Read Ghomala New Testament MARKUSI 2 Bible Online

MARKUSI 2 - Ghomala New Testament bible

MARKUSI 2

¹A lə nə cyə̀ po mtyɛ'dzʉ́, Yeso pɑnyə Kapɛrnaum, pu yu' gɑ ě dyə́.

²Pɔmnəŋ piŋ shu'tə tsʉ'u tə la' sɔmtsʉ' yɑwə́, ba m jyədyə̌; e lə bɑwə siŋ wap Ghɔm.

³Shɑ̀ pɔ lə ŋwǎk, bɑwə dɑ ta' gɛ po'tə nɑ sɔ' m bi e, bɑ pɔ papfʉə kwa e.

⁴A pǐŋ bɑ pa' a lə bi a pɑ́ wap lə lɑ e gɔ tə ŋkhəm bəŋ e, bi du pɔ a, wap cwɔ' thə́ pa' nə kwa' tsʉ' yə́ Yeso lə bɑ nə a, gə jyə tsʉ'u, fi' kodyə yə gɛ po'tə nɑ lə bɑ nə bɑ pu nùŋ e a.

⁵Yeso lə yɔ piŋnthʉm yap gɔm bi gɛ po'tə nɑ́ gɑ: Mú a, pu lɑ mhɔ mǔ shwyɛ' o.

⁶Shɑ́ pɑ zhyə mcò' lə bɑ wap cwəsi tsʉ'u; wap lə sɛ̌ nthʉm tʉm tsap gɑ:

⁷Nwə kɑ́ bɛ́ yəŋ ghɔm po'o? E yəmtə́ Si. Pɑ́ wɑ̌ lɑ mhɔ mo shwyɛ' e, tə ně da' Si do e?

⁸Yeso lə wuŋ jyə́ nə zhwenyə é gɑ̀ wap lə bɑwə sɛ́ nthʉm tʉ́m pu po'o, gɔm gɑ: Nwə kɑ po sɛ́ yɑ nthi nwə̀?

⁹A ghɔ nə nə ghɔm bi gɛ po'tə nɑ gɑ: Pu lɑ mhɔ mǔ shwyɛ' o kɑ nə ghɔm gɑ lusi ŋkwa kodyə o gɔ̌ bɑ ya yɛ̀?

¹⁰Po'o tə́ po nə́ jyə́ gɑ́ Mú mo ghə tʉɔ nə lɑ mhɔ mo shwyɛ' e dəmcǎ'. E ghɔm bi gɛ po'tə nɑ̀ gɑ:

¹¹Gɑ̌ ghɔm bu: Lusǐ, ŋkwa kodyə ó biŋ gɔ dyə o.

¹²Bɛ bɔ lə lǔsi, guŋ ŋkwa kodyə e, biŋ nthəm pɑ dzə̌ guŋ pɔmnəŋ awɛ, tə nwə va' guŋ pɔ awɛ, wap pɑ hɑ ghú'tə bi Si, bɑ gɔm gɑ: Pyə lǎ m jɔ sɔmywə pa' yə̀ŋ a!

¹³Yeso lə kwi' gɔ kəŋ shyə́ lɑpʉə. Guŋ du pɔ awɛ pɑ sɔ' bi e, e pɑ́ ji'tə wap.

¹⁴E lə́ pɑ̌ shyə́, jɔ Levi, mu Alfeo, bɑ ě cwəsi dyə shwɔ̀p. E ghɔm bi é gɑ: Yap jʉ̌m m̀. E wuŋ dusi biŋ jap jʉ̀m e.

¹⁵E lə pɑ̌ tɑpe dyə Levi. Bo'gwyə pɑ kwishwɔp pu a mghɛ mhɔ jɔmyɔ̌m pɑ yap tɑpe, ba Yeso pu a pɑkhʉ̌ pyə́ nə pa' pɔmnəŋ lə bɑ si tə́ jɔ́m,

¹⁶ba pɑ zhyə́ mco' pɑ Farisai pɑ́ jʉ̌m pú. Wap lə nə́ yɔ̌ gɑ Yeso pu a mghɛ mhɔ ba pɑ kwishwɔp wə bəmtə́ dzʉ́ywə, gɔm bi pɑkhʉ̌ pyə́ gɑ: Nwə kɑ e tsʉywə pu a pɑ kwishwɔp ba mghɛ mhɔ m pa' a?

¹⁷Yeso lə yǔ' gɔm bi pú gɑ: Tɑ́ pɑ nɑ Nthʉɔ nə shəŋ gəgɛ pɑ̀, mghɛ gho nə shəŋ é; ŋ da tə́ sɔ' nə́ ke pɔ dəŋdəŋ pɑ́, ŋ də sɔ' m nə mghɛ mhɔ.

¹⁸Pɑkhʉ̌ Yohane ba pɑ Farisai lə pɑ̌ shwə tə́ pɑ̌ dzʉ́ywə, sɔ' gɔm bi Yeso gɑ: Nwə kɑ pɑkhʉ̌ Yohane ba pyə pɑ Farisai pɑwə shwə tə́ tsʉ̌ ywə, pu pɑkhʉ̌ lə pɑ shwə yap tə tsʉ̌ ywə?

¹⁹Yeso ghɔm bi pu gɑ: Pɑ pɔ pyə pu ke wap nə nə́ ghapghʉɔ a cwə́ tə tsʉ̌ ywə nə cwə yə tá jwigʉɔ cəcɑ̌ pu a? Cwə yə pu a tá jwigʉɔ bəmtə bɑ a, wap tə gɔ cwə́ tə tsʉ̌ ywə pɑ.

²⁰Da' gɑ shɑ mtyɛ'dzʉ wə sɔ̌' yə pu gɔ kwi tá jwigʉɔ bi pu a; a gɔ pɑ tyɛ' o bɔ wap cwə tə tsʉ̌ ywə.

²¹Sɔmmo tə́ dɑ pàk dzə́ sə́ ntham dzə́ bvò pɑ̀; a pɑ̀ po'o bɑ pak dzə́ sə́ gɔ fəŋ yə bvò a piŋ hʉə kwa' bɔkbɔk e.

²²Sɔmmo tə́ nyə́ŋ mlù' sə́ nthʉm mnthu' bvò pɑ̀; a pɑ́ po'o bɑ mlu' gɔ ghə mnthǔ' vyə́tə́, pu pi mlu' ba mnthǔ'; da' gɑ nə mlu' sə́ a shə́ŋ mnthǔ' sə́.

²³A lə piŋ bɑ mu' tyɛ'dzʉ sabat Yeso pɑ shyə nə mpě msɛ́tʉ̀ɔ, pɑkhʉ̌ pyə pɑ giŋ bo' mcɛ́ msɛtʉɔ.

²⁴Pɑ Farisai ghɔm bi e gɑ: Yɔ ywə yə pɑkhʉ́ pǔ wə gə tyɛ' sabat! A tə́ bɑ pu piŋ po'o pɑ̀.

²⁵Yeso piŋ gɔm bi pu gɑ: Po la m ŋkhe ywə yə David lə ghə nə cwə yə́ ywə lə pɑ jak bi e, jikǔ' yɛ́ e, wap pu a mso pyə́ a?

²⁶Pa' a lə pɑ́ cwə ŋkhamsi gwyə Abiatar, e ko dyə Si, pfɑ msɛ tsə pwɔ' bɑ pu ka piŋ gɑ sɔmmo pfɑ́ tə́ ně da' mkamsi, biŋ hɑ ba m bi pɔ pyə́ pu a pu lə bɑ a?

²⁷E lə piŋ gɔm bi pu gɑ: Pu lə gə sabat m bi mo, tə mo m bi sabat pɑ̀.

²⁸A pɑ po'o tə Mú mo pɑ́ ba tá sabat.