Read Ghomala New Testament MARKUSI 12 Bible Online

MARKUSI 12 - Ghomala New Testament bible

MARKUSI 12

¹E lə to' nə lɑ ghɔm tə́ tútə̀ gɔmnwə bi pú gɑ: Mu' mo lə tsə̌ mthə nə nú' mlù' pé e, ŋkwɑ ŋkhɛpé nə dzám, biŋ nthə́ŋ tsʉ' nə nú' mlù' pé bɔ bə́m; biŋ ŋkwɑ tsʉ' nə cwə nə́ bɑ dé pé; e lə yo' gùŋ é awɛ bi pɑ tsʉ' mthə́ nə nú' mlù' cwəlɔ, gɔ̌.

²Cwə lə kǔ' e tə́m ta' gɛ fà' bi pɑ tsʉ' mthə́ nə nú' lù' gɑ e ghɔ ŋkwi yə ywə yə a nthəm pé a.

³Pɔ bɔ lə́ ghəm é shwɔ é, jə́ŋ é tɑ́ hɑ sɔmywə bi e.

⁴E lə́ kwi' nthəm mu' gɛ fà' bi pú; wap cwɔ yə bɔ mo nə́ thə́ é, biŋ jəmtə é.

⁵E piŋ nthəm mu' gɛ fà'; wap zhwə yə bɔ; e piŋ nthəm shɑ́: Wap cwɔ shɑ, biŋ jwətə́ shɑ.

⁶A lə cʉ' da' mú e yə e lə ŋkhuŋ é té' a. E nə təm e bi pú bɑ gɔm gɑ: Wap gɔ ghə mku' mu a.

⁷Da' gɑ pɑ tsʉ' pě mthə́ nə nú' mlù' bɔ ghɔm cəcɑ̌ pu gɑ: E bɑ́ dzʉdyə̌! Pɑ̀ zhwe é, mcʉ̌' cʉ' mɔk pɑ̀.

⁸Wap lə ghəm e, jwə́ é, dɑ pfə́ e nə nthəm pé mǎ'.

⁹Gɛ pě bɔ gɔ ghə gɑ́ kɑ̀? E gɔ sɔ́' sɔ', ghə̌ pu zhwə pɑ tsʉ' pě mthə nə nú' mlù' bɔ, e piŋ hɑ pé bɔ bi shɑ pɔ̀.

¹⁰Po ka ké tsʉ' ŋwa'nyə̀ yə a gɔm gɑ: Gwɔ' yə pɑ pə́m pa' lə wa' á, ya nə lě ji gwɔ' phə pa'.

¹¹A bɑ́ fa' Cyəpɔ: Msya nwə nə mnyə́ mɔk pɑ̀!

¹²Wap lə pɑ̌ shəŋ nə ghəm é, da' gɑ́ bɑwə́ bwɔk pɔmnəŋ. A lə bɑ wap cəŋtə ju' gɑ nwə yə e lə ghɔm a, e lə gɔm nə pú. Wap lə tak Yeso cwəlɔ, gɔ̌.

¹³Wap lə təm shɑ pɑ Farisai pu a shɑ pɔ Herode bi Yeso po'o gɑ wap cyə́ m nə ghɔm tsyə́ gəm é.

¹⁴Wap lə sɔ' gɔm bi e gɑ: Ta, pyə̌ zhyə́ gɑ o bɑ nyənyɔ, la' o piŋ bɑ biŋ gɑ sɔmmo hya o: O tə́ bwɔk mnyə sɔmmo pɑ̀, bɑ da'tə məjyə̀ Si dəŋdəŋ. A bɑ pu piŋ nə ma' shwɔp bi Kasa kɑ gɛ̌? Pyə̌ gɔ ma' kɑ pyə tə́ gɔ ma' a?

¹⁵Da' gɑ Yeso zhyə́ gɑ́ wap bɑ pɔ jʉm pʉə gɔm bi pu gɑ: Nwə kɑ po ləŋtə a? Po hɑ ta' bɛ ŋkhap bəm tə́ jɔ.

¹⁶Wap lə hɑ ta' bɛ ŋkhap bi Yeso. E ghɔm bi pu gɑ: Thə́ mo ba ywə yə pu bvə nə a bɑ yə wɑ? Wap pa' bi é gɑ: Yə Kasa.

¹⁷Yeso ghɔm bi pu gɑ: Po pa' ywə yə a yə Kasa a bi Kasa, ba' yə Si bi Si. Nwə lə piŋ shyə́ wap té' nə Yeso.

¹⁸Pɑ Sadukai lə sɔ' bəŋ Yeso. Wap pyə wap gɔm gɑ nə yám nə vʉ̌ tə bɑwə a pɑ́ həŋtə é gɑ:

¹⁹Ta, Mosɛ bɑ é lě bvə bi pyə gɑ: Mbɛ ghə fɑ e yə mbɛ, e nə pfʉ nthak mjwǐ tə́ tak mú, e sɔk npfɔk e po'o gɑ e ghə gwya mo bi fɑ e bɔ̌.

²⁰Shɑ mfɑ lə pɑ̌ sɔmbʉə. Dəŋdzə̀ lɔmdyə́, npfʉ́ tə tak gwya mo.

²¹Batə yɑpʉə sɔk mjwǐ bɔ, npfʉ́ tə tak gwya mo. Ba batə yɑtá,

²²ba guŋ yap sɔmbʉə awɛ, wap lə tak gwya mo. Guŋ yap awɛ lə pfʉ̌, ba mjwǐ ti npfʉ yə́ jʉ̌m pú.

²³A gɔ sɔ' pɑ cwə nə yám nə vʉ̌, wap yám nə vʉ̌, mjwǐ bɔ pɑ́ yə wɑ̌ nə pú, pa' wap lě nəŋ dɔm é awɛ a?

²⁴Yeso ghɔm bi pu gɑ: A tə́ shyə m pa' a tə bɑ pǒ zhyə́ ywə yə pu lə və a, ba tʉɔ si a, tə po pɑwə hɔjyə pa' lə?

²⁵Nə pa' cwə yə pu jam nə vʉ̌ a, pu lə ghə mjwǐ kɑ dhə́ lə. Pu bɑ m pa' pɑ aŋgəle kɛbəŋ a.

²⁶Sɔ' m nə nə́ yam nə vʉ̌, bɑ po la m ŋkhe nthʉm ŋwa'nyə Mosɛ, nə ywə yə pu lə və nə nwə cu' mghé mɔk tə́ ŋkhə, pa' Si lə ghɔm bi e gɑ: Gɑ̌ bɑ Si Abraham, Si Isak ba Si Yakop a?

²⁷E tə bɑ Si mpfə́ pɔ pɑ̀; é bɑ Si pɔmtʉɔ. Pǒ bɑ pǒ cəŋtə hɔ məjyə.

²⁸Mu' jyə́ mco' lə sɔ' bəŋ Yeso. A lə bɑ ě yu' pa' Yeso pu a pɑ Sadukai nthɛshwə̀, e pa' bi pu pɑpuŋ a. E lə həŋtə Yeso gɑ: Də̀ŋdzə̀ mco' nə gùŋ mco' awɛ bɑ ma?

²⁹Yeso pa' gɑ: Dzə̀ mco' bɑ gɑ: Yu' m Israɛl Cyəpɔ Si yɔk pɑ̀ bɑ da' Cyəpɔ.

³⁰O gɔ pɑ kuŋ Cyəpɔ Si o nə guŋ tʉm tsʉ̌ awɛ, nə guŋ lam tsʉ̌ awɛ, nə guŋ kwɛnyə o awɛ ba nə guŋ gʉ' o awɛ.

³¹Batə məbʉ̌ə́ bɑ gɑ: O gɔ pɑ́ kuŋ mo yə e bəŋ o a pa' thə nɑ o a. Sɔm mco' ka cyə́ mɔ mco' məbʉə́.

³²Jyə́ mco' ghɔm bi e gɑ: Ǎ pùŋ m Ta, o ghɔm nyənyɔ. E bɑ́ da' yʉ́ dǒ é, sɔm lə kwi' bɑwə́,

³³nə kùŋ e nə guŋ tʉ̌m mo awɛ, nə guŋ zhyə̌nwə mo awɛ, nə guŋ gʉ' mo awɛ, biŋ ŋkhuŋ mo yə e bəŋ mo a pa' thə nɑ́ mo a pɑ́ bɑ ǎ cyə guŋ tsə tsyə pu ntho bi Si a ba tsə pwɔ' awɛ.

³⁴Yeso lə yɔ̌ gɑ e lɑ fʉ́ nə ba', gɔm bi e gɑ: O tə̌ gʉə sʉəsʉə nə Nəfo Si pɑ́. A piŋ bɑ po'o sɔmmo lə kwi' həŋtə́ e sɔmywə.

³⁵Yeso lə lɑ̌ ghɔm, bɑ ji'tə pɔmnəŋ ywə Dyə Si bɑ gɔm gɑ: Pɑ zhyə́ mco' gɔm gɑ Kristo bɑ mú David m gɑ́ kɑ̀?

³⁶Zhwenyə Dɔlɔ̌ lə ghə David zhyə biŋ gɔm gɑ: Cyəpɔ ghɔm bi Cyəpɔ a gɑ: Cwə́ nə ghəŋ tʉɔ a tə́ a nyəŋ mghɛ bò pǔ to mkwə o.

³⁷Kwa' David ŋkhe e gɑ Cyəpɔ e; tə́ é biŋ bɑ mu e m gɑ kɑ? Vəŋ dú pɔ lə bɑwə ŋwɛnyə nə yu' e.

³⁸Yeso lə bɑ ji'tə pɔ ywə bɑ gɔm gɑ: Po pɔm pɑ zhyə́ mco' pyə wap ŋkwa msʉə́ dzə́ nə giŋ, bɑ shə́ŋ gɑ pú ca'tə wap dəm sim,

³⁹bɑ ŋkho sinagogə shwə nə dəŋdzə mkwɔ', biŋ bɑ tsʉ' la'nwə shwə pɑ́ nə dəŋdzə tsʉ' a.

⁴⁰Wap pyə wap mitə tsə mpfɔk, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə́ pú.

⁴¹Yeso lə cwə̌ bəŋ kak yə pú nyəŋ ywə nə fa' Dyə Si nə a, bɑwə jɔ pa' pɔmnəŋ wə nyəŋ ŋkhap nthʉm o a. Pɔ jizhǐ tə jɔm lə sɔ̌' bɑ́ nyəŋ ywə nthʉm o tə a yɔm.

⁴²Mu' npfɔk bəŋ mjwǐ lə sɔ' nyəŋ po mpfʉ́ tsə bɛ pʉ̌ə, kwa' jʉ̀m ŋkhap.

⁴³Yeso lə kě pɑkhʉ̌ pyə́ gɔm bi pu gɑ: Kwa' nyənyɔ gɑ̌ siŋ wɔ gɑ́ npfɔk bəŋ mjwǐ yə̌ŋ nyəŋ shyə guŋ pɔ pyə wap bɑwə nyəŋ ywə nthʉm kak a.

⁴⁴Nə pa' gùŋ yap awɛ nə nyəŋ nthé pɑ nə dziak tsə tsap, tə́ sɔ' m nə é bɑ ě nə nyəŋ yə́ nthe m nə ghəghʉɔ e, nyəŋ guŋ yə́ ywə yə a bɑ bi a, guŋ ywə yə a kɑ́ bɑ ě ghə nə́ nə bvɔk a.