Read Ghomala New Testament MATIO 27 Bible Online

MATIO 27 - Ghomala New Testament bible

MATIO 27

¹Dzʉ́ lə lɔ̌, guŋ mkamsi gwyəgwyə awɛ pu a mghətso cɔmnwə nə Yeso nə ja'shɛ e gɑ̀ pu zhwə e.

²Wap lə piŋ shə̀ŋ e cwəlɔ, dɑ e nə gɔ hɑ e bi gɔpna' Pilato.

³A lə pɑ́ po'o Yuda yə e lə hɑ Yeso a nə yɔ gɑ́ pu nyəŋ shɛ thə́ e zhwìŋ ko nə e, e lɑ ŋkhap bɛ mgham nthá nə bɑnyə hɑ bi mkamsi gwyəgwyə pu a mghətso

⁴gɔm gɑ: Ŋ khé hɔ nə hɑ mcyə́ tə bya. Da' gɑ wap ghɔm bi e gɑ: A ghə la m wɔk! A yu shɛ.

⁵A lə pɑ̀ po'o e təm, ma' ŋkhap nə ghəŋ tsʉ' Si, cwəlɔ gɔ shəŋnyə.

⁶Mkamsi gwyə lə pé ŋkhap gɔm gɑ: Pu ka piŋ gɑ́ pɑ ŋkhap yəŋ ko nthɛ nə pa' a ŋkhap mcyə.

⁷Wap lə tɛ̌, dɑ ŋkhap bɔ nə jo pe bə̌m mcǎ' nə gə tsʉ' nə nthəŋ mghʉɔ.

⁸A ywə yə a gə tə́ pu pɑ́ ŋkhe pé bɔ gɑ pé mcyə tə ŋkhəm cwəlɔ a.

⁹A pɑ́ po'o ywə yə gɔm ghɔm Si Yeremia lə ghɔm a pəmtə gɑ: Wap lě biŋ ŋkwi ŋkhap bɛ̀ mgham nthá: A bɑ dəŋ mo yə pu lə tɛ a, mo yə pǒ pɑ Israɛl lə tɛ a.

¹⁰Wap lə hɑ nə́ pě bə̌mmcǎ' dəŋdəŋ pa' Cyəpɔ lə ghɔm bəm a.

¹¹Pu lə fyɛ' Yeso dzə gɔpna' həŋtə e gɑ: O bɑ fo pɑ Yudea a? Yeso ghɔm bi e gɑ: Wə nə gɔm,

¹²tə́ sɔ' m nə mnwə myə mkamsi gwyəgwyə pu a mghətso lə gɔm nə e a, e lə pa' sɔmywə nə́.

¹³A pɑ́ po'o Pilato ghɔm bi e gɑ: O tə́ bɑwə ju' guŋ mnwə myə pu bɑwə gɔm nə́ o a pǎ?

¹⁴Yeso lə̀ pa' sɔm nwə bi gɔpna', tə́ nwə cyə e.

¹⁵A lə bɑ mɑ̀ gɑ́ a pɑ bǎ nə ya ŋwɛnyə lə, gɔpna' té ta' mo cɛ́, bi pɔmnəŋ, mo yə wap həŋtə a.

¹⁶A lə bɑ pu ghə̀ mu' mgha'mgha' gɛ cɛ̌, tso tsyə pɑ Yeso Barabas

¹⁷Pilato lə həŋtə pɔmnəŋ pyə wap lə bɑ wap cu'tə a gɑ: Pǒ wə shəŋ gɑ nthak ya mo bi pǒ? Yeso Barabas ká Yeso yə pu ŋkhe e gɑ Kristo a?

¹⁸Nə pa' Pilato lə bɑ e zhyə gɑ́ pu lə̀ ŋkhiŋ Yeso kǐŋ tə̀ hɑ é bi e a.

¹⁹Cwə yə Pilato lə pɑ́ dyə fyɛ' a, jwi e təm gɑ́ pu ghɔm bi e gɑ: Kɑ ko nə nwə mo nyənyɔ yɑ! Nə pa' jʉ̀m kwɔ' la' tyɛ' ɔ baknyə a nə nwə e te'te'.

²⁰Mkamsi gwyəgwyə pu a mghətso lə́ tɔk pɔmnəŋ gɑ pu həŋtə bi Pilato gɑ e tak Barabas nəŋ, gə pu zhwə Yeso.

²¹Gɔpna' lə piŋ dɑ ghɔm həŋtə wap gɑ: A ghɔ nə wap pɑpʉə po pɑwə shəŋ gɑ nthak ya mo neŋ? Wap pa' bi e gɑ Barabas.

²²Pilato həŋtə wap gɑ: Gɑ gɔ ghə la m Yeso yə pu ŋkhe é gɑ Kristo a? Guŋ yap awɛ pa' gɑ: Kam e thə́ bɛnyəpɛnyə!

²³E piŋ həŋtə wap gɑ: A bɑ e ghə kɑ yə a pɔk a? Da' gɑ wap cwé tə thə̀ gɑ: Kam e thə́ bɛnyəpɛnyə.

²⁴Pilato lə nə yɔ gɑ́ ywə yə e wə gɔm a ka kwitə, pɔmnəŋ piŋ bɑwə shaktə nɑ tsap, ŋkwi shyə nə sɔk bu myə́ dzə pɔmnəŋ gɔm gɑ: Ŋ kha zhyə sɔmywə nə mcyə mɔ̌; a yɔ shɛ̀.

²⁵Guŋ pɔ awɛ pa' gɑ: Mcyə myə́ ko nə pyə ba m nə́ pó pɔk.

²⁶A lə pɑ́ po'o e tak Barabas nəŋ bi pu. Tə sɔ' m nə Yeso; e lə ghə̀ pu lɑ nthě shwɔ e, biŋ hɑ e gɑ pu kam e thə bɛnyəpɛnyə.

²⁷Msəŋwi gɔpna' lə lɑ Yeso ŋkho dyə fyɛ' cwəlɔ, shu'tə guŋ msəŋwi awɛ bəŋ e.

²⁸Wap lə tɔk dzə nə e ŋkwa pɛ dzə nə̌m nə e.

²⁹Dɑ mka'tə ba' ntheŋ nthʉ́ thə é; biŋ hɑ ka'cyə bi e nə pù tʉɔ; wap lə kam mkwi'tə dzə e, shap é gɔm gɑ: Pyə ca'tə o bɑ fo pɑ Yudea!

³⁰Wap lə thə́tə mtǐ nə e, biŋ ŋkwi ka' pu e shwɔ thə e.

³¹Wap lə cap e po'o nthɔk dzə́ nə́m nə e, ŋkwa kwa' dzə tsyə nə e, biŋ dɑ e gɔ nə kam e thə̀ bɛnyəpɛnyə.

³²Wap lə pɑ́ nthəm jɔ mu' mbɛ, yə Kirena, tso tsyə pɑ Simon wap ghəm e gɑ e kwa bɛnyəpɛnyə Yeso.

³³Wap lə ghɔ tə ŋkho tsʉ' yə pu ŋkhe gɑ Gɔlgota, a pɑ̀ nthùtə gɑ tsʉ' kəlo' thə́ mò.

³⁴Wap hɑ mlu' bɑ pú ŋi'nyə mcyə́ nə́ bi e gɑ e nwə. E lə́ zhwi'tə, ŋkhəŋnyə nə́ nwə́

³⁵wap lə kam e thə bɛnyəpɛnyə cwəlɔ, nthamnthùŋ nə gap mdzə myə́.

³⁶Wap lə piŋ shwə̀ tsʉ' u bɑ byap e.

³⁷Wap lə ŋwa' ywə yə a gə tə̀ pu zhwə e a jap dəm thə́ e gɑ: Mo yə̌ŋ gɑ bɑ Yeso, fo pɑ Yudea.

³⁸Pu lə pəmtə̀ ŋkham wap pu a shɑ̀ msamshwə pɑ́pʉə, mu' nə ghəŋ tʉɔ gə yə mu' nə ghəŋ kwyap.

³⁹Mcyə́ jyə̀ lə nə cyə̀ bɑ jəmtə, bɑ ŋʉ' thə yap,

⁴⁰gɔm gɑ: Wə yə o sa'tə tsʉ' Si biŋ ŋkwɑ nə tyɛ' tá a, o pɑ Mu Si o vɔk thə nɑ o, fi' thə bɛnyəpɛnyə!

⁴¹Ba pɑ zhyə mco' pu a mghətso, ba mkamsi gwyəgwyə lə yəmtə e gɑ:

⁴²E lə̀ vɔk shɑ pɔ; bi a pɑ e lə vɔk thə nɑ e a! E bɑ fo pɑ Israɛl, e fi' thə bɛnyəpɛnyə cwəlɔ̌, pyə piŋ e!

⁴³Pu Si nə bɑ́, a Si vɔk e cwəlɔ, a pɑ zhyə́ gɑ́ e ŋkhuŋ e, nə pa' e gɔm gɑ: Gɑ̌ bɑ́ Mu Si!

⁴⁴Ba msam shwə̀ pyə pu lə kam wap pu a pù a lə kwi' jəmtə e yap pɑ po'o.

⁴⁵Tə́ fɑ mɔkcʉ gɔ ŋkhəm nə mnam tá, jʉ́m lə lɑ guŋ dəmca' awɛ.

⁴⁶A lə nə kəm nə mnam tá Yeso cwé tə́ thə̀ gɑ: Eli, Eli, lama sabaktani. A pɑ́ nthutə gɑ: Si a, Si a, o gwa' a gɑ kɑ?

⁴⁷Shɑ pɔ nə pɔ pyə wap lə bɑ tsʉ' u a lə nə yu' e po'o gɔ́m gɑ: E yə́ bɑwə ŋkhe Elia,

⁴⁸Mu' mo nə pu lə wuŋ ŋkhʉ̀dʉ́ be cù ywə nyəŋ cɔ́kmlu' nə, su nə́ kam kà' nya gɑ e nwə.

⁴⁹Pyə shɑ́ pɔ ghɔm gɑ: Tiŋnyə! Pɑ yɔ bi a Elia gɔ sɔ' vɔk e a.

⁵⁰Da' gɑ Yeso lə piŋ shwe tə́ thə cwəlɔ, zhwenyə é təm.

⁵¹Pu nə yɔ dzə́ Dyə Si sɔ pak pʉə fɑ thə̀ ŋkhəm si; cǎ' cu'nyə. Mghwɔ' sɔtə,

⁵²mthəsì ghyɛ', mnɑ pɔ dɔlɔ̌ tə jɔm yam nə vʉ̌:

⁵³Jam nə vʉ̌, nthəm mthəsì po'o ŋkho tisuŋ dɔlɔ̌ pɔ jɔmyɔm yɔ wap.

⁵⁴Tadyə msəŋwi ŋkhə pu a pɔ pyə pu a pu lə bɑwə byap Yeso a lə nə yɔ pa' ca' shʉ'nyə a, ba ywə yə a lə cyə a, bwɔk té' o gɔm gɑ: kwa' nyənyɔ mo yəŋ kɑ bɑ Mu Si.

⁵⁵Vəŋ pɑ jwǐ lə bɑ tsʉ'u, bɑ wap tiŋnyə gʉə sʉəsʉə bɑwə jɔ; wap lə̀ bɑ jʉm Yeso tə fɑ cwə yə́ é lə́ bɑ́ Galilea, bɑ fa' bi e;

⁵⁶Maria yə Makdala ba Maria ma Yakop pu Yosɛp, ba ma pǒ Zebede lə bɑ cəcɑ pù.

⁵⁷A lə̀ kəm bwadzʉ̌, mu' mbɛ yə Arimatea mo jizhǐ tso tsyə pɑ Yosɛp, bɑ e lə bɑ yə mukhʉ̌ Yeso sɔ'.

⁵⁸Bɛ bɔ lə ghɔ jɔ Pilato, həŋtə gɑ e hɑ pfə Yeso bi e. Pilato lə ghɔm gɑ pu hɑ pfə Yeso bi e.

⁵⁹Yosɛp lə kwi pfə Yeso dzʉmtə nə kam dzə́ dɔlɔ̌,

⁶⁰nyəŋ nthʉm sì sə́ yə e lə ghə pu təŋ nthʉm ghu gwɔ' a; biŋ ŋkhəŋnyə mɑ gwɔ̀' nə shɑ thəsì cwəlɔ gɔ.

⁶¹Da' gɑ Maria yə Makdala pu yə mu' Maria lə́ bɑ tsʉ'u bɑ wap cwə dzə sì.

⁶²Tyɛ' nə nyaptə paska lə cyə̌, dzʉ lɔ cwəlɔ, mkamsi gwyəgwyə pu a pɑ Farisai pəmtə gɔ ywə Pilato,

⁶³gɔm bi e gɑ: Cyəpɔ, pyə kamtə́ gɑ shwanwə yəŋ lə pɑ cwə yə e lə jɑ tə pfʉ̌ a gɔm gɑ: A gɔ la' cyə tyɛ'dzʉ́ yɑtá jam nə vʉ̌.

⁶⁴Ghɔm gɑ pu pyap thəsì e tə ŋkhəm nə tyɛ' tá, bwɔk gɑ pɑkhʉ̌ pyə kɑ sɔ' jʉ pfə́ e, gɔm bi pɔmnəŋ gɑ́ e yam nə vʉ̌. Nə pa' bɑ yə bɔ cwanwə gɔ piŋ pɔk tə cyə yə dzə.

⁶⁵Pilato lə ghɔm bi pu gɑ: A bɑ pǒ ghə pɑ pyap tsʉ'. Po ghɔ byap thəsì e pa' po zhyə a.

⁶⁶Wap lə ghɔ cwəlɔ jap stam nə gwɔ' thəsì e, biŋ jap pɔ gɑ wap pyap.