Read Ghomala New Testament LUKASI 11 Bible Online

LUKASI 11 - Ghomala New Testament bible

LUKASI 11

¹Yeso lə pɑ mu' tyɛ'dzʉ nə mu' tsʉ' bɑ́wə shwyɛ'nyə Si. E lə miŋ nə cwyɛ'nyə Si, mu' mukhʉ e ghɔm bi e gɑ: Cyəpɔ zhi'tə wɔk nə cwyɛ'nyə Si pa' Yohane lə zhi'tə bi pɑkhʉ pyə a.

²E ghɔm bi pu gɑ: Po pɑ shwyɛ'nyə Si po ghɔm gɑ: Ta, ghə̌ tso tsʉ̌ pɑ dɔlɔ̌. Ghə̌ Nəfo tsǔ sɔ̌'.

³Pɑ hɑ yɔk dəŋ ywətsʉ bǎ nə ya tyɛ'dzʉ lə́

⁴Lɑ mhɔ mɔk nə shwyɛ' wɔk nə pa' pyə dɑ mhɔ pyəshɑ pɔ shwyɛ' wap. Kɑ piŋ gɑ mləŋtə ko nə pyə.

⁵Yeso lə kwi' gɔm bi pu gɑ: A bi a pɑ mu' mo nə po ghə so e, biŋ gɔ jɔ e téŋ mtsʉ̌' gɔm bi e gɑ: So a, cwyɛ' a msɛ mta' tá

⁶nə pa' mu' so a fɑ məjyə la' gə ywə yə gɑ gɔ hɑ bi e a.

⁷So e bɔ piŋ nthiŋnyə dyə gɔm gɑ kɑ paknyə a, gɑ é da' jo' dyə, pyə a po pɑ é da' nuŋ kodyə; bi a pɑ́ ŋ də lusi nə hɑ msɛ bu pɑ̀.

⁸Gɑ̌ siŋ wɔ gɑ; e pɑ tə lusi hɑ msɛ bi e pa' e so e a, bɑ e gɔ lusi pa' e nə baknyə e a, hɑ guŋ ywə awɛ bi e.

⁹Tə gɑ ghɔm bi po gɑ: Po ló pu gɔ hɑ bí po; po cə́ŋ, po gɔ yɔ; po kǒ'tə jyədyə̌, pu gɔ hé bi po.

¹⁰Nə pa' mo yə e lo a pu hɑ bi e; mo yə e cəŋ a, bɑ e gɔ yɔ, mo yə e ko'tə jyə dyə a, pu gɔ he dyə bi e.

¹¹Yǎ tá mú cəcɑ̌ po bi a pɑ́ mú é lo bapgu bi e, e hɑ nɔk bi é nə tsʉ' bapgu?

¹²Kɑ bi a pɑ́ mú lo pəm gɔp bi e, e hɑ gɔmsí bi e?

¹³A bi a dəŋ pa' a bɑ pǒ pɔk a, po zhyə nə hɑ tsə pɑpuŋ bi pó pɔ́, bɑ mcʉ̌m sʉ'ʉ nə Ta yə e kɛbəŋ a, pa' e gɔ hɑ Zhwenyə Dɔlɔ̌ bi pɔ pyə wap lo a?

¹⁴Yeso lə zhə̌ŋ mu' zhwenyə cwəpuŋ yə a dɑ mo gə təghɔm a. Zhwenyə bɔ lə təm nə təghɔm, təghɔm ghɔmnwə. A sya pɔmnəŋ.

¹⁵Tə́ shɑ pɔ cəcɑ̌ pu ghɔm gɑ: E shyə m nə Beɛlzəbul, tadyə̌ mzhwenyə cwəpuŋ tə́ jəŋ zhwenyə cwəpuŋ.

¹⁶Shɑ pɔ pɑ shəŋ nə ləŋtə e gɔm bi e gɑ e la'tə wap mtiŋ myə a fɑ́ m kɛbəŋ a.

¹⁷Yeso zhyə pa' wap lə́ bɑwə ŋkwɛ a gɔm bi pu gɑ: Gúŋ Nəfo tsyə a ghaptə a bɑ guŋ bipǐ; mlǎ' simnyə, bvʉtə pɑ ta' do ta' dò, shɑ́ də̌m shɑ́.

¹⁸A pɑ gɑ ba sata ghaptə nɑ é nə gə mghəŋ bʉə nthʉm shù, bɑ nəfo e gɔ piŋ pɑwə m gɑ ka? Nə pa' po bɑwə gɔm gɑ́ gɑ̌ dɑ pɑ Beɛlzəbul tə nə jəŋ mzhwenyə cwəpuŋ.

¹⁹A pɑ gɑ́ gɑ̌ dɑ Beɛlzəbul tə nə jəŋ mzhwenyə cwəpuŋ bɑ pɑkhʉ pɔ́ dɑ yap kɑ tə nə jəŋ wáp? Pɑkhʉ pɔ gɔ pɑ m ya'shɛ yɔ́.

²⁰Tə a bi a pɑ gɑ́ gɑ̌ dɑ nthəpǔ Si tə nə jəŋ mzhwenyə cwəpuŋ bɑ Nəfo Si sɔ' tə ŋkho nə po.

²¹Mbɛ ghə gʉ̌' pu a tsə shu, bɑ byap la' tsyə́ bɑ bi a pɑ sɔmywə lɑ ghə tsə tsyə́.

²²Tə mu' mbɛ yə e ghə gʉ' shyə́ é a la sɔ̌' gəm e, bɑ e gɔ kwi tsə shu tsyə e kɑ nə byap nɑ é a ghaptə tsə tsyə́.

²³Mo yə pyə é tə́ bɑ a pɑ bɑ gɛ bo a, Mo yə pyə̌ tə bəmtə shu'tə a pɑ sa'tə.

²⁴Cwə yə zhwenyə cwəpuŋ nthəm nə mo a, bɑ́ ŋkha mghakgo shəŋ tsʉ' hwitə a, bɑ́ tə yɔ tsʉ' hwitə gɔm gɑ: Gɑ̌ gɔ pɑnyə dyə m̀ tsʉ' yə ŋ də təm nə a.

²⁵E nə sɔ' jɔ dyə bɔ bɑ pu khʉm, nyəŋ m səm nə.

²⁶E ghɔ dɑ shɑ mzhwenyə cwəpuŋ sɔmbʉə bɑ wap pɔk shyə e; wap pu a pu sɔ' ŋkho nə mo bɔ bɑ shwə nə e, yə nə pɑ mo bɔ piŋ bɔk shyə pa' e lə ji bɑ́ a.

²⁷Pa' Yeso lə pɑ gɔm po'o a, mu' mjwǐ tiŋnyə cəcɑ̌ pɔmnəŋ gɔm bi e gɑ: Buŋtsě mjwǐ yə e lə kwa o vam é biŋ núŋ o a.

²⁸Tə Yeso ghɔm gɑ: Mpuŋtsé bɑ pɔ pyə wap ju' ghɔm Si bɑ giŋ pa' a gɔm a.

²⁹Vəŋ pɔ lə cu'tə bəŋ Yeso, e to' nə ghɔm bi pu gɑ: Yəŋ gɑ wɔ̌dzʉ pɔ, bɑ́ wɔdzʉ́ pɔ cwəpuŋ. Wap wə həŋtə́ msya myə a gɔ pɑ mtiŋ fɑ m bi Si a. Bi a pɑ wap lə piŋ jɔ shɑ msya tə ně da' myə́ Yona.

³⁰Nə pa' dəŋdəŋ pa' Yona lə pɑ̌ mtiŋ bi pɑ Ninivə a, dəŋdəŋ po'o, Mú mo gɔ sɔ' pɑ mtiŋ bi wɔ̌dzʉ yəŋ gɑ.

³¹A gɔ sɔ' pɑ tyɛ'dzʉ nə fyɛ' shɛ, Mɑfo guŋ Mto dzʉ lusi pu a pɔ nə yəŋ wɔdzʉ, é nyəŋ shɛ thə pu, nə pa' e lə fɑ tə dhə dzʉ́ sɔ' ju' zhyənwə Salomoŋ. Tə po zhyə gɑ mo yə e tsɔ'ɔ a bɑ e cyə Salomoŋ.

³²A gɔ sɔ' pɑ tyɛ'dzʉ nə fyɛ', pɑ Ninivə lusi pu a pɔ nə yəŋ wɔdzʉ, pɑ Ninivə pɑ nyəŋ shɛ thə pu nə pa' a bɑ wap lě ju' ghɔm Yona bʉɔtʉm tsap a. Tə po zhyə gɑ́ mo yə ě tsɔ'ɔ a bɑ e cyə Yona.

³³Sɔmmo tə sumɔk nə lambu nyəŋ cəŋ pɑ́, pu nthʉ́ dəm kwɔ' lam po'o gɑ pɔ pyə wap dyə a yɔ tsʉ'.

³⁴Lambu nɑ mo bɑ bɛtsə o. Bɛtsə o pɑ nthʉ̀ɔ bɑ guŋ nɑ́ o awɛ gɔ pɑ nthʉ́m dɔlɔ̌; tə bɛtsə o pɑ jɛ́, bɑ guŋ nɑ o awɛ gɔ pɑ nthʉ́m jʉ́m.

³⁵Pɑ́ dé bi a ŋkha' yə a bɑ nə o a ka pʉɔ shʉ' jʉ́m a.

³⁶A pɑ́ gɑ guŋ nɑ o awɛ wə bɑ nthʉm ŋkha' awɛ, tə muywə jʉm bɑ nə e, bɑ e bɑ nthʉm ŋkha' pa' lam dɑ ŋkha' e nə ŋkhyɛ' o a.

³⁷Yeso lə pɑ gɔm po'o mu' yə Farisai ke e gɑ pu e tsʉ ywə dyə e. E lə ko dyə e shwə́ tɑpe.

³⁸Yə farisai e bɔ yɔ pa' Yeso dzʉywə tə sɔk bu a, nwə cyə e.

³⁹Cyəpɔ ghɔm bi e gɑ: Wɔ pɑ Farisai, pǒ sɔk yɔ kɛ pú nthǔ' pɑ jʉmdzʉ, tə bɑ m nthʉm o bɑ cǔŋ pu a yapnwə lo nə po.

⁴⁰Wɔ mfʉ́mnyə́ pɔ! Tə́ mo yə́ e lə ghə jʉm dzʉ̌ a, nə lə́ gə jʉm nthʉ̌m o a?

⁴¹Po hɑ pɑ ywə yə ǎ m nthʉ̌m tʉm po a nə ŋkwitə mpəŋ, po'o gɑ guŋ ywə awɛ pɑ dɔlɔ̌ bi po.

⁴²Tə́ ghəghʉɔ bɑ bi po, wɔ pɑ Farisai. Po gaptə tsə́ tsyə po dzʉ' a nə gə jyə ghǎm bɑ hɑ ta' jyə bi Si: Po gə po'o biŋ dʉɔnyə nə pɑ dəŋdəŋ ba nə kuŋ Si. Yəŋ gɑ bɑ dzə ywə yə́ po kɑ́ bɑ gɔ to' m nə tə́ ghə pyə shɑ tsə a.

⁴³Ghəghʉɔ yɔ, wɔ pɑ Farisai wɔ pyə po ŋkhuŋ dəŋdzə ŋkwɔ' dyə Sinagogə pu a nə ca'tə pɔ dəm sim a.

⁴⁴Ghəghʉɔ yɔ, wɔ pyə pǒ bɑ pa' mthəsì myə pu giŋ dəm o tə zhyə, la' pu pɑ jɔ a.

⁴⁵Mu' tadyə́ jyə mco' ghɔm bi Yeso gɑ: Ta o gɔm pǎ' bɑwə jəmtə ba wɔk yɔk!

⁴⁶Yeso pa' bi e gɑ: Ghəghʉɔ bɑ bi po yɔ, wɔ mtadyə nə zhyə mco'. Po nthʉ́ ŋkhəm dzɑtsɑ thə pɔmnəŋ tə bi a pɑ po lə co' nthə pu yɔ nə pɑ́.

⁴⁷Ghəghʉɔ yɔ, nə pa' po bəm mthəsì mghɔm ghɔ̀m Si pyə mta pɔ lə zhwə wap a.

⁴⁸Po biŋ ywə yə mta pɔ lə ghə a nə pa' wap le jwə mghɔm ghɔ̀m Si, po nəŋ bɑwə bəm mthəsì map.

⁴⁹A pɑ po'o bɑ Si yə e bɑ e zhyə awɛ a ghɔm gɑ: Gɑ gɔ sɔ' təm mghɛ ghɔm ghɔ̀m Si ba mghɛ nthəm Si bi pu, wap zhwə shɑ́, biŋ dɑ pyə shɑ́ jɔgo'.

⁵⁰Po'o gɑ Si sɔ' həŋtə nwə bi pɔ nə́ yəŋ wɔdzǔ nə mcyə guŋ mghɛ ghɔm ghɔ̀m Si awɛ myə pu lə pfyə tə fɑ nə́ nyaptə dzʉ̌ a.

⁵¹Tə fɑ́ nə́ mcyə Abɛ gɔ ŋkhəm nə́ mcyə Sakaria yə pu lə zhwə e bəŋ tsʉ' nə to ywə nə gamtə Si Dyə Si a, pɔ nə yəŋ gɑ wɔ́dzʉ́ gɔ sɔ' ghɔmnwə nə́.

⁵²Ghəghʉɔ yɔ, wɔ mtadyə nə mcò'. Po bɑ po pe ki nə shwɔ' jyədyə̌ zhyənwə: po lə nəŋ ŋkho dyə po lə nəŋ biŋ gɑ pyə shɑ pɔ kodyə pɑ́.

⁵³Yeso lə lǔ tsʉ'u bɔ, pɑ zhyə mcò' ba pɑ Farisai pɑ shú'mshwə nə é, bɑ həŋtə e nthinthi mnwə nə dəŋtə é

⁵⁴Po'o tə́ nə ghəm é nə nwə yə e ghɔm a.