Read Ghomala New Testament MARKUSI 15 Bible Online

MARKUSI 15 - Ghomala New Testament bible

MARKUSI 15

¹A lə́ nə pɑ̌ mɑ fɔkdzʉ̌, mkamsi gwyəgwyə pu a mghətso ba pɑ zhyə́ mco' pu a guŋ Sanedrɛŋ awɛ ko cu'tə nə jap yɑ nwə pa' wap yɔ a. Wap lə cə̀ŋ Yeso, dɑ e nə gɔ hɑ bi Pilato.

²Pilato lə həŋtə é gɑ: O bɑ fo pɑ Yudea a? Yeso pa' bi e gɑ: Wə nə gɔm.

³Mkamsi gwyəgwyə lə ghɔm nthinthi mnwə nə e nə butə e.

⁴Pilato lə kwi' həŋtə é m sə́ gɑ: O tə́ ba' sɔmywə a? Yɔ dəŋ guŋ mnwə myə wap bɑwə nə butə o.

⁵Da' gɑ́ la' Yeso piŋ ba' sɔmywə tə nwə cyə Pilato.

⁶A lə bɑ nə guŋ mtyɛ' ŋwɛnyə awɛ Pilato pɑ nthak ta' gɛ cɛ̌ yə wap həŋtə gɑ e tak é nə́ŋ a bi pú.

⁷A lə nə pɑ̌ po'o mu' mo pu pɑ ŋkhe é gɑ Barabas pɑ dyəcɛ̌ pu a shɑ mghɛ va', bɑ wap lě bɑ bva' tsʉ' jwə mo.

⁸Pɔmnəŋ lə sɔ̌' bɑ həŋtə Pilato ywə yə e lə bɑ ě ghə mà nə ghə bi pu cwə o bɔ a.

⁹Pilato pa' bi pú gɑ: Pǒ piŋ gɑ nthak fo pɑ Yudea nəŋ bi po a?

¹⁰Nə pa' Pilato lə bɑwə jɔ gɑ́ mkamsi gwyəgwyə lə shyə pɑ m nə nə khiŋ tə hɑ Yeso bi e a.

¹¹Mkamsi gwyəgwyə lə thənyə pɔmnəŋ gɑ wap həŋtə́ gɑ e tak pɑ Barabas bi pu.

¹²Pilato lə piŋ dɑ ghɔm həŋtə́ wap gɑ́: Tə gɑ̌ gɔ ghə la m mo yə po ŋkhe é gɑ fo pɑ Yudea a?

¹³Wap lə pǐŋ ŋkwi' shwé gɑ: Kwe é thə bɛnyəpɛnyə.

¹⁴Pilato lə ghɔm bi pú gɑ: A bɑ ě ghə kɑ yə ǎ pɔk a? Wap lə cwé tə́ thə́ nə gɔ dzə bɑ gɔm gɑ: Kwe é thə bɛnyəpɛnyə.

¹⁵Pilato lə pɑ̌ shəŋ nə ghə nwə puŋ pɔmnəŋ, nthak Barabas nə́ŋ, biŋ gə pu cwɔ Yeso, e hɑ e gɑ pu ghɔ ŋkwe é thə bɛnyəpɛnyə.

¹⁶Msə̌ŋwi lə lɑ e nə gɔ nthʉ́m bùŋdyə̌ tsʉ' yə pu ŋkhe gɑ́ Praitorion a. Wap lə kě guŋ msəŋwi awɛ.

¹⁷Wap lə kwǎ dzə pəpɛ nə e biŋ su co'fo thə é bɑ wap lɑ mjúŋ nə bá'.

¹⁸Wap lə to' nə pɑ bu'tə bu bi e bɑ gɔm gɑ: Pyə ca'tə o m fo pɑ Yudea.

¹⁹Wap lə lɑ̌ ka'cyə shwɔ é nə thə́ é, nthətə́ mti nə é, bɑ bɔnyə ŋkham mkwi'tə dzə̌ e.

²⁰Wap lə nə miŋ nə yəmtə e, nthɔk dzə pəpɛ yə wap lə kwa nə e a, ŋkwa kwa' tsyə dzə́ nə e. Biŋ gə e təm nə kwe é thə bɛnyəpɛnyə.

²¹Wap lə tɔm mu' shyəjyə̀ e pɑ fɑ m gǒ gɑ e kwa bɛnyəpɛnyə e. Mo bɔ lə bɑ Simon yə Kirena, tá Aleksandrə pu Rufo.

²²Wap lə lɑ Yeso gɔ nə tsʉ' yə pu khé gɑ́ Gɔlgota, a pɑ dá'tə gɑ tsʉ' kəlo' thə mo a.

²³Wap lə pɑ̌ gɔ hɑ mlu' bi e bɑ pu ŋi'nyə mu' ywə nə, pu pɑ ŋkhe gɑ mira. Da' gɑ e kəŋnyə.

²⁴Wap lə kwe e thə bɛnyəpɛnyə, biŋ nthamnthúŋ nə nə gaptə mdzə myə́ tə nə jyə́ yə bǎ ya mo lə gɔ ghə a.

²⁵Wap lə́ ŋkwe é thə po'o nə mnam vʉ̌'.

²⁶Pu lə və̌ nwə yə pu lə jwə e nə a gɑ́: Fo pɑ Yudea.

²⁷Wap lə kwe é thə bɛnyəpɛnyə pu a shɑ́ msamshwə pɑpʉ́ə. Ŋkwe mu' nə ghəŋ tʉɔ e, ŋkwe mu' nə ghəŋ kwyap e,

²⁸po'o gɑ ywə yə pu lə və a pəmtə gɑ: Pu lě sɛ é nə dəŋ pɑ ghə mnwə cwəpùŋ.

²⁹Pɑ cyəjyə lə cyə́ bɑ ŋʉ' thə nə jəmtə é bɑ gɔm gɑ: He! Wə yə o sa'tə Dyə́ Si ŋkwɑ nə tyɛ' tá a,

³⁰vɔk kwa' thə́ nɑ o pɑ wə fi' thə́ bɛnyəpɛnyə.

³¹Ba mkamsi gwyə́gwyə́ pu a pɑ zhyə mco' lə pɑ gwi e yap cəcɑ̌ pu bɑ gɔm gɑ: E lě bvɔk shɑ́ pɔ, pɑ kwa' yʉ lə vɔk thə́ nɑ é.

³²Kristo, fo pɑ Yudea, e fi' thə bɛnyəpɛnyə cwəlɔ̌ pyə yɔ́ biŋ é. Ba pɔ pyə pu lə kwe wap pu a pu a lə yə̌mtə e yap.

³³A lə kə̌m mɔkcʉ́, jʉ̌m lɑ guŋ dəmca' awɛ tə ŋkhəm nə nam tá.

³⁴A lə kəm nə nam tá Yeso cwé tə thə́ gɑ: Eloi, Eloi lama sabaktani? A pɑ́ nthútə́ gɑ: Si a, Si a, o gwa' a gɑ kɑ̀?

³⁵Shɑ̀ pɔ pyə wap lə̌ tsʉ'u a lə nə yu' po'o bɑ gɔm gɑ: E yɑ́ bɑwə ŋkhe Elia.

³⁶Mu' mo lə ŋkhʉ̌dʉ́ gɔ nyəŋ cù'ywə́ nə mlu' shɔkcɔ̌k, sú nə ka'cyə, nya bi e gɑ e nwə biŋ gɔm gɑ: Cʉ' pɑ̀ yɔ pa' Elia gɔ sɔ' fi' e thə a.

³⁷Da' gɑ́ Yeso lə cwě tə thə́, pfʉ́.

³⁸Dzə Dyə Si lə sɔ bak bʉ́ə fɑ thə́ ŋkhəm si.

³⁹Tádyə msə̌ŋwi pɔ ŋkhə yə e lə bɑ ě tiŋnyə dzə e a lə nə yɔ gɑ ě pfʉ̀ po'o gɔm gɑ: Kwa' nyənyɔ bɛ yəŋ kɑ bɑ Mu Si.

⁴⁰Ba shɑ pɑ jwǐ lə bɑ yap tsʉ'u bɑ wap tiŋnyə gʉə sʉəsʉə bɑwə jɔ. Maria yə Makdala, ba Maria ma Yakop mo ŋkho' pu Yoze, ba Salome lə bɑ cəcɑ̌ pú.

⁴¹Wap lə bɑ pɑ jwǐ pyə wap lə bɑ jʉ̌m Yeso bɑ fa' bi e cwə yə e lə bɑ Galilea pu a pyə shɑ́ pɔ tə jɔm pyə wap lə pʉɔ pu a pú sɔ' Yerusalɛm a.

⁴²A lə wuŋ nə pɑ́ bwadzʉ̌, pa' a lə bɑ tyɛ' nə nyaptə nɑ, dzʉ̌ pɑ gɔ lɔ a pɑ́ Sabat a,

⁴³mu' mo gwyə́ nə cu'tə, tso tsyə pɑ Yosɛp yə Arimatea sɔ'. Ba yʉ́ yə́ lə bɑwə byap Nəfo Si. E lə ghə kaktʉɔ nə ko ywə́ Pilato nə həŋtə pfə́ Yeso.

⁴⁴Nwə lə cyə Pilato gɑ ě da' pfʉ́. E lə ke tadyə msə̌ŋwi pɔ ŋkhə həŋtə e gɑ pa' e la' pfʉ́ a ǎ cwə te' kilə́?

⁴⁵Tadyə msəŋwi lə siŋ e pa' a bɑ a, e piŋ gɑ Yosɛp lɑ pfə e.

⁴⁶Yosɛp lə ghɔ̌ jo dzə cwəlɔ, fi' pfə Yeso thə́ bɛnyəpɛnyə, dzʉm e nthʉm dzə bɔ, nyəŋ e nthʉm thəsì yə a lə bɑ pu təŋ nə wǔ gwɔ' a, biŋ ŋkheŋnyə mu' gwɔ' jap shwə thəsì bɔ.

⁴⁷Maria yə Makdala pu Maria má Yoze lə bɑwə jɔ tsʉ' yə pú jap pfə Yeso nə a.