Read Ghomala New Testament MARKUSI 7 Bible Online

MARKUSI 7 - Ghomala New Testament bible

MARKUSI 7

¹Pɑ Farisai pu a shɑ pɑ zhyə́ mco' pyə́ wap lə fɑ́ Yerusalɛm a lə cú'tə bəŋ Yeso.

²Wap lə bɑwə jɔ gɑ shɑ pɑkhʉ̌ Yeso dzʉ ywə́ yap pu a bǔ mviŋ, yəŋ la'tə gɑ́ bú tə sɔk.

³Nə pa' pɑ Farisai pá' guŋ pɑ Yudea a, tə́ dzʉ́ ywə tə́ cəŋtə́ sɔ́k bú map pɑ́, bɑ gə po'o nə́ nə nthɔ́m mà pɑ́ dzə̀.

⁴Wap tə fɑ sìm dzʉywə tə sɔk nɑ pɑ; bɑ wap piŋ nthɔm shɑ nthinthǐ mnwə myə a bɑ nwə mà? gùŋ a: Yap nthi nə sɔk mthǔ', ba mghʉ̌ɔ pu a mkɛ̌.

⁵A lə pɑ̌ po'o pɑ Farisai pu a pɑ zhyə́ mco' həŋtə́ Yeso gɑ: Nwə kɑ la' pɑkhʉ pǔ ghiŋ nə mà pɑ dzə̀? Wap dɑ bu mvíŋ dzʉ́ ywə́.

⁶Yeso ghɔm bi pu gɑ: Esaya gɔm ghɔm Si lə́ cəŋtə́ gɔmnwə nə po, pɑ tsɛbǔ, nə pa' a bɑ pu və gɑ: Pɔ pɔ gɑ gə mkù' mə̌ pɑ́ shyə shwə̀ da' gɑ́ tʉ́m tsap pɑ tə́ gʉə sʉəsʉə nə́ m̀;

⁷Wap shu'tə sé a pɑ pɔpɔ nə pa' ywə yə wap ji'tə bi pɔmnəŋ a bɑ pɑ́ nwə monəŋthə́.

⁸Pǒ bak ywə yə Si jap a hɑ jʉ̀m, biŋ bɑ́ da nɑ́ pɑ́ nə́ mà pɔmnəŋ.

⁹E lə kwi' gɔm bi pú gɑ: Pǒ shəŋtə ŋkhəŋnyə mco' myə Si jap a, bɑ nthɔm pɑ́ mà yɔ́.

¹⁰Nə pa' Mosɛ lə ghɔm gɑ: Ghə mku' tɔ̌ pú mɔ̌; biŋ gɔm gɑ: Mo wak tap e pu map e bɑ pu gɔ nyəŋ shɛ thə e, zhwe e.

¹¹Da' gɑ́ po gɔm gɑ: Mo ghɔm bi tap e kɑ bi map e lə gɑ: Ywə nə ŋkwitə́ o yə o bɑ gɔ pyap bəm a zhi korban, yəŋ la'tə gɑ tsə pwɔ' dɔlɔ̌,

¹²bɑ pǒ biŋ bi e gɑ e kɑ́ piŋ gə sɔmywə bi tap e kɑ bi map e lə.

¹³Pǒ dɑ po'o má guŋ yə pǒ ji'tə a nə bɔptə ghɔm Si. Pǒ biŋ gə shɑ nthi mnwə po'o tə a yɔ́m.

¹⁴E lə pǐŋ ŋkhe pɔmnəŋ gɔm bi pú gɑ: Po teŋtə mtəŋ guŋ yɔ awɛ ju' a.

¹⁵Sɔmywə yə a fɑ m dzʉ̌ ŋkho nə mo bviŋ e a tə bɑwə pɑ; ywə yə a nthəm mthʉ̌m nɑ́ mo a nə bviŋ mò.

¹⁶E lə cwə̌ tə́ ŋkho dyə, nə́ tsʉ' gʉɔ sʉəsʉə nə pɔmnəŋ, pɑkhʉ̌ pyə́ həŋtə e nwə nə tsɔ ghɔm tə́ tútə̀.

¹⁸E ghɔm bi pu gɑ: Ba wɔ yɔ́ bɑ po ka ghə zhyənwə a? Po ka zhyə́ gɑ́ pɑ sɔmywə lə fɑ m dzʉ̌ ŋkho nə mo tə bviŋ é a?

¹⁹Nə pa' ywə bɔ tə ŋkho nthʉm tʉ́m tsyə pɑ́, a ŋkho m vam é, biŋ shyə gɔ m kwa. E lə́ gɔm po'o gɑ guŋ ywətsʉ awɛ bɑ ǎ puŋ.

²⁰E lə gɔm gɑ: Ywə yə a nthəm nə mo a nə bɑ ywə yə a bviŋ e a.

²¹Nə pa' ywə yə a nthəm nə mo a, nthəm nthʉm tʉm é, bɑ mkwɛnyə cwəpùŋ, ghiŋ cwəpùŋ, cǔŋ, nə zhwə mo.

²²Ghap, nə cəŋ fʉ', yǎpnwə̀, fʉ̌, nwə cʉ̀', ghi'nyə, mcàp, ŋa'nɑ́, nwə tə ŋkhɛ̀.

²³Guŋ nwə cwəpuŋ bɔ nthəm m nthʉ̌m tʉ̀m mo, bviŋ è.

²⁴Yeso lə lǔ tsʉ'u gɔ nthʉm gùŋ Tiro. E lə kó nə mu' dyə́ la' e pɑwə ŋkhúŋ gɑ mo zhyə; da' gɑ a lə pɑ̌ bi a pɑ pu lə cyə́ tə zhyə̀.

²⁵Mu' mjwǐ yə́ gò e lə bɑ́ bɑ zhwenyə cwəpúŋ ko nə e á lə wuŋ nə yu' pa' pú gɔmnwə nə e a, sɔ' bvʉ́ nə mkwə myə́.

²⁶Mjwǐ bɔ lə bɑ tə pɑ yə Yudea, bɑ yə Siro Fenikia nə nə́ tsə é. E lə bɑwə dó bi Yeso gɑ e zhəŋ zhwenyə cwəpuŋ nə mu e.

²⁷Yeso lə ghɔm bi e gɑ: Cu' kwa' pǒ zhwyə́, nə pa' a ka púŋ nə pé msɛ̌ pó ma' bi pǒ bvʉ́.

²⁸Mjwǐ bɔ lə pa' bi Yeso gɑ: A nyə́nyɔ m Cyəpɔ, da' gɑ́ pǒ bvʉ́ bɑ to tɑpe pfɑ́ msəsia ywətsʉ pó.

²⁹Yeso ghɔm bi e gɑ: Shyə m nə ghɔm bǎ, ghɔ̌, zhwenyə cwəpuŋ tə́m nə gò o.

³⁰Mjwǐ bɔ lə pɑnyə la' e, biŋ jɔ mú e bɑ ě nuŋ kodyə, bɑ zhwenyə cwəpǔŋ təm nə é.

³¹Yeso lə́ tə̌m nthʉ́m gùŋ Tiro nə pɑnyə ghəŋ shyə lɑpʉə Galilea shyə́ m Sidon, ntwɔk nthʉ́m Dekapoli.

³²Pú lə lɑ́ mu' bu' mtəŋ e piŋ bɑwə́ gɔm kəkɔ sɔ' bi e, biŋ shwyɛ'nyə e gɑ́ e yap bú nə e.

³³Yeso lə lɑ e fɑ cəcɑ̌ pɔmnəŋ nthəm, gɔ tə́ jʉ̀m, tsʉ' tsìŋ, ntwɔk nthə́ bú myə́ mtə́ŋ e, nthətə́ mti, jap nə tʉm e.

³⁴Biŋ bʉ' mnyə myə́ dé kɛbə̀ŋ, mpfə̌ biŋ gɔm bi mo bɔ gɑ: Efata, à pɑ da'tə gɑ ghyɛ'.

³⁵Mtəŋ myə́ lə wuŋ gyɛ', tʉm é kyɛ' e piŋ gɔmnwə̀ pɑpúŋ.

³⁶Yeso co' bi pú gɑ́ wap kɑ́ ghɔmnwə bi sɔm mò; da' gɑ́ e lə bɑ sho' bi pú po'o, tə wap pɑ́ shyanyə nwə bɔ.

³⁷Nwə̀ pɑ shyə wáp, wap pɑ́ gɔm gɑ: Ě cəŋtə gə gùŋ ywə awɛ pɑ pɑpúŋ; e gə mbu' mtə̀ŋ yu' nwə̀, tə ghɔm pɑ́ gɔm.