Read Ghomala New Testament LUKASI 12 Bible Online

LUKASI 12 - Ghomala New Testament bible

LUKASI 12

¹A lə nə pɑ̌ po'o bɑ pɔmnəŋ cu'tə pɔ sha' shǎ', mpfɑ mpfɑ̌ tə bɑwə nthənyə. Yeso pɑ gɔm bi pɑkhʉ pyə gɑ: Po pɔmtə ywə kwɔ'msɛ̌ pɑ Farisai, yə a bɑ nə tsɛ bu jʉm pʉə a.

²Bǎ kɑ́lə́ yə pu tʉm a, pu gɔ sɔ' la'tə; bǎ kɑ́lə́ yə a mcàm a, pu gɔ sɔ' zhyə́.

³A po'o tə guŋ ywə yə po ghɔm m nthʉm jʉ́m a pu ghɔ sɔ' yu' dɔdzʉ̌; ywə yə po camtə təŋ mo m dyə̌ a, pu ghɔ sɔ' tiŋnyə do pa' tə́ ghɔm.

⁴Gɑ̌ wə gɔm bi wɔ mso pɑ̌ gɑ: Ka po pwɔk pɔ pyə bi a pɑ wap zhwə́ bap nɑ́ tə bi a pɑ wap lə piŋ gə sɔmywə a.

⁵Gɑ gɔ la'tə wɔ mo yə bi a pɑ po pwɔk e a: Po pwɔk mo yə bi a pɑ e zhwə mo biŋ nyəŋ e nthʉm tsʉ' go' a. Gɑ siŋ wɔ gɑ a mo yə bi a pɑ po pwɔk é a.

⁶Pu tə́ fiŋ mcici pɑtɔ nə tsə bɛ pʉ̌ə a? Tə́ Si lə nəŋ bɑ dʉɔnyə sɔm nə pú.

⁷Tə́ ŋkhəm pɑ nə nəŋ thə́ yɔ, Si bɑ e sɛ wɛ. Ka po pwɔk. Pǒ bɑ pǒ cyə́ mcící.

⁸Gɑ siŋ wɔ gɑ bǎ ya mo lə yə e piŋ dzə pɔmnəŋ gɑ pyə e nə bɑ a, bɑ Mú mo gɔ piŋ dzə pɑ aŋgəle Si gɑ pu e bəm bɑ.

⁹Tə mo yə e kəŋnyə a dzə pɔmnəŋ a bɑ pu gɔ sɔ' kəŋnyə e dzə pɑ aŋgəle Si.

¹⁰Bɑ̌ wɑlə́ yə e ghɔmnwə cwəpuŋ nə Mú mo a, bɑ pu gɔ sɔ' nə cwyɛ' e; tə mo yə e cap Zhwenyə Dɔlɔ̌ a bɑ pu tə gɔ sɔ' nə cwyɛ' é pɑ.

¹¹Pu pɑ dɑ wɔ gɔ m dzə̌ pɑ ya' shɛ Sinagogə ka lam tsɔ́ sɔ́ nə ywə yə pǒ gɔ ko tsʉ'u ghɔm a.

¹²Nə pa' Zhwenyə Dɔlɔ̌ gɔ kó tsʉ'u pɑ́ cwə o bɔ siŋ wɔ́ ywə yə po gɔ ghɔm a.

¹³Mu' mo lə tiŋnyə cəcɑ̌ pɔmnəŋ gɔm bi Yeso gɑ: Ta: Ghɔm bi fɑ a gɑ e ghaptə tsə mcʉ' mɔk pyə e hɑ mə̌.

¹⁴Yeso ghɔm bi e gɑ: Wɑ bɑ e lɑ á nə gə gɛ ya' shɛ yə é gɔ ghaptə tsə mcʉ' mɔ cəcɑ̌ po a?

¹⁵E lə piŋ gɔm bi pu gɑ: Po pɔm ghi'nyə, nə pa' vɔk mo tə bɑ m nə dəŋ tsə tsyə́ pɑ, kɑ e la' ji pɑ gɑ kɑ́ lə.

¹⁶E lə ghɔ́m ghɔm tə tutə bi pu gɑ: Mu' gɛ ywə lə ghə pe é; potsə puŋ nthʉm o te' ó.

¹⁷E sɛ nthʉ́m tʉm e gɑ: Gɑ̌ gɔ ghə gɑ́ kɑ? Nə pa' ŋ kha ghə tsʉ' yə gɑ̌ gɔ nyəŋ tsə tsɑ̌ nə a.

¹⁸E lə piŋ gɔm gɑ: Ywə yə gɑ gɔ ghə a, gɑ̌ gɔ sa'tə mthɛ mə̌, piŋ pəm shɑ myə gwyə́gwyə́, nyəŋ guŋ msɛtʉɔ ba guŋ tsə tsɑ̌ nthʉm o awɛ.

¹⁹Piŋ ghɔm bi tʉm tsǎ gɑ: A yɑ bɑ o ghə tsə tə a yɔm, tsə tsyə a gɔ cwə nə mgu' jɔmyɔ̌m a. Hwitə nɑ o, bɑ dzʉ́ pɑ ywə́, biŋ nwə́ pɑ ywə́, bɑ ŋwɛ́nyə́.

²⁰Tə́ Si ghɔm bi é gɑ: Fʉmnyə́ mo! Pɑ kwa' mtsʉ' tyɛ'ɔ́, pu gɔ kwi vɔk o, tsə tsyə o dwɔ' a, a cʉ' tsyə wɑ?

²¹Yɔ ywə yə a nthəm nə mo yə e gə tsə́, a pɑ́ pɑ tsyə, la' a pɑ́ bɑ é zhi nə Si a yəŋ.

²²Yeso piŋ gɔm bi pɑkhʉ pyə gɑ: Á ywə yə á gə tə́ gɔm bi po gɑ́: Ka lam tsɔ pɑ sɔ nə vɔk yɔ nə ywə yə po gɔ ti tə tsʉ a, ba nə́ nɑ tsɔ nə́ dzə́ yə po gɔ kwa a.

²³Nə pa' vɔk bɑ ǎ tʉɔ shyə ywətsʉ, ba nɑ mo piŋ nthʉɔ shyə dzə́.

²⁴Po yɔ mŋwə́ŋwə tə jɔ: Wap tə dzə ywə pɑ, wap lə piŋ bɑ dɑ ywə nyəŋ dyə; bɑ wap ka nəŋ gə́ mthɛ kɑ ŋkhiŋ lə; tə Si ŋkhim wap, tə mcʉ́m sʉ'ʉ nə́ wɔ pyə́ á bɑ pó cyə́ pǒ msə́ŋ a?

²⁵Tə ba tə po'o bi a ya mo nə po sɔlam nə vɔk po'o tə ŋkwi' muywə nə vɔk e.

²⁶A bi a pɑ gɑ́ po ka ghə gʉ' nə gə sɔm muywə bɑ po biŋ sɔlam dəŋ po'o nə kʉ̌.

²⁷Po yɔ mtutuŋ mghe. Wap tə si' dap a, wap lə nəŋ bɑ ba' dzə. Tə gɑ siŋ wɔ gɑ fo Salomoŋ nthʉm guŋ nəfo tsyə́ awɛ, la tə kwa buŋ dzə́ pa' sɔm a.

²⁸A bi a Si pɑ ŋkwa dzə́ nə mghe po'o, mghe myə pu gɔ ti to mɔk a, bɑ a gɔ pɑ m gɑ́ kɑ nə pǒ? Wɔ pyə piŋnthʉm yɔ bɑ a kɔk a?

²⁹Tə wɔ, ka po pɑ shəŋ pɑ ywə yə po gɔ tsʉ a, ba yə po gɔ nwə́ a! Ka po pɑ dzɔp nə tsɔ.

³⁰Pɑ tə́ pɑ́ pɑ Yudea shəŋ yap tə pwa. Tə Tá yɔ bɑ ě zhyə gɑ tsə bo wə jak wɔ.

³¹Po ləŋdzə shəŋ Nəfo tsyə́, guŋ tsyə shɑ awɛ ne sɔ' ŋkwi' nə́.

³²Wə̀ mú kadzə, ka lam tsǔ sɔ́ nə pa' Tá yɔ́ yɔ gɑ́ ǎ puŋ nə hɑ Nəfo bi po.

³³Po fiŋ ywə yə po ghə a, hɑ nə́ nə ŋkwitə mpəŋ. Po ghə pétə yə ywə tə mi nthʉm o a pɑ, po ghə fʉ' yə a tə mi a pɑ́ thə́ kɛbəŋ; tsʉ' yə mcǔŋ tə̌ nə́ a pɑ, msɔkgwɔ' lə pɑ dzʉ́ a.

³⁴Nə pa' tsʉ' yə fʉ' o nə á, a tsʉ̌ yə tʉm tsʉ̌ bɑ nə a.

³⁵Po zhwé tap vʉ' po, a mɔ̌k nəŋ bɑ́ pɑ nə mlam mɔ.

³⁶Po cwə pa' pɔ pyə wap bɑwə byap Ta yap e fɑ́ la'nwə a, wap he jyədyə̌ bi e cwə yə e sɔ' ŋkho'tə jyədyə̌ a.

³⁷Mpuŋtse bɑ mghɛ fa' pyə Ta yap gɔ nə sɔ' tə wap bɑwə di a. Gɑ̌ siŋ wɔ kwa' nyənyɔ gɑ e gɔ kwa dzə́ fà', yap wap tɑpe, khim wap.

³⁸Kɑ e la' sɔ' pɑ téŋ mtsʉ' kɑ ŋkwɔ'dzʉ lɑ; nə sɔ' tə wap di, bɑ wap bɑ mpuŋtse!

³⁹Po zhyə pɑpuŋ gɑ gɛ dyə̌ zhyə cwə yə shuŋ gɔ sɔ' a, bɑ e gɔ pyap, e lə piŋ gɑ shuŋ tu e pɑ́.

⁴⁰Ba wɔ yɔ po nə cwə̌ bɑ byap nə pa' Mu mo gɔ sɔ' sɔ' m nə cwə yə po ka zhyə a.

⁴¹Pɛtrɔ ghɔm bi é gɑ: Cyəpɔ, o gɔm ghɔm tə tutə tsɔ pɑ bi pyə kɑ m bi guŋ pɔ awɛ?

⁴²Cyəpɔ ghɔm gɑ: Kwa' ya ŋkhonthɛ nyənyɔ biŋ bɑ gɛ fʉ̌ yə Ta gɔ yap e dzə nə pɔ pyə gɑ e pɑ gap ywətsʉ bi pu nə cwə yə a puŋ a?

⁴³Buŋtsě gɛfa' bɔ yə ta gɔ nə sɔ' e pɑwə fá'fà' a.

⁴⁴Gɑ siŋ wɔ nyənyɔ gɑ é gɔ yap é dzə̀ nə guŋ tsə tsyə́ awɛ.

⁴⁵Tə́ gɛfa' bɔ ghɔm nthʉ́m tʉm e gɑ: Ta á gɔ nə sɔ' cwə, ntho' nə cwɔ mso fa' pyə́ pyə pɑ bɛ ba pyə pɑ jwǐ, bɑ dzʉ́, bɑ nwə́, bɑ bam,

⁴⁶bɑ tap e gɔ la' sɔ' tyɛ'dzʉ yə e tə wə byap e a pɑ, cwə yə e ka zhyə a, zhəŋ e, ghə nə e pa' e gə nə́ pɑ tsɛbu jʉm pʉə́ a.

⁴⁷Gɛfa' yɑ yə a bɑ e zhyə ywə yə tap e shəŋ a, la' e nəŋ nyaptə sɔmywə, la' e ghə pá' tap e shəŋ a, mgwa mshɔm myə́ gɔ sɔ' yɔm te' o.

⁴⁸Tə mo yə e ka zhyə a, la' e nəŋ gə a, pu tə́ gɔ sɔ' ghyɛ' cwɔ e pɑ. Pu gɔ sɔ' kwi a yɔm bi mo yə pu le hɑ bi e a yɔm a, həŋtə a yɔm bi mo yə pu le dwɔ' bi e tə a yɔm a!

⁴⁹Gɑ̌ sɔ m nə́ ma' mɔk dəmcǎ'; biŋ bɑ si sʉ́m bi a a ka' pé'e bɑ pu e da' su mɔk bɔ?

⁵⁰Mu' kwishyə sí yə gɑ̌ gɔ kwi ya a, ŋ biŋ bɑwə do'nyə gɑ a pəmtə.

⁵¹Po ŋkwɛ gɑ ŋ də́ sɔ' hɑ hwitə dəmca' a? Gɑ̌ ghɔm bi po gɑ gɛ̌, ŋ də́ dɑ ŋkhyɛ'nyə sɔ̌'.

⁵²Nə pá' tə fɑ cwəlɔ, dyə yə pɔ pɑtɔ nə a, wap gɔ ghap ghəŋ pʉə́: Pɔ tá pɑ bɔ pɔ pʉə, pɔ pʉə pɑ bɔ pɔ tá;

⁵³tá pɑ bɔ sə̀m, səm pɑ bɔ ta, má pɑ bɔ go, gó pɑ bɔ má. Shyə́ pɑ bɔ jwi mu, jwi mu pɑ bɔ shyə́ yap.

⁵⁴E lə pǐŋ gɔm bi lǎ' gɑ: Pǒ jɔ mlwa yaptə mghəŋ Binam po wuŋ gɔm gɑ bə̌ŋ wə sɔ̌', a sɔ'.

⁵⁵Jɔ fəfa fɑ mto dzʉ po ghɔm gɑ nam gɔ tyə́, nam nə́ŋ nthyə́.

⁵⁶Pɑ tsɛ bǔ, po jyə́ nə zhyə́ ywə yə mtiŋ sicǎ' ba kɛbəŋ da'tə a; kɑ́ gə po lə zhyə mtiŋ cwə dzʉ yəŋ gɑ̌?

⁵⁷Nwə kɑ la' po nəŋ jyə ywə yə a bɑ dəŋdəŋ a?

⁵⁸Po gɛ bo o pɑ gɔ m dzə ja' shɛ́, o ko məjyə gə́ shɛ mi; bwɔk gɑ e kɑ lɑ o gɔ dzə ja' shɛ, ja' shɛ́ hɑ o bi byapcɛ̌, byapcɛ̌ nyəŋ o cɛ́.

⁵⁹Gɑ̌ siŋ o gɑ o gɔ la' nə təm cɛ́ bɑ o tuŋ ju tə nthuŋ bɑ mcwɔp myə́.