Read Ghomala New Testament MARKUSI 9 Bible Online

MARKUSI 9 - Ghomala New Testament bible

MARKUSI 9

¹Yeso lə ghɔm bi pú gɑ: Kwa' nyənyɔ gɑ̌ siŋ wɔ gɑ́ cəcɑ̌ pɔ pyə wap si tsɔ' a, shɑ́ pɔ tə gɔ sɔ' pfʉ́ tə yɔ yə nə sa'dzʉ̌ Si pa' a sɔ' m nə́ tʉɔ a pɑ́.

²A lə cyə tyɛ'dzʉ́ nthɔk, Yeso lɑ Pɛtrɔ ba Yakop pu Yohane, pu a pu ghɔ tsʉ' tsiŋ, dəm mu' mɑ sʉəsʉə kuŋgǒ. Yeso lə ko tsʉ'u sɑ́nyə́ dzə̌ pú,

³dzə́ tsyə́ fɔk dəŋnyələŋnyə pa' pɑ̀ sɔm nu'dzə́ dəmcǎ' lə ghə dzə fɔk po' a.

⁴Elia pu Mosɛ ŋwak dzə̌ pú, pu a Yeso pɑwə shɔm nwə́.

⁵Pɛtrɔ lə lɑ ghɔm, gɔm gɑ: Rabi, ǎ puŋ bi pɑ nə pɑ́ tsɔ'ɔ. Pɑ zhɔk mnthap mɑnthá, mu' pɑ yǔ, mu' pɑ yə Mosɛ, mu' pɑ yə́ Elia.

⁶Pɛtrɔ la tə́ bɑwə jyə ywə yə e gɔ ghɔm a pɑ́, nə pa' pwɔk lə bɑ ǎ ko nə pú.

⁷Mlwa lə sɔ' pfɔptə wap, pu yu' gi mo fɑ nə mlwa gɑ: Mo yə̌ŋ bɑ Mu a yə gɑ̌ ŋkhuŋ é te' a, po yu'nyə e.

⁸Wap lə wuŋ détə́ giŋnyə̌ pú, wap lə piŋ jɔ sɔm mò tə́ ně da' Yeso do e, biŋ gə wap.

⁹Cwə yə́ pu a pú lə pɑ dzə́ŋ fɑ kúŋgǒ a, Yeso co' bi pu gɑ wap kɑ siŋ sɔmmo ywə yə wap jɔ́ a, tə̌ Mu mo la' jám nə vʉ̌.

¹⁰Wap lə ghiŋ nə mco' bɔ, da' gɑ bɑ həŋtə́ cəcɑ̌ pú kwa' ywə yə e lə gɔm gɑ́ nə yám nə vʉ̌ a.

¹¹Wap lə pǐŋ həŋtə́ Yeso gɑ: Nwə kɑ̀ pɑ zhyə́ mco' pɑ gɔm gɑ́ Elia gɔ sɔ' ləŋdzə sɔ̌'?

¹²E ghɔm bi pu gɑ: Ǎ kwa' pa', Elia gɔ ləŋdzə́ sɔ', piŋ yap guŋ ywə awɛ pa' a shəŋ a, da' gɑ́ a bɑ pu və nə nwə Mú mo gɑ e gɔ sɔ' yɔgo' te' pu piŋ gwak e.

¹³A po'o tə gɑ̌ siŋ wɔ, Elia lě sɔ', wap piŋ gə guŋ ywə yə́ wap kuŋ a nə e, dəŋdəŋ pa' a bɑ pu lə və̌ a.

¹⁴Wap lə nə pɑnyə bə́ŋ pyəshɑ́ pɑkhʉ̌ jɔ mɑ vəŋ pɔ pɑ bəŋ pu pu a pɑ zhyə́ mco' pɑwə nthɛshwə̀.

¹⁵Wap lə wuŋ nə yɔ Yeso, guŋ pɔmnəŋ awɛ zhəzhə̀ŋ, pu pɑ́ ŋkhʉdʉ́ nə ca'tə e.

¹⁶E həŋtə pɑkhʉ̌ pyə gɑ: Pu a pú nthɛshwə nə kʉ́?

¹⁷Mu' mo cəcɑ̌ pɔmnəŋ pa' bi e gɑ: Ta gɑ̌ bɑ gɑ̌ lɑ mu a sɔ' bu, zhwényə tə ghɔm pɑ́ nə é.

¹⁸Zhwenyə bɔ nthɔm e bǎ hɑ lə́, ma' e si, e sə́ dhə̀dhə̀, pfɑ́ msúŋ, nthiŋ. Gɑ̌ ghɔm bi pɑkhʉ̌ pǔ gɑ wap zhə́ŋ e, la' wap ghə gʉ' nə jə́ŋ e.

¹⁹Yeso lɑ ghɔ̀m gɔm bi pu gɑ: Gwya pɑ tə piŋ, gɑ̌ gɔ pɑ bə́ŋ po tə́ kəm sǒ? Gɑ̌ gɔ kyəp tʉm tsɑ̌ nə po tə kəm sǒ? Po lɑ e nə sɔ' bəm.

²⁰Wap lə́ lɑ e nə sɔ' bi Yeso. Mu bɔ̌ lə cwə̌tə́ jɔ Yeso, zhwenyə to' nə cʉ'nyə é, gə e tiŋ; bvʉsi, ŋkheŋnyə lə́ sə́ dhə̀dhə̀.

²¹Yeso həŋtə tap e gɑ: A cwə dəŋ pǎ' pa' a pɑ̌ gə nə e po' a? E ghɔm gɑ: Tə fɑ bwa

²²a bɑ mcʉmmcʉ̌m, zhwenyə bɔ ma' e mɔk kɑ m nthʉ̌m shyə lə, po'o gɑ e pfʉ́. Tə a pɑ gɑ́ pɑ o ghə ywə nə́, o kwitə wɔk shyə m nə cɔmmtso.

²³Yeso ghɔm gɑ: A pɑ̀ gɑ́! Gɛ piŋnthʉm bɑ́ ě ku' nə ghə guŋ ywə awɛ.

²⁴Tá mú bɔ lə wuŋ shwe gɑ: Gɑ̌ bíŋ! Sɔ' ŋkwitə yɑ nə yak piŋnthʉm.

²⁵Yeso lə yɔ̌ pa' pɔmnəŋ shu'tə a, shɔktə zhwenyə cwəpuŋ gɔm gɑ: Zhwenyə bu'mtəŋ ba tə ghɔm, gɑ̌ ghɔm bu, təm nə mu yə̌ŋ, o kɑ piŋ tə́ bɑnyə nə e!

²⁶Zhwenyə lə lɑ cwé pu a mtiŋ nə nthəm nə mú bɔ. Mu bɔ cwə pa' cwə yə ě pfʉ̀ a, tə́ guŋ pɔ awɛ pɑwə gɔ́m gɑ: Ě pfʉ́.

²⁷Da' gɑ́ Yeso tɔm pú e, bʉ' e, e tiŋnyə thə́.

²⁸Cwə yə Yeso lə pɑnyə dyə a, pɑkhʉ̌ pyə həŋtə e gɑ: Kɑ gə tə la' pyə ku' nə zhəŋ zhwenyə bɔ?

²⁹E ghɔm bi pu gɑ: Nthi zhwenyə yəŋ gɑ bɑ bi a pɑ́ sɔmywə lə té é nə́ mo, tə ně da' mcwyɛ'nyə.

³⁰Yeso pu a pɑkhʉ̌ pyə lə lǔ tsʉ'ú, shyə m Galilea ba m Yudea; Yeso la tə́ bɑwə shəŋ gɑ sɔmmo zhyə pɑ́.

³¹Nə pa' e lə́ bɑwə ji'tə pɑkhʉ̌ pyə gɔm gɑ: Pu gɔ hɑ Mú mo nə bǔ pɔmnəŋ; a wap zhwə é, cwə yə́ wap zhwə é á, a nə cyə̀ tyɛ'dzʉ́ yɑtá e yám nə vʉ̌.

³²Da' gɑ pɑkhʉ̌ pyə la tə́ yu' tsɔ ghɔm tə tútə, biŋ bwɔk nə hə́ŋtə é nwə nə́.

³³Wap lə ghɔ̌ Kapɛrnaum; cwə yə wap lə pɑ̌ dyə́ a, Yeso hə́ŋtə wap gɑ: Po kɑ́ bɑ́ mə́jyə nthɛ́shwə nə kɑ?

³⁴Da' gɑ́ wap lɛtə lɛ̌tə́; tə́ bɑ wap la' bɑ mə́jyə bɑwə fəŋnyə́ nə zhyə́ mo yə́ e bɑ mo gwyə́ a.

³⁵Yeso lə cwə̌si, biŋ ŋkhe pɔ shwɔppʉə mghǎm, gɔm bi pú gɑ: Mo pɑ shə́ŋ nə pɑ́ dəŋdzə̀, e pɑ́ jʉɔjʉm nə guŋ pɔ awɛ, biŋ bɑ gɛfa' bi guŋ pɔ awɛ.

³⁶E lə pǐŋ dɑ ta' muywə mú, jap e cəcɑ̌ pú, nthɛtə́ e, gɔm bi pú gɑ:

³⁷Mo yə e lɑ muywə mú pa' yəŋ gɑ́ a dɑ nə tso tsɑ̌, bɑ é dɑ pɑ kwa' myə̀; mo yə e nəŋ nyə́ŋ a dyə́ a, bɑ e tə́ nyəŋ pɑ́ myə̀ dyə pɑ́, e nyəŋ Mo yə e nthəm a a.

³⁸Yohane lə ghɔ̌m bi e gɑ: Ta pyə̌ yɔ mu' mo, e pɑwə́ dɑ tso tsǔ jə́ŋ mzhwenyə cwəpùŋ, pyə pɑ shəŋ nə kɔ bi e, nə pa' tə pyə a pu nə lə bəmtə bɑ́ a pɑ.

³⁹Tə́ Yeso ghɔm gɑ: Ka po kɔ bi e, nə pa' pɑ sɔmmo lə lɑ́ tso tsɑ̌ gə msya, biŋ gúŋ pɑ cwə o bɔ, ŋkhe tso tsɑ̌ cwəpùŋ.

⁴⁰Mo yə́ e tə bɑ gɛ bo yɔk pɑ a pɑ́, bɑ́ mo yɔk pɑ̀.

⁴¹Gɑ̌ siŋ wɔ gɑ́ bǎ wɑlə́ yə e gɔ sɔ' hɑ nthu' shyə bi po gɑ po nwə shyə́ m nə pa' pǒ bɑ pɔ Kristo a, tə gɔ sɔ' pi myə́ mcwɔ'fa' pɑ̀.

⁴²Da' gɑ mo yə e fa'tə bǎ ta' mo nə pɔmkəcɔk po pɔ gɑ pyə́ wap biŋ a, bɑ dzə̌ wə bɑ bi mo bɔ gɑ́ pu cə́ŋ gwɔ' gwyə nthúŋ é, ma' e shyə lɑpʉə.

⁴³A pɑ gɑ́ pú ó gɔ ghə o fa'tə bvʉ́si, o ya' e; dzə̌ bɑ gɑ́ o ko nə vɔk kam pu, shyə́ nə lɑ bʉ́ mǔ məbʉ́ə gɔ nthʉm gehɛnə̀, nthʉm mɔk tə́ pi.

⁴⁴A pɑ gɑ́ kwə̀ o gɔ ghə o fa'tə bvʉ́si, o ya' e; dzə̌ bɑ gɑ́ o ko nə́ vɔk kam kwə, shyə pá' pu gɔ ma' o pu a mkwə mǔ məbʉ́ə nthʉm gehɛnə̀ a.

⁴⁵

⁴⁶Bi á a piŋ bɑ gɑ́ bɛtsə o fa'tə o nə vʉ nə mhɔ o té e; dzə́ gɑ́ o ko nthʉ́m Nəfo Si kəpi bɛtsə shyə́ pa' pu gɔ ma' o nthʉ́m gehɛnə̀ pu a mnyə mǔ məbʉə a,

⁴⁷

⁴⁸tsʉ' yə́ nənəŋdam tə́ pfʉ́ a pɑ́, ba mɔk lə piŋ bɑ bi a.

⁴⁹Nə́ pa' pu gɔ sɔ' lɑ mɔ́k pa' gwɛ́ á, nyəŋ bǎ nə wɑ̌lə́.

⁵⁰Gwɛ̌ bɑ́ ywə pɑpúŋ, tə́ gwɛ̌ pi yə́ nə tʉ̀m bɑ pu gɔ piŋ lɑ kɑ́ nyəŋ nə é? Po ghə gwɛ́ nə po, biŋ bɑ bvɔk nə hwitə̀ cəcɑ̌ po.