Read Ghomala New Testament MATIO 8 Bible Online

MATIO 8 - Ghomala New Testament bible

MATIO 8

¹Yeso lə nə tsə̌ŋ fɑ dəm kuŋgǒ, vəŋ pɔ pɑ́ jʉm e.

²Po'o tə mu' gɛ ka'pap sɔ' ŋkham mkwi'tə myə́ dzə e bɑ́ gɔm gɑ: Cyəpɔ, o kuŋ bɑ o gɔ lɔnyə a.

³Yeso nya pu é, ŋkwak nə é gɔm gɑ: Gɑ̌ kùŋ, lɔ́! E wuŋ dɔ pɑ cwəocwəo nə́ ka' pap.

⁴Tɑ́ Yeso piŋ gɔm bi e gɑ: Pɔm tə siŋ sɔmmo; da' gɑ́ ghɔ da'tə nɑ o bi ŋkhamsi, biŋ hɑ́ ywə hɑhɑ̌ yə Mosɛ lə́ yap a: a pɑ́ mkwinthɛ́ bi pu.

⁵Yeso lə́ pɑ̌ ŋkho Kapɛrnaum, mu' tadyə msəŋwi pɔ ŋkhə sɔ' bəŋ é, səso é,

⁶gɔm gɑ: Cyəpɔ gɛfa' a dyə bɑ e nùŋ bɑ po'tə nɑ kó nə é, é pɑwə jɔgo' te'te'.

⁷Yeso ghɔm bi e gɑ: Gɑ̌ gɔ ghɔ yɛ é.

⁸Da' gɑ́ tádyə msəŋwi ŋkhə́ piŋ gɔm gɑ: Cyəpɔ ŋ kha ku'nyə nə pa' bi a pɑ́ o ko dyə m̀ a: Ghɔm da' shwəghɔm a gɛfa' a yɛ́.

⁹Nə pa' gɑ̌ ju' shwə pɔ pyə wap sa'a biŋ bɑ sa' shɑ́ msəŋwi. Biŋ bɑ gɔm bi mu' nə pyə gɑ̌ sa' wap a gɑ: Ghɔ̌ e ghɔ, gɔm bi mu' gɑ sɔ̌' e sɔ', biŋ gɔm bi ŋkwɔ a gɑ: Ghə gɑ, e ghə.

¹⁰Yeso lə nə́ yu' pa' tádyə msəŋwi ŋkhə bɔ gɔm po'o a, go' e, biŋ gɔm bi pɔ pyə wap lə́ bɑ́ jʉm e a gɑ: Kwa' nyənyɔ gɑ̌ siŋ wɔ gɑ́ Ŋ kha yɔ yəŋ gɑ nthi piŋnthʉm bi sɔmmo Israɛl.

¹¹A po'o tə bɑ siŋ wɔ gɑ́ pɔ jɔmyɔ̌m gɔ sɔ' fɑ ghəŋ nthəmnam ba m ghəŋ binam pu a Abraham, ba Isak ba Yakop tsʉ́ la'nwə nthʉm Nəfo kɛ́bəŋ.

¹²Da' gɑ́ kwa' pɔ nəfo bɔ̌, pu ma' wap dzʉ́ nthʉm jʉ́m; a pɑ́ tsʉ'u bɔ pú pɑ́ dɔ̌ biŋ bɑ pfɑ msuŋ.

¹³Yeso lə pǐŋ gɔm bi tadyə msəŋwi pɔ ŋkhə́ gɑ: Pɑnyə la' o! A ghə nə o pa' o nə bìŋ a. Gɛ́ fa' e lə wuŋ jɛ́ pɑ́ cwə o bɔ.

¹⁴Yeso lə nə kodyə Pɛtrɔ, jɔ gám Pɛtrɔ bɑ e nuŋ kodyə mhwi pɑwə səŋ e.

¹⁵Yeso lə kwak pú nə e, mhwi təm nə é, e lúsi biŋ ntho' nə fa' bi e.

¹⁶A lə pɑ́ bwadzʉ̌, pu lɑ mghɛ gho pyə zhwenyə cwəpuŋ lə bɑ nə pu a nə sɔ' bi e, e pɑ́ jəŋ mzhwenyə pɑ ta' shwə ghɔm biŋ bɑ jɛ́ guŋ mghɛ ghɔ awɛ.

¹⁷Po'o gɑ ywə yə gɔ́m ghɔm Si Esaya lə ghɔm a, a pəmtə́ gɑ: E lə ŋkwi mkhʉ́m mɔk pɑ, biŋ ŋa' bɑ mgho mɔk pɑ.

¹⁸Yeso lə nə yɔ vəŋ pɔ bəŋ é, nyəŋ gɑ́ e gɔ ghɔ nə yə mu' jʉɔ shyə́.

¹⁹Mu' jyə́ mco' sɔ' gɔm bi e gɑ: Ta gɑ gɔ yap jʉ̌m o, tə ko bǎ hɑ́ lə yə o ghɔ a.

²⁰Yeso ghɔm bi e gɑ: Msə́sʉ́m bɑ wap ghə mghʉ̌m map, bɑ pǒmsəŋ to kɛbəŋ piŋ gə mkɔ map. Tɑ́ sɔ' m nə Mú mo, a bɑ̀ e ká ghə tsʉ' yə e jap thə e nə a.

²¹Mu' mukhʉ́ e piŋ gɔm bi e gɑ: Cyəpɔ na' nthak a gɔ nthəŋ tá a tə́ sɔ̌'.

²²Da' gɑ́ Yeso ghɔm bi e gɑ: Yap jʉ̌m m̀ biŋ nthak mpfə pɔ wap təŋ mpfə pɔ pap

²³Yeso lə ko nthʉm kənu', pɑkhʉ̌ pyə yap jʉm e.

²⁴Mu' mɑ fʉ́m wuŋ nthəm dəm shyə, ŋkwa shyə bɑ gɔ nə sə kənu'; Yeso lə bɑwə di.

²⁵Pɑkhʉ pyə sɔ' bəŋ e, jam e gɔm gɑ: Cyəpɔ kwitə wɔk, pyə pfʉ́.

²⁶E ghɔm bi pú gɑ, nwə kɑ po pwɔk? Pɑ ghə muywə piŋnthʉm. A lə pɑ́ po'o, e lusi baptə fəfa pu shyə lɑpʉə, tsʉ' wuŋ dɛtə gɑ kǎm.

²⁷Nwə cyə pɔmnəŋ, wap piŋ bɑ gɔm gɑ: E bɑ m gɑkɑ tɑ́ ba fəfa pu shyə lɑpʉə yu' shwə è!

²⁸Yeso lə ko nə yəmu' jʉ́ɔ, nthʉm guŋ pɑ Gadarɛno, shɑ́ pɔ pɑ́pʉə, nthəm m thəsì, zhwényə cwəpuŋ pɑ́ nə pú, bɑ wap cɔk tə la' sɔmmo pɑ bi a pɑ e cyə́ nə yə bɔ məjyə̀ sɔ' pu a pu yu'tə.

²⁹Wap lə́ wuŋ ntho' nə cwé gɑ: O kwi kɑ́ bi pyə̌ Mù Si? Ǒ sɔ' m tsɔ'ɔ nə va' wɔk tɑ́ cwə gúŋ ŋkhu' a?

³⁰A lə nə pɑ́ po'o mu' ka mgənɔm pɑ́ giŋnyə tsʉ'u bɑwə pfɑ mghé.

³¹Mzhwenyə cwəpuŋ cwyɛ'nyə é gɔm gɑ: O zhəŋ wɔk, o cya wɔk nə ka mgənɔm.

³²Yeso ghɔm bi pu gɑ: Po ghɔ nə pú. Mzhwenyə cwəpuŋ bɔ lə təm gɔ ŋkho nə mgənɔm bɔ̌, guŋ ka mgənɔm fɑ kúŋ nə mkə́kə́ŋ cwəlɔ ŋkheŋnyə́ bvʉtə nthʉm shyə lɑpʉə, npfʉtə awɛ nthʉm shyə.

³³Pɑ pyap mgənɔm bɔ lə ŋkhʉ̌ gɔ tisuŋ siŋ pɔmnəŋ guŋ mnwə awɛ, bɑ m nə mzhwenyə cwəpuŋ.

³⁴A lə pɑ́ po'o guŋ tisuŋ awɛ təm nə ghɔ jɔ́ Yeso. Wap lə cwə tə jɔ e, shwyɛ'nyə e gɑ́ e tə́m nthʉm guŋ yap.