Read Ghomala New Testament MARKUSI 6 Bible Online

MARKUSI 6 - Ghomala New Testament bible

MARKUSI 6

¹Yeso lə́ lǔ tsʉ'u bɔ, gɔ nthʉm gǔŋ pu; pɑkhʉ̌ pyə yap jʉ̌m e.

²A lə pɑ̌ tyɛ'dzʉ sabat, e to' nə zhi'tə ywə bi pɔmnəŋ dyə sinagogə. Nwə lə pɑ̌ shyə́ pɔ jɔmyɔ̌m pyə wap lə bɑwə ju' e a, wap pɑ gɔm gɑ: E dɑ yə bɔ m hɑ́? Yəŋ piŋ bɑ ya nthi zhyə̌nwə yə pu hɑ bi e tə e pɑwə gə ba msya pu a bú myə?

³Mo bɔ tə́ bɑ ŋkham mthə́ pa', mu Maria, biŋ bɑ fɑ́ Yakop, ba Yozɛt, ba Yuda, pu Simon a lə́? Tə́ pá mfɑ́ pyə́ pyə pɑjwǐ nə bɑ́ tsɔ' a lə? E lə pǐŋ bɑ bi pu bɑ pɑ ywə fa'tə.

⁴Yeso lə ghɔ̌m bi pu gɑ: Pu gwak gɔm ghɔ̌m Si pɑ nthʉm gǔŋ pú, cəcɑ̌ ŋkhənyə e, pɑ kwa' dyə́ é.

⁵A lə pɑ̌ po'o, bi a pɑ́ e lə ghə sɔm msya tsʉ'u. Da' gɑ ba tə́ po'o e lə yap bǔ nə shɑ mghɛ gho nə jɛ́ wap.

⁶Nwə lə cyə é nə yap nə́ cyətə ghə piŋnthʉm. E lə́ ghǐŋ giŋnyə tsʉ'u, bɑ ji'tə ywə bi pɔmnəŋ.

⁷E lə ghə pɔ shwɔppʉə mghǎm sɔ' bəŋ e, e to' nə pɑ nthəm wap pɑpʉə pɑpʉə, hɑ tʉɔ bi pú nə mzhwenyə cwəpúŋ.

⁸E lə ghɔm bi pú gɑ wap kɑ nə́ ghɔ dɑ sɔmywə tə́ ně da' pə̀ŋ: Gɑ wap kɑ́ lɑ ywətsʉ kɑ pʉə lə, kɑ ŋkhap nthʉm tap yap lə;

⁹biŋ sɔ' m nə mntháp wap su pɑ mntháp ŋkhə, wap kɑ kwa dzə yɑpʉə.

¹⁰E lə ghɔ̌m bi pu gɑ: A pɑ́ gɑ po ŋwak nə tsʉ', ŋkho nə dyə̌, po cwə pɑ tsʉ'u tə́ da' nthəm wə́.

¹¹A pɑ gɑ́ mu' tsʉ' ka lɑ́ wɔ, pú lə piŋ ju' ywə yə po gɔm a, po nə fɑ tsʉ'u ghɔ dzɔp vɔp nə mkwə mɔ. A gɔ sɔ' pɑ yɔ nə ŋkwinthɛ̌ bi pú.

¹²Wap lə ghɔ bɑ siŋ gɑ pɔmnəŋ pʉɔtʉ́m.

¹³Wap lə zhə̌ŋ mzhwenyə cwəpuŋ jɔmyɔ̌m, biŋ bɑ dɑ mwɑ shi' mghɛ gho jɔmyɔ̌m, bɑ jɛ́ wap.

¹⁴Fo Herode lə yu' pa' pu gɔmnwə nə Yeso a, nə pa' tso tsyə́ lə bɑ gə̌ŋnyə ko nə té' a. Pu pɑ gɔm gɑ: Yohane nu' pɔ shyə́ bɑ ě yám nə vʉ̌; a shyə m po'o tə tʉɔ nə gə msya pɑwə shyə m nə é fǎ'.

¹⁵Shɑ́ pɔ lə bɑwə gɔm gɑ: A bɑ́ Elia, shɑ pɑ́ gɔm gɑ: A bɑ mu' gɔm ghɔm Si pa' mghɔm ghɔm Si pɔk pɑ a.

¹⁶Herode lə nə yu' guŋ mghɔm bɔ awɛ bɑ gɔm gɑ: A bɑ Yohane yə ŋ dɑ́ sə̌ thə́ e a, yʉ́ nə jam nə vʉ̌.

¹⁷Nə pa' Herode lə bɑ e lə ghə̌ pu ghəm Yohane biŋ dɑ gwɑ́ mtʉɔ shə́ŋ é dyəcɛ̌ po'o nə nwə Herodia jwi fɑ e Filipo yə e lə lɔm e a.

¹⁸Nə pa' Yohane lə bɑ gɔm bi Herode gɑ: Pu ka piŋ bu gɑ o lɑ jwi fɑ́ o.

¹⁹A lə pɑ̌ po'o, Herodia wuŋ bɔ é pɔ tə bɑ shəŋ pɑ nə zhwə é, da' gɑ́ la' e ku' nə zhwə e.

²⁰Nə pá' Herode lə bɑwə bwɔk Yohane, bɑ ě zhyə gɑ́ e bɑ mo dəŋdəŋ, biŋ bɑ dɔlɔ̌, e piŋ bɑwə pfoptə e. E lə nə yǔ' po' nwə cyə e; da' gɑ e la tə́ ŋkhəŋnyə́ nə yu' ywə yə Yohane lə gɔm a pɑ́.

²¹Da' gɑ́ mu' búŋ tyɛ'dzʉ́ lə tǐ bɑwə, Herode pɑ́ ŋwɛnyə nə nə ŋkhamtə tyɛ' nə tsə̀ e, bɑ da'nwə ŋkhé mkam pyə́ pyə gwyə́gwyə́, ba mtadyə msəŋwi, ba mkam pɑ Galilea nə khim wap nə la'nwə̀.

²²A lə pɑ̌ po'o gò Herodia bɔ sɔ' nəŋ mu' nə̀ŋ, a puŋ Herode biŋ buŋ ba pɔ pyə́ e lə kě wap nə la'nwə é a. Fo bɔ ghɔm bi mu go gɑ: Ló a ywə yə ǒ kùŋ a, gɑ̌ gɔ hɑ bu.

²³E lə kɔ́ mkɔ gɔm bi e gɑ: O lo a pɑ́ kɑ lə́ bɑ gɑ̌ gɔ hɑ bu, kɑ a la' bɑ́ pɑ́ mu' ghəŋ nəfo lə.

²⁴Go lə́ tə̌m gɔm bi map e gɑ: Gɑ̌ gɔ ló kɑ? Map e pa' bi e gɑ: thə́ Yohane nu' pɔ shyə́.

²⁵Go lə wuŋ bɑnyə bəŋ fo biŋ do bi e gɑ: Gɑ̌ wə shə́ŋ gɑ o wuŋ hɑ thə Yohane nu' pɔ shyə bəm pɑ cwəlɔ nthʉm pak kɛ́.

²⁶Sə́ fo lə fǐ', da' gɑ́ a cyə m nə mkɔ myə e lə kɔ a, ba nə pɔ pyə a lə bɑ é ke wap a, e lə yɔ nə kəŋnyə̀ bi e.

²⁷Fo lə wuŋ nthəm msəŋwi pɑ pyap gɔm gɑ wap lɑ thə Yohane sɔ̌'. Msəŋwi ghɔ dyə́ cɛ̌ cwəlɔ sə thə e.

²⁸Wap lə lɑ thə e sɔ' nthʉm pak kɛ́ hɑ bi mu go, mu go hɑ bi map e.

²⁹Pɑkhʉ̌ Yohane lə́ nə yu' po'o, sɔ' dɑ pfə e nə gɔ nyəŋ nthʉm thəsì.

³⁰Mghɛ nthəm lə cu'tə bəŋ Yeso biŋ siŋ e gùŋ ywə yə wap lə ghə a ba guŋ ywə yə wap lə zhi'tə bi pɔmnəŋ a.

³¹E lə ghɔ̌m bi pu gɑ: Po na' sɔ' m tsʉ' tsiŋ, tsʉ' yə mo tə̌ nə́ a pɑ na' hwitə́. Nə pá' pɔmnəŋ lə bɑ si tə jɔm, bɑwə sɔ' a lə gɔ tə la' wap ghə bɑ cwə nə dzʉ́ ywə.

³²Wap lə lɑ kənu' gɔ nə tsʉ' yə mo tə nə a pɑ́, m tsʉ' tsiŋ.

³³Pɔmnəŋ lə yɔ pa' wap gɔ a pɔ jɔmyɔ̌m zhyə́ wap. Pɔ jɔmyɔm lə lɑ mkwə ŋkhʉ́dʉ́ shwanyə wap, dzə́ tsʉ̌'u bɔ, nthəm po'o nə guŋ mtsʉ' awɛ tisuŋ.

³⁴Yeso lə nə́ təm nthʉm kənu', jɔ mɑ du vəŋ pɔ. Mtso map kú e nə pa' wap lə bɑwə shwə́ pa' jʉ̀jʉ̀ tə gɛ pyap wap a. E lə to' nə zhi'tə wap mnwə jɔmyɔ̌m.

³⁵A piŋ bɑ́ pá' ya' dzʉ̌ lə bɑ ǎ cyə a, pɑkhʉ̌ pyə sɔ' bəŋ e gɔm bi é gɑ: Tsɔ'ɔ gɑ wə bɑ ghakghak tsʉ́', ya' dzʉ̌ piŋ bɑ́ bɑ ǎ cyə.

³⁶La'nyə wap; a wap ghɔ nthʉm mla' ba pǒ mtisuŋ giŋnyə tsɔ'ɔ jó ywətsʉ.

³⁷Da' gɑ Yeso pa' bi pu gɑ: Kwa' wɔ hɑ ywətsʉ bi pú. Wap ghɔm bi e gɑ: Pɑ pu lɑ ŋkhap tsə́ bɛ ŋkhəpʉə nə jo msɛ nə ŋkhim wap a?

³⁸Yeso həŋtə wap gɑ: Pǒ ghə msɛ́ dəŋ gɑ́ kɑ? Po ghɔ jɔ́! Wap lə lě, gɔm gɑ: msɛ́ mta' tɔ ba bapgu duŋ pʉ̌ə.

³⁹E piŋ gɔm bi pu gɑ́ wap yap gùŋ pɔ awɛ mpfə mpfə dəm mghe hwǐ.

⁴⁰Wap lə cwə̌tə̀ nə mkhɛ pɔ ŋkhə pu a pɔ mgham nthɔ.

⁴¹Yeso kwi msɛ mta' tɔ ba bapgu duŋ pʉ́ə, bʉ' mnyə myə́ kɛ́bəŋ, nyəŋ byanyə́, bo'tə msɛ́ hɑ bi pɑkhʉ̌ gɑ wap hɑ bi pɔmnəŋ biŋ gap bapgu duŋ pʉ́ə bi guŋ pɔ awɛ.

⁴²Wap lə pfɑ̌ gùŋ yàp awɛ tə jwyə́.

⁴³Pu piŋ daktə mbo' myə́ a lò nə msap shwɔppʉə mghǎm, ba ywə yə a lə vʉ̌' nə bapgu a.

⁴⁴Pɔ pyə wap lə pfɑ̌ msɛ bɔ a lə bɑ́ pɑ bɛ sha'tɔ.

⁴⁵Yeso lə wuŋ nthə́nyə pɑkhʉ̌ pyə́ gɑ wap kó kənu' nə ntham dzə e sa' gɔ nə yə mu' jʉ́ɔ, ghə̌ŋ Betsaida, e cʉ' bɑ da'nyə pɔ.

⁴⁶Pu a pu lə hapnyə, e ghɔ dəm kúŋ nə cwyɛ'nyə Si.

⁴⁷A lə pɑ̌ bwadzʉ̌, kənu' pɑ́ cəcɑ́ shyə lɑpʉə, e yɑ dəmcǎ' do e.

⁴⁸E lə yɔ pa' wap wə nthégʉ' nə sɔp kənu' pu a fəfa pɑ̀wə do', a pɑ́wə dɑ wap biŋ m jʉm a. A lə pɑ̌ dɔdzʉ̌, e ghiŋ dəm shyə lɑpʉə gɔ m bə̌ŋ pú nə tam m dzə̌ pu tə bɑ gɔ fiŋnyə wap.

⁴⁹Wap lə nə yɔ pa' e wə giŋ dəm shyə lɑpʉə a, ŋkwɛ gɑ́ a ghɛnyə́ mo, biŋ bɑ shwé.

⁵⁰Nə pa' guŋ yáp awɛ lə yɔ é, tʉm tsap va'. Da' gɑ́ é wuŋ gɔmnwə́ bi pú gɔm gɑ: Po kyəp tʉm tsɔ, a bɑ a, ka po pwɔk.

⁵¹E lə kwɔ̌' bəŋ pú nthʉm kənu', fəfa mi. Nwə lə zhʉ̌m wap te' o.

⁵²Nə pa' a lə bɑ wap ka yu' sɔmywə nə nwə msɛ́, bɑ tʉm tsáp sɔk.

⁵³Wap lə sa'a shyə, ŋkhə́m Gənezarɛt nthiŋnyə́ kə́ŋ shyə tsʉ'u.

⁵⁴Wap lə wuŋ nə təm kənu' pɔmnəŋ tíŋ Yeso.

⁵⁵Wap lə kəka nthʉm gùŋ mgúŋ awɛ, bɑ ŋkwa mghɛ gho nthʉm mkodyə nə gɔ tsʉ' yə pu lə bɑ̀ jú' gɑ́ e nə a.

⁵⁶Bǎ yá tsʉ' lə́ yə e lə́ ŋkho nə a, kɑ m nthʉ̌m po mtisuŋ, kɑ m nthʉm mtisuŋ, kɑ m nthʉm mla' lə, pu lə jap mghɛ gho tsʉ'u bɔ; biŋ bɑ shwyɛ'nyə e gɑ e tak gɑ́ wap kwak pu bǎ da' nə mcwǐŋ dzə myə́; a piŋ bɑ po'o pɔ pyə wap lə ŋkwak pu nə e a pɑ jɛtə.