Read Ghomala New Testament MATIO 7 Bible Online

MATIO 7 - Ghomala New Testament bible

MATIO 7

¹Ka po pɑ ji pɑ fyɛ̀', po'o gɑ pu kɑ fyɛ' wɔ;

²nə pa' pu gɔ sɔ' lə pɑ nthi fyɛ' yə po nə fyɛ' a nə fyɛ' wɔ, lɑ pɑ fo' yə po nə fo' a nə fo' wɔ.

³Nwə kɑ́ o lé ghəgha' ywə yə a bɛtsə́ fɑ o a tɑ tə zhyə́ gɑ nthyə̀ bɛtsə o?

⁴Kɑ́ o gɔ ghə m gɑ́ kɑ tə ghɔm bi fɑ o gɑ́ tiŋnyə nthé ghəgha' ywə yə a bɛtsə́ o a tə́ nthyə̀ pɑ bɛtsə o?

⁵Wə mo dzɛbǔ, ləŋdzə nthé nthyə̀ bɛtsə́ o tɑ̀ jɔ tsʉ' pɑpúŋ nə nthé ghəgha' ywə bɛtsə́ fɑ o.

⁶Ka po hɑ ywə dɔlɔ̌ bi mbvʉ̌, kɑ nə ma' mtɔkcyə mo bi pǒ gənɔm lɑ́, bwɔk gɑ wap kɑ́ nəŋtə biŋ fɛ nɑ tsap syatə wɔ.

⁷Po ló, pú gɔ hɑ bi po; po cə́ŋ, pǒ gɔ yɔ, po ko'tə jyədyə̌, pu gɔ hé bi po.

⁸Nə pa' mo yə e ló a ŋkwi, mo yə e cəŋ a yɔ, pu pɑ́ hé bi mo yə e ko'tə a.

⁹A po'o bi a ya mo pɑ́ nə po yə mú e lo e ywətsʉ bɑ e gɔ hɑ gwɔ' bi a?

¹⁰Kɑ bi a e lo e bapgu bɑ e gɔ hɑ́ nɔk bi é?

¹¹A bi a dəŋ pa' bɑ po pɔk a po zhyə́ nə hɑ tsə pɑpuŋ bi pó pɔ, bɑ mcʉ̌m sʉ'ʉ nə Tá yɔ yə e kɛbəŋ a, pa' e gɔ hɑ tsə pɑpúŋ bi pɔ pyə wap ló bi e a?

¹²Po'o, bǎ yɑ ywə lə́ yə po shəŋ gɑ́ pɔmnəŋ ghə bi po a, kwa' wɔ ghə ya bi pú. A bɑ mcò', biŋ bɑ mghɔm mghɔm Si.

¹³Po ko dyə m nə pim jyədyə̌. Jyədyə̌ yə a gɔ m nə pi á bɑ ǎ sɛtə biŋ gʉ́ɔnyə; pɔ pyə́ a bɑ wap cyə m nə a yɔm té' o.

¹⁴Tɑ́ jyədyə̌ vɔk bɑ a kɔ́k, məjyə piŋ ŋkhɔmtə, bɑ pɑ yɔ məjyə̀ bɔ ka yɔm.

¹⁵Pó pɔm mghɔm ghɔm Si cwanwə, pyə wap sɔ' bəŋ po pa' jʉ̀jʉ̀ á tə bɑ m nthʉm o bɑ mbvʉ́ gǒ pyə wap sim tsʉ' a.

¹⁶Po gɔ zhyə wap pɑ nə nthɔm map. Pu ŋkhap nthɔm nthə́ nə nu' mlu' nə mka'tə a? Nəŋ bɑ ŋkhap figə nə thə júŋ a?

¹⁷A bɑ po'o tɑ bǎ yá ta'thə pɑpuŋ a jam nthɔm pɑpuŋ; da'gɑ bǎ ya ta' thə yə gho ko nə a pɑ jam nthɔm cwəpuŋ.

¹⁸Bi a pɑ ta'thə pɑpuŋ lə yam nthɔm cwəpuŋ kɑ ta'thə gogho lə yam nthɔm pɑpuŋ.

¹⁹Bǎ ya ta' thə lə́ yə a tɑ́ jam nthɔm pɑpuŋ a pɑ, pú ŋkho', ma' mɔk.

²⁰A po'o tə́ po pɑ́ gɔ lɑ pɑ nthɔm máp nə zhyə́ wáp.

²¹Tə da' nə ghɔm bəm gɑ́: Cyəpɔ, Cyəpɔ! Nə gɔ ghə tɑ́ mo ko nə́ Nəfo kɛbəŋ pɑ. O gɔ ghə ywə yə Tá a kɛbəŋ shəŋ a.

²²Pɔ tə́ jɔm gɔ sɔ' tyɛ'dzʉ́ bɔ ghɔm bəm gɑ: Cyəpɔ, Cyəpɔ! Pyə lé tə lɑ tsó tsǔ gɔm ghɔm Si a? Dɑ tsó tsǔ jəŋ zhwenyə cwəpuŋ a? Dɑ tsó tsǔ nthé vəŋ msya a?

²³Biŋ gɔm bi pú gɑ: Ŋ da m jyə wɔ, po lú bəŋ m̀ wɔ pɑ ghə mnwə cwəpuŋ!

²⁴A po'o tə bǎ ya mo lə́ yə é ju' mghɔm myə gɑ̌ gɔm á giŋ nə á, bɑ́ dəŋdəŋ pa' mu' mo jyə nwə yə e lə kwɑ pa' e dəm wǔ gwɔ' a.

²⁵Bəŋ lú, mcɑ tsəŋ; fəfa cʉ' guŋ e awɛ vʉ nə pa' bɔ̌, da' gɑ́ a lə vʉ nə pá' to pa' bɔ̌ bɑ́ dəm wǔ gwɔ' a.

²⁶Mo yə e nəŋ jú' mghɔm myə gɑ̌ gɔm a la' e ghiŋ nə a, bɑ́ pá' mu' ŋkhəŋkhʉɔ yə e ŋkwɑ pa' e nə bvɛ a.

²⁷Bəŋ lú, mcɑ tsəŋ; fəfa cʉ', guŋ e awɛ vʉ̀ nə pà' bɔ̌, a vʉ, mkhʉm myə́ yɔm tɑ́.

²⁸A lə pɑ́ tə Yeso miŋ nə ghɔ̀m mghɔm bɔ, ywə yə e ji'tə a cəŋtə́ ŋkhó nə pɔmnəŋ

²⁹nə pá' e lə bɑwə ji'tə m pa' mo yə e ghə tʉɔ a, la' e zhi' m pa' pɑ zhyə mco' a pɑ́.