Read Ghomala New Testament MATIO 4 Bible Online

MATIO 4 - Ghomala New Testament bible

MATIO 4

¹A lə pɑ po'o Zhwenyə lɑ Yeso gɔ ghakgo gɑ Sata ləŋtə e.

²E lə cwə tsʉ'u mtyɛ'dzʉ mghappfʉə ba mnthyatə mghappfʉə tə tsʉ̌ ywə, jikǔ' yɛ́ e.

³Gɛ ləŋtə sɔ' bəŋ e gɔm bi e gɑ: O pɑ́ Mu Si, o ghɔm gɑ mwɔ' mɔ gɑ cʉ' msɛ.

⁴Da' gɑ Yeso ghɔm bi e gɑ: A bɑ pu və gɑ́ mo tɑ́ bvɔk da' nə msɛ̌ pɑ, mo bvɔk m nə ghɔm tsyə a təm shwə̌ Si a.

⁵A lə pɑ́ po'o Sata lɑ e gɔ nthʉm tisuŋ Dɔlɔ̌ jap e do Dyə Si,

⁶biŋ gɔm bi e gɑ: O pɑ mu Si, o cʉ́msi, nə pa' a bɑ pu və gɑ. Si gɔ pa ghɔm bi pɑ aŋgəle pyə wap pɑ ŋkwa o nə bu map po'o gɑ o kɑ cwɔ' kwə o nə gwɔ'.

⁷Yeso ghɔm bi e gɑ: A bɑ pu piŋ bvə ba m gɑ o tɑ gɔ ləŋtə Cyəpɔ Si o pɑ.

⁸Sata piŋ dɑ e gɔ dəm mu' sʉəsʉə kuŋ gǒ; da'tə é guŋ nəfo dzʉ awɛ ba mghu' myə́,

⁹gɔm bi e gɑ: O kam mkwi'tə mu dzə m gamtə a bɑ gɑ̌ gɔ hɑ guŋ e awɛ bu.

¹⁰A pɑ po'o Yeso ghɔm bi é gɑ: Sata lǔ! Nə pa' a bɑ pu və gɑ o gɔ pɑ ghamtə pɑ da' Cyəpɔ Si o piŋ pɑ fa' da' bi e.

¹¹Sata lə tak e nəŋ cwəlɔ pɑ aŋgəle sɔ' bəŋ e, bɑ fa' bi e.

¹²Yeso lə nə yu' gɑ pu ghəm Yohane nthəm dɑ m Galilea,

¹³dú Nazarɛt, gɔ shwə Kapɛrnaum kəŋ shyə lɑpʉə guŋ Zabulon pu Nɛftali,

¹⁴po'o gɑ́ ghɔm tsyə gɔm ghɔm Si Esaya lə ghɔm a, a pəmtə gɑ́:

¹⁵Guŋ Zabulon, guŋ Nɛftali, jyə shyə́ lɑpʉə, guŋ nə yə mu' jʉɔ Yurdɛŋ, Galilea mgùŋ!

¹⁶Pɔ pyə wap lə́ bɑ́ nthʉm jʉ́m á, yɔ ŋkha' gwyə; pɔ pyə wap lə́ bɑ́ nthʉm sə́sə́ guŋ vʉ́ a, ŋkha' sɔ' bi pu.

¹⁷Tə fɑ cwə o bɔ Yeso to' bɑ siŋ gɑ: Po kwyəpnyə: Nəfo kɛbəŋ ghɔptə.

¹⁸Yeso lə pɑ́ giŋ giŋnyə shyə́ lɑpʉə Galilea jɔ shɑ mghəm bapgu pɑpʉə, wap pɑ mfɑ̌. Simon yə pu ŋkhe e gɑ Pɛtrɔ a, pu Andreya fɑ e, wap pɑ́wə ma' nthənthɔm nthʉm shyə́ lɑpʉə.

¹⁹Yeso ghɔm bi pú gɑ: Po yap jʉ̌m m̀, gɑ gɔ sɔ' lɑ wɔ ghə pɑ ghəm pɔmnəŋ.

²⁰Wap lə wuŋ nthak mnthənthɔm map nə́ŋ Ntham jʉ̀m e.

²¹Yeso lə ghɔ tə ŋkho dzə, jɔ shɑ mfɑ pɑpʉə Yakop mu Zebede pu Yohane fɑ e, nthʉm kənu' pu a tá yap Zebede wap pɑwə nyaptə nthənthɔm yap, Yeso ke wap.

²²Wap lə wuŋ nthak kənu' pú tà yap jap jʉ̌m Yeso.

²³Yeso lə́ kǎ nə gùŋ Galilea awɛ bɑ ji'tə pɔmnəŋ ywə sinagogə pú, biŋ bɑ siŋ Cuŋ pɑpuŋ nə́ Nəfo, biŋ bɑ jɛ́ mgho pu a mkho'tə cəcɑ́ pɔmnəŋ.

²⁴Pu lə cyanyə tso tsyə́ nə gúŋ pɑ Siria awɛ, pù piŋ bɑ dɑ gùŋ pɑ yɔgo' awɛ, mghɛ gho, kɑ kɑ́ nthi gho mɛnyə lɑ́: Mghɛ ghə zhwenyə cwəpùŋ, pɑ vʉwa', mghɛ po'tə nɑ̀ sɔ' bi é. E pɑ jɛ wáp.

²⁵Vəŋ du pɔ lə biŋ bɑ́ giŋ jʉ̌m Yeso: Pɔ pyə wap lɑ fɑ Galilea bɑ m Dekapoli, bɑ m Yerusalɛm, bɑ m Yudea, bɑ m nə yə mu' jʉɔ Yurdɛŋ.