Read Ghomala New Testament MARKUSI 10 Bible Online

MARKUSI 10 - Ghomala New Testament bible

MARKUSI 10

¹Yeso lə́ lǔ tsʉ'u, gɔ nthʉm guŋ Yudea nə yə mu' jʉɔ Yurdɛŋ. Pɔmnəŋ tə jɔm lə pǐŋ ŋkwi' shu'tə bəŋ é, é piŋ ŋkwi' bɑ ji'tə wap ywə́ pa' e lə gə a.

²Pɑ Farisai lə sɔ' bəŋ e, biŋ nə lə̀ŋtə é, həŋtə é bi a bɑ pú pǐŋ gɑ mbɛ zhə́ŋ jwi e a.

³E pa' bi pu gɑ: Mosɛ bɑ e lě bvə nə́ bi po gɑ́ kɑ?

⁴Wap ghɔm gɑ: Mosɛ bɑ e lě biŋ gɑ́ mbɛ və ŋwa'nyə nə jəŋ mjwǐ bi jwi e nə jə̀ŋ e.

⁵Yeso ghɔm bi pú gɑ: A lə́ dú m nə́ tʉm sɔksɔk tsɔ́ tə́ e və mɑ́ mco' bi po.

⁶Da' gɑ cwə nə nə to', Si lə ghə mbɛ pu mjwǐ;

⁷a po'o tə́ mbɛ gɔ sɔ' tə́m nə tap é pu map e piŋ kwɑ́ nə jwi é,

⁸pu e pɑpʉə́ cʉ' pɑ́ ta' bap nɑ́ yɑmu'. A po'o tə́ wap tə́ biŋ bɑ pɔ pɑpʉə pɑ́, wap bɑ pɑ́ ta' mo.

⁹A po'o tə mo kɑ́ haptə ywə yə Si nthamtə a.

¹⁰Pɑkhʉ̌ pyə lə kodyə biŋ ŋkwi' həŋtə é ywə nə́ nwə́ bɔ.

¹¹E ghɔm bi pu gɑ: Mo zhəŋ jwi e, biŋ dɔm mu' mjwǐ, bɑ e bi yə mu' mjwǐ bɑ e ghə ghap;

¹²a piŋ bɑ bi a mjwǐ zhəŋ dhə́ e biŋ dɔm bi mu' bɑ ě ghə ghap.

¹³Pɔmnəŋ lə lɑ pɔ̌ mkəcɔk pó nə sɔ' bi Yeso gɑ́ e yap bu nə pú, da' gɑ́ pɑkhʉ̌ pyə́ pɑ baptə wap.

¹⁴Yeso lə nə yɔ̌ po' o a pɔ́k é, e ghɔm bi pu gɑ: Po tak pó mkəcɔk po wap sɔ' bəm, ka po kɔ bi pú, nə pa' Nəfo Si bɑ bi pɔ pyə wap hwənyə wap a.

¹⁵Kwa' nyənyɔ gɑ̌ siŋ wɔ gɑ́ mo pɑ́ tə lɑ Nəfo Si pa' mu kəcɔk mu a, bɑ e tə gɔ sɔ' ko nə́ pɑ́.

¹⁶E lə tɛ̌tə wap, jap bú nə pú nə nyəŋ byanyə nə pú.

¹⁷Pa' e lə pɑ̌ ntham məjyə a, mu' mo lə khʉdʉ̌ sɔ' ŋkham mkwi'tə myə́ si dzə e; gɛ lə bɑ həŋtə́ e gɑ: Tá pɑpúŋ, gɑ̌ gɔ ghə gɑ kɑ tə́ sɔ' kwi vɔk mamà pa' mcʉ' a?

¹⁸Yeso ghɔm bi é gɑ: Nwə kɑ́ o ké a gɑ mo pɑpúŋ? Sɔmmo tə bɑ mo pɑpúŋ pɑ́ tə́ ně da' Si dò é.

¹⁹O bɑ ǒ zhyə mco' gɑ: Kɑ zhwə mo, kɑ ghə ghap, kɑ zhʉ, kɑ kwǐnthɛ́ cwanwə̀, kɑ ghə ywə yə a ka tiŋnyə a bi sɔmmo, ghə mku' tɔ́ ɔ pu mɔ́ ɔ.

²⁰Bɛ bɔ ghɔm bi e gɑ: Ŋ dɑ́ jyə guŋ nwə bǎ awɛ fɑ cwə yə ŋ dɑ́ jɑ̀ mú səm a.

²¹Yeso lə lě é, bɑ ŋkhúŋ é; gɔm bi e gɑ: Ta' ywə wə́ jak bu; ghɔ̌, tsə tsyə o gə a, o fiŋ, hɑ bi mpə̌ŋ, biŋ sɔ' gə fʉ' kɛbə̀ŋ, biŋ sɔ' jap jʉ̌m m̀.

²²Da' gɑ bɛ bɔ lə yú' ghɔm tsɔ gɑ, sə é fi' e piŋ nə ghɔ bɑ ŋiŋtə sə e, nə pa' a lə bɑ ě ghə fʉ́' jɔmyɔ̌m a.

²³Yeso lə lě pɑkhʉ̌ pyə giŋnyə é gɔm bi pu gɑ: A gɔ sɔ' tʉɔ bi mghɛ fʉ́' té' o nə́ ko nə́ Nəfo Si.

²⁴Nwə lə pɑ̌ shyə́ pɑkhʉ̌ Yeso nə mghɔm bɔ, da' gɑ Yeso kwi' gɔm bi pú gɑ: Pó pɑ, a bɑ ǎ tʉɔ nə ko nə́ Nəfo Si te' o.

²⁵Ǎ yɛ̀ bi kamelo nə twɔk nə fǎ syap shyə bi gɛ ywə nə ko nə́ Nəfo Si.

²⁶Nwə lə pɑ̌ shyə wap nə gɔ pɑ́ dzə̀, wap pɑ gɔm cəcɑ̌ pu gɑ: Tə́ wɑ̌ gɔ sɔ' vɔ̌k?

²⁷Yeso lə lě wap dəŋdəŋ gɔm bi pu gɑ: A bɑ a cyə pɔmnəŋ, da' gɑ a tə́ bɑ ǎ cyə Si pɑ́, nə pa' ywə yə a cyə́ Si a tə̌ wə́ pɑ́.

²⁸Pɛtrɔ to' nə ghɔm bi e gɑ: Yɔ, a bɑ pyə lě nthak guŋ pǒtsə awɛ nə́ŋ jap jʉm o.

²⁹Yeso ghɔm bi e gɑ: Kwa' nyənyɔ gɑ̌ siŋ wɔ gɑ́ sɔmmo tə̌ wə yə ě tak pa' e ba mfɑ pyə́ pyə pɑ bɛ ba pyə pɑ jwi, nthak map e, nthak tap e, po pyə kɑ mbé myə́ lə nə nwə a ba nə́ Cùŋ pɑpúŋ lə,

³⁰la' e kwi tsə bɔ jyə́ ŋkhə cwəlɔ nə yəŋ cwə dzʉ̌ a; kɑ mpa' lə, kɑ mfɑ̌ lə, kɑ mmʉə lə, kɑ pǒ lə́, kɑ mbě lə́ cwə nə́ nə cwɔ'mkwə yə̌ŋ, biŋ sɔ' ŋkwi vɔk màmà a.

³¹Bo'gwyə pɑ dzə́ gɔ sɔ' cʉ' pɑ jʉ̀m a pɑ jʉ̀m piŋ shʉ' pɑ dzə̀.

³²Wap lə pɑ̌ mə́jyə bɑwə bʉɔ m Yerusalɛm, Yeso pɑ́ dzə̌ pu; wap lə bɑwə shwɔ̌', pɔ pyə wap lə bɑ jʉ̌m pu a pɑwə bwɔk. Yeso lə kě pɔ shwɔppʉə mghǎm pu a pú kwi' bɑ mu' cʉm, e to' nə siŋ wap nwə yə a lə́ bɑwə gɔ təm a, gɔm bi pu gɑ:

³³Po yɔ́, pɑ̌ wə́ bʉɔ m Yerusalɛm, pu piŋ hɑ Mú mo bi mkamsi gwyə́gwyə́ pu a pɑ zhyə mco'; wap ya'shɛ e gɑ pu gɔ zhwə e, piŋ hɑ e bi pɑ tə́ pɑ pɑ́ Yudea,

³⁴wap gɔ yəmtə é, thə́tə mti nə é, lɑ mshɔ̀m cwɔ é, a zhwə é, a piŋ nə cyə̀ tyɛ'dzʉ́ yɑtá e yám.

³⁵Yakop pu Yohane pǒ Zebede lə fʉ'tə nɑ tsap hɑ́ bəŋ Yeso gɔm bi e gɑ: Ta pyə wə shəŋ gɑ o ghə ywə yə pyə gɔ lo bu a bi pyə.

³⁶Yeso ghɔm bi pu gɑ: Pǒ shəŋ gɑ́ ŋ gə gɑ kɑ bi pǒ?

³⁷Wap ghɔm bi e gɑ: Piŋ gɑ nthʉm ghu'tə o, pyə cwə́, mu' mo nə ghəŋ tʉɔ, yə mu' mo nə ghə́ŋ kwyap.

³⁸Yeso ghɔm bi pú gɑ: Po ka zhyə ywə yə́ pǒ wə do a. Pǒ ku' nə nwə́ nthǔ' yə gɑ gɔ nwə́ a? Kɑ pǒ ku' nə kwishyə yə gɑ gɔ kwi a?

³⁹Wap ghɔm bi e gɑ: Pyə̌ ku'nyə̀. Yeso ghɔm bi pu gɑ: Nthǔ' yə gɑ gɔ nwə a po gɔ la' nwə́, ba shyə yə gɑ̌ gɔ kwi a po ghɔ la' kwi.

⁴⁰Tə́ sɔ' m nə nə́ cwə nə́ ghəŋ tʉɔ kɑ ghə́ŋ kwyap bəm lə, myə̀ nə́ lə pɑ́ hɑ bi mo: Pu gɔ sɔ' hɑ bi pɔ pyə́ pu lə la' nyaptə́ po'o bi pu a.

⁴¹Pyə́ shɑ̀ pɔ ghǎm pyə wap lə yu' po'o a lə tǒ' nə yɛlúŋ nə Yakop pu Yohane.

⁴²Yeso ké wap gɔm bi pu gɑ: Pǒ zhyə́ gɑ pɔ pyə pu jɔ wap pa' mtadyə nə mguŋ mguŋ á dɑ pɑ tʉɔ tə́ nə sa' gùŋ, ba pɔ gwyəgwyə pɑ hya mgùŋ.

⁴³A tə bɑ́ pɑ po'o cəcɑ̌ po pɑ́. Mo pɑ gɔ pɑ mo gwyə cəcɑ po e pɑ gɛ fa' yɔ.

⁴⁴Mo pɑ shə́ŋ nə pɑ dəŋdzə̀ cəcɑ̌ po, e pɑ ŋkwɔ guŋ yɔ awɛ.

⁴⁵Nə pa' Mú mo la tə́ sɔ' m gɑ pu fa' bi é pɑ́, e lə sɔ' m nə fa' biŋ hɑ vɔk e nə́ nə ŋkwyəpnyə thə pɔ jɔmyɔ̌m.

⁴⁶Wap lə ŋwak Yeriko. Yeso pu a pɑkhʉ̌ pyə́ ba mɑ vəŋ pɔ pɑ nthəm Yeriko, Bartimeo, gɛ fʉ̀, mú Timeo pɑ́ bɑ ě cwə kə́ŋ məjyə̀ bɑwə do ywə.

⁴⁷E lə nə yǔ' gɑ̀ a Yeso yə Nazarɛt, ntho' nə cwe gɔm gɑ: Mu David, Yeso, cɔmmtso mə̌!

⁴⁸Pɔ tə́ jɔm pɑ baptə e gɑ́ e lɛtə́; da' gɑ́ e piŋ shwé tə́ thə́ gɑ: Mu David cɔmmtso mə̌!

⁴⁹Yeso lə tiŋnyə, gɔm gɑ: Po ké é. Pu lə kě gɛ fʉ́ bɔ gɔm bi e gɑ: Kaktʉɔ, lusi ě wə ŋkhe o.

⁵⁰E lə wǎ' sʉə dzə e, déŋ dusi gɔ bəŋ Yeso.

⁵¹Yeso ghɔm bi e gɑ: O shə́ŋ gɑ́ ŋ gə la bu? Gɛ fʉ pa' bi e gɑ: Rabuni gɑ myə̀ piŋ jɔ tsʉ'.

⁵²Yeso ghɔm bi e gɑ: Ghɔ̌, piŋnthʉm o vɔk o. Fʉ bɔ lə wuŋ jɔ tsʉ', jap jʉ̌m Yeso mə́jyə.