Read Ghomala New Testament MARKUSI 16 Bible Online

MARKUSI 16 - Ghomala New Testament bible

MARKUSI 16

¹Sabat lə cyə̌, Maria yə Makdala ba Maria ma Yakop pu a Salome yó mwɑ́ damnyəlamnyə nə́ nə gɔ shi' pfə Yeso.

²A lə pɑ̌ mɑ fɔkdzʉ̌ nə dəŋdzə tyɛ'dzʉ́ nə gapdzʉ́, wap ghɔ thəsì, nə cwə yə nàm sa' a.

³Wap lə bɑwə gɔm cəcɑ̌ pu gɑ: Wɑ̌ gɔ ko kéŋnyə gwɔ' nə shwə thəsì bi pu?

⁴Wap lə nə pʉ' mnyə map jɔ bɑ pú kéŋnyə gwɔ', mɑ wǔ gwɔ'.

⁵Wap lə kǒ nthʉm sì, jɔ mú sə̀m bɑ ě kwa fə́fə́ dzə́, shwəsi nə ghə̌ŋ tʉɔ. Wap lə pwɔk.

⁶Da' gɑ gɛ ghɔm bi pu gɑ: Ka po pwɔk. Pǒ shə́ŋ Yeso yə Nazarɛt, yə pú kɑ kwé e thə bɛnyəpɛnyə a, e yam nə vʉ̌, e tə̌ tsɔ pɑ̀; po yɔ tsʉ' yə pu kɑ yap e nə a yə̌ŋ.

⁷Da' gɑ́ po ghɔ gɔm bi pɑkhʉ̌ pyə ba m bi Pɛtrɔ gɑ: E tamdzə̌ po Galilea; po gɔ ko wə́ yɔ e pa' e lə ghɔm bi po a.

⁸Wap lə tə̌m cwəlɔ ŋkhʉ́ gɔ gʉə sʉəsʉə nə́ thəsì, nə pa' wap bɑ sə̀ŋ, nwə pɑ jʉm wap; da' gɑ la' wap ghɔm sɔm nwə bi sɔmmo nə pa' wap lə bɑwə bwɔk.

⁹Yeso lə yám nə vʉ̌ fɔkdzʉ̌ nə də̀ŋdzə tyɛ'dzʉ́ nə gap dzʉ́, də́ŋdzə da'tə nɑ e bi Maria yə Makdala yə e lə zhə́ŋ mzhwenyə cwəpùŋ sɔmbʉə nə e a.

¹⁰Maria bɔ ghɔ siŋ pɔ pyə pu a Yeso lə pɑ nə vʉ̌ bɑwə dɔ a.

¹¹Da' gɑ́ pɔ bɔ lə nə yǔ' bi Maria gɑ Yeso pɑ nthʉɔ, gɑ e yɔ é, wap lə piŋ.

¹²E lə kwi' da'tə nɑ e bi shɑ pɔ nə pú pɑpʉə m nə mu' nthi; pɔ bɔ lə bɑ məjyə bɑwə gɔ m gǒ.

¹³Pɔ bɔ lə pɑnyə siŋ pyə shɑ́ pɔ. Da' gɑ́ la' wap piŋ.

¹⁴E lə pǐŋ ŋkwi' da'tə nɑ e bi pɔ shwamu' mghǎm. Wap lə bɑ tɑpe bɑwə dzʉ́ ywə́. E lə paptə wap nə zhʉ'nyə pu a sɔk tʉ́m yə wap bɑ wap ghə a, nə pa' wap la tə piŋ pɔ pyə wap lə yɔ e bɑ ě yam nə vʉ̌ a.

¹⁵E lə ghɔm bi pu gɑ: Po ghɔ nə guŋ dzʉ́ awɛ siŋ Cùŋ pɑpuŋ bi guŋ tsə tsyə Si lə nyaptə á.

¹⁶Mo yə ě piŋ ŋkwishyə a gɔ sɔ' vɔk, mo yə e ka piŋ a, bɑ pu gɔ sɔ' nyəŋ shɛ thə́ e.

¹⁷Mtìŋ myə a gɔ sɔ' pɑ bi pɔ pyə́ wap piŋ a bɑ gɑ: Wap gɔ sɔ' pɑ lɑ tso tsɑ̌ zhəŋ mzhwenyə cwəpuŋ, pɑ ghɔ́m mghɔ̀m sə́,

¹⁸pɑ lɑ bú map ghəm mnɔk, bi a wap nwə pɑ mcɔp myə a jwə mo a bɑ a tə gɔ ghə sɔmywə nə pu pɑ́; wap gɔ sɔ' pɑ yap bù map nə mghɛ gho wap yɛ́tə.

¹⁹Cyəpɔ Yeso lə cwə̌ tə gɔm bi pu po'o, pu lɑ e m kɛbə̀ŋ e cwə́ nə ghəŋ tʉɔ Si.

²⁰Sɔ' m nə pú, wap lə ghɔ̌ bɑ siŋ Cùŋ pɑpúŋ nə guŋ mtsʉ' awɛ: Pu a Cyəpɔ pɑ bəmtə fǎ', e pɑ dɑ mtìŋ myə a lə́ nthəm jʉ̀m Ghɔm á gə pu cəŋtə biŋ Ghɔm tsyə́.