Read Ghomala New Testament MARKUSI 8 Bible Online

MARKUSI 8 - Ghomala New Testament bible

MARKUSI 8

¹A lə pɑ̌ tyɛ'dzʉ́ bɔ, və́ŋ dù pɔmnəŋ pɑ́ si, tə́ ghə ywə yə wap gɔ tsʉ́ a; Yeso ké pɑkhʉ́ pyə́ gɔm bi pú gɑ:

²Gɑ̌ wə shɔ́mmtso vəŋ pɔ pɔ̌, nə pa' a tyɛ̌' tá pa' wap pɑ̌ bəŋ m̀, bɑ wap ka nəŋ gə ywə yə wap gɔ tsʉ́ a.

³Myə̀ la da'nyə́ wap gɑ wap ghɔ mla' máp tə wap dzʉ́ ywə, bɑ wap gɔ ko məjyə̀ vʉ, shɑ́ pɔ piŋ bɑ cəcɑ̌ pú bɑ wap fɑ tə́ gʉə sʉəsʉə.

⁴Pɑkhʉ́ pyə́ pa' bi é gɑ: Pú gɔ yɔ də̀ŋ msɛ́ myə pɑ pu nə ŋkhim wap tə wap zhwyə́ a hɑ́ ghakgo tsɔ'ɔ?

⁵Yeso hə́ŋtə wap gɑ: Pǒ ghə msɛ́ dəŋ gɑ́ kɑ? Wap pa' bi e gɑ mta' sɔmbʉə.

⁶E piŋ gɔm gɑ pɔmnəŋ cwətə si, biŋ ŋkwi msɛ mta' sɔmbʉə, nyəŋ byanyə, biŋ bo'tə, hɑ́ bi pɑkhʉ̌ pyə́ gɑ wap ghaptə; wap ghaptə bi pɔmnəŋ.

⁷A lə bɑ wap ghə po mduŋ bapgu. Yeso nyə́ŋ byanyə́ nə́, gɔm gɑ wap ghaptə.

⁸Wap lə pfɑ̌ tə jwyə. Pú piŋ daktə mbo' myə́ a lə cʉ̌' a msap sɔmbʉə.

⁹A lə nə pɑ̌ po'o wap pɑ́ gwɛ a pɔ sha' pfʉə. Yeso lə la'nyə wap,

¹⁰biŋ gúŋ ŋkho nthʉm kənu' pu a pɑkhʉ̌ pyə, pú a pú ghɔ m nə ghə̌ŋ Dalmanuta.

¹¹Pɑ Farisai lə́ sɔ̌' biŋ bɑ nthɛ́shwə́ pu a Yeso; wap hə́ŋtə e mtiŋ myə a fɑ kɛbə̀ŋ a nə dəŋtə́ é.

¹²Yeso lə pfə̌ sʉəsʉə pfə́, gɔm bi pú gɑ: Nwə kɑ́ gwya pɔ nə yəŋ wɔ̌dzʉ́ hə́ŋtə mtìŋ? Kwa' nyənyɔ, gɑ̌ siŋ wɔ gɑ́ pu tə́ gɔ sɔ' hɑ sɔm mtiŋ bi gwya pɔ nə yəŋ wɔ̌dzʉ́ pɑ.

¹³E lə lǔ bəŋ pú, ŋkhó kənu' gɔ nə yə mu' jʉɔ.

¹⁴Pɑkhʉ̌ Yeso lə tʉɔnyə́ nə lɑ msɛ̌ tə́ gə da' ta' msɛ̌ yɑmu' nthʉm pɛ.

¹⁵Yeso lə ghɔ̌m bi pú gɑ: Po pɔmtə́ ywə kwɔ'msɛ̌ pɑ Farisai ba yə Herode.

¹⁶Wap lə tǒ' nə tɛshwə̀ cəcɑ̌ pu nə pa' a lə bɑ wap ka ghə msɛ́ a.

¹⁷Yeso zhyə́ gɔm bi pú gɑ: Nwə kɑ po tɛshwə̀ nə pa' po ka ghə msɛ́ a? Jyə́ gɑ́ pǒ jɑ̀ tə tɔm cwyəŋ nwə, tə yu' nwə lə̀? Tʉm tsɔ bɑ a sɔk pɑ́ m gɑ́ kɑ?

¹⁸Po bɑ po ghə mnyə́, la' po pɑwə jɔ a? Po bɑ po ghə mtə́ŋ la' po pɑwə ju'nwə a? Po ka kamtə́

¹⁹cwə yə ŋ də pǒ' msɛ mta' tɔ bi pɔ sha' tɔ a, po lə laktə̀ bo' myə́ nə msap məsʉ'ʉ? Wap ghɔm bi e gɑ: Shwɔppʉə mghǎm.

²⁰Po piŋ ŋkhamtə cwə yə ŋ də pǒ' msɛ mta' sɔmbʉə bi pɔ sha' pfʉə̀ a, po lə laktə mbo' myə́ nə́ mkhəkhʉə mə sʉ'ʉ? Wap ghɔm gɑ mkhəkhʉə sɔmbʉə.

²¹E lə pǐŋ gɔm bi pu gɑ́ po jɑ tə́ yu' a?

²²Wap lə ŋwak Betsaida; pú lɑ mu' fʉ̀ sɔ' bi Yeso, shwyɛ'nyə e gɑ e kwak e.

²³E lə́ tɔm pǔ fʉ bɔ dɑ e nthəm nthʉm lá'; sho' mtǐ nə mnyə́ myə́, jap bú nə e, hə́ŋtə́ é gɑ: O wə jɔ ywə a?

²⁴E lə́ ghyɛ' mnyə́ myə́, gɔm bi Yeso gɑ: Gɑ̌ wə́ na' jɔ pɔmnəŋ, jɔ́ wap pa' mta'thə́ a, da' gɑ́ wap pɑwə giŋtə́.

²⁵Yeso lə kwi' sho' bú myə́ nə mnyə́ bɛ bɔ, e yɔ tsʉ' kwa' dɔlɔ̌, bɑ ě yɛ̀, bɑwə jɔ guŋ ywə awɛ jyə́ yá.

²⁶Yeso lə nə la'nyə e gɑ́ e pɑnyə la' e gɔm gɑ: Pɔm tə ko bǎ nthʉm gùŋ.

²⁷Yeso pu a pɑkhʉ̌ pyə́ lə ghɔ nə mpfə́ la' giŋnyə Kaesarea Filipo. Pu a pú lə pɑ̌ mə́jyə, e hə́ŋtə pɑkhʉ̌ pyə gɑ: Pɔmnəŋ gɔm gɑ́ gɑ̌ bɑ́ wɑ?

²⁸Wap ghɔm bi e gɑ: Shɑ́ pɔ gɔm gɑ o bɑ́ Yohane nu' pɔ shyə; shɑ́ ghɔm gɑ́ o bɑ Elia; pyə shɑ́ pɑ́ gɔm gɑ́ o bɑ mu' gɔm ghɔm Si.

²⁹E kwi' həŋtə wap gɑ: Sɔ' m nə po, pǒ gɔm gɑ́ gɑ̌ bɑ̀ wɑ́? Pɛtrɔ lə́ lɑ̌ ghɔ̀m ba' gɑ: O bɑ Kristo.

³⁰E lə cǒ' bi pú gɑ wap kɑ́ ghɔmnwə nə é nə bi sɔmmo.

³¹E lə to' nə zhi'tə wap gɑ́ Mú mo lə bɑ gɔ sɔ' yɔgo' té', mghətso wa' e, ba mkamsi gwyəgwyə pu a pɑ zhyə mco'. Pú zhwə é, a piŋ nə pɑ̌ tyɛ'dzʉ́ yɑtá e yám nə vʉ̌.

³²E lə́ gɔm tsɔ ghɔ̀m po' pɑ sɔsɔ̌; Pɛtrɔ lə fəŋ e nə gɔ jʉ̀m ntho' nə cɔktə e.

³³Da' gɑ e lə fɛ̌ nɑ e jɔ pɑkhʉ̌ pyə́, biŋ shɔk Pɛtrɔ gɔm bi e gɑ: Lu jʉ̌m m̀ m Sata, nə pa' yù nə yɔ tə́ yə nə́ yɔ Si pɑ́, ǎ pɑ́ yə́ monəŋ.

³⁴E lə pǐŋ ŋkhe pɔmnəŋ pu a pɑkhǔ pyə gɔm bi pú gɑ: Mo pɑ́ gɔ yap jʉ̌m m̀, e kəŋnyə thə́ nɑ é biŋ ŋkwa yə bɛnyəpɛnyə nə jap jʉm m̀.

³⁵Nə pa' mo yə ě cəŋ nə vɔk vɔ́k e a gɔ sɔ' pi vɔk e bɔ; da' gɑ́ mo yə e pi vɔk e nə m̀ ba m nə Cúŋ pɑpuŋ a gɔ sɔ' vɔk vɔ́k e bɔ.

³⁶A po'o bi a pɑ mo ghə guŋ dzʉ́ awɛ, tə dɑ vɔk e nə jó, bɑ a gɔ kwitə é nə kɑ?

³⁷Pɑ mo hɑ kɑ bi mo tə a pɑ́ dəŋ vɔk e.

³⁸Nə pa' mo kuso nə m̀ ba nə ghɔm tsɑ̌ dzə̌ gwya pɔ nə yəŋ gɑ wɔ̌dzʉ́ pɑ ghə ghàp, pɑ hɔnwə bɑ ba Mú mo gɔ sɔ' kuso nə e nə cwə yə́ e gɔ sɔ́' sɔ' nthʉm ghu'tə Tap e pu a pɑ aŋgəle dɔlɔ̌ a.