Read Ghomala New Testament MARKUSI 3 Bible Online

MARKUSI 3 - Ghomala New Testament bible

MARKUSI 3

¹Yeso lə kwi' ŋkho nə mu' sinagogə; mu' mbɛ lə bɑ sinagogə bɔ bɑ pu é cwyə́m.

²Wap lə bɑwə dé Yeso, yɔ bi a e gɔ yɛ mo bɔ tyɛ' sabat á, tə wap té byà nə é.

³Yeso ghɔm bi bɛ bɔ yə pú ě lə bɑ ǎ cwyəm a gɑ: Lusí! Sɔ' tùŋ.

⁴Biŋ gɔm bi pu gɑ̀: Ywə yə a bɑ pú piŋ tyɛ' sabat a bɑ nə ghə nwə pɑpuŋ kɑ́ nə ghə nwə cwəpùŋ? Nə vɔk mò kɑ́ nə zhwə é? Da' gɑ̀ wap lɛ́tə lɛ̌tə́.

⁵E lə́ lɑ mnyə́ yɛluŋ shʉ́ wap, nwə̀ tʉm sɔksɔk tsap cyə é, e ghɔm bi bɛ bɔ gɑ: Siŋ pu ó. E siŋ pu é a tʉɔ.

⁶Pɑ Farisai pu a pɔ Herode lə wuŋ nə təm sinagogə, ŋkho cu'tə nə Yeso, nə yɔ nthi pa' wap gɔ ghə tə́ zhwə é a.

⁷Yeso pu a pɑkhʉ̌ pyə́ lə təm gɔ kəŋ shyə lɑpʉə. Vəŋ dú pɔ pyə wap lə fɑ Galilea a lə yap jʉ̀m e. Vəŋ dú pɔ lɑ nə yu' ywə yə e lɑ ghə a, bɑ fɑ Yudea,

⁸ba m Yerusalɛm, ba m Idumea, ba m nə yə́ mu' jʉɔ Yurdɛŋ, ba m nthʉ̌m guŋ Tiro ba m Sidon bɑ sɔ' bi e shyə́ nə mcuŋ guŋ ywə awɛ yə e lə́ gə a.

⁹E ghɔm bi pɑkhʉ̌ pyə gɑ̀ wap cə́ŋ kənu' bi e, bwɔk gɑ vəŋ pɔ kɑ́ tsa'tə e.

¹⁰Nə pa' a lə bɑ ě yɛ pɔmnəŋ tə́ bǎ wɑ̌lə́ yə ywə lə bɑwə gə́ e a pɑ sɔ' nthə́nyə e nə kwak e.

¹¹Pɔ pyə Mzhwenyə cwəpuŋ lə bɑ nə pu a lə nə yɔ e, bɑ bvʉ́ nə mkwə myə́, bɑ shwé gɑ: O bɑ Mú Si.

¹²E pǐŋ bɑ́ sho' bi pu shɔkcɔ̌k gɑ́ wap kɑ́ ghə pu zhyə́.

¹³E lə kwɔ̌' dəm kúŋ, biŋ ŋkhe pɔ pyə́ e kuŋ a, wap sɔ' bi e.

¹⁴E piŋ shwɔ' pɔ shwɔppʉə mghǎm pu a pú pɑ bəmtə bɑ́, e piŋ bɑ nthəm wap gɑ wap ghɔ siŋ Cuŋ pɑpúŋ,

¹⁵biŋ hɑ tʉ̀ɔ nə jə́ŋ zhwenyə cwəpuŋ bi pú.

¹⁶E lə yap pɔ́ shwɔppʉə mghǎm pɔ gɑ: Pɛtrɔ, tsɔ̌ bɑ́ mu' tsó tsyə e lə kwi' nə tso Simon a.

¹⁷Yakop mú Zebede pu Yohane fɑ Yakop pyə e lə kě wap gɑ Boanɛrges a pɑ da'tə gɑ mu hɛbəŋ.

¹⁸Andreya, Filipo, Batəlemi, Matio, Tomasi, Yakop mú Alfeo, Tadeo pu Simon mu é gùŋ

¹⁹ba Yuda Iskariɔt yə e lə la' hɑ Yeso a.

²⁰Yeso lə sɔ' dyə́, pɔmnəŋ piŋ shu'tə bəŋ e tə bi a pɑ e lə piŋ dzʉ́ ywə́.

²¹Mfɑ pyə́ lə nə yu' po'o sɔ' m nə ghəm e. Nə pa' wap lə bɑwə gɔm gɑ: Thə é pi.

²²Pɑ́ zhyə́ mco' pyə wap lə tsə̌ŋ fɑ Yerusalɛm a lə́ bɑwə gɔm gɑ̀: A bɑ ě ghə Beɛlzəbul nə é; e shyə m nə tádyə́ mzhwenyə cwəpuŋ tə́ jə́ŋ mzhwenyə cwəpuŋ.

²³E lə ghə wap sɔ', e piŋ dɑ ghɔm tə́ tútə̀ gɔm bi pú gɑ: Pɑ̀ Sata zhə̀ŋ Sata m gɑ́ kɑ?

²⁴A bi a ta' nəfo ghap ghə́ŋ pʉə, bɑ pɑ yə bɔ nəfo lə piŋ shwə pɑ́.

²⁵A bi a ta' tuŋdyə́ ghap ghə̌ŋ pʉə, bɑ tuŋdyə bɔ tə gɔ piŋ pɑwə pɑ́.

²⁶A piŋ bɑ bi a Sata pɑ bɑ ě té shu nə thə́ nɑ e, biŋ bɑ́ bɑ e ghap ghə́ŋ pʉə, bɑ e tə́ gɔ piŋ pɑwə pɑ́, bɑ ě mi.

²⁷Da' gɑ̀ pɑ mo lə kodyə́ gɛ gʉ̌', dɑ tsə́ tsyə tə́ a bɑ gɑ ě ləŋdzə ŋkwɑ gɛ gʉ̌' bɔ, po' tə sím dyə́ e.

²⁸Kwa' nyənyɔ gɑ̌ siŋ wɔ gɑ́ pu gɔ sɔ' lɑ mhɔ pɔmnəŋ ba yap nə cap Si nə cwyɛ' wap, kɑ a la' jɔm pɑ́ gɑ́ kɑlɑ́.

²⁹Da' gɑ̀ mo cap Zhwenyə Dɔlɔ̌, bɑ nə nə shwyɛ' e tə wə́ pɑ: Bɑ a bɑ e hɔnwə̀ mama.

³⁰E lə gɔm po'o nə pa' wap lə bɑwə gɔm gɑ: E ghə zhwenyə cwəpuŋ.

³¹Map é pu a mfɑ pyə́ lə ŋwǎk, nthiŋnyə dzʉ́, gə pu ké e.

³²Nə pa' pɔmnəŋ lə bɑ wap cwətəsi nə dzam é; pu ghɔm bi e gɑ: Yɔ mɔ̌ pu a mfɑ pǔ dzʉ́ bɑwə shəŋ o.

³³E pa' bi pu gɑ: Wɑ́ bɑ pɑ mǎ á pu a mfɑ pɑ̌?

³⁴E lə cʉ̌ pɔ pyə wap lə bɑ wap cwətəsi dzam e a gɔm gɑ: Yɔ ma á pu a mfɑ pɑ̌ pɔ̌.

³⁵Bɑ̌ wɑlə́ yə e ghə ywə yə Si a shəŋ a bɑ e bɑ fɑ a yə́ mbɛ, fɑ a yə́ mjwǐ ba ma á.