Read Ghomala New Testament MARKUSI 11 Bible Online

MARKUSI 11 - Ghomala New Testament bible

MARKUSI 11

¹Wap lə ghɔ tə́ bɑ ŋkhəm bə́ŋ Yerusalɛm, bəŋ Bɛtfage ba Betanya, nə ghə̌ŋ kúŋ mthə Olivə, Yeso tə́m pɔ pʉ́ə nə pɑkhʉ̌ pyə́,

²biŋ gɔm bi pu gɑ: Po ghɔ nə́ pfə́la' yə ǎ dzə̌ po a; po gɔ cwə tə ko wə́, yɔ mú jakasi bɑ pu cə̀ŋ é, bɑ sɔmmo ka wuŋ ŋkwɔ' nə é; a po kyɛ' é nə sɔ'

³bi a mo ghɔm bi po gɑ: Nwə ka po ghə pa' a? Po pa' bi e gɑ: Cyəpɔ wə hə́ŋtə́ yá, e wuŋ shya e tsɔ'ɔ.

⁴Wap lə ghɔ̌, jɔ mu jakasi ba pu cəŋ e dzʉ́ bə́ŋ mu' jyədyə̌ mə́jyə. Wap lə kyɛ' e.

⁵Shɑ pɔ nə́ pɔ pyə wap lə tsʉ'u a lə ghɔ̌m bi pú gɑ: Pǒ ŋkhyɛ' mu jakasi yɑ́ gɑ kɑ̀?

⁶Wap pa' pá' Yeso la' gɔm a, pu tak wap, wap ghə po'o.

⁷Wap lə lɑ̌ mu jakasi gɔ bi Yeso, jap mdzə map dəm é, Yeso cwə nə́.

⁸Bo'gwyə́ pɔ lə sǐŋ mdzə map məjyə, ba shɑ pɔ piŋ bɑ́ bo' mcɛ́ tsə pé sɛ məjyə.

⁹Pɔ pyə wap lə bɑ dzə é a, ba pyə wap lə bɑ jʉ̀m é a ghiŋ bɑ nthógə̀ŋ gɑ: Hozana! Byanyə́ bi mo yə e sɔ' nə tsǒ Cyəpɔ a!

¹⁰Byanyə pɑ nə́ yə nə sa'dzʉ̌ yə a wə sɔ' a, yə nə sa'dzʉ̌ David tá yɔk pɑ̀! Hozana tə́ thə́ kɛbə̀ŋ.

¹¹E lə kǒ Yerusalɛm, ŋkho Dyə Si, jɔ guŋ mtsʉ' awɛ giŋnyə e; pa' a lə bɑ́ bwadzʉ̌ a, e tə́m, pu a pɔ shwɔppʉə mghǎm ghɔ Betanya.

¹²Dzʉ̌ lə lɔ̌, wap pɑ́ nthəm Betanya jikù'u yɛ́ Yeso

¹³e lə yɔ mu' ta' thə́ nthɔmthə́ gʉə sʉəsʉə, mhwə́ pɑ́ nə́ tə jɔ́m, e ghɔ bəŋ o nə yɔ bi a ywə nə a. E lə ghɔ tə ŋkhəm bəŋ o, jɔ pɑ́ da' mhwə nə́, nə pa' a la tə́ bɑ cwə nthɔ̌m mthə́ pɑ́.

¹⁴Yeso ghɔm gɔm bi e gɑ: Sɔmmo kɑ́ la'tə́ pfɑ́ mnthɔm mǔ! Pɑkhʉ̌ pyə lə bɑwə jú'.

¹⁵Wap lə ŋwak Yerusalɛm, Yeso ko Dyə Si, ntho' nə zhəŋ pɔ pyə wap lə bɑwə fiŋ bìŋ jo potsə́ Dyə Si a; ŋkwɔk mtɑpe pɑ kwyəpnyə bʉm pu a mkwɔ' pɑ tɛ msəŋgɔpfò.

¹⁶La' e piŋ gɑ sɔmmo kwa sɔmywə nə shyə́ Dyə Si.

¹⁷E lə zhi'tə wap bɑ gɔm gɑ: A tə́ bɑ pu və̀ gɑ: Pu gɔ sɔ' pɑ ke Dyə a gɑ dyə mcwyɛ'nyə bi gùŋ mgùŋ awɛ a? Tə́ a bɑ́ yə̌ŋ bɑ po nə gə túŋ msamshwə̀.

¹⁸Mkamsi gwyə́gwyə́ pu a pɑ zhyə́ mco' lə yǔ', bɑwə shəŋ pa' wap gɔ ghə tə zhwə e a. Nə pa' wap lə bɑwə bwɔk e, nə kɑlɑ́ ywə yə e lə bɑwə ji'tə a lə bɑwə ŋkhonyə vəŋ pɔ.

¹⁹A lə pɑ̌ bwadzʉ̌, Yeso pu a pɑkhʉ̌ pyə təm tisuŋ.

²⁰Wap lə nə́ cyə̀ fɔkdzʉ̌, jɔ thə́ nthɔmmthə bɑ ǎ yəm tə́ ŋkhəm nə gɛ tsyə́.

²¹Pɛtrɔ kamtə gɔm bi Yeso gɑ: Rabi, yɔ thə́ nthɔmmthə́ yə o kɑ nyəŋ dò nə a yəŋ bɑ ǎ yə́m awɛ.

²²Yeso pa' bi pu gɑ: Po ghə piŋnthʉm nə Si.

²³Kwa' nyənyɔ gɑ̌ siŋ wɔ gɑ mo ghɔm bi kuŋgǒ yə̀ŋ gɑ gɑ́: Lu tsa' a gɔ ŋkho shyə lɑpʉə, biŋ bɑ tə zhʉ'nyə nthʉm tʉ́m é, da' gɑ biŋ gɑ́ ywə yə e gɔm a a gɔ pɑ po'o, bɑ ywə bɔ gɔ pəmtə.

²⁴A po'o tə gɑ̌ siŋ wɔ gɑ: Guŋ ywə awɛ yə pǒ lo nə mcwyɛ'nyə̀ a, po piŋ gɑ po e da' ŋkwi ywə bɔ, a Si hɑ ywə bɔ bi po.

²⁵Bi a po nəŋ biŋ nthiŋnyə thə́ bɑ shwyɛ'nyə Si a pɑ gɑ po a mo ghə nwə̀, po nə shwyɛ' é, po'o gɑ tá yɔ yə ě kɛbə̀ŋ a lɑ mɔ mhɔ nə shwyɛ' wɔ.

²⁶Nə pa' po pɑ tə́ lɑ mhɔ pyə shɑ́ pɔ shwyɛ' wap bɑ Ta yɔ yə́ ě kɛbəŋ a tə́ gɔ lɑ mɔ mhɔ cwyɛ' wɔ pɑ́.

²⁷Wap lə pɑ̌nyə Yerusalɛm, Yeso pɑ Dyə Si bɑwə giŋtə́, mkamsi gwyəgwyə, ba pɑ zhyə́ mco' pu a mghətso lə sɔ' bəŋ e.

²⁸Həŋtə é gɑ: O dɑ ya tʉɔ gə ywə bǎ? Kɑ wɑ̌ hɑ tʉɔ bu tə́ o nə gə?

²⁹Yeso ghɔm bi pu gɑ: Gɑ̌ gɔ həŋtə́ wɔ ta' nwə̀. Po la ba' bəm bɑ gɑ gɔ siŋ wɔ tʉɔ yə gɑ̌ nə gə nwə bɔ a.

³⁰Kwǐshyə́ Yohane lə fɑ m kɛbəŋ kɑ m bi pɔmnəŋ? Po pa' bəm.

³¹Wap lə sɛ̌ cəcɑ̌ pu gɑ: Pɑ̀ ghɔm gɑ́ kɛbə̀ŋ bɑ e gɔ ghɔm bi pɑ̀ gɑ́ tə nwə kɑ́ bɑ po lě tə́ piŋ e?

³²Pɑ gɔ nəŋ ghɔm gɑ́ bi pɔmnəŋ a? Nə pa' wap lə bɑwə bwɔk vəŋ pɔ pyə wap lə bɑ si a, nə pa' guŋ yap awɛ lə́ bɑwə sɛ gɑ́ Yohane lə bɑ́ kwa' gɔm ghɔm Si.

³³A lə pɑ̌ po'o wap pa' bi Yeso gɑ: Pyə ka zhyə́. Yeso piŋ gɔm bi pú gɑ: Ba myə̀ yɑ̌ pɑ́ ŋ dɑ́ siŋ wɔ tʉ̀ɔ yə gɑ̌ nə gə mnwə bɔ a.