Read Ghomala New Testament MATIO 5 Bible Online

MATIO 5 - Ghomala New Testament bible

MATIO 5

¹Yeso lə nə yɔ vəŋ pɔmnəŋ ŋkwɔ' dəm kuŋgǒ, shwəsi, pɑkhʉ pyə sɔ' bəŋ e.

²E lə to' nə ghɔmnwə, bɑ ji'tə wap gɑ:

³Mpuŋtsé bɑ mpə́ŋ zhwenyə nə pa' nəfo kɛbəŋ bɑ bi pu a.

⁴Mpuŋtsé bɑ mghɛ byanyə nə pa' wap gɔ sɔ' tsʉ guŋ,

⁵Mpuŋtsé bɑ́ pɔ pyə wáp dɔ á nə pa' pu gɔ sɔ' zhwyə́tə wap.

⁶Mpuŋtsé bɑ pɔ pyə jǐ pu a ghak yap ŋkhə nə nwə dəŋdəŋ á nə pa' wap gɔ sɔ' zhwyə́.

⁷Mpuŋtsé bɑ́ pɑ cɔmmtso nə pa' pu gɔ sɔ' cɔmmtso map.

⁸Mpuŋtsé bɑ pɔ pyə wap ghə tʉm dɔlɔ̌ a, nə pa' wap gɔ sɔ' yɔ Si.

⁹Mpuŋtsé bɑ pɑ fa' nə hwitə; nə pa' pu gɔ sɔ' ké wap gɑ pǒ Si.

¹⁰Mpuŋtsé bɑ pɔ pyə pu dɑ wap jɔgo' nə nwə dəŋdəŋ a, nə pa' Nəfo kɛbəŋ bɑ bi pu.

¹¹Po bɑ mpuŋtsé nə cwə yə pu jəmtə wɔ, bɑ́ cwɔ'mkwə mɔ cwəpuŋ, biŋ bɑ shwatə mnwə cwəpuŋ nə po, po'o nə thə a.

¹²Po pɑ ŋwɛnyə́, bɑ sɛnyə́ nə pa' mcwɔ'fa' mɔ ghu' thə kɛbəŋ. Pu lə ghə pɑ po'o nə́ mghɔm ghɔm Si pyə wap lə bɑ́ dzə po a.

¹³Pǒ bɑ gwɛ́ dəmcǎ', a bi a gwɛ̌ pi nə tʉ̀m, bɑ a gɔ piŋ pɑ gwɛ m gɑ́ kɑ? Bɑ a tə yɑ sɔmywə pɑ, bɑ pu gɔ ma' pé, pɔmnəŋ pɑ dɑ mkwə nə́ŋtə́.

¹⁴Pǒ bɑ ŋkha' dzʉ́, bi a pɑ tisuŋ dəm ŋkhuŋ lə tʉmnyə.

¹⁵Pú tə́ sumɔk nə lambu nyəŋ cəŋ pɑ́, pu nthʉ dəm kwɔ' lambu, po'o gɑ a kyɛ' guŋ pɔ pyə wap dyə a awɛ.

¹⁶Dəŋdəŋ po'o, ŋkha' yɔ́ pɑ́ ŋkhyɛ' nə mnyə́ pɔmnəŋ po'o gɑ́, wap nə yɔ mfa' pɑpuŋ mɔ bɑ gu'tə Tá yɔ yə e bɑ kɛbəŋ a.

¹⁷Ka po kwɛ gɑ́ gɑ sɔ' ghə gɑ mco' pu nwə yə mghɔm ghɔm Si lə ghɔm a, a mi. Ŋ tə sɔ' m nə ghə gɑ́ a mi pɑ. Gɑ sɔ' nə ghə gɑ́ a pəmtə.

¹⁸Nə pa' gɑ siŋ wɔ kwa' nyənyɔ gɑ, kɛbəŋ pu cǎ' gɔ sɔ' nə mi, bɑ bǎ ta' i, bǎ cwɔ' nə i nə mco' lə mi tɑ́ a bɑ gɑ́ guŋ mnwə awɛ pəmtə pɑ́.

¹⁹Cwəlɔ, mo yə e pɔptə bǎ yɑmu' nə mupfʉ̌ mco', biŋ ji'tə bi pɔmnəŋ nə ghə po'o a, bɑ pu gɔ sɔ' lɑ e ghə mo ŋkho' nthʉm nəfo kɛbəŋ; da' gɑ mo yə e ghiŋ nə mco' bɔ, biŋ ji'tə bi pɔmnəŋ a, pu gɔ sɔ' ke mo bɔ gɑ mo gwyə nthʉm nəfo kɛbəŋ.

²⁰Nə pa' gɑ siŋ wɔ gɑ yɔ nə pɑ́ dəŋdəŋ pɑ tə cyə yə pɑ zhyə́ mco' pu a pɑ Farisai, bɑ po tə gɔ sɔ' ko nə nəfo kɛbəŋ pɑ.

²¹Po lə yu' pa' pu lə ghɔm bi pɑ dzə gɑ: Kɑ zhwə mo; mó yə e zhwə mo a bɑ pu gɔ fyɛ́' e dyə fyɛ̀'.

²²Tɑ gɑ ghɔm bi po gɑ́ bǎ yɑ́ mo yə e yɛluŋ nə fɑ é a, bɑ pu gɔ fyɛ́' e dyə fyɛ'; mo yə e ghɔm bi fɑ e gɑ: ŋkhəŋkhʉɔ a, bɑ pu gɔ fyɛ' e sanedrɛŋ; mo yə e ghɔm bi fɑ e gɑ bʉəpǒ a gɔ sɔ' ko nthʉm mɔk tə pǐ.

²³A bi a o pɑ gɔ m nə nuŋpwɔ', ŋkho tsʉ́' to tsə pwɔ', ŋkhamtə gɑ po fɑ o ghə nwə̀,

²⁴o tak tsə pwɔ' tsʉ' to tsə pwɔ', biŋ dəŋdzə gɔ po fɑ o wɔ' bvɑnyə tə o sɔ' cwəlɔ̌ hɑ tsə pwɔ'.

²⁵Cwə yə po yɑ məjyə a, lo'nyə gɑ po gɛ bo o pɑ ŋkwishwə, bwɔk gɑ, ka gɛ bo o bɔ̌ ghɔ fiŋ o bi fyɛ' shɛ, fyɛ' shɛ́ hɑ o bi səŋwi, pu nyeŋ o dyəcɛ̌.

²⁶Gɑ̌ siŋ o kwa' nyənyɔ gɑ o tə gɔ təm dyəcɛ̌ bɔ tə tuŋ gúŋ jú o awɛ pɑ tə a lə cʉ' bǎ ta' nəŋthə.

²⁷Po lə yu' pa' pu lə ghɔm gɑ́: kɑ ghə ghap a.

²⁸Tɑ́ gɑ̌ ghɔm bi po gɑ́ mo yə e lɑ mnyə ghi'nyə dé mjwǐ a, bɑ pu é é da' gə ghap nthʉm tʉm e.

²⁹A pɑ gɑ bɛtsə o yə tʉɔ fa'tə o nə́ vʉ́ nə mhɔ̀, o té e gwa' tə gʉə sʉəsʉə, nə pa' dzə bu gɑ ta' zhəŋ nə mzhəŋ nɑ mu pfʉ́ po'o gɑ pu kɑ ma' guŋ nɑ o awɛ mɔk tə pi.

³⁰Biŋ bɑ bi a pú o yə tʉɔ fa'tə o nə́ vʉ nə́ mhɔ, o ya' e gwa' tə gʉə sʉəsʉə, nə pa' dzə̌ bu gɑ ta' zhəŋ nə́ mzhəŋ nɑ mu pfʉ́ po'o gɑ guŋ nɑ́ o awɛ kɑ́ ghɔ nthʉm mɔk tə pi.

³¹A bɑ pu lé bǐŋ gɔm gɑ́: mo zhəŋ jwi e, e hɑ ŋwa'nyə nə jəŋ e bi e.

³²Tɑ́ gɑ̌ ghɔm bi po gɑ mo yə e zhəŋ jwi e, tə ně da' gɑ́ e ghə ghap a, bɑ e bɑ si pa' a shya e nə ghap. Bi a mo nəŋ ŋkho mjwǐ yə pu zhəŋ e a bɑ ě ghə ghap.

³³Po lə kwi' ju' gɑ pu lə ghɔm bi pɑ dzə gɑ́: ka mo kɔ́ mkɔ a, da' gɑ́ o kɔ mkɔ bi Cyəpɔ nə nwə a pəmtə.

³⁴Tə gɑ̌ ghɔm bi po gɑ́ ka po kɔ mkɔ. Kɑ nə kɛbəŋ lə́, nə pa' a bɑ leŋfò Si a.

³⁵Kɑ nə sicǎ' lə́ nə pa' a bɑ kwɔ' tʉ mkwə Si, kɑ nə Yerusalɛm lə́, nə pa' a bɑ tisuŋ Fo gwyə́.

³⁶Kɑ kɔ thə o, nə pa' bi a pɑ o lə kwyəpnyə ta' nəŋ thə o a fɔk, kɑ a so lə́.

³⁷Po pɑ gɔm nwə, a pɑ Əŋ kɑ Gɛ̌ lə́, yə ǎ kwi' nə a fɑ m bi Cwəpùŋ.

³⁸Po' lə yu' pa' pu lə ghɔm gɑ́: Bɛ́tsə́ nə bɛtsə, suŋ nə́ suŋ.

³⁹Tɑ́ gɑ̌ ghɔm bi po gɑ ka po a mo shɔkcɔk fəŋnyə nwə. A pɑ gɑ mo cwɔ pu təŋ o nə ghəŋ tʉɔ̀, o nya yə mu' ghəŋ bi e.

⁴⁰Mo pɑ gɔ lɑ o nə ghɔ dzə́ ja'shɛ́ nə dzə o yə nthʉm o, o hɑ ba yə o pfɔptə a bi e.

⁴¹Mo thənyə o gɑ́ po e ghiŋ mkwə shǎ', po e ghiŋ mkwə sha'pʉə.

⁴²Hɑ bi mo yə ě lo a; mo yə e hǔ a, o kɑ fɛ ŋkha'tə o nə ntham e.

⁴³Po lɑ yu' pa' pu lə ghɔm gɑ́: Kuŋ mo yə e bəŋ o a, bɔ gɛ bo o.

⁴⁴Tɑ́ gɑ̌ ghɔm bi po gɑ: Po kuŋ mghɛ bo pɔ́, po pu' bú bi Si nə pɔ pyə wap shwɔ'mkwə mɔ cwəpuŋ a,

⁴⁵Po'o gɑ́ po pɑ́ kwa' pǒ Tá yɔ yə ě thə kɛbəŋ a nyənyɔ; nə pa' e gə nàm e tyə́ nə pɔ cwəpuŋ ba m nə pɔ pɑpúŋ, biŋ gə bəŋ lú nə pɔ dəŋdəŋ ba pɔ tə pɑ́ dəŋdəŋ

⁴⁶Nə pa' po kúŋ pɑ pɔ pyə wap ŋkhuŋ wɔ a bɑ po gɔ kwi mcwɔ'fa' nə kɑ? Ba mghɛ kwishwɔp gə po'o.

⁴⁷A piŋ bɑ gɑ po sha'tə pɑ mfɑ pɔ bɑ po gə kɑ msya? Ba pɑ tə pɑ pɑ Yudea gə pɑ́ po'o.

⁴⁸Po pɑ́ tə byà pa' Ta yɔ kɛbəŋ bɑ́ tə bya a.