Read Ghomala New Testament MARKUSI 1 Bible Online

MARKUSI 1 - Ghomala New Testament bible

MARKUSI 1

¹Nə́ zhi Cuŋ pɑpuŋ Yeso Kristo, Mu Si;

²dəŋdəŋ pa' a bɑ́ pu və nthʉ́m ŋwa'nyə gɔm ghɔm Si Esaya gɑ: Yɔ, gɑ̌ tə́m shwiŋkhʉɔ a dzə o, gɑ e nyaptə́ məjyə̀ o.

³Gì mo ghakgo shwé gɑ: Po nyaptə́ məjyə̀ Cyəpɔ. Po ghə mpim jyə̀ tiŋnyə dəŋdəŋ.

⁴Yohane nu'pɔ shyə lə təm ghakgo bɑ siŋ nwə́ kwishyə pʉɔtʉ́m nə́ nə lɑ mhɔ mo shwyɛ' e.

⁵Gùŋ guŋ Yudea awɛ ba guŋ pɑ Yerusalɛm awɛ lə ghɔ bə́ŋ é, bɑ gə e nu' wap shyə Yurdɛŋ, wap pɑ̀ biŋ mhɔ máp.

⁶Yohane lə́ bɑ ě kwadzə́ mnəŋ kamelo, gə tap gwɔp vʉ' e; e lə́ pfɑ́ pɑ gǎmmthɔ biŋ dzʉ ŋwa' gó.

⁷Yohane lə́ bɑ siŋ gɑ̀: Mo yə ě ghə tʉɔ shyə́ á a wə sɔ' jʉ̌m m̀, bɑ ŋ kha kú' nə pɔnyəsi ŋkhyɛ' ŋkhə nə mthap myə́.

⁸Kwa' myə̀ gɑ̌ bɑ gɑ̌ nu' wɔ pɑ shyə, tə́ yʉ́, e gɔ la' nu' wɔ nthʉm Zhwenyə Dɔlɔ̌.

⁹A lə pɑ̌ nə mtyɛ'dzʉ́ bɔ, Yeso fɑ́ Nazarɛt m Galilea sɔ' gə Yohane nu' e shyə Yurdɛŋ.

¹⁰E lə pɑ̌ nthəm shyə, jɔ kɛbəŋ ghyɛ', Zhwenyə piŋ fi' pá' səngɔpfo a sɔ' nə é.

¹¹Pu piŋ jú' gi mo fɑ kɛbəŋ gɔm gɑ: O bɑ Mú a yə gɑ̌ ŋkhuŋ e a, ǎ púŋ a nə cwɔ' o.

¹²Zhwenyə lə wuŋ nthə́ Yeso shya e ghakgo.

¹³Sata lə́ lə̌ŋtə́ e nə tyɛ'dzʉ́ mghappfʉə. Pu a mnɔm go nə lə́ bəmtə bɑ́, pɑ aŋgəle piŋ bɑ fa' bi e.

¹⁴Pú lə cwə̌ tə́ hɑ Yohane, Yeso sɔ' Galilea. E lə bɑwə siŋ Cùŋ pɑpuŋ Si bɑ gɔm gɑ:

¹⁵Cwə̌ ku', Nəfo Si ghɔptə́: Po pʉɔtʉ́m tsɔ́ biŋ bíŋ Cùŋ pɑpúŋ.

¹⁶Yeso lə pɑ̌ shyə́ giŋnyə shyə lɑpʉə Galilea, jɔ́ Simon pu Andreya fɑ e. Wap pɑwə ma' nthənthɔm shyə lɑpʉə nə pa' wap lə bɑ pɑ ghəm bapgu a.

¹⁷Yeso ghɔm bi pu gɑ: po ntham jʉ̌m m̀, a biŋ dɑ wɔ gə pɑ ghəm pɔmnəŋ.

¹⁸Wap lə wuŋ nthak mnthənthɔm map jap jʉ̀m e.

¹⁹E lə na' giŋ, jɔ́ Yakop, mu Zebede pu fɑ e Yohane wap pɑ́ nthʉm kənu' yap bɑwə nyaptə mnthənthɔm map.

²⁰E lə wuŋ ŋkhe wap. Wap lə tǎk tá yap Zebede pu a mghɛ fa' nthʉm kənu', jap jʉ̀m e.

²¹Wap lə kǒ tisuŋ Kapɛrnaum, a nə pɑ̌ tyɛ' Sabat, Yeso ko Sinagogə bɑ̀ ji'tə́ ywə bi pɔmnəŋ.

²²Ywə yə e lə́ bɑwə ji'tə wap a pɑ shəŋtə ŋkhonyə wap shyə m nə yə́ nthi nə ji'tə́; nə pá' e lə́ bɑwə ji'tə pa' mo yə́ e ghə tʉɔ á, la' e zhi'tə m pa' pɑ zhyə mco' a.

²³Mu' mbɛ lə guŋ bɑ sinagogə pú pɑ́ cwə o bɔ, zhwenyə cwəpuŋ pɑ nə e; mo bɔ cwé gɑ:

²⁴A yɔk pɑ̀ kʉ? Yeso yə Nazarɛt. O sɔ' m nə ghə gɑ́ pyə́ pí. Gɑ̌ zhyə́ mo yə o bɑ yʉ́ a: O bɑ̀ Dɔlɔ̌ Si.

²⁵Yeso paptə e gɑ: Lɛtə́ biŋ nthəm nə bɛ yə̌ŋ!

²⁶Zhwenyə cwəpuŋ bɔ lə lɑ̌ bò shʉ'nyə bɛ bɔ, biŋ nə təm nə́ é bɑ shwé tə́ thə́.

²⁷Nwə̀ lə cyə̌ wap té' o, wap pɑ́ gɔm cəcɑ̌ pu gɑ: Yəŋ nwə bɑ m gɑ́ kɑ? Yɔ mu' nə zhi'tə̀ yə̌ sə́, tʉɔ pɑ bɑ ǎ ló nə́! E gɔmnwə ba m bi mzhwenyə cwəpuŋ, wap yu'nyə bi e!

²⁸Tso tsyə́ lə wuŋ sɛ nə́ guŋ mtsʉ' awɛ ghə́ŋ Galilea.

²⁹Wap lə́ wuŋ nə təm sinagogə, wap pu a Yakop ba Yohane ghɔ dyə́ Simon pu Andreya.

³⁰A lə́ nə pɑ̌ po'o ma jwi Simon pɑ̀ wə bɑ ě nùŋ, mhwi pɑ̀ nə́ e; pu lə wuŋ gɔm bi Yeso.

³¹Yeso lə́ sɔ' bəŋ e, nthɔm pú e nə́ bʉ' e, mhwi tə̀m nə e, e to' nə fa' bi pú.

³²A lə pɑ̌ bwadzʉ̌, tə bɑ nǎm pi, pu pɑ́ dɑ guŋ mghɛ gho awɛ ba pɑ ghə zhwenyə cwəpuŋ sɔ' bi e.

³³Guŋ tisuŋ awɛ lə bɑ a cu'tə jyədyə̌ tisuŋ.

³⁴E lə yɛ̌ mghɛ gho tə wap yɔm, nthinthi mgho pɑ́ nə pú, biŋ jə́ŋ mzhwenyə cwəpuŋ jɔmyɔm, tɑ́ pǐŋ gɑ wap ghɔmnwə nə pa' wap lə bɑ wap zhyə é a.

³⁵A lə pɑ fɔkdzʉ̌, tə dzʉ̌ yɑwə sonyə sonyə, Yeso lusi, nthəm gɔ tsʉ' tsìŋ bɑ tsʉ'u shwyɛ'nyə Si.

³⁶Simon pu a mso fa' pyə to' nə cəŋ é biŋ jɔ é.

³⁷Gɔm bi e gɑ: Guŋ pɔ awɛ bɑwə shəŋ o.

³⁸E ghɔm bi pu gɑ: Pɑ ghɔ nə mu' tsʉ', nthʉ́m shɑ mtisuŋ, a siŋ Cuŋ pɑpúŋ ba m wə, nə pa' a bɑ mə̌ mnthə̌mdyə́.

³⁹E lə pǐŋ gɔ nə guŋ Galilea awɛ, bɑ siŋ Cuŋ pɑpuŋ nthʉm msinagogə biŋ bɑ jə́ŋ mzhwenyə cwəpuŋ.

⁴⁰Mu' ta' gɛ ka'pap lə sɔ' bəŋ Yeso shwyɛ'nyə e, biŋ ŋkham mkwi'tə myə́ si gɔm gɑ: O kùŋ bɑ ǒ ku' nə ghə ŋ dɔ́.

⁴¹Mtso myə́ lə kù e, e nya pú ě, ŋkwak e, gɔm bi e gɑ: gɑ̌ kùŋ, lɔ́.

⁴²Ka'pap lə wuŋ nthəm nə e pɑ cwə o bɔ, e lɔ́.

⁴³Yeso lə wuŋ shaktə nɑ e nə é, jəŋ é.

⁴⁴Gɔm bi e gɑ: Pɔm tə́ ghɔm sɔmywə bi sɔmmo, da' gɑ ghɔ da'tə nɑ o bi ŋkhamsi, biŋ hɑ ywə yə́ Mosɛ lə yap a, nə pa' o dɔ́ a, a nə́ bɑ́ bi pú bɑ mtìŋ.

⁴⁵Da' gɑ mo bɔ lə cwə̌ tə́ gɔ̌, guŋ bɑ siŋ tə́ thə́, bɑ sɛ mcuŋ bɔ, tə bi a pɑ Yeso lə piŋ ŋkho nthʉm sɔm tisuŋ dəŋdəŋ, bɑ shwə pɑ m jʉ̀mdzʉ̌, nə mtsʉ' tsìŋ, pu pɑ fɑ ba'bà' sɔ' bi e.