɑ: Lam tsɑ̌ wə jwiŋ m zhwiŋ vʉ̌. Pó cwə tsɔ'ɔ pɑ̀ pəmtə disɛ́.

³⁹E lə piŋ na' gɔ dzə, bvʉ́ pfɔppfɔp shwyɛ'nyə Si gɑ: Ta ǎ, a ghɔ̀ bɑ̀ gɑ bi a pɑ yəŋ gɑ̀ nthǔ' cyə̀ gʉə sʉəsʉə nə m̀! Da' gɑ́ tə m pa' gɑ̌ kuŋ a pɑ́, pa' o kuŋ a!

⁴⁰E lə sɔ' bəŋ pɑkhʉ̌ pyə́, wap pɑwə di; e ghɔm bi Pɛtrɔ gɑ: A pɑ̀ po'o tə́ po lə ghə tʉɔ gɑ̀ pɑ nə disɛ nə ta' nam!

⁴¹Po tisɛ, bɑ́ shwyɛ'nyə Si gɑ̀ po kɑ̀ vʉ̀ nə mləŋtə. Zhwenyə wə bɑ a ló kaktʉɔ, da' gɑ bɑ bap nɑ́ pwa.

⁴²E lə piŋ ŋkwi' dù bəŋ pú batə m cʉm bʉ́ə gɔ shwyɛ'nyə́ Si gɔm gɑ: Ta ǎ a pɑ gɑ bi a pɑ yəŋ gɑ nthu' lə cyə tə́ gɑ nwə́, ywə yə o shəŋ a, a pəmtə̀.

⁴³E lə piŋ bɑnyə, jɔ wap, wap pɑwə di nə pa' mnyə map lə bɑ ǎ tsɑ̀ nə lwɔk a.

⁴⁴E lə tak wap nəŋ, biŋ ŋkwi' gɔ nə batə mcʉm ntha' shwyɛ'nyə Si, gɔm pɑ́ mghɔm myə e ji gɔm a.

⁴⁵E lə piŋ sɔ' bəŋ pɑkhʉ̌ gɔm bi pu gɑ: Po ti nə gɔ dzə biŋ hwitə́! Yɔ̀, cwə yə pu gɔ hɑ Mù mo nə̀ bǔ pɔ cwəpuŋ a ku'.

⁴⁶Po lusi! Pɑ ghɔ, yɔ́, mo yə e hɑ́ a wə sɔ'.

⁴⁷E lə́ pɑ́ gɔm po'o, Yuda mu' mo nə pɔ shwɔppʉə mgham ŋwak pu a vəŋ pɔ bɑ wap wim mnyədwɔp pu a mwya; bɑ mkamsi gwyəgwyə pu a mghətsó nthʉm guŋ nə́ nthəm wap.

⁴⁸Mo yə é lə bɑwə gɔ hɑ Yeso a lə bɑ pu a pu yap mtiŋ, e ghɔm bi pu gɑ: Mo yə gɑ gɔ nuŋ mgho' myə́ a, a gɔ pɑ yʉ Yeso, po ghəm é.

⁴⁹E lə wuŋ gɔ bəŋ Yeso gɔm gɑ: Gɑ ca'tə m Ta. E lə piŋ nuŋ mgho' myə́.

⁵⁰Yeso ghɔm bi e gɑ: Só a, ghə ywə yə o tsɔ' nə a. Wap lə̀ sɔ' cwəlɔ, jap bù nə Yeso gəm e.

⁵¹Mu' mo yə pu a Yeso lə bɑ́ a, lə̀ cwɔ' nyə́ e, nə̀ nɔk gɛfa' ŋkhamsi gwyə, nthe təŋ e.

⁵²A pɑ po'o Yeso ghɔm bi e gɑ: Nyəŋ nyə o nə tsʉ' e, nə pa' pɑ̀ cwɔ' nyə́ gɔ la' pfʉ́ pɑ́ nyə.

⁵³Ǒ kwɛ gɑ́ ŋ khá ku' nə ké Tá ǎ e wuŋ hɑ shwə̀ shù aŋgəle shwɔppʉə mgham bəm a.

⁵⁴Bi a pɑ̀ po'o bɑ ywə yə pu lə və gɑ́ a gɔ pɑ̀ po'o a gɔ pəmtə m gɑ́ kɑ̀?

⁵⁵Yeso lə́ ghɔm bi pɔmnəŋ pɑ cwə o bɔ gɑ: Pa' cwə yə pu gɔ ghəm samshwə a, po lɑ mnyə pu a mwya nə sɔ' m nə ghəm a! Ŋ dɑ̀ bɑ guŋ mtyɛ'dzʉ́ awɛ bɑ̀ gɑ cwə Dyə Si bɑ ji'tə pɔmnəŋ ywə, po lə ghəm a.

⁵⁶Da' gɑ́ guŋ ywə awɛ bɑ́ po'o tə́ ywə yə mghɔm ghɔm Si lə və a a pəmtə. A lə pɑ̀ po'o pɑkhʉ̌ pyə wa' e, ŋkhʉ̌.

⁵⁷Pɔ pyə wap lə ghəm Yeso a lə lɑ e gɔ ywə Kaifa, ŋkhamsi gwyə yə pɑ zhyə́ mco' pu a mghətso lə bɑ wap cu'tə ywə e a.

⁵⁸Sɔ' m nə Pɛtrɔ, e lə bɑ ě yap jʉm, tə bɑwə giŋ tə gʉə sʉəsʉə; e lə ghɔ tə́ ŋkhəm ywə ŋkhamsi gwyə; ŋkho ywə e, shwə pu a mghɛ fa', bɑ gɔ yɔ yə pa' a lə gɔ nə miŋ a.

⁵⁹Mkamsi gwyə́gwyə́ pu a Sanedrɛŋ lə bɑwə shəŋ kwinthɛ cwanwə yə wap gɔ ghɔm tə pu cyə m nə ja' gɑ pu gɔ zhwə e a.

⁶⁰Ba tə pa' mkwinthɛ cwanwə lə sɔ' tə jɔm a, wap la tə yɔ sɔmywə pɑ́. A lə nə miŋ, shɑ pɔ̀ pɑpʉə sɔ'

⁶¹gɔm gɑ̀: Bɛ yəŋ kɑ́ ghɔm gɑ̀: Gɑ̌ ku' nə sa'tə tsʉ' Si, biŋ ŋkwɑ nə mtyɛ'dzʉ́ mənthá.

⁶²Ŋkhamsi gwyə lə lǔsi gɔm bi Yeso gɑ: O ka ghə sɔmywə yə o gɔ pa' nə a? Pɔ pɔ gɑ̀ butə o gɑ́ kɑ?

⁶³Da' gɑ Yeso lɛ́tə̀ lɛ̌tə́. Ŋkhamsi gwyə ghɔm bi e gɑ: Gɑ̌ ghɔm bu nə tso Si nthʉɔtʉɔ gɑ o siŋ wɔk bi a o bɑ Kristo Mù Si a.

⁶⁴Yeso pa' bi e gɑ: Ǒ ghɔm. Da' gɑ́ tə fɑ cwəlɔ po gɔ pɑ yɔ Mu mo bɑ e cwə nə ghəŋ tʉɔ Si nthʉɔtʉɔ e fi' dəm mlwa kɛbəŋ.

⁶⁵A lə pɑ po'o, ŋkhamsi gwyə khi dzə e gɔm gɑ: E cap Si, pɑ biŋ shəŋ ya nthi mkwǐnthɛ! Po yu' mcap.

⁶⁶Pǒ yɔ́ yɔ gɑ́ kɑ? Wap pa' bi e gɑ: E ku'nyə nə vʉ̌.

⁶⁷A lə̀ pɑ̀ po'o wap thə́tə mtǐ nə sə́ e, shap e, shɑ pɔ cwɔ mfe təŋ e,

⁶⁸bɑ gɔm bi e gɑ: Gɔm ghɔm Si siŋ wɔk mò yə e shwɔ o a m Kristo.

⁶⁹A lə̀ nə̀ pɑ po'o Pɛtrɔ pɑ́ shwədyə̌ bɑ e cwə́si. Mu' mú mjwǐ gɛfa' lə̀ sɔ' bəŋ e gɔm gɑ: Ba wə yǔ kɑ́ bɑ po Yeso yə Galilea.

⁷⁰Da' gɑ e kəŋnyə dzə guŋ pɔ awɛ gɔm gɑ: Ŋ kha zhyə ywə yə o shəŋ nə ghɔm a.

⁷¹Pɛtrɔ lə lǔ tsʉ'u bɑ gɔ m shwə pù, mu' mu mjwǐ gɛfa' yɔ e gɔm bi pɔ pyə wap lə́ bɑ tsʉ'u a gɑ: Mo yəŋ gɑ pu Yeso nə kɑ̀ bɑ̀.

⁷²Pɛtrɔ kɔ mkɔ nə ŋkhəŋnyə gɔm gɑ: ŋ kha zhyə bɛ bǎ!

⁷³A lə̀ na' shwə muywə, pɔ pyə́ wap lə bɑ tsʉ'u a sɔ' bəŋ Pɛtrɔ gɔm gɑ: A kwa' nyənyɔ gɑ o bɑ̀ mo yap! Ba gi o pɑwə nthɛ mnɛ mǔ.

⁷⁴Pɛtrɔ lə to' nə kɔ mkɔ bɑ̀ gɔm gɑ: ŋ kha zhyə bɛ bǎ! A lə̀ pɑ po'o ko' wuŋ nthúŋ.

⁷⁵Pɛtrɔ piŋ ŋkhamtə ghɔm tsyə Yeso la' gɔm bi e gɑ: Ko' gɔ nə tùŋ bɑ o kəŋnyə a mcʉm ntha. E lə̀ təm biŋ dɑ mtso dɔ̌.