Read Ghomala New Testament LUKASI 10 Bible Online

LUKASI 10 - Ghomala New Testament bible

LUKASI 10

¹A lə pɑ po'o, Cyəpɔ cwɔ' shɑ pɑkhʉ pyə shwɔppʉə mgham sɔmbʉə, nthəm wap pɑpʉə pɑpʉə dzə e, nthʉm guŋ mtisuŋ awɛ ba guŋ myə shɑ mtsʉ' myə kwa' yʉ Cyəpɔ lə́ bɑ gɔ ghɔ nə a.

²E lə ghɔm bi pu gɑ: Tsə́ lɑ nyə́ŋ dyə yɔm, mghɛ fa' kɔk; po cwyɛ'nyə Cyəpɔ gɑ e cya shɑ mghɛ fa' pe é nə lɑ tsə nyə́ŋ dyə.

³Po ghɔ̌! Gɑ̌ nthəm wɔ pa' mjʉ̀jʉ̀ a cəcɑ̌ mbvʉ̌ go.

⁴Ka po lɑ pétə́, ka po lɑ pʉ̀ə, ka po lɑ mthap; po kɑ ca'tə sɔmmo məjyə.

⁵Po ko bǎ nə ya dyə́ lə po ləŋdzə gɔm gɑ: Hwitə̀ bi dyə yəŋ gɑ.

⁶Bya mo hwitə pɑ dyə bɔ bɑ hwitə́ yɔ gɔ ko nə e, tak po'o bɑ́ hwitə́ yɔ gɔ wuŋ nə po.

⁷Po cwə dyə bɔ, dzʉ́ biŋ nwə ywə yə pu hɑ bi po a nə pa' bǎ ya gɛfa' lə bɑ e ku' nə mcwɔ'fa' myə́. Ka po ko mdyə́dyə̌.

⁸Po ko bǎ nə ya tisuŋ lə́ tə pu nyəŋ wɔ dyə́, po tsʉ ywə yə pu gɔ hɑ bi po a.

⁹Jɛ mghɛ gho pyə wap gɔ pɑ nthʉm tisuŋ bɔ a, gɔm bi pu gɑ: Nəfo Si sɔ' tə bɑ bəŋ po.

¹⁰Tə bǎ ya tisuŋ lə́ yə po ko nə la' pu piŋ nə nyəŋ wɔ dyə a, po ghɔ̀ məjyə, gɔm gɑ:

¹¹Pyə tsɔp vɔp tsɔ́ nə mkwə mɔk tə́ po zhyə gɑ Nəfo Si sɔ'.

¹²Ga siŋ wɔ gɑ a gɔ la' pɑ tyɛ'dzʉ bɔ, Sodɔm lə pɑ sɔmywə nə yə go' tisuŋ bɔ.

¹³Korazin, o bɑ gɛ ghəghʉɔ! Betsaida, o bɑ gɛ ghəghʉɔ! Nə pa' msyanwə myə pu gə bi po a, a lə pe' bɑ m Tiro pu Sidon bɑ wap lě da' bʉɔtʉm tsap tə shi' və biŋ ŋkwa mko' pʉ̀ə.

¹⁴A po'o tə a gɔ sɔ' pɑ tyɛ'dzʉ nə fyɛ', go' Tiro pu Sidon lə pɑ sɔmywə nə yù.

¹⁵Sɔ' m nə o Kapɛrnaum, o kwɔ' tə ŋkho pɑ kɛbəŋ, bɑ o gɔ sɔ' fi' tə ko guŋ mpfə a vʉ̌.

¹⁶Yeso lɑ kwi' gɔm bi pɑkhʉ pyə gɑ: Mo yə e piŋ wɔ a, bɑ e piŋ a. Mo yə e kəŋnyə wɔ a, bɑ e kəŋnyə a; mo yə e kəŋnyə a á, bɑ e kəŋnyə mo yə e nthəm á a.

¹⁷Mghɛ nthəm pɔ shwɔppʉə mgham sɔmbʉə lə lɑ́ ŋwɛnyə bɑnyə, gɔm bi e gɑ: Cyəpɔ: Ba mzhwenyə cwəpuŋ yu' shwə yɔk nə cwə yə pyə dɑ tso tsu gɔm nwə bi pu a.

¹⁸Yeso ghɔm bi pu gɑ: Ŋ də yɔ Sata e fɑ kɛbəŋ bvʉ pa' pəpa' bəŋ a.

¹⁹Po yu', ŋ də hɑ tʉɔ bi po nə́ nə giŋ nə mnɔk ba m nə́ mgɔmsǐ, nə́ nə hya gʉ' gɛ bo tə sɔmywə cwəpuŋ gə wɔ.

²⁰Tə ka po ŋwɛnyə pɑ́ gɑ mzhwenyə cwəpuŋ yu'shwə yɔ; po ŋwɛnyə m gɑ́ pu və mtso mo kɛbəŋ.

²¹Pɑ kwa' cwə o bɔ, Zhwenyə Dɔlɔ̌ ghə Yeso ŋwɛnyə gɔm gɑ: O Ta, Cyəpɔ kɛbəŋ ba m sicǎ'; gɑ̌ gho'tə o, nə pa' o tʉ́m nwə bɔ bi mzhyənwə, da' gɑ gə po mkəcɔk po zhyə́. Əŋ m Ta a puŋ bu gɑ a gɔ pɑ po'o.

²²Ta o lě hɑ guŋ ywə awɛ bəm, bɑ sɔmmo ka nəŋ jyə mo yə Mú bɑ e a tə ně da' Tá, sɔmmo lə nəŋ jyə Tá, tə ně da' Mú, biŋ gə mo yə Mú ghə gɑ e zhyə é a.

²³Biŋ fɛ nə e gɔm bi pɑkhʉ pyə gɑ: Mpuŋtsé mnyə myə a wə jɔ ywə yə po wə jɔ a!

²⁴Nə pa' gɑ siŋ wɔ sɔsɔ̌ gɑ mghɔ́m ghɔ̀m Si ba mfo tə jɔm lə cəŋ nə yɔ ywə yə pǒ wə jɔ a, la' wap yɔ, nə yu' ywə yə pǒ wə ju' a, la' wap yu'.

²⁵Mu' tadyə nə nə zhyə mco' lə lǔsi dəŋtə e gɔm bi e gɑ: Ta, gɑ gɔ ghə gɑ kɑ tə sɔ' kwi vɔk mama a?

²⁶Yeso ghɔm bi e gɑ: A bɑ pu və gɑ kɑ nthʉm mcò' o? O ŋkhe nthʉm o gɑ́ kɑ?

²⁷E pa' bi e gɑ: O gɔ pɑ kuŋ Cyəpɔ Si o nə guŋ tʉm tsʉ awɛ, nə guŋ lam tsʉ awɛ, nə guŋ gʉ' o awɛ, bɑ nə guŋ mkwɛnyə mu awɛ piŋ kuŋ mo yə e bəŋ o a pa' o ŋkhuŋ thə́ nɑ o a.

²⁸Yeso ghɔm bi e gɑ: O pa' tə a puŋ. Pa gə pɑ pa' a, sɔ' bvɔk.

²⁹Tə mo bɔ pɑ shəŋ nə la'tə gɑ e bɑ mo dəŋdəŋ gɔm bi Yeso gɑ: Mo yə e bɑ bəŋ m̀ a bɑ wɑ?

³⁰Yeso piŋ gɔm gɑ: Mu' mo lə tsə̌ŋ fɑ Yerusalɛm bɑ gɔ m Yeriko. Bvʉ nə bǔ msamshwə, wap lɑ tsə tsyə́ awɛ, dzɔp e tə e cʉ' pɑ pfə, wap ma' e si gɔ.

³¹A pɑ́ po'o mu' ŋkhamsi pɑ dzəŋ m tsʉ' o bɔ: Jɔ é, kwyəpnyə məjyə, la' e cyə bəŋ é.

³²Mu' mo nə ŋkhənyə pɑ Levi lə pɑ shyə yə́ jɔ é, ŋkwyəpnyə məjyə.

³³Tə́ mu' yə Samaria lə pɑ gɔ m tə̌m, ŋwak bəŋ mo bɔ, jɔ́ e, mtso myə́ ku e,

³⁴e ghɔ tə́ bəŋ e, ŋkwɑ mfiŋ myə́, nə ŋkwɑ nyəŋ mlu' ba mwɑ nə́, ŋkwá é dəm leŋ é, pu e ghɔ dyə mghʉɔ, e nyaptə e.

³⁵Dzʉ lə lɔ̌ e té ŋkháp bɛ pʉə hɑ bi gɛ dyə̌, gɔm gɑ, cʉ' bɑ nə nyaptə e. O sim ŋkhap a cyə pɑ pa', bɑ gɑ ti nə cyə tùŋ.

³⁶O yɔ yu gɑ ya mo nə pɔ pɔ gɑ pɑtá lě da'tə gɑ e bɑ bəŋ mo yəŋ gɑ yə e lə vʉ nə bu msamshwə a?

³⁷Tadyə jyə mco' ghɔm gɑ: Mo yə e lɑ cɔmmtso myə́ a. Yeso ghɔm bi e gɑ: Ghɔ̌ biŋ ŋkho bɑ gə po'o ba wə yǔ.

³⁸Pa' Yeso pu a pɑkhʉ pyə́ lə pɑ məjyə e ko nthʉm mu' guŋ, mu' mjwǐ, tso tsyə pɑ Marta lɑ e dyə.

³⁹Mu' fɑ mjwǐ bɔ, tso tsyə pɑ Maria lə cwə dzə cyəpɔ bɑwə ju' ghɔm tsyə.

⁴⁰Marta pa' e lə bɑwə jəzhəŋ nə mfa' dyə a sɔ' gɔm gɑ: Cyəpɔ ja a tə́ po'o bɑwə gə sɔmywə nə o gɑ fɑ a tak guŋ mfa' awɛ bəm do m̀ a lə? Ghɔm bi é gɑ é sɔ' ŋkwitə a.

⁴¹Cyəpɔ ghɔm bi e gɑ: Marta, Marta, o bɑwə jwiŋ, bɑ dzɔp nɑ o nə tsə yɔ̌m.

⁴²Tə a pɑwə shəŋ da' ta' ywə yɑmu'. Maria bɑ e cwɔ' yə nthʉɔ, bi a pɑ́ pú lɑ́ kwi bi e.