Read Ghomala New Testament LUKASI 1 Bible Online

LUKASI 1 - Ghomala New Testament bible

LUKASI 1

¹Pa' pɔ jɔmyɔ̌m lə to' nə və mnwə myə a lə cyə cəcɑ̌ pɑ a,

²bvə ywə yə pyə lə yu' bi pɔ pyə wap lə́ bɑ́ si tə fɑ cwə nə to', jɔ nwə bɔ, shʉ' mghɛ ŋkwinthɛ̌ nə́, bɑwə dɑ mghɔm bɔ sa dzʉ á,

³a lə́ puŋ gɑ́ ŋ de mnwə nə́ pa' a pɑ nyənyɔ tə fɑ nə zhitə a, tə́ bvə bu nə ŋkhɛ dəŋdəŋ, wə tá Teofilə,

⁴tə o nə jyə́ nyənyɔ nə mnwə myə pu siŋ o gɑ o zhyə a.

⁵A lə pɑ̌ nə́ cwə yə Herode lə́ bɑ́ fo pɑ Yudea á, mu' ŋkhamsi pɑ wə tso tsyə pɑ́ Sakaria, e pɑ́ nə kam Abia. Jwi é lə́ bɑ́ gwya mo Aaron, tso tsyə pɑ Elisapet.

⁶Wap lə́ bɑ́ pɔ dəŋdəŋ dzə̌ Si, bɑ giŋ nə mco' Cyəpɔ nyənyɔ bɑ́ gə pa' Si shəŋ a.

⁷Wap lə́ bɑ wap ka wim mú, nə pa' Elisapet lə́ bɑ́ ŋkhíŋ, bɑ wap vò.

⁸A lə kəm nə cwə yə yə́ kam pɔ Sakaria lə́ bɑ́ gɔ fa' fà' Si a,

⁹nthuŋ tsʉ́ e pa' mà mkamsi lə́ bɑ́ cwə o bɔ a, gɑ́ yʉ́ nə gɔ ko nə tsʉ' yə pu ntho phə̀ damnyəlamnyə nə shwyɛ'nyə Si dyə Cyəpɔ a.

¹⁰Guŋ pɔ awɛ lə́ bɑ́ dzʉ cwə nə to ywə nə shwyɛ'nyə Si bɑwə shwyɛ'nyə Si.

¹¹Aŋgəle cyəpɔ lə ŋwak dzə̌ Sakaria, nthiŋnyə nə́ ghəŋ pu tʉ̀ɔ, bəŋ tuŋmɔk nə ntho ywə damnyəlamnyə.

¹²Sakaria lə nə yɔ e, lam tsyə sɔ, e pwɔk.

¹³Aŋgəle ghɔm bi é gɑ: Kɑ́ pwɔk m Sakaria, Si bɑ ě yu' mcwyɛ'nyə mǔ; jwi o Elisapet gɔ sɔ' tsə ta' mu mbɛ bu, o ke tso tsyə gɑ́ Yohane.

¹⁴O gɔ sɔ' ŋwɛnyə nə é te', ba bo'gwyə pɔ ŋwɛnyə yap nə cwə yə pu tsə é a.

¹⁵E gɔ sɔ' pɑ́ mo gwyə́ dzə̌ Cyəpɔ. E tə gɔ sɔ' pɑ́ nwə mlu' pɑ, kɑ bǎ kɑ́ ywə́ nwə yə a fɛnyə mo a lə, é lə nwə́. Pu gɔ sɔ' nə tsə é bɑ Zhwenyə Dɔlɔ̌ lo nə é.

¹⁶E gɔ piŋ sɔ' lɑ bo'gwyə pɑ Israɛl nə sɔ' dzə̌ Cyəpɔ Si yap.

¹⁷E gɔ sɔ' pɑ ghiŋ nə zhwenyə, ba gʉ' Elia, dzə̌ Si, yáp kwishwə cəcɑ̌ mtǎ pu a po pap; ghə pɑ tə yu'shwə ghə́ zhyənwə pɔ nyənyɔ. Po'o gɑ́ wap cʉ' pɔ pyə pu nyaptə wap bi Cyəpɔ a.

¹⁸Sakaria ghɔm bi aŋgəle gɑ: Gɑ̌ gɔ lɑ kɑ́ zhyə gɑ́ nwə yə o gɔm a, ǎ nyənyɔ? Gɑ̌ bɑ gɑ̌ vo, mgu'dzʉ jwi a piŋ bɑ́ bɑ ǎ ghɔ dzə.

¹⁹Aŋgəle pa' bi e gɑ: Gɑ̌ bɑ́ Gapriya, gɑ̌ shwə bəŋ Si. E nthəm a gɑ sɔ' gɔm bu po'o, siŋ o yəŋ cuŋ pɑpúŋ.

²⁰Cwəlɔ o gɔ zhi tə ghɔ̀m, o lə piŋ gɔm tə kəm tyɛ'dzʉ́ yə yəŋ nwə pəmtə a. Nə pa' ǒ tédʉ' nə ghɔm tsɑ̌ tsyə a gɔ sɔ' pəmtə a.

²¹Pɔmnəŋ lə́ bɑ́ dzʉ́ byap Sakaria, nwə pɑwə shyə wap, nə tiŋ pa' e nə shwə tsʉ' to ywə a.

²²E lə təm dyə, bi a pɑ́ é lə ghɔmnwə jyə. Pɔmnəŋ zhyə gɑ e kodyə nə yɔ m nthʉm zhwenyə. E cʉ' bɑ gə pɑ nthinthi mtìŋ, shwə pɑ tə ghɔm.

²³Myə́ mtyɛ' fa' lə́ mǐ, e pɑnyə la' é.

²⁴A nə cwə muywə, jwi e Elisapet fə̀ŋ. Dʉmnyə nə mŋwə nthɔkə, bɑ gɔm gɑ:

²⁵Si bɑ ě lɑ mnyə cɔmmtso dé a, nthé kuso nə m̀ dzə pɔmnəŋ.

²⁶A lə pɑ̌ nə́ mŋwə nthɔkə, Si tə́m aŋgəle Gapriya nthʉm mu' tisuŋ Galilea, tso tisuŋ bɔ pɑ́ Nazarɛt,

²⁷bəŋ mu' mú gò, bɑ mǒ ko nə é, tso tsyə́ pɑ Yosɛp, mo nə́ tuŋdyə́ David. Tsǒ gò bɔ lə́ bɑ́ Maria.

²⁸Aŋgəle kodyə é gɔm gɑ: Ŋwɛnyə! Wə yə Si jɔ o pɑpuŋ a, po Cyəpɔ nə bɑ.

²⁹Ghɔm tsɔ gɑ lə sɔlam Maria, tɑ e pɑ həŋtə gɑ: Yəŋ nthi ca'tə po'o bɑ́ da'tə gɑ́ kɑ̀?

³⁰Aŋgəle ghɔm bi e gɑ: Kɑ́ pwɔk m Maria. O bɑ Si gho' o.

³¹O gɔ pɑ tsʉ́m, tsə mú mbɛ, cwə̀ tso tsyə́ gɑ́ Yeso.

³²E gɔ sɔ' zhi tə', pu pɑ ŋkhe e gɑ Mú Si tə́ thə́ kɛbəŋ. Cyəpɔ Si gɔ sɔ' hɑ Nəfo tap e David bi é.

³³E gɔ sɔ' pɑ́ fo mama nə gwya Yakop, yə nə sa' tə́ gɔ la' mi pɑ.

³⁴Maria ghɔm bi aŋgəle gɑ: Yəŋ nwə gɔ cyə m gɑ́ kɑ tə́ pəmtə̌, nə pa' ŋ kha zhyə mbɛ a?

³⁵Aŋgəle pa' bi e gɑ: Zhwenyə Dɔlɔ̌ gɔ sɔ' pɑ́ nə́ o, gʉ' Si thə kɛbəŋ pɑ pfɔptə o. A shyə m po'o tə́ mu yə o gɔ sɔ' tsə e á pɑ Dɔlɔ̌, pu pɑ ŋkhe é gɑ Mú Si.

³⁶Zhyə gɑ́ fɑ o Elisapet yə a bɑ e vo a kě fəŋ tə ǎ wə́ bɑ́ mŋwə nthɔkə pa' e pɑ tsʉm á, yʉ yə pu lə́ ŋkhe é gɑ ŋkhiŋ mjwǐ a,

³⁷nə pa' sɔmywə yə a cyə Si a, a tə̌ wə pɑ́.

³⁸Maria ghɔm gɑ; gɑ̌ bɑ́ ŋkwɔ Cyəpɔ. Ywə yə o gɔm nə m̀ a pəmtə! Aŋgəle ghɔ.

³⁹Maria lə lǔ pɑ́ cwə o bɔ, bʉɔ m gʉ̌' gɔ nə mu' tisuŋ Yudea

⁴⁰ŋkho dyə Sakaria; sha'tə Elisapet.

⁴¹Elisapet lə nə yu' ca'tə Maria, mú ŋaknyə vam é, e lonyə nə Zhwenyə Dɔlɔ̌.

⁴²E cwe tə thə́ gɔm gɑ: O bɑ mjwǐ byanyə cəcɑ̌ pɑ jwǐ, Mu yə e vam o a, pɑ mu byanyə.

⁴³A shyə m gɑ́ kɑ̀ tə́ má Cyəpɔ a piŋ nə́ sɔ' bəŋ m̀?

⁴⁴Nə pa' gɑ̌ nə yu' gi ca'tə o, mú a ŋaknyə vam m̀, ŋwɛnyə́.

⁴⁵Buŋtsě bɑ́ mjwǐ yə e piŋ a, nə pa' ywə yə Cyəpɔ gɔm bi a gɔ sɔ' pəmtə.

⁴⁶Maria ghɔm gɑ: Lam tsɑ ghamtə Cyəpɔ

⁴⁷ba zhwenyə a ŋwɛnyə nə Si gɛvɔk a.

⁴⁸E le ŋkwɔ e yə e fi' nɑ e hɑ si a; tə fɑ́ cwəlɔ guŋ pɔ nə guŋ mwɔ dzʉ awɛ gɔ ghɑ pɑ ke a gɑ buŋtse mjwǐ.

⁴⁹Nə pa' Gʉ' gwyə bɑ e ghə msya nə m. Tsó tsyə bɑ dɔlɔ̌.

⁵⁰Puŋnthʉm e bɑ́ nə pɔ pyə wap bwɔk e a mzhəŋ mzhə̀ŋ.

⁵¹E lě dɑ gʉ' bu myə́ nə́ sa'tə mghɛ ŋa'nɑ.

⁵²E lě ŋkwɔktə mfomfo nə́ mkwɔ' map, ŋa' pɔ pyə wap fi' nɑ hɑ Si a hɑ thə́.

⁵³E lě gə mghɛ jikǔ' cʉ́' pɑ ghə ywə, mghɛ ywə pʉɔ shʉ' mpəŋ.

⁵⁴E lě ŋkwitə Israɛl ŋkwɔ e. E lě ŋkhamtə cɔmmtso e.

⁵⁵Pa' e lə ka' bi mta pɔk pɑ Abraham, ba gwya e nə guŋ mcwə awɛ.

⁵⁶Maria pu Elisapet lə cwə gwɛ a mŋwə tá. E pɑnyə la' é.

⁵⁷Cwə yə Elisapet lə bɑwə gɔ tsə́ a lə kǔ', e tsə́ mú mbɛ.

⁵⁸Mghɛ dhə dyə pu a mfɑ pyə lə nə yu' gɑ́ Cyəpɔ cɔmmtso myə́, pu a pu ŋwɛnyə.

⁵⁹A lə nə́ kəm tyɛ'dzʉ hɔ̌m pu sɔ' m nə́ vo mú, pu pɑ́ gɔ ké tso tsyə́ gɑ Sakaria, nə tsǒ tap e

⁶⁰map e ghɔm gɑ: Pu gɔ ke é gɑ Yohane.

⁶¹Pu ghɔm gɑ: Sɔmmo tə̌ nə́ tuŋdyə o tsó tsyə pɑ́ Yohane pɑ̀.

⁶²Wap lə lɑ mtiŋ həŋtə ta mú pa' pu gɔ ke tso mú a.

⁶³Sakaria lə́ kwi tɑ̌fi ŋwa' nə gɑ: Tso tsyə bɑ Yohane. A zhʉ̌m pɔmnəŋ.

⁶⁴Shwə é lə́ wuŋ gyɛ', tʉm é kyɛ' e to' nə ghɔmnwə, go'tə Si.

⁶⁵Pɑ giŋnyə tsʉ'u pwɔk, pu pɑ shyanyə mnwə bɔ kuŋ Yudea awɛ.

⁶⁶Bǎ wɑlə lə́ yu' nwə bɔ bɑ ŋkhamtə, lə́ bɑ gɔm gɑ: Yəŋ mú gɔ sɔ' pɑ́ m gɑ́ kɑ? Mtʉɔ Si cəŋtə bɑ nə e.

⁶⁷Zhwenyə Dɔlɔ̌ lə lo nə tap e Sakaria e ghɔm ghɔ̀m Si gɑ:

⁶⁸Byǎnyə bi Cyəpɔ, Si pɑ Israɛl, nə pa' e sɔ' ŋkwi pɔ pyə.

⁶⁹E hɑ gɛvɔk pɔ bi pɑ, shyə nə́ tuŋdyə́ fo David ŋkwɔ e.

⁷⁰Ywə yə e lə la' shyə m nə shwə mghɛ ghɔm ghɔ̀m tsyə́ cwə dzə̀ gɔm a,

⁷¹ywə vɔk yə a ŋkwi wɔk pɑ bi mghɛ bo pɔk pɑ a.

⁷²E la'tə cɔmmtso e bi mta pɔk pɑ, ŋkhamtə kɔ tsyə pu a pu lə wɑ á, kɔ dɔlɔ̌,

⁷³e ka' bi Abraham ta yɔk pɑ gɑ́

⁷⁴cwə yə e gɔ sɔ' te wɔk pɑ dyə mkwɔ a pɑ pɑ́ fá' bi e tə pwɔk.

⁷⁵Bɑ giŋ dzə e, dɔlɔ̌, dəŋdəŋ, nə guŋ mtyɛ'dzʉ vɔk mɔk pɑ awɛ.

⁷⁶Sɔ' m nə wə mubwǎ, pu gɔ sɔ' ké o gɑ gɔ̀m ghɔm Si tɑ́ thə́ kɛbəŋ. Nə pa' o gɔ sɔ' pɑ ghiŋ dzə Cyəpɔ nyaptə məjyə e.

⁷⁷Ghə pɔ pyə́ zhyə́ ywə vɔk shyə m nə́ nə lɑ mhɔ map shwyɛ' wap!

⁷⁸A bɑ́ nwə cɔmmtso Si yɔk pɑ. Tə́ nam fɑ thə́ ŋkhyɛ' wɔk pɑ.

⁷⁹A ŋkhyɛ' pɔ pyə wap lə bɑ wap cwə nthʉm jʉm vʉ a, da'tə wɔk pɑ məjyə hwitə

⁸⁰Sɔ' m nə́ mú bɔ̌, é lə́ pɑ̌ kwyə, bɑ́ gə gʉ' nə zhwenyə e. E lə cwə̌ ghakgo tɑ́ ŋkhəm tyɛ'dzʉ yə e lə la'tə nɑ́ e bi Israɛl a.